1234567

ديوان الشاعر / طارق المحياس

ديوان قصائد الشاعر - ديوان قصائد الشاعره ارسال إلى Twitter ارسال إلى facebook
  1. *مزون شمر*
    04-07-2010, 01:34 AM

    مابي أرجع

    ديوان الشاعر / طارق المحياس


    كل شي بعدك تغير حتى انا ما عدت انا
    الزمن غير طباعي ماني ذاك الاولي

    علمتني الدنيا اقسى بعد ما ذقت العنا
    واكتشفت انه المحبه غيم فترة وينجلي

    ليه راجع ودك انه نعيد ايام الهنا
    طيب اذكر لي سبب واحد يقول انه انته لي

    غبت عني باختيارك مات بيدك حبنا
    والا يعني جاي تقنعني انك انته اشتقت لي

    روح يابن الناس في حالك وانا ببقى هنا
    ودي احيا باقي عمري ويا نفسي مختلي

    لا حبايب لا شجون ولا محبة ولا ضنا
    يكفي اللي صار فيني مابي ارجع وابتلي
  2. *مزون شمر*
    04-07-2010, 01:36 AM

    بعد فرقاك

    ديوان الشاعر / طارق المحياس


    تظن إني بعد فرقاك.. باتكلم أنا عنك ؟
    باقول إنتا اللي فيك وفيك وباكشف كل اسرارك

    وانا اللي يوم حبيتك تعلمت الوفا منك
    تعلمت أقبل اعذارك.. وانا مدري وش اعذارك

    حبيبي ماهو من طبعي أخيب يوم في ظنك
    صحيح إنه افترقنا بس.. أبد.. ماقل مقدارك

    أنا حبيتك بإحساس وأغليتك ولكنك
    تركت اللي ترك هالناس وكل الكون واختارك

    أنا لا يمكن إني ف يوم أحكي كلمه بس عنك
    أنا أصلا بعد فرقاك.. دوم اسأل عن اخبارك

    عليك الله تشك فيني..! وانا اللي كنت اظن إنك
    مأمني على نفسك.. على ماضيك.. واسرارك..!..؟
  3. *مزون شمر*
    04-07-2010, 01:38 AM

    على فكره

    ديوان الشاعر / طارق المحياس


    كثر ماتقدر اتمادى وقول اللي تبي وبساع
    انا واثق ولايهمني اذا تحفر لي اي حفره

    ترا من يوصل القمه يحسده من سكن بالقاع
    وهالشي من قبل معروف يعني بس على فكره

    مثل مافي تجاره وخير بعد في للطرق قطاع
    مدام القافله تمشي نباح الكلب ماضره

    ومثل مافي ضعاف نفوس مثلك يحسدون شجاع
    تأكد والله ماحركت فالشجعان لو شعره

    ترانا تربية زايد لنا عده وعتاد وساع
    فوقت الشده مانرحم ياويل اللي بدا غدره

    وتراها المسأله ماهي بقضية جوع او اشباع
    تفضل عندنا فالبيت وشوف شكبرها السفره

    نحن لو تدري نشبع بطن فاضي لو انه جاع
    ونفهم مقصد المحتاج قبل لايقول من نظره

    انا اكتب احاسيسي شعر لاتظن انا خداع
    عرفت اني انا شاعر كذا والله بالفطره

    انا ما اصطنع شعري ولا اصارع عليه اصراع
    لقيت الشي ذا فيني وقلبي حبه من صغره

    اخذ من وقتي كل وقتي وبين الناس شعري شاع
    وذني قلته باحساسي اخذ من صوتي كل نبره

    انا أداوي بأشعاري هموم الناس والاوجاع
    ولابغي من ورا شعري مقابل او ابي شهره

    المقابل خله لك انت وانا اخلي الشعر فواع
    لانها نظرتي بعيده ولا اظن انت لك نظره

    انا اصدق دوم مع نفسي وبالتالي الشعر ينصاع
    تحت امري تحت شوري على كيفي انا اسيره

    بغيت امدح ترا بمدح بغيت الذم مرحبا الساع
    وهو شعري وانا كيفي مثل ما ابغيه بعتبره

    انا شعري مثل نجم تلالا بالسما لماع
    ولي مثلك يشوفه فوق يطلع وقتها عذره

    ولا اظن له عذر اصلا لانه بس يقول امباع
    وانا ماسمعه والله كفاني خيره وشره

    انا الاشعار تخضع لي مذله وبالغصب اخضاع
    ثقه كيفك تسميها ولا سمها بطره

    انا شعري ترا يخشاه ناس يهزمون اضباع
    وشعرك انت مثلك يوم تشك الخيط بالابره

    تحاول تكتبه يرفض يعاند يرتبك يلتاع
    وانا اتحداك لو تقدر تقوله بس على عشره

    ياخويه لو تقول انته شبر صدقني شعري باع
    وانا كم مره اسأل عنك يقولون والله والعثره

    تقيمني ! ومن حضرتك اسير الشوق او الملتاع
    لاوالله تخسي انت ومن فوقك بعد عشره

    او انك فاكر انه انت على غفله مثل فزاع
    لاوالله ولاتسوى شعر فزاع او ظفره

    ياخويه هذا شاعر فارس مثقف وصيته ذاع
    تصفق له جميع الناس من الروعه اللي في شعره

    تحت امره هبوط هبوط وحالا لو يقول اقلاع
    والله من كثر حبه حفظنا كل بو شعره

    وهو بحر الشعر اصلا وانا رافع في بحره شراع
    كلام الحق مايزعل ولايذبل ابد زهره

    يروض كل خيول الارض وكل خيلن لأمره طاع
    وابيك تشوف شو يسوي فسباق الخيل والقدره

    اذا انك ناوي تتفلسف تراها الفلسفة انواع
    واسهلها معك صعبه وليه بس تدعي القدره

    لاتتفلسف بكلماتك ترا مالك ابد اي داع
    ترا سهله اقلك قم اطلع لوسمحت بره

    ولكنا تربينا وفينا المستحى ماطاع
    تعلمنا مع الايام نعطي كل احد قدره

    ومب كل من كتب له بيت ويمكن هو شرا او باع
    يسمي نفسه الشاعر ويستطرب على ذكره

    ترا الشاعر عباره عن مشاعر داخل الاضلاع
    واذا طلعت من الخاطر بتوصل كوكب الزهره

    انا وش لي ارد اصلا" على واحد لبسله قناع
    دفعه النقص يتكلم وهو ميت من الحره

    بقولك بس شي واحد ترا قالوه بالاجماع
    ومن قاله ترا قاله قناعه تجربه وخبره

    ترا من يوصل القمه يحسده من سكن بالقاع
    وهالشي من قبل معروف يعني بس على فكره
  4. *مزون شمر*
    04-07-2010, 01:39 AM

    ياما قبلك

    ديوان الشاعر / طارق المحياس


    ياما قبلك في الهوى ناح وفي ليله سهر
    مامعه إلا خياله وذكرياته والصور

    وفي النهايه ما توقع... خانه وقته والقدر
    كل شي جايز حبيبي انصحك إمشي بحذر
    ...
    الهوى بحره غزير والبحر ماله أمان
    لو دخلته ع السلامة منهو يعطيك الضمان ؟

    بين جزره وبين مده الصبر يوصل لحده
    كل شي جايز حبيبي انصحك إمشي بحذر
    ...
    الهوى مثل الغيوم تمشي بكيف القدر
    وكل غيمه ماهو شرط يكون داخلها مطر

    وانتا عاشق أو مفارق تبقى بين الدمع غارق
    وكل شي جايز حبيبي انصحك .. إمشي بحذر
  5. *مزون شمر*
    04-07-2010, 01:41 AM

    ليه

    ديوان الشاعر / طارق المحياس


    يقول لي ليه تكتم بصدرك الضنك
    فرج ترى الدنيا علينا ثقيله

    فرج ترى سيوف الدقايق بتطعنك
    محد يشيل همك ترى انته تشيله

    خايف من همومي وبعد اللقا عنك
    وخايف أبين لك أمور مستحيله

    الله لو تدري حبيبي شو بقى منك
    حلو السوالف وذكرياتي الجميله

    من بعد ما خليتني صرت مدمنك
    والدمع من عيني تزايد هميله

    أواسي نفسي يمكن أنساك وأضعنك
    ألاقي قلبي يقول مالي بديله

    لاتظن قلبي في زواياه يركنك
    والله حبك فوق راسي أشيله

    بس انته وحدك في وسط روحي أسكنك
    ارجع تراها الروح بعدك عليله

    تدري ان قلبي صار بيتك وموطنك
    تدري انه مالي اس احد اشتكي له

    هذا جزات اللي على قلبي أمنك
    ترحل وتبعد انته أهله ودليله

    بدفن في قلبي ذكرياتك وبدفنك
    ياللي عيونك ناعسات وكحيله

    دونتك بشعري واحساسي دونك
    جمعت أحاسيسي وهذي الحصيله

    إن كنت تقوى البعد في الروح مسكنك
    وش ذنب خل اختلا عن خليله

    وان جيتني والله بالروح لحضنك
    وأقول هذا الخل ما فيه حيله
  6. *مزون شمر*
    04-07-2010, 01:44 AM

    القيامة

    ديوان الشاعر / طارق المحياس



    صرت أحس إن القيامة أقرب من ارموش عيني
    وصرت أحس انه بقى لي بدنيتي كم من شهر

    ويوم أفكر ياترى شي اللي أخذته من سنيني
    أكتشف وبكل أسف.. خسران انا بالمختصر

    وين ذولاك اللي في عمري حسافه وانا ويني
    ليش انا للحين ضامي وغيري يغرف مل البحر

    ليش انا ماني موفق ؟ ليش هم الدنيا فيني ؟
    أبتسم للناس دايم وانا ميت مل القهر

    ليش صار ابسط طموحي إني بس أرد ديني
    ليش ما فكر بنفسي حالي من حال البشر

    إيه.. والدنيا متاع.. وضحكتين ودمعتيني
    واللي باقي. ماهو كثر اللي مضى من هالعمر

    لو وقف مستقبلي ياصاحبي بينك وبيني
    والله لاختارك ولو مستقبلي مجد وفخر

    كيف مختارك مدامك صرت ثالث والديني
    كيف مختارك مدامك صرت لي لذة عمر

    يكفي إني قربك اعرف قيمتي واكبر بعيني
    يكفي إني قربك اشعر إني دايم منتصر

    هذا وانتا مو بايديني.. كيف لو كنت بإيديني .. ؟!
    بس على كل حال أقول الحمد لله والشكر

    ما أبي غير إني أ حشر واخذ أعمالي بيميني
    وما أبي غير الله ينجي قلبي من ضيق القبر

    وما أبي غير الله في وقت الصراط انه يعيني
    ومابي غير الله يفرج كلما ضاق الصدر

    صرت أحس إن القيامة اقرب من ارموش عيني
    وصرت أحس انه بقى لي بدنيتي كم من شهر

    ودام انا للحين عايش.. بس باتفاخر بديني
    وبإذن ربي راح ألبي وقت اذان الفجر

    ما بافوت أي ركعة.. ياعسى ربي يهديني
    العشاء والمغرب وحتى الظهر ويا العصر

    لين ماتطلع على وجهي سمات الصالحيني
    ودي بهيبة عمر.. ودي بتقوى بو بكر

    باقي اخر أمنيه.. ياربي بارفعلك إيديني
    من بعد ما موت.. تلهم إخواني الصبر

    ياعساي اموت في مسجد.. وانا من الساجديني
    والقى نفسي برحمتك.. بالجنة مع خير البشر
  7. *مزون شمر*
    04-07-2010, 01:46 AM

    هذا مكاني

    ديوان الشاعر / طارق المحياس


    بين هم وبين الم هذا مكاني
    الله خالقني عشان اني اعاني

    العمر يمشي وانا بلحالي واقف
    واعتقد اني بزمن ما هو بزماني

    حتى اهلي حتى اصحابي وربعي
    صرت احس اني معاهم شخص ثاني

    لازم اجامل عشان اكسب رضاهم
    وابتسم واضحك ولو ضحكي ثواني

    والمصيبة وين انا والضحك وينه
    بيني وبينه مسافات ومواني

    كيف اضحك وانا من سنتين ميت
    ما بكاني حد بس واحد بكاني

    ذاك ياللي يوم اشوفه كنت افرح
    لني ادري صدق من قلبه هواني

    اذكر انه كان وافي كان طيب
    ما شكيته لحد ولا عمره شكاني

    واذكر انه كان مذهل في جماله
    واذكر اني كنت في حبه اناني

    واذكر انه كان هو مالي عيوني
    من جميع الناس احساسه كفاني

    واذكر انه كان يحفظ كل قصيدي
    وكان هو بالذات يحب .. موت الاماني

    واذكر انه كان يامرني والبي
    يمشي امره لو طلب اصغر اخواني

    واذكر اني كنت احبه موت والله
    ما نسيته فيوم ولا عمره نساني

    لكن الاقدار كانت حيل اقوى
    ما مداه يعيش قربي وما مداني

    راح وخلا الدنيا واللي فيها كلهم
    وما كذب من قال انه العمر فاني

    راح وخلا فقلبي اجمل ذكرياته
    ضحكته..طيفه..خياله..وشي ثاني

    راح وخلا دمعي باين في عيوني
    منهو بعده يقول.. صح الله لساني

    من بعد ما راح منهو اشتكي له
    يا عذابي..يا مصابي..يا هواني

    كم سهرت الليل اكتب له قصايد
    ولعيونه كنت انا أألف أغاني

    من بعد ما راح يا ثقل القصايد
    ما بقى فيها بعد عينه معاني

    الله يا ربي عسى يغفر ذنوبه
    وأعظم ذنوبه هوايه مع حناني

    ادعي الله يا عسى الفردوس داره
    ويا عساه يكون في الجنات هاني

    العمر يمشي وانا بلحالي واقف
    واعتقد اني بزمن ماهو بزماني

    بين هم وبين الم هذا مكاني
    الله خالقني عشان اني اعاني
  8. *مزون شمر*
    04-07-2010, 01:47 AM

    ما يبونك

    ديوان الشاعر / طارق المحياس


    ما يبونك ارخصوك..بعد ما مني خذوك
    قلت لك احذر من اللي..في البداية ضحكوك

    وكنت تحسبني اغار..وكان بيديك القرار
    ليه ما خذت النصيحة..عاجبك يعني اللي صار

    لا تظن جاي اتفلسف..والا اتشمت عليك
    عيب انا ماني من اللي..انتظر فرصة واجيك

    قالوا انك صرت غارق..في بحر حزنك وهالك
    جيتك باحساس صادق..بس ابتطمن عليك

    تجربة كانت عساها..علمت طيشك دروس
    الحياة ماهي مظاهر..او برستيج وفلوس

    الحياة يالغالي فرصة..والذكي من يستغلها
    وكنت انا فرصة حياتك..لا تظن تلقى مثلها

    لا تظن اني المح..او اعيد الذكريات
    بس لجل ارجع لحبك..لا ترى اللي فات مات

    انا حالف ما ارد لك..لو يصير اللي يصير
    جيت عندك بس اقول..اصبر وربك كبير
  9. *مزون شمر*
    04-07-2010, 01:51 AM

    الجرووح

    ديوان الشاعر / طارق المحياس


    الجرووح اللي تجيني من يدينك
    قلبي يتحملها والله لجل عينك

    يكفي اني انسى همي يووم اشووفك
    اجرح اكثر اجرح الله لا يهينك

    يكفي اني اغلى واحد في حياتك
    وتكفي هالبسمه حبيبي من شفاتك

    ما في قلبي اي احد غيرك يا غالي
    والله ما في حد اعزه نص غلاتك

    شي طبيعي نختلف نغضب ونزعل
    بس يبقى الحب في كل شي الاول

    اقدر اتحمل انا كل شي لكن
    الا بعدك عن عيووني ما تحمل
  10. *مزون شمر*
    04-07-2010, 01:55 AM

    صبرت وقلت

    ديوان الشاعر / طارق المحياس


    صبرت وقلت أكيد الوقت يرده.
    .مصيره يحس باللي ضاع بعده

    أكيد اليوم أو بكره بيجيني.
    . ومر اليوم وبعده واللي بعده

    ولا جاني وأنا اللي ما نسيته..
    تناسى صاحبي عهده ووعده

    بعد حبه تناساني و نساني.
    . وتمادى حيل في بعده وصده

    ش أشوي ما قدرت فيوم أنسى
    ..حنانه والمحبه والموده

    هذاك اللي إذا مني ذكرته.
    .تهل أمطار عيني ع المخده

    و إذا تراوا لي طيفه يوم يضحك.
    . نسيت إني أنا عايش بشده

    جمال فيه لا ماهو طبيعي.
    . مثل قطر الندى من فوق ورده

    جفاني من بعد ما هو هواني.
    . وغير خط سيره صار ضده

    سقى الله يوم أقول أبغي أشوفك.
    .يقول إقرب وأجي له لين حده

    أجي له وقت ما ودي أجي له.
    . ولا بيني وبينه أي مده

    و يسولف لي وأنا أطالع عيونه.
    . و أتبسم و أنا ما فيني شده

    أخاف عيوني تنطق من حلاته.
    . ويوقف قلبي كلما صد صده

    أحبه حب والله غصب عني.
    .وهو أسباب حزن القلب و سعده

    إذا حزان حزني كان منه.
    .وإذا فرحان هالفرحه بيده

    أسد الباب يفتح باب ثاني
    و كل ما أفتحه يرجع يبنده

    إذا شديت أرخى هو معايه.
    .وإذا أرخيت يرجع هو ويشده

    يمازحني يا حلو المزح منه..
    فديت أمه و أبوه وجد جده

    ويعاملني مثل أصغر إخوانه
    ..يأكلني ويشربني بيده

    وهو والله الوحيد اللي بحياتي
    إذا إتبسمت يعني كنت عنده

    كذا فجأه تغير في طباعه.
    .و كأني عله طاحت بجبذه

    تثيقل من بعد ما كان طيب
    و كل ما أطلبه شي يرده

    تغلى لين ما راح و تخلى.
    .و قلبي بإيدنه للغير هده

    ياربي ليه و أش سويت يعني؟
    أبا أعرف ش الذي ع البعد حده

    حياتي ما لها معنى بدونه..
    ولا لي خلق إي إنسان بعده

    أظنه ما سمع ذيك القصيده..
    كتبها عاشقه و دمعه ع خده

    كفايه صار لك شهرين غايب
    و إذا ناوي تحدى لا تحده

    لأني ماني قدك بالتحدي...
    ولا تحط راس شيخ براس عبده

    لا تظلمني و أنا عبد بإيدنك..
    وأنته الشيخ خل سيفك بغمده

    أبي لحظات بس خلني أشوفك
    بعدها روح ولا تطري لي رده

    وكل ما أخطر ف بالك بعدها
    تذكر الوفي لخله مرده

    أبي تضحك إذا زارك خيالي
    و تسمع شاعرك وشلون عده

    تفنن كيف و أبدع في كفايه
    ..تأثر لين دمعه بل خده
1234567