ديوان الشاعر/ سعد بن سعود ال سعود( المنادي)

قصيدة / دمعة فراق

غلاك ودعته معك في وداعك

ما عاد بعد فراقنا دمعة فراق

القلب باع هموم عمره وباعك

تو المتيم فيك من غفوته فاق

إيه انطفى سحرك وواهج شعاعك

توه يطيح الشوق من عين مشتاق

حبيبتي ما عاد يغري سماعك

ذبل كلام الحب بقلوب واوراق

قناعتي بالبعد كثر اقتناعك

ياكذبة ايامي تودعك الأشواق

وما ضاعت الاحلام ليلة ضياعك

في داخلي عشق وفي الكون عشاق​
 
قصيدة / حلم المدينه

ترعى الغنم وتعيش حلم المدينه

في روض عز وكل شي خذلها

حره تعيش وفي زمنها سجينه

عن زخرف الدنيا زمنها عزلها

حره تعيش وللمتاهه رهينه

نام الأسى بعيونها ما سألها

طموحها الباكي يعاتب سنينه

رغم الأمل عاجز يحقق أملها

تلوم لكن من تلوم وتدينه

الوقت والا الظرف والا أهلها

من حزنها كل الليالي حزينه

احساسها بالظلم يسكن خجلها

في الباديه واحلامها في المدينه

ولها الفخر لو كل شي خذلها​
 
قصيدة / المحال

بين المحال وبين تحقيق الامال

مثل الذي بالضبط بيني وبينك

عزفت في روحي من الوجد موال

روح تلاعبها بأ نامل يدينك

احيي خيالك في خيالي وتغتال

حلم جمعنا خايف انه يدينك

دايم تعذبني ودايم على البال

الحب غلا فيك زينك وشينك

يزول عمري والأمل فيك ما زال

الشوق خلف لي بقايا حنينك

أقول أحبك وادري الحب قتال

الله على كثر المحبه يعينك

ولانت ناسيني على كل الاحوال

لو مت من فرقاك ما قلت وينك

ليت المحال يصير لولحظه وصال

كان الجروح تهون من شان عينك​
 
قصيدة / احبك

عيني وقلبي وعقلي يحبونك

وان بغيت الحقيقه كلي أحبك

عاشقك عاشق اوصافك ومجنونك

في الزعل والرضا قلبي على قلبك

اوعدك ماجرح احساسك ولا اخونك

كيف بفرح بغيرك والفرح قربك

مع نسايم عبيرك مالت غصونك

ومالت النفس معك وسرت في دربك

تدري إني اشوف الناس بعيونك

لو اكذبك شفت الصدق في كذبك

فاتني وش تبيه يقول مفتونك

والله انك تونس من يسولف بك

لوتحس بشعوري يوم من دونك

كان تشكر على كثر الغلا ربك

ايه احبك واحب اللي يحبونك

انت وانت الأمل وشلون ماحبك​
 
قصيدة / هلا...جفا

اغيب واسئل ليه ..طول غيابك

وانسى ان بعدي كان بسباب غيبتك

حسيت بالغربه وانا عند..بابك

وللحب غربه عشتها بعد غربتك

عاتبت نفسي كيف ترضى عتابك

ونفسي تعاتبني على فقد .. صحبتك

ويوم انصدم حلمي بواقع .. سرابك

واسيت احاسيسي وبررت كذبتك

اموت باحضان الحزن والبقابك

ويسقيني الحرمان بالدمع وانبتك

هلا جفا .. وان جيت يمك هلا بك

وبخطوة في درب الاشواق جابتك

عذاب قربك ..ولا فراق وعذابك

حتى جروحي ... رحبت بك ..وحبتك​
 
قصيدة / فاقد الشيئ

اخطيت يوم اني طلبتك حنانك

لاصرت فاقد شي ..وشلون تعطيه

مهما نطق لي بالمشاعر... لسانك

شي بدون احساس .. ما اقتنع فيه

احساسك المصنوع خنته وخانك

جاملتني به وانت تجهل ..معانيه

مني نصيحه تنفعك في زمانك

الاشعورك ..لاتبيعه وتشريه

كانك تقدر قيمه الحب كانك

اللي يودك .. لاتحاول تعنيه

ياكثر ماحبك فوادي .. وصانك

مع كثر ماتبعده .. كنك تناديه

غيرك امانه خوف .. والخوف امانك

ماكل من راعاك .. تقدر تراعيه

حتى لو عليت بالقلب ...شانك

ابقى يتيم الحب .. جرحي اقاسيه

اعذرك ..لاحطيت نفسي .. مكانك

لاصرت فاقد شي .. وشلون تعطيه​
 
قصيدة / بعض الحقيقه

عيشي على الأحلام ياكل الأحلام

والناس خليها تعيش الحقيقه

بس أعذري جفني عن الحلم لو نام

كثر السهر ماكل عين تطيقه

ان كان قلبك في بحور الهوى هام

وشلون اجل تضمين وانتى غريقه

مشاعرك نسمه ونغمات والهام

بس الوهم عيب القلوب الرقيقه

تبلورت قناعتك عبر الايام

يبقي اقتناعي بالهدف والطريقه

لك العذر لو شفتى بعين الاوهام

دمعه رقت فالحلم بعض الحقيقه​
 
قصيدة / الوصل

مثل مافراقك جرح ... بعض الوصل جارح

وقربك جفا .. لاخطيت ..مهما تقربني

حبيبي ..حبيب اليوم يذكر غلا البارح

وماللغلا معنى ..بعد ماتعذبني

تكابر باحاسيسك وفي ظلمي تصارح

احبك.. وبسلاح المشاعر تحاربني

تأكد رموز الحب ماتنتظر شارح

وماللحكي داعي .. وسمعك مكذبني

ايلاجيتني من خلف عمر الوهم سارح

فلا تقتنع بالشوق حتى تجربني

مثل وصالك جرح .. حتى الفرح جارح

واحس ان جرحي ... لاحر الحزن يطربني​
 
عودة
أعلى