ديوان الشاعر / فهد عافت

*مزون شمر*

عضو مؤسس
fahad-1.jpg

الشاعر فهد عافت

شاعر سعودي قدير
له مكانه بالساحه الشعريه
شاعر رائع و غني عن التعريف

لاملك معلومات كثيره عن الشاعر
وفي حال توصلت الى اي معلومات سوف انقلها لكم

اتمنى ان تحوز على اعجابكم قصائده​
 
التعديل الأخير:
لهجة للملح والفتنة

بغيت ارمي بعض حملي
عجزت القى صديق
الا الرصيف وبارد الاسفلت
ركلت اللي صدف رجلي
من احجار الطريق
وقلت :
ابي اقرا في الحصى
سر ارتباكي
لا ... لمست
الضاحك / الباكي انا
***
حملني
قبل لا اعرف الكتابه
موجك الازرق على متنه
وقال ان البلل : فتنه
وقالت لي :
قبل حتى ال (( قبل )) قاعك:
تضيع ان كثروا اتباعك
تغرد بالاغاني
بالاغاني البيض ياشاعر:
نجوم الليل : تفاح المسا
وعيونك : ذراعك
***
الملم حنطة غباري
البس لهجتي ما يستر العاري
وأفك الباب : ... بلا ... د ... ي
والجهات الاربعة في غيبتك : ظلما
وما بين الجهات الاربعة : ظلما
ابي اتجهك ... معي : وجهك
واول ما حفظت من ((الرمل)) و((الما ))
واذا ما شابه المعنى عيوني
عاذرك : .... خوني !!!
ولكن اه لو تدرين
عن طعم الثواني في غيابك
عن لهاث الضو في الشارع
عن الفارع من الحزن الطري

عن دفتري / عن جلسة المقهى
بلا ... اصحاب !
***
تهجيتك .. ت .. ه .. ج .. ي .. ت .. ك
رفضت الممكن / الباهت : طريق
وهذا انا : جيتك وناجيتك :
اذا ما اشتقت في الغربة
قل الذكرى طحين الوقت !
واخبز من تبي قربه !!
ب .. لا .. د .. ي
يا مفاتيح الكلام البكر :
جوعي لك / رجوعي لك !!
مثل ما للنجوم : اسرارها
مثل ما للهدوم : ازرارها
مثل ما للهموم : اوزارها
للمفردات الخارجه عن سلمها,
والداخلة في حلمها زوارها !
قومي هو العشق
احتمالات التطاول في البنا
منح البنفسج فرصة الركض
انعتاق اجسادنا / المفرق هو العاشق :
جنون يحفر ف كبد السما
من شان دفن الارض في الازرق !!
ويا ... ازرق :
يابعد .. وقرب !
يا لمحة في العيون الغرب !
يا سقف الكون ! يا لون اللون !
يا حبر اقلامنا المعجون
بالفوضى , وطين العاقل المجنون !
يا ... ازرق :
من اللي .. يعرف ان البحر :
هين ؟!
... قال ... (( من يغرق!! ))
***
اشوفك ملح واتهجا
حروفك وادخل ف ملجا
كفوفك واغرقك وانجا !
واحبك واشبه الجامح !
***
احبك : واشبه الجامح
لذا كان الصهيل : وسادة المعنى
وكنتي : أول الاشكال
مره فيها من التفاح
ما يحني غصون القلب للموال !!
وكنتي : اخر الاشكال
مره لكن : فرس ودلال !
وانا بين السما والقاع
كنت اركض وامد من العيون :
................ ذراع
أزاوج بين نجم الليل والنعناع
واهدي خطوتك خلخال
أنا الشاعر بلادي أو أنا الأشياء
ما تخفى وما تنقال !
أحبك واشبه الاطفال !
تحب وتشبه الاطفال
وتغريد الكتابه
(( بالرذاذ الطيب الدافي )) :
بهذا ثرثرت نسمه وهفهف شال !
***
أحبك واشبه الجامح
لذا كان الصهيل : وسادتي
كانت عيونك : عادتي
والمثقلات من الغصون قلادتي
كانت !
اذا ماشابه المعنى : عيوني
عاذرك خوني !!!
ولكن لا تظنين القصايد بالوفا
خانت !
بلا ... د .. ي .. , اه لو تدرين :
عن طعم الثواني في غيابك
عن لهاث الضو في الشارع
عن الفارع
من الحزن الطري / عن دفتري /
عن جلسة المقهى بلا اصحاب !
عن الأشيا يقيدها ويطلقها (( الغريب ))
وبعدها يسال عن الأسباب !
عن عيوني تصير (( الرمث ))
ويصير السهر (( حطاب )) !!
عرفتي ليه انا المخطي وانا المعطي
وانا المطلوب والطلاب !
عرفتي ليه انا كل الحضور
ف حفلة عيونك وانا الغياب !!
عرفتي ليه انا الصادق
إلى حد الذي سميت به : كذاب !!
عرفتي ليه :
انا اكره دفتري واغليه ؟!
ليه اموته واحييه ؟!
ليه اثبته وانفيه ؟!
ليه اهدده واحميه ؟!
ليه اعطيه واستجديه ؟!
ليه اجلس في كلي خارجه
واجلس في كلي فيه ؟
ليه ابدا الحزن وانهيه
باسمك
او عرفتي ليه
انا ارمي لهجتي : للملح والفتنه
وارد الباب !!
***
وحدك تفتحين الباب
وحدك
تطلعين النورس الغافي على صدري :
سمك واعشاب !
***
ارتب لهجتي يا أجمل ضيوفي
واهيل قهوتي وتهيلين عتاب !
تصبين (( الدرايش )) في عيوني
و(( الرسايل )) و((الجدايل ))
و(( القبايل )) و (( القوايل ))
والكلام الحلو ... والاحباب !
واضمك
سالفة (( غوص )) قديم ف بحة
الشياب
أضمك .. شيطنة طفل

ان ضحك : يجمع من غيومك أرانب
وان بكى : ت .. ت .. ك .. س .. ر ..
الألعاب !
أضمك
حبل في (( حوش العشيش ))
و (( ضرتين )) !! وهفهفات ثياب !
أضمك: في الأغاني - لا ارتفع
صوت الاغاني
و (( الهوى .. غلاب )) !
أضمك داخلي يا داخلي
شنطة كتب فصل
وطباشير وشغب طلاب !!
أضمك صالة ضجت بجمهور غريب
وشاعر مرتاب !
وتروحين ويظل العطر
تروحين ويخون السطر
لا (( الجهراء )) تجمع رملها في
راحة يديني
ولا هذا هو (( المرقاب )) !
,,,,
نعيق غراب ... نعيق غراب
نعيق
أ .. غراب !!
,,,
امد يديني ل يديني !
بلادي واسالك ويني ؟!
واصيح : اهواك
يكشر بينك وبيني :
((خميس )) من جثث واسلاك
ورق ينشر ورق يطوي
شفاه من الظما تروى !
جسد يركض بلا جدوى !
ذراع طيبه تلوى !
بنادق ترتفع مابين :
طفلين وصحن حلوى !
أغاني والرصاص أقوى
((بلادك وين يا نجوى؟! ))
بلادك وين؟!
يا نجوى بلادي وين ؟!
نغني والرصاص أقوى
من الاثنين!
لو تدرين لو تدرين لو تدرين
عن طعم الثواني عن لظى الفرقا ؟!
وكيف ليا غزاني في خميسك
صرختي ترقى؟!
ابعثر لهجتي في كل صبح
وكل صبح القى :
حروفي جامدة
قهوة كلامي باردة
نار الأغاني خامدة واشقى!
***
من اول يوم لفراقك إلى هاليوم
ووحدك تفتحين الباب
وحدك تطعمين النورس الغافي
على صدري
عتاب ولوم
من اول يوم لفراقك الى هاليوم
ووحدك تذبحين النوم !
هذاك اللي دماه تلطخ عيوني
سهر ونجوم!
من اول يوم لفراقك الى هاليوم
وانا اركض واتبع اثارك
وامد من العيون ذراع
واقطف من سماك :
هموم !!
من اول يوم لفراقك الى هاليوم
وانا فوق الورق
تحت الورق
بين الورق مهزوم !!
***
كتبت وما بخلت بجرح
،،،،
كتبت وما تنفس صبح !!

عرق واشباح/ ارق واشباح
ورق واشباح / كفى ياديرتي
برتاح
من اول يوم لفراقك
ولا خان الظلام ولا وفا مصباح!!
من اول يوم لفراقك
وانا اضمد جراحك يا بلد بجراح!!
من اول يوم لفراقك
وحمل المفردات (( سفاح ))!!
كفى برتاح
كفى ياديرتي/ ياسيرتي/ ياحيرتي
يا غيرتي برتاح!
خلاص! ما عاد امد من العيون ذراع
واقطف نجمة التفاح
هي الفرقا :
وما فينا الذي من فارقك ما
يرفضه رفضه!
وما فينا الذي ما يلفظه لا من
حكى لفظه !!
وما فينا الذي ما ينهدم صبح ومسا
بعضه على بعضه !!
غبار ارواحنا يزداد ما نقدر على
نفضه !!
تبرينا من الاشياء
تبرت مننا الاشياء
تغيرنا كثير وكل قلب خان به
نبضه
هو الإنسان من اقصى حدود الدمع
الى اقصى حدود الدمع لعبة في يد
اللحظه !
وضاع الشعر كل الشعر
في معنى : عجوز/ ومفردة
نبضه !!
والشاعر
يغازل بالرذاذ الطيب الدافي صباحه
والمسا: يصفع جبين الشعر بالكبريت
والفضة !!
***
أبي أصرخ في البحر : تكفى
يباس فشفتي وسكوت
ولا ادري كيف تب تشفى
جروحي والجروح بيوت
دخيل عيونك الاوفا
ترفق بالتعب يا (( كوت ))!
في برد يشفه المنفى !
في ليل يشبه التابوت !
قليل من الحطب وادفا
قليل من التعب واموت
ارد الباب
دخيلك يا بلد لا تفتحين الباب
,,,,
أبي أرمي من عيوني الناس
والإحساس
والأجراس
والحراس
والكناس
والوسواس
والخناس
الفظ اخر الانفاس
ارمي جثتي فوق السرير/ الياس :
لا شاعر
ولا معنى
ولا قرطاس
نعاس ... ... نعاس
... نعاس ...
... نعاس...
... نعاس ...
...
ن.. ع .. ا ... س ...

... ن .. ح .. ا .. س
..ن ..
... ع ..
...ا ...
... س ...
***
من اللي هناك ؟!
من اللي هناك ؟!
من اللي يرمي الشباك
با حجار الحنين ويوقظ الفطنة ؟!
انا القاع اللي قالت لك :
تضيع ان كثروا اتباعك !
وانا البحر اللي شالك فوق متنه ! !
بلادي.. !!
يا كثر ما ني مقصر بالغلا وادري
ولكن ما قويت الجرح
تمنيتك تهجيتك
وشبيت المعاني من حطب صدري
كتبت وما تنفس صبح !!

من اول يوم لفراقك
وانا اركض واتبع اثارك
واركض واتبع اثارك
واركض واتبع اثارك
ولكنك وقفت
ادري
لأن الصمت عاجز يقتلك !!
والشعر عاجز ياخذ بثارك!!
..!!
!!
!!
أبي حريتي
هذا الحكي من غابت عيونك:
شبك وسياج../ غضب كرباج
خذ عيون الهوى معراج !
تشبه دايما بالجامح / الطفل
وتذكر حكمة الامواج!
ولا تهتم قصر ليل او طول
وكون المستحيل المعطي/ الذاخر
,,,,
تقدم دايما من أول الأول
وخذ حلمك معاك لاخر الاخر!!
...!!
تعلم كيف تقطف من بساتين الكلام
ال ((لاء)) وتصرخ (( لا ))
أحبك
كثر ما احبك
أحبك واكره الاملاء !!

هو العشق احتمالات التطاول في البنا
قبل الالف !!
منح البنفسج فرصته للركض
بعد الياء !!
خذذيني
علميني من جديد استلهمك
واستل همك
علميني كيف اغامر في البياض
من الورق
واعطي لصدرك فتنة الغامض
من النابض من الاشياء !!
خذيني ..
علميني كيف اسوي من عصافير الطفولة :
قاعدة والمدفع استثناء !!
جراح الطيبين : القاعدة والمدفع استثناء!!
عيون الطيبات : القاعدة والمدفع استثناء !!
***
زمنا وان قسا بيلين
وطنا وان قصا داني

تعودنا نزف الطين
عروس وصدرنا حاني
وندخل فى الكلام اثنين
وننسى أينا الثاني​
 
قصيدة / كفو

كفو هي مالها إلا واحد مثلك شديد الباس
...... الى ضاقت على الحر الكريم وخانت ظروفه


كفو من اول إحدود الامل لأخر حدود الياس
...... ولابه باس دام أنك هناك .. ولك بها شوفه


أبو نواق أبو كل النوايف رافعات الراس
....... ولد عبد العزيز اللي حياته كانت حتوفه


طلال وقبل احدر حاجتي يرقى لها قرناس
....... كثر عرفه بجهلي شفت أنا جهله بمعروفه !!!!!!!


جلس مثل الرضا في قلب من صلى العشا بنعاس
....... وقف مثل العفو .. هو فيه مثله ساعة وقوفه !



عزيز في الحياة ليا صمد ماكن فيه احساس
....... ذليل فالصلاة اليا سجد ماقام من خوفه !



وش إكتب يالقلم / يالمحبره / يالليل / يالقرطاس
..... تعزبت المعاني ... والمعاني كانت ضيوووفه ..!!


كفو ماهي (كفو) اللي صارت لحي الله من الناس
...... كفو .. للي كفو ... لو كملوها صارت ( كفوفه )​
 
قصيدة / مدى

أهز جذع المسافة ويتساقط مدى
أهز جذع القصيدة ويتساقط نخيل

تزهر يديني أحس انه طريقي بدا
واقول حيا على هذا الفلاح الجميل

أبدا بتجهيز اوراقي ، وقطرة ندى
أشوفها من على خد النوافذ تسيل

اخذ معي كل مايخطر في بالك . عدا
ثوب تركته معلق في جدار هزيل

تبكي الستاير تناديني .. أرد الندا:
عمر الشقي ياستاير - لاتخافي - طويل

أودع البيت ، ياجدران طين وصدى
من كان مثلي رحيله أرض وارضه رحيل !؟

أسير حافي قدم .. دربي ضلال وهدى
وجهي سحاب وظما .. صوتي نواح وعويل

أقطع مشاوير تقطعني بطيب وردى
واصير انا الهين الميسور والمستحيل

وليا لقيت الطريق اللي مشيته غدى
قصير مثل الفرح .. مثل الليالي بخيل

.. أهز جذع المسافة ويتساقط مدى
أهز جذع القصيدة ويتساقط نخيل​
 
قصيدة / دخيلك

دخيلك دخيلك لاتصلح غلطتك هذا الخطا غالي
رفضت انك تجيبه من عرفتك لين هو جابك

ومدام ان الزعل مثل الرضا يبقيك في بالي
انا مزعل ولارضى منك انا ازعل عنك وارضابك

هلابك يالخطا ضيف عزيز يكرم دلالي
اذا صبيت له فنجال عفو ونوخ اركابك

من الليله باسمي غلطتك عنقودي الحالي
الامني قطفته بالسماح انتثرت اطيابك

حبست العقل واطلقت العنان لمهرة اهبالي
وقريت ان الخطا عين الصواب بصفحة كتابتك

وش القمرا سوى غلطة ظلام ولاني مغالي
وش الظلما سوىغلطة سما بتقلد هدابك

يساورني يقين ان المطر غلطة هوا عالي
حسب نفسه يصالح غيمتين وبلل ثيابك

فديتك لاتعذر والذي سواك واهدالي عيونك
مالقيت الطف بهالدنيا من اعتابك

جزاك الله خير وبيض الله وجه عذالي
متى ماجيت ابنسى سيرتك قالوا لي احبابك

وانا لقالوا احبابك عجزت اسمع وش التالي
خذيت الكلمة اللي تشتهيك وضعت باسبابك​
 
قصيدة / لولاي أنا

انا .. انا .. لولاي انا من تكونين"
" اقولها وانا نعم .. فيك مغرور

انا جعلتك نور وانتي .. من الطين
" جرة قلم .. وامحيك من عالم النور

انتي بدوني وردة في البساتين "
" والورد في دنيا .. البساتين مغمور

لكن معي صرتي .. كما الشوف للعين
" والعين لولا الشوف .. ماظن لها دور

هذا وقصدي تعرفي موقعك زين
" وحذرا .. ترى من انذرك صار معذور

اما اشتري ودي على العسر .. واللين "
" والا تراني .. بايعك بيعة البور

بسطور .. خليتك شعار المحبين
" وامسحك من دنيا المحبين يسطور​
 
قصيدة / ذنب ومغفرة

نصف وجهي هجير ونصف ظل "
" وأنت غالي وطبع الحب كافر

بعض مني يخاف انك تضل
" وبعض مني يخاف أنك تسافر

بين أقول الصواب وبين أزل
" ضعت فيك متجاذب ومتنافر

خلني فيك ضايع لين أدل
" وأنهزم منك لجل أرتد ظافر

أمتليت بغلاك وفضت غل
" وفرت الشوك تعني الورد وافر

ول سافرت ماسافرت ول
" ما اجتمع غير بك مذنب وغافر
 
قصيدة / مريم

مريم وتضحك يرق الما ويصفا لي زماني
والمكان يطيب والرمان يتكدس هنيا

قلت رحلتنا تبي سكر وترنيمة أغاني
جاوبت هات الاغاني واترك السكر عليا؟

من شفايفها صباح الخير شكل وطعم ثاني
اه لو تدري وش تسوي صباح الخير فيا ؟

تاخذ الما من يديه توصله شط الاماني
واهنيي كل مامريم خذتني من يديا!

اذكر اول ماتلاقينا تسمر ف مكاني
حاولت عيني تشوف الدرب مير القلب عيا

الحلا فيها من اقصاها ولا للزين داني
كل مافيها خلقه الله من طلعة محيا

كل ما عز الطلب عندي ،، و قالت لي : عشاني
قلت من هذي قبل هذي و جابتني حميا

قبلها ماطاعت اقدام طريق إلا عصاني
بعدها ماظل حلم اخضر بصدري ماتهيا !!​
 
مرثية طلال مداح

بيوت الطين , رفرفة الحمام , وغبشة استحواذ
مراجيح الشفيف من الفواكه لاطرف السله

عذوق الهمس من نخل السهر , لاهزها نفاذ
من عطور الحنين الخابز ارغفته على مله

ضيا قمرا زز هي اكرم من عطا ضي وهي الشحاذ
تقول ليا عطت وليا خذت : هذا لوجه الله

ربيع ( كبودنا ) ترعى حماده ضجة الأفلاذ
شغب غمازتين , وهيل نصف موارب ودله

تفوح بطيبها -المبطي بها- ياطيبها الأخاذ
جمعك فحنجرته ومولك , والغيم مول .. له

نهض يستكمل النايات في جغراقيا الرذراذ
طلال .. وكل فوضى رتبتنا جسدت : ظله

وتر .. ضد اليباس وخارج الاسمنت والفولاذ
هنا لغز البساطه في موسيقاه .. وهنا .. حله

هو اللي ذوب ( الرا ) في طفولة ضيه .. استلذاذ
هو اللي ذوب الدنيا في ( رابع ) أحرف العله

كريم الروح .. مد من الجسد خمسين جرح ولاذ
بنا , كيف انعمينا عن تعب ريحانه وفله

أغاني ( الفيديو كليب )وموسيقى شهوة الافخاذ
نهشته قمح قمح وحنطة حنطه .. هوى كله

هوى .. فجأه .. عرفنا كم تخاذلنا عن الإنقاذ
لغاية مافرغ كرسي الخشب من بحة موله

وقف خمسين عام استاذ للمعشب وطاح استاذ
وظلت ريشة الطير ف يده خضرا ومبتله​
 
مرثية طلال الرشيد

لو الحزن دمع الله يحرم يباس الموق
على العين لين يغرق الجفن مجهاشه

ولو الوزن شمع اللي من كبودنا محروق
ينير الظلام بنجر الاضلاع مهباشه

على سلم جدانه يموت و جبينه : فوق
لو ان الجدي يرقى على سهيل ما ناشه

وطيب لو ان المسك ما ارخصه عرض السوق
غدا من قواريره ومن طيب غراشه

"طلال الرشيد" اللي تجيه المنايا بوق
على صدق وعد الموت ، الاسباب غشاشه

نصاه الرصاص : ضيوف ! قلطهم :المعلوق
وعشى ضيوفه مهجته !رابط جاشه

يا ربع يهبا ريح الفشق وشكثر معشوق
تقل .. عيب احد من "شمر"يموت بفراشه

وهذا مهو بايات احد يعجز الطاروق
يوفيه قدره لو هو السحر وادهاشه

أمير التواضع و الحيا و الأدب و الذوق
والاخلاق ملفى كل طيب و مطراشه

سرى للنوايف _ راس "شمر"مهو مسبوق
تقل وحده "الساري"والانام "غباشه

نعم ..مايكبره "اللقب"يكبر المنطوق
بالافعال وعزوم الرجاجيل بطاشه

حثينا على وجه السحاب :التراب حقوق
لو الله عفا منه اكرم الخلق ماحاشه

يا رب اغفر لعبدك "طلال الرشيد" وسوق
له من البرد مايبهج الروح رشراشه

وعسى "ربي الله ونبيي محمد "طوق
يوقي بها عن ظلمة القبر ..واوحاشه

بجاهك وعزك وبجلالك ياربي عوق
عن النار جسم عل "الاستبرق" قماشه

يا رب وعسى صحبته "ابو بكر"و "الفاروق
بقدرتك ياللي ترزق الطير باعشاشه

يا رب وعسى اللي عندك من السعد مفهوق
له بكل عمر ماته ابن ادم .. وعاشه​
 
مرثية الملك فهد

اللي تعب واسترحنا نتعب ويستريح
قل للتعب يبشر بسيل يهوله عدد

اليوم اذا يبسن الارياق يبسن صحيح
ياضيق الاثنين للمستبشرين الاحد

الدمع يسبقه باقيه انحدار ومطيح
فاللي نزل من مدامعنا علينا صعد

مات الكريم الحيي المستقيم الصريح
اشجع هل الارض واخوفهم متى ماسجد

لولا المنايا منايا كان شفت الطريح
أي الصدوقين واوفاهم وعيد ووعد

لاشك ربه كتب ماللمنايا نطيح
نفنى ولا دايم الا وجه واحد احد

يارب كانه ستر نفس وحفظ عرض زيح
عن وجهه النار واغسله بسحابة برد

أنت الكريم وتحب من الوجيه الفليح
بشر من احسن بك الظن بدروب السعد

عز الله انه عدل فينا عسى الله يبيح
له ويغفر ذنبه ويجزيه عنا رغد

عف . وعفى . واصلح وجاهد وصان المليح
ولافارق اجر الصواب اجره على ماجتهد

ياحي الافعال من مسك وقرنفل وشيح
لاطاب طيبك ولا سوى سواياك احد

في الميتين الرثا يكتب وفيك المديح
يكمل مديحه بوصفك ياعظيم البلد

جمع البخاري ومسلم للحديث الصحيح
جمعك صحاح الشيم والطيب متن وسند

خمس وثمانين عام وكون صدرك فسيح
قل يعقب من نكر فضل يهبا من جحد

والفرق بعد المهد يظهر وقبل الضريح
يافارق فالضريح وفارق فالمهد

من استطاع السبيل وحج فرضه يطيح
ومن طاح فرضه رجع شايل جمايل فهد

ماهبت الريح تبقى وانت لا هب ريح
اعف الالسن جميع واكرم هل الارض يد

لوماتسمى ملك ماظن ربي يتيح
هذا الاسم للبشر من قبل ولا بعد

وقت الرخا يكثرون اهل اللسان الفصيح
يا افصح الناس لاضاقت وعز السند

ان كان فيما كتب خادمك ضي شحيح
ياسيدي فاللسان من المصاب انعقد

واللي جهل في حضورك علم الامر القبيح
تعلم ف غيبتك جهل الصبر والجلد

وهو بس اناللي ضلوعه من دموعه تسيح
المملكة والعرب والمسلمين وبعد

يالله بصبر بلا سلوان يشفي جريح
سلوان مثلك ماهو حاصل ولا اطلبه ابد

ياوالدي كل عرق من عروقي يصيح
يامكرمك والد يابخل بخلي ولد​
 
أبها

البشر والشوارع والمساكن
ليلها المغتسل في صبح باكر

السحاب .. السحاب .. ابيض وداكن
التراب .. التراب .. اول واخر

القلوب القلوب اللي تماكن
من بعضها بعض والعشق سافر

العيون ان خذت من غير هاكن
النفوس ان عطت من غير ذاخر

رفعة الراس في انسانها ,كن
خالد الفيصل ارسلهم منابر

هذي الارض فيها شي راكن
في الحنايا وفيها نبض ساحر

كني اعرف بها كل الاماكن
كني اقرا بها كل الدفاتر

ليه ابها .. انا مدري ولكن
كن ف ابها طفولة كل شاعر​
 
محمد بن راشد المكتوم

ياسمو المرجله والكرم والاحتشام
ياسمو الجدو والجود منك وفيك ضافي

ياسمو البحر لارخى عن الموج اللثام
ثم هدر يعطي وياخذ بلادين .. ومنافي

ياسمو الكبريا والتواضع بانسجام
ياسمو النجم حاشاك : بعض النجم طافي

سيدي من وعليك وبك وفيك السلام
سامح اللي قصرت به طواريق وقوافي

من بدايات الكلام لنهايات الكلام
مالقيت اللي يوفيك حقك يالسنافي

يامحمد ياسمي النبي نسل الكرام
والله انك مدهل الطيب عريان وحافي

عاد يوم الله عطاك بعطاياه الجسام
كيف ماتركض لك الناس محتاج ولافي

انت علمت العرب كيف يوفون الذمام
وانت علمت العجم كيف بعض الموت : شافي

خالقك ربي تضيم ان بغيت ولاتضام
وكملك بالعدل حتى غديت العدل صافي

من شجاعتك المنايا تسميك :الزؤام
ومن لطافتك الحنايا تسميك :الخوافي

ومن قصايدك المعاني تسميك :المرام
ومن عوايك الأماني تسميك :المرافي

ومن عطاك الجود سماك :حساد الغمام
ماتركت الغيث يفرح بغيثه للضعافي

غثتهم قبله ولاهي غريبه يالحسام
سلك الله للعطايا وقال الجود كافي

غثتهم قبله ولا كن لك عين تنام
قبل ترتاح الخلايق .. وتلتم العوافي

يعذر المومن اذا عيد بشهر الصيام
يوم شاف هلال وجهك بشوش ومتعافي

جيت لك شايل ثلاثين عن تسعين عام
رامي في باب وجهك عذاباتي خلافي

والله اني من جماعه بهم شد الحزام
مايخيب ان طوحن الغنادير الغدافي

شمري من السعوديه الارض الحرام
مثل ماحرمت عليك النواقص والهوافي

لكن الدنيا رمتني ولاخلت سهام
ماتلت في ضلوعي تشاف وماتشافي

ياسمو المرجله والكرم والاحتشام
ياسمو الجود والجود منك وفيك ضافي

سيدي وانت البدايه ولالي بك ختام
كان شعري جاحد الطيب انا بالحيل وافي​
 
فهد بن سلمان

مافي القلوب الا سهر يابس نجوم
ومافي العيون الا قلوب تسيلك

ومافي الغياب الا كريم ومحشوم
ومافي الذهاب الا ثناك وجميلك

ومافي الضلوع الا عطيب ومثلوم
ومافي القدوع الا: هن,الله وكيلك

ياللي انت كنت الاطيب علوم وسلوم
من جيت, .. ولما لانهاية رحيلك

وياللي انت كاسبها بخسرانها دوم
حصيلك انك ماتبقى حصيلك

الموت لو ماهو مقدر ..ومحسوم
وماكنه الا أنت وفزعت لدخيلك !

ماكانت هموم , وهي ان خليت هموم
يافهد بن سلمان ماتنبغي لك

ياسابق جيلك , ولا شحت قروم
ويا لاحق أجيال , ولا هان جيلك

عطاك قبل الناس تجلس به تقوم
وغطاك قبل انك تحطه .. يشيلك

جاريت أبوك , اللي ماجارنه حلوم
بالطيبات , وهو من اهداك خيلك

الطيبة قبل يتقرنس بها سوم:
ان كانها ماهي لسلمان .. هي..لك!

لقحت له اليوم الحساني , وجت : توم!
ودفن الحساني ..فعل أبوك وسبيلك

اخر دلايل شيختك بشت وهدوم
واول دلايلها طهارة شليلك

واخر دلايل شيختك حبة خشوم
واول دلايلها .. زبادك وهيلك

واكرم دلايلها : كم أنصفت مظلوم
واعظم دلايل شيختك : لادليلك !

متواضع الا لا بغت كل زيزوم
ساحة وغا.. تفرق هناك في صهيلك

عز الله ان الموت ماهو بمليوم
ماأحد يلوم أحد على أنه يجيلك !

دنياك دنيا .. وانت بدلتها اليوم
الموت هي من وين تلقى بديلك​
 
عبدالعزيز بن فهد

طبيعة السيل ينزل والبشر ترتوي
إلا الماذن لطهر السيل فيها صعد

ويا ابن ادم الرزق ما يضعف وربك قوي
والادمي رزق لرزقه: كفاف ورغد

وان قيل من يتبع الشاعر ؟ قل المنغوي
وان قيل من يغوي الشاعر ؟قل ابن الفهد

عبد العزيز البحر خيره وما يحتوي
عبد العزيز البحر شره واشروا اشد

عبد العزيز البحر من غير ما يرعوي
موجه لساحل ، حشى موجه عن انه يحد

جا للفهد خادم وصاحب وزير وخوي
يا طيب طيب الأبو .. يا طيب طيب الولد

يلوي ذراع المكارم والمراجل لوي
ما احد خذا الطيب طيب ..الطيب غصب انوجد

نجم ولاله من الأنوار ما ينزوي
حر ولاله من الأوكار غير الهدد

لا من عطا ما بقى في الناس عقل سوي
ولا من خذا كل من فوق البسيطه رشد

ما ينتوي ياصل ..الواصل قبل ينتوي
ولا ياعد ويافي ..الوافي بليا وعد

أطيب من ال.. وأشجع ال.. وأعز من ..ينروي
فراغ الاسما ولا تثمر غصونه باحد

ولا هو بالاول على الدنيا لما يحتوي
ترتيب الاول على ثاني يهين العدد

الفكر فكر حضري والراس راس بدوي
وش يصلح الملح ؟ هذا يصلحه لا فسد

رجل معه نجمة الحكمة تضوي ضوي
اعلى جبين بها الدنيا جبين سجد

جيته بهم تخاف النار لا تكتوي
باللي ترمد على اطرافه من امس وهمد

فزع كذا (تعرف انت النجم كيف يهوي؟)
جاك متجمع كذا ما كنه الا الحسد

مثل الحسد شيء بشيء بشيء طوي
ما شابه الا نقيض الروح به والجسد

جيته وذيب النكد وسط الضلوع يعوي
واليوم أنا كيف ابا اوفي جميل النكد ؟

الحزن دايم مرتب والفرح فوضوي
والشعر ما يثبت من حروف فكر شرد

يا رب انا ويش انا لو مطمعه دنيوي
وش ينتظر مني انت اجزه عليك العمد))​
 
عبدالعزيز بن فهد ( 2 )

قالوا: كتبت؟!.. وقلت : لا.. واستحاله
على انها زانت..وطابت مشاهي

وحضن الورق : يشتاق، والحبر : ياله
والشعر: وادي هايم باتجاهي

واللي يلوق المدح به..والثنا..له
تاجي.. ونبراسي.. وعزي .. وجاهي

هو فال طيبه.. طيب الله فاله
عبدالعزيز..وشعشع النور .. باهي

فرق القمر : نقص القمر: واكتماله
وفرق البحر :..شح البحر..والتناهي

يا ضيق مجلسه ان طرى «وسع باله»
عليك !!.. ما هذا..لهذا..مضاهي!

تخفي يمينه جودها.. عن شماله
أثر..العطا اللي تعرف الناس : واهي!!

عذره معه لو يبغض الناس: ماله!
سبايب الفرقا كريهه ترا..هي!!

يكرهك يا ابن ادم: ابليس وحلاله!
كل طرد من جنته.. والملاهي!

واحد.. طرد من جنة الخلد..حاله
وواحد طرده اللي على الجود راهي

فكره.. سعة صدره.. كلامه.. عاله
وجود حكت به غفلتي لا نتباهي

لطف اختيار المفردات.. ف.. جداله
وعفة لسانه في الطريف الفكاهي!

ما شابهت حتى خصاله.. خصاله :
دايم..هو اكرم منه : امر..وناهي !!

كن الفهد يومه يسمي عياله
فهق له اسمه.. عمد..ما هو بلاهي

وما هي غريبه..طبع ابوه: العداله
من خلق يزها به..عسى دوم زاهي

الشعر في عبدالعزيز. استحاله
يكتبه حبري.. وتحكي به شفاهي

احتاج لي نفحة خيال.. هباله
من فرط صدقه.. يعبر الكذب..ساهي !

لابد من صدق .. نبيه.. وداله
هو ..كذب..لكنه فطين ..وفاهي!!

حقيقتي تعجز.. توفيه.. ماله
من حق.. واخشى لا كذبت : انسفاهي!

له هيبة تحمي _من الكذب _جاله
وسفن الحقيقه..غارقه في مياهي!

لا احد جهل جهلي.. ولابي جهاله
ولا احد عرف عرفه.. ولابه..تباهي!!

ف: هذا..وابو..هذا.. وجده.. وخاله
ما يعجز عن الشعر ..غير..الدواهي

عل.. الخيال.. ليا تخيل.. خياله :
يقدر.. يجيب اوصافهم.. مثل ماهي​
 
متعب بن عبدالله

الخميس الي تناثرنا بجوه
لين ضج الليل عشاق ومحاني

بالنفيس اللي خذا الدنيا مروه
ماخذاها صولجان وهيلماني

ذعذع الما والرطب غنا ونوه
كل غصن بما عليه من الأغاني

خابر بيني وبين الشعر خوه
ان بغيته جا .. ولاجيته بغاني

ياسمو اللي تساما به سموه
بك تعلمنا عظيمات المعاني

متعب محبينه .. مريح عدوه
بالعطا ذولا وهذا باليماني

السماحه من تعاليم النبوه
وانت كملت السماحه بالتفاني

اثر مابه ليل به صبح مشوه
وان صفا ماغير صبح .. وصبح ثاني

واثر مابه غير ضعف الصفح قوه
نقط . والمجني عليه يصير جاني

واثر تو العمر والقنديل توه
والطريق اكرم كثير من التواني

وانت من سماك متعب ماتفوه
بالعبث , حاشاه ماحاشا لساني

في رواح الزعفران وفي غدوه
وانت تعطي كن هالدنيا ثواني

ماخلقك الله ب( ليت انه ) ولوه
كملك واقصى الخلايق عنك داني​
 
سلطان بن عبدالعزيز

سلامات تطول الغيم وعذوق النخل والطير
تزف ابه الشموس من النفوس لشيخها الغالي

هلا ياللي خلقت بيوم راد الله بخلقه خير
ابغني وابنطح بالهلا ياسيدي فالي

تمسكنا بحبل العروة الوثقى وهو تدبير
تكافخ به بيارق عزنا في المر والحالي

وسلمك الولي للشعب حب وللوطن تعمير
وللمحتاج تاج .. وللعدا ضيم وغربالي

اسميك الجبال الشم والقى بالحكي تقصير
خفافك لو نحملها الجبال تدور الوالي

واسميك القمر زلة لسان ومالقابه غير
شعاع ينطفي وانت اول انوارك بلاتالي

اسميك المطر حاشاك لامامنت المطر يامير
وهو لاعطا نزل واما انت تعطي وانت في العالي

اسميك انت .. ماسميك غيرك باخر التفكير
بغيت القى شبيه لك سواك وماتهيالي​
 
مبايعة الملك عبدالله

عتق الرقاب وفك قيد المحابيس
عادته ماوالله خذاها سياسه

هذا ملهسها على الطيب تلهيس
غيره يطيب بلجنتين ودراسة

هله طحاطيح عنزه والسناعيس
خواله يشوف المهالك وناسه

مارد غير معذربينه مفاليس
المستقيم مميل عقال راسه

تحت اخمص اقدامه تشوف القواميس
تقرا دروس المرجله والحماسه

يحط مابينه وبين المتاريس
شعبه فهم حراسه من الحراسه

ماشيبت راس الظلام الفوانيس
تشييبته في صابر هموم ناسه

دربك وعر مير ابشري يالنواميس
مايفطم عن ديود مرقا مداسه

لطام خشم العايل مروض بليس
عبدالله املا يابحر نصف كاسه

عل الفهد في ظل روض الفراديس
اللي عهد له بالولا والرياسه

ياشعر . واختلطت علينا الاحاسيس
بايع .. وبارك له ..وعزه ..وواسه​
 
الملك عبدالله

ابطيت كنت انثر احساسي وارد اجمعه
وانثره ثاني وارد استجمعه من جديد

لين استراحت على غصني طيور اربعه
الوزن والقاف..والمعنى وروح القصيد

واخترت لحظة يغط الزعفران اصبعه
في القلب ولكل شاعر وقت والشعر صيد

الشعر حر رمى راعيه عن برقعه
واحساسنا ياطويل العمر طلعن وكيد

وانا ادري اني بصب الطيب في منبعه
بس الشرف لاتهيت فرصته ليه احيد

والناس بالشعر متبوعه ومستتبعه
لكنهم بالغلا جولك على ماتريد

بك يجتمع كل طيب وكفك توزعه
بين اقرب الناس واقربهم ولالك بعيد

والله ماشفت شخص الا انت له او معه
عين الضرير ويد العاجز وثغر الوليد

قسمت نفسك لضيقات الاوادم سعه
من وحد الكل بالحب يتكلل وحيد

تجوع عينك لشوفة جايع تشبعه
جايعك يشبع ويبقى جوع عينك شديد

وتيبس لهاتك على طفل تسيل ادمعه
وتكفكف الدمع ستر..وعلم..وثياب عيد

وحشة جهنم ومدت كفك بمنفعه
اختلفوا بكل شي الا بهل من مزيد

كف وهي في رضاه تشوفها طيعه
وهي في زعلها الحديد اللي يفك الحديد

يامعلم اللي اغتر وقل فيه اسنعه
علم يسدد عوجه وما نعوج به سديد

تهتف لك الراية البيضا وهي مشرعه
هذا هو السيد ماهو كل سيد بسيد

وانا ..بوجهك اذا اعذاري ماهي مقنعه
ظنيت نفسي ذهين ويمكن اني بليد

اسمك يقدم وانا عن عمد من رجعه
وفي الحالتين انت الاول مير كيف القصيد

والشعر لاصار عبدالله على مطلعه
بك يكتفي ياطويل العمر وش يستزيد​
 
عودة
أعلى