ديوان الشاعره نوض ...

قصيدة ( يانوف )

انا ماكتبت الشعر (يانوف) اماري فيه
مشاعر تهيضني ومليت لكتمها ..

كتبت القصايد كلها فيه ولعينيه
اسجل له بيوتي ولجله انظمها ..

وألحن قصيدي لجل يسمعه واغنيه
ونفسي من اسباب المفارق اعلمها ..

صدى الصوت عيا لا يرده ولا يوحيه
واعاتب ضنوني بالتفاكير واتهمها ..

أحبه واوده واعشقه وأملكه واغليه
وحتى ان روحي لجل روحه اقدمها ..

وابيع البشر (يانوف) وإن الحبيب اشريه
واراجع على صفحة غرامي وبصمها ..

عرفتي حقيقة قلبي الطيب وشفتيه ؟
انا ساهره ليلي و(....) نايمها ..

ليا من سألتي ليه .. جاوبت انا لك ليه ؟؟
هجرني ونفسي قاسي الوقت ظالمها ؟؟ ..

ولكن مع هذا غرامي معه أوكيه
انا راضيه وياليت ربي يتممها ..​
 
قصيدة ( شف عيوني )

الغلا موجود لاصاح الضمير
والحقيقه عجلت بفراقها

المفارق عذب القلب الكسير
مايقدرني سوى الي ذاقها

حالتي صعبه بهالوضع الخطير
شف عيوني لا حكت باحداقها

العلاقه عدت وراحت بخير
والحبيب الي جحد ميثاقها

الغلا يمشي كما سلك الحرير
عالقه من راسها لي ساقها

ماعرفت الحب من طعم المصير
لين ذقت الحنضل وترياقها

من بدايتنا الى اليوم الأخير
العلاقه ماعقدت اوثاقها

الزمن يمشي معاي ويستدير
والمشاعر بيحت بوراقها
 
قصيدة ( صك امتلاك )

عشت ابغرامي وأنا لجلك وأعيش ابغلاك
وأنت الحبيب المميز ياغلاي الوحيد

ناديت باسمك ولكن ما وصلني نداك
ومشيت لجلك وفي حبك .. على ما تريد

وسجلت لك من عظيم الشوق صك امتلاك
وأودعت لك في صميم القلب كنز ورصيد

وفيت لك في هواك وما وفاني هواك
وأبدعت لك بالقصيد ولا نفعني قصيد

يا صاحبي لو بغيت القلب أشر وجاك
مادام في غيبتك ظلمه .. وشوفتك عيد

تروح عني وأنا قلبي حشا ما نساك
وتغيب عني وقلبي بالمحبة يزيد

وأضيق من غيبتك وأقول ربي معاك
وأحس كنك قريب وبالحقيقة بعيد

إن كنت زعلان لا والله عشت ابهلاك
وان كنت مشغول عني جعل دربك سديد

الله يوفقك يوم انه رزقك وعطاك
والله يخليك يا عمري وعمرك مديد

من عقب ما كنت في عينك وقلبك ملاك
الحين منك مريضه وأنت تدري أكيد​
 
قصيدة ( الوداع )

الله ياكبر العتب ولا الوله يامكبره
اموت من جرح الهوى واعيش في جو الصراع

جبرت راسي ولا انا قلبي يبي من يجبره
اعالج القلب المولع لين مت امن الصداع

حتى ان صبري فاض في قلبي ومليت اصبره
حاولت اداوي بالهوى قلبي بقدر المستطاع

مايوجع القلب العليل الا أن علم يسبره
ومايجرح القلب الخلى الا ليا صار الوداع

بحر الغلا ماعاد ليه حيل احاول واعبره
حتى تحطم مركبي بالبحر وانفل الشراع

ويوم انتهى حب مضى تاليه راح المقبره
مات الغلا والحب والاصرار والتفكير ضاع

لو للغلا منبر وقفت امن الوله في منبره
وقفت ميقاف القوي .. واعلنت اصرار الشجاع

ولو للمحبه درب ابمشي فيه دايم واشبره
وابقطع الدرب الشقي واخذ معه مليون باع

المشكله بإنه عرف حبه وقدره يخبره
عنده خبر باني احبه واعشقه حتى النخاع​
 
قصيدة ( اهتم فيني )

عيشتني مابين (ليه؟) و (هدي)
ودايم على أطباعي موقف ضدي ..

اتحملك من شان قلب عاشق
ولا أمورك وصلتني حدي ..

مره اعيش بحالة مرثيه
وأقول من فرقاك ودي ودي ..

ومره اقول اشتاق لك ياروحي
وأجيك ودموعي تروي خدي ..

طبعي مزاجيه وأحب ادلع
خل التكبر عنك يالمتحدي ..

توي صغيره لاتجيني كلك
الوقت ضيق والزمن متردي ..

لبستني ثوب الكبر من بدري
مر الزمن والثوب ماهو قدي ..

حاول تعيشني بجو هادي
واهتم فيني لاتكون إمصدي ..

عل وعسى نرتاح في دنيانا
لو كنت من فرقاك ماهو ودي ..​
 
قصيدة قوافي * قوافي

يالله تجبر عزاي وتدمح اثامي
والي تركني عساه ايحاسبه ربه

لي صاحبن من فراقه حطم احلامي
والشوق وسط الحشا يملاه ويكبه

زوله حديث الشعور وذكره إلزامي
وانا على سالفة ياليت وأربه

كتبت فيه القصيد وجفت اقلامي
وانادي الدمع ثم اقول له عبه

واشوف نور الامل لازال قدامي
وأحيان اشوفه يثيرالقلب ويشبه

لونه يحس بعذابي وحرقة الامي
ماكان يترك فؤاد مالقى طبه

كانه مسح من خياله دفتر ارقامي
ابمسكه من خيال الفكر واذبه

لكن حبه يزيد بقلبي الضامي
من زود مغليه صرت اشتاق واسبه

وأحيان اقول اه ليته ترجع ايامي
والله أحبه وأحبه موووت وأحبه​
 
قصيدة أحتاجلك حيل

(احتاجلك حيل) لكن ويش يمنعني
غير الحقيقه وهي من صادق أعماقي ..

ماعقبها غير ألا انك تودعني
لو كان حتى كلامك واضح و راقي ..

دايم افكر وهمس الروح يقنعني
وأسج عن عالمي واصارع اشواقي ..

حرام والله خبرتك منت بايعني
لكن والله حرام اخون ميثاقي ..

والله ماقلته الا الود يدفعني
والصدق بين وانا تمنعني اخلاقي ..

والله لو كان قلبي بالوفا يعني
ماكان بشرح هواي وبكشف اوراقي ..

لكن لي حظ بالدنيا مقاطعني
ولاشك عندي مكانك بالحشا باقي ..

ارتحت وافشيت هرج كان موجعني
ولا انت ياليت مايثر بك افراقي ..

اسمع كلام الغلا واقرى وسمعني
(انا على كلمتي تممت ميثاقي) ..​
 
قصيدة ( ظروفي )

ظروفي ,,, والله اعلم عن ظروفي
دموع العين تمسحها كفوفي ..

احاول اخفي العبره واغني
وانا من ضيقتي يزداد خوفي ..

حزينه والحزن مني وفيني
بدنيا مابها مخلوق يوفي ..

اعيش بهم واتعذب واعاني
وانا من اول اماري في سيوفي ..

لقيتك يازمن تقسى عليه
هواي الهم والبركان جوفي ..

عليله من ظروف واجهتني
حلفت واه يا مكثر حلوفي ..

هقيت اني بوقف بالموادع
قويه .. بس ماينفع وقوفي ..

تفارقنا وعني راح يمشي
وانا والدمع والجرح وحروفي ..

مشينا وكل واحد في طريقه
وانا امشي عنه وارجع له بشوفي ..

وخلاني على ذكرى حزينه
(فراق احباب) (والهم) (وظروفي) ..​
 
قصيدة / منبع

اليوم من سبة الاشواق تعبانه
تعبت افسر كلام الحب واوصف له

ماعاد للكلمه اللي قالها خانه
طبعي له سنيين بد الخلق يعرف له

افرح معه لافرح وازعل على شانه
واليا تكلم عذولي فيه اوقف له

الناس في نفسها بالحقد مليانه
للي يعزه من الاصحاب يهتف له

اليا افترقنا تعيش النفس حيرانه
واليا التقينا يصير امن اللقا حفله

لازلت من منبع الاشواق ضميانه
يازين كلمة احبك لو على غفله

ان جاتني ياهلا وصح الله لسانه
توي صغيره تراني بالهوى طفله

يشهد قصيدن كتبته وسط ديوانه
وتشهد بيوت سريعه مالها قفله

والله يشهد على اللي قلت سبحانه
لو شخص غيره حشى ماكنت بحلفله​
 
قصيدة / المعمعه

إيهيض قلبي وامسك اشواقي وتفلت من يدي
ولا انت لامن هاض قلبك ياحبيبي تقمعه

اشرح لك اشواقي وحبي والغرام ومقصدي
واليا زعلت اتطش حبي قدم عيني وأجمعه

أول اقول ان الغلا مايحرزه غير اولدي
والحين اقول ان الغلا ما يستوى إلا معه

إن قلت لي ياغايتي يامنوتي جيت أعدي
وان رحت عني ياحبيبي عشت وسط (المعمعه)!!

وصلتني لين (الثريا والكواكب والجدي)
والحين مدري وش علامك كل فكر ترمعه !

لاتستمع قول الردي جنب عن اهروج الردي
واهل النميمه والحسد والبلبله والمطمعه

واسمع كلام اللي يحبك ياحبيبي يبعدي
واليا نوى العاذل يثير المشكله لاتسمعه

صبرت لين الصبر مل وصار ليلي سرمدي
حتى هدب عيني من دموعي غرق في مدمعه

ماهوب ذنبي دايم اشواقي تخالفها يدي
بس القهر مدري علامك ليه قلبك تقمعه​
 
قصيدة / قلوب

قلوب الناس تملاها مشاعر صادقه وإحساس
وانا قلبي ملاه الدمع يومه سال من عيني

على خدي يسيل الدمع ياصل قلبي الحساس
الا يا بعد خدك ياحبيبي وينك وويني؟!؟

بكيت وعشت في جو القهر والظيم والهوجاس
ابولع عبرتي وامسح دموع العين بيديني

سهرت بليلي الحالك وانا بين الشقا والياس
أجر الصوت واغني على المسحوب وأهجيني

تعبت امن الشقا ياصاحبي وضاقت بي الانفاس
من غيابك تجيني ضيقتي والقلب مشقيني

تجي ذكراك لاهب النسيم وذعذع النسناس
إلا مني ذكرت أحداث صارت بينك وبيني

أقول اهواك يالغالي واعشقك ياعريب الساس
احبك لا تعذبني طلبتك لا تخليني

عسى ربي يحفظك لي وتسلم لي وعاش الراس
انا مجنونه ابحبك وجمر الشوق يكويني

احبك ايه احبك والغلا عندي بدون اقياس
أهيض اليا سمعتك قلت ياعمري وحشتيني​
 
قصيدة / العيون

يا غايتي ياسلوتي يافرحة القلب الحزين
ياراحتي يامنوتي ي حلى شعور الهايمه

جيتك أدور فرحتي واثر الفرح غايب سنيين
وأنته طوال الوقت عندي مير عيني نايمه

حتى صحت عيني وانا من صحوها واقول وين؟
قالت:تعالي وابشريبه يالعيون الصايمه

تكحلى وأروي عطش موقك وشوفي من تبين
شوفي حبيبك وابشري صارت حظوظك قايمه

لو قلت ي عيوني كفاك من التعب والله يعين
كافي ترى والله تعبت وعاد نفسي شايمه

يكفي تعب..يكفي شقا..يكفيك ياعيني حنين
تعبت ياعيني وانا اشقى بالظروف الظايمه

تعبت اجاوب حرقت(ن) في ظامري هم وانين
تعبت اناظر بالسما بعد الطيور الحايمه

قالت عيوني:اسمعي يا (نوض) عادك تفهمين
شوفي حبيبك قد وصل .. ماني لمثلك لايمه

قولي هلا بعد الغياب وعانقي بالعين عين
الله يا طعم اللقاء من بعد غيبه دايمه

كيف أنت .. يابعد الغلا عسا زمانك مايشين
ابطيت عني في غيابك والمشاعر عايمه

كن المشاعر بحر..وأمواج البحر شوق وأنين
صنته ولاني مثل غيري بالمشاعر سايمه

حفظت حبك ياحبيبي حفظ كن الحب دين
يامرحبا يأول طريق وياشعور...الهايمه​
 
قصيدة / مليت

مليت أجامل وأراعي وأترزز له
وأنطر وصوله وأعاتب لحظة اغيابه

إن كان هالوضع هذا حيل جايزله
وصلي وفرقاي عنده صار متشابه

بعيش في دنيتي مانيب منعزله
مادمت حره ولي بالمجتمع لابه

ومن هاجس العاطفه والعشق معتزله
والحب والشوق عنه شدة اركابه

من يوم صارت حياتي بالهوى هزله
يوم انتصافا وعشر أيام بطلابه

نويت اسافر بقلبي عنه واحجزله
واروح في رحلة(ن) والبعد يصلابه

إمن اول(ن) قلبي المسكين يرمزله
والحين أقول اه ليت الحظ ماجابه

خلوه يقرا بيوتي دامها جزله
وخلوه يعرف عن الخفاق وش صابه​
 
قصيدة / خمسة

ياليت لي خمسة ملايين فالبنك
(ومجمع العربيد) ليه الحالي

(تطريز) مع (نمنم) و(قيبير) مع شك
والبس عليه إمن الحلي الغوالي

والله لأبدع بالنفانيف والفنك
وحتى الجواتي مشتري غير (بالي)

وإمجمع (الاوقاف) لي واملكه ملك
(والصالحيه) (والمثنى) حلالي

لأمشي دلع مثل الحمامه على السلك
وسيارتي (BM) من حر مالي

واشري عماره واكتب الاسم بالصك
للي خذا عمري وروحي وبالي​
 
قصيدة / راجع

اقفى ويوم إلتفت لي قالي (راجع)!!
واليوم ليه ( ثمان ) شهور ماشفته !!

سهرت ليلي وجفنه نايم وهاجع
حفظة سر(ن) لعينه كنت حالفته

فرقاه ياغثها وسط الحشا تاجع
ولو يصبر شوي قلبي كان نتفته

أصبح غيابه على قلبي خبر فاجع
محد(ن) بعد غيبته جاني ووالفته

وينه حبيبي يجيب إعلاجه الناجع؟!!؟
تعبت أغني قصيد(ن) فيه ألفته

وتعبت أكرر كتاب الحب واراجع
اللي بوسط الظلوع الحدب غلفته

ماودي انه يجي ويقول نتراجع
حيثي أحبه وأحب اللي مخلفته

وينه ووينه ووينه قالي (راجع)؟!!؟
وينه تراني بموت إن كان ماشفته !!​
 
قصيدة / صفحه

فكرت أبكتب لي قصيده فريده
وإحترت مدري بدهن ويش أبدي؟

هذي إسبقوني بنشرها بالجريده
وهذي الا من قلتهاإنباح سدي؟

وهذي اعجزت تشرح عن اللي أريده
وهذي مصيبه موت وإن جات ضدي؟

وهذي معانيها لحقك عنيده
وصارت هواجيسي تجيب وتودي؟

حبك مقيدني ثمانين قيده
وقلبك حبيبي صاير(ن) مستبدي

عجزت اراجع في كتابك واعيده
وأنا بقوالشوق وصلت حدي؟

ماني بعد لاماك بنت(ن) سعيده
لا بالله الا ضعت من وسط يدي؟

كنت احسب(ن)فعلتك هذي مكيده
وأثورباعصابي وأصارخ وأهدي؟

ويومي عرفت إن المشاكل شديده
وعرفت بان الظرف ما عنه صدي؟

نويت أبفتح معك صفحة(جديده)
يا ليت تمسح دمعة(ن)فوق خدي؟​
 
قصيدة / الفصول

كل ما شفت المعاني وقربت الحلول
شفت في قلبي حقايق وهم شايله

وكل ماجات المشاكل تبا حبك يزول
مالقيت الا المدامع لخدي سايله

كيف بفرح وانت دايم من اطباعي زعول ؟؟
ياموريني نجومك بعز القايله

انت لك عدت معاني ولك عدة فصول
كل مافصلك تغير جلست احايله

ماعلي إمن الليالي لو العتمه تطول
بنتظر برق المحبه يجي واخايله

صرت لي اقرب من الناس من ذولا وذول
صرت لي اقرب من اسمي وأسم العايله

ايه اشوفك عاقل احيان واحيان امهبول
لكن انت اللي بقلبي خذيت الطايله

انت وينك لاعدمتك ترى جاني ذهول
والمشاكل ياحبيبي تراها زايله​
 
قصيدة / القطاعة

شيشتك والمقهى وأهلك وجماعتك
وأشغالك اللي ماتخليك ساعه

قدرت توفيهم بقدر استطاعتك
وانا على فرقاي عندك مناعه

لاصرت انا وياك طالعت ساعتك
واليا تكلمنا كلامك لكاعه !!

أول تحسسني ب أني اوداعتك
الله يستر لاتضيع الوداعه

علمتني وشلون حبك وطاعتك
ووريتني مر الجفا والقطاعه

لكن اذا ودك تطول قطاعتك
جرب على كيفك بحسب إقتناعه

وإن شفتها ماعاد تقدر مناعتك
عود على قلبي وبالحب راعه

وإن شفتها دنياك خانت وباعتك
تعال يامرحب وسمع(ن) وطاعه

لاعتني إظروف الليالي ولاعتك
واليا تفرقنا نعود جماعه​
 
قصيدة / الدمع

لو جمعت الشوق في لحظة لقاك
مايساوي شوق هالكون الكبير

من غرامك ضعت في لذت هواك
ودي ابقى معك لو عمري قصير

قلبي اللي يذكرك ماقد نساك
وخاطري من سبة الفرقا كسير

لو طلبت العمر فدوه قلت جاك
دام لك قلبن على قلبي أمير

ماحدن بالكون يستاهل غلاك
أنت في قلبي ولا غيرك خشير

وماحدن يقدر على قلبي سواك
أنت أول حب يالحب الأخير

ياعسى قلبي وروحي من فداك
ياغلا نفسي بهالوضع الخطير

ليت باق العمر اعيشه معاك
داو جرحي وإمسح الدمع الغزير

ياحبيب الروح قلبي ماعصاك
لو طلبت الصعب مع حبك يصير

أفرح بلقياك وأتمنى نداك
وأعشقك وأهواك وأحبك وأغير

ياعزيز النفس عالي مستواك
أنت غير وباقي العشاق غير​
 
قصيدة / قيد

(هذي قصيده توها قيد الإنشاء
في بدعها ياليت ربي يعيني)

حبك مضيعني من الحاء .. للباء
إجمع حروف الحب بينك وبيني

أنته حبيب الروح ماقلت لك لاء
اي والله إني اعشقك ياضنيني

لاغبت عني ياغلا نفسي استاء
وتضيق نفسي والقهر يبتليني

أذكر وجودك كل ماشفت الأشياء
وأزهق اذا شفت الحزن يحتويني

والشعر احساس ومشاعر وإيحاء
يوصلك يغلا الناس من نون عيني

أصبحت زهره وأنت لي يالغلا ماء
وإليا ضميت اتقول لي اشربيني

تروى الضما لو كنت لي بالهوى داء
وإن مت ياقصة غلاه ادفنيني

ماهمني ياصاحبي كثر الأعداء
وماهمني وش قالوا الناس فيني

إن جيتني فزيت بالزول لاجاء
وإن غبت عني أدري انك تبيني

ومن الألف يالين ماتاصل الياء
قصة غرامك قصة العاشقيني

الله فعل والله قدر وماشاء
إن الضروف اتكون بينك وبيني​
 
عودة
أعلى