1234

ديوان الشاعر / زياد بن حجاب بن نحيت حامل البيرق

ديوان قصائد الشاعر - ديوان قصائد الشاعره ارسال إلى Twitter ارسال إلى facebook
  1. *مزون شمر*
    13-03-2010, 07:10 PM

    ديوان الشاعر / زياد بن حجاب بن نحيت حامل البيرق

    ديوان الشاعر / زياد بن حجاب بن نحيت حامل البيرق


    ديوان الشاعر زياد بن نحيت


    نبذه عن الشاعر :


    ديوان الشاعر / زياد بن حجاب بن نحيت حامل البيرق

    زياد بن حجاب بن عبدالله بن عقاب بن محسن بن شبيب بن نحيت الحربي
    خواله:
    الوابل من الزويمل من سنجاره من شمر

    أما والده الشيخ حجاب بن نحيت
    خواله السردي من المسعود من الاسلم من شمر


    من مواليد الرياض 34 عام



    متزوج وله 3 ابناء و 3 بنات


    نبذه عن حياته:


    ضابط مراسم في وزارة الدفاع
    برتبة نقيب
    حاصل على شهادة الماجستير في الاعلام الامني
    ويطمح لاكمال مسيرته التعليميه والحصول على الدكتوراه


    تاريخه الشعري وبداياته:


    اول ظهور له حينما كان طالبا في كلية الملك عبدالعزيز الحربيه



    كان شاعر الكتيبه فهو شاعر حماسي وصاحب صوت مميز (يعتبر مفاجأه)


    له عدة مشاركات في النشاط الثقافي بالكلية.


    استمر لمدة اربع سنوات بعد التخرج يشارك في احتفالات تخريج الضباط الجامعيين بين يدي
    صاحب السمو الملكي الامير سلطان بن عبدالعزيز ولي العهد ووزير الدفاع والطيران والمفتش العام

    كما شارك في أهم مناسبات القوات المسلحه

    له عدة مشاركات وطنيه أخرى كان أبرزها قصيدة الارهاب اللتي القاها أمام خادم الحرمين الشريفين
    الملك عبدالله بن عبدالعزيز حفظه الله.
    نالت استحسان الملك واثنى عليه شخصيا.

    تمت دعوته من قبل ادارة التعليم بالمنطقه الشرقيه لاقامة امسيه خاصه بحفر الباطن
    تعتبر هي اولى امسيات الشاعر

    حظرها جمهور غفير كما حظرها والد الشاعر الشيخ حجاب بن نحيت

    كلف رسميا لاعداد قصيدة المشاركه في مهرجان ملتقى ابل قبيلة حرب.

    شارك في برنامج شاعر المليون للموسم الثالث و خطف لقب شاعر المليون
    بعد أن شهدت الحلقة النهائية منافسة شديدة بين الشعراء
    وسط أجواء مليئة بالحماسة والمتعة والشاعرية,
    حيث تم الإعلان عن الفائز باللقب وهو الشاعر زياد بن حجاب الحربي
    وعلى الرغم من أن جميع شعراء الحلقة النهائية سعوديون
    إلا أن الحظ ابتسم لزياد بن حجاب وحصل على نسبه نهائية فارقة 81,
    بينما كان الأقرب إليه الشاعر عايض الظفيري ونال 65 وحصل على المركز الثاني ..

    هو اول شاعر سعودي يحصل على البيرق ويفوز بالقب 27/03/2009

    هذه بعض المعلومات التى استطعت الحصول عليها عن الشاعر


    تحيتي
  2. *مزون شمر*
    13-03-2010, 07:12 PM

    تبت يدين مجمعين الملايين

    ديوان الشاعر / زياد بن حجاب بن نحيت حامل البيرق


    تبت يدين مجمعين الملايين
    اللي يبيعون الأوادم بالأموال

    وعاشت يدين الطيبين الميامين
    اللي شروا بالطيب وقفات ورجال

    علمتنا ياحمود وش يعني الدين
    ذكرتنا تاريخ وامجاد وافعال

    علمتنا وش يعني اللطف واللين
    في ساعة فيها البلاوي والأهوال

    وعلمتنا وش لون مخلوق من طين
    يشيل حمل(ن) مايشيلنه جبال

    وعلمتنا وش يعني الزين والشين
    وعلمتنا وش يفرق النون والدال

    سامحت رغم انك تعاني من الدين
    وبركت لحمول يابونايف ثقال

    فتحت من طيبك وعفوك ميادين
    واحرمت مانعها وحطمت الأقفال

    ذكرتنا باللي نسينا من سنين
    يوم الوفا والطيب مضرب للأمثال

    يوم المهادي قصته تبكي العين
    ويوم البلالي موقفه موقف رجال

    قالوا وليدك مات! قلت الله يعين
    لله عفيت ولابي لعفوي ريال

    واخفيت حزن الأب ماودك يبين
    حزن تكنه لكن الحزن قتال

    كرمت جارك عن حياة المساجين
    وعزيت ربعك عن سخافات جهال

    ماتوا لك عيال! وبقى عيال حيين
    حنا فداك-!! وكلبونا لك عيال

    حنا سعوديين ونطبق الدين
    من قبل لا نحمل بطاقات الاحوال

    حنا الشموخ اللي يهز السلاطين
    حنا الظلال اليا الزمن شح بظلال

    حنا السحاب اللي يغيث المساكين
    تمشي بنا الدنيا من الجال للجال

    تفخر بك الدنيا ويفخر بك الدين
    وانا يشرفني ليا قلت ياخال
  3. *مزون شمر*
    13-03-2010, 07:15 PM

    قصيدة - الطلاق

    ديوان الشاعر / زياد بن حجاب بن نحيت حامل البيرق


    ماكان قدامي يابو ثامر حلول الا الطلاق
    مادامها ترغب مفارقي فانا طلقتها

    كلش يطاق الا الأهانه شي يقهر مايطاق
    وانا على شان الأهانه شمت مارافقتها

    مدام مفهوم المحبه بالتلاقي والعناق
    وش فايدة حبي لها لاصار ماعانقتها

    حبيتها واهديتها عمري وشديت الوثاق
    ويوم النفاق أفضل وسيلة وصل مانافقتها

    مانيب غالي عندها والناس لارضاها سباق
    وأنا على غير الكلام اللي يبونه سقتها

    فتحت باب الوصل لكن حطت بوجهي رواق
    ويوم فتحت بيبان الألسن بالسلاح اغلقتها

    وأنا الى من المسائل عاكست والصدر ضاق
    ولكن قدامي طريق الأ الحريق احرقتها

    وسام تحرير الكويت اثبات لاطماع العراق
    غلطه قديمه وانتهت لو كان ماصدقتها

    والناس لاموني على الفرقى وقالوا بتفاق
    ليتك يابو طارق صبرت شوي لو علقتها

    لكن أنا ماكان قدامي حلول الا الطلاق
    بغيت اعلقها وخفت ابلشبها وطلقتها
  4. *مزون شمر*
    13-03-2010, 07:19 PM

    قصيدة - الحياه

    ديوان الشاعر / زياد بن حجاب بن نحيت حامل البيرق


    الحياه الي بها تاريخ ودروس وعبر .
    . ليه ماتصدق مع الي حافظين دروسها

    لي شهر ولا بعد يمكن اكثر من شهر .
    والعرب مدري وراه شاينات نفوسها

    لا .. وفيه كويتب مسكين ماصدق خبر .
    قال اهاجم هالحموله واستدر فلوسها

    كان تقبل راي اخوك اركد ووفر بالحبر .
    ولاتعض ايد الكرامه وانت قبل تبوسها

    ماكبر قدرك الا اننا بنيناه وكبر .
    وش تبي بافراح عمانك تجي وتحوسها

    كان بك سكر وضغط انصحك تاخذلك ابر .
    وكان كبدك فايحه غل انتبه لتروسها

    الحسد والحقد عمره ماجلب لاحد نصر .
    والعرب ماهمها ناس تسن ضروسها

    جيت اقابل هالنعام ولا لقيت الا صور .
    تتقي باذنابها وتدس عني روسها

    خمتن جحادت المعروف قايدها عور .
    ضيعت وقت الصلاه وضيعت ناموسها

    جنة الانهار والاشجار والروض الخضر .
    ماعلى سكانها من وزوزة ناموسها



    ديوان الشاعر / زياد بن حجاب بن نحيت حامل البيرق
  5. *مزون شمر*
    13-03-2010, 07:21 PM

    قصيدة - المشايخ والقضاة

    ديوان الشاعر / زياد بن حجاب بن نحيت حامل البيرق


    مادامها وصلت بعد حتى المشايخ والقضاه
    وش عاد باقي يازمن وش عاد باقي يازمن



    هذا الزمان اللي به الانسان يتمنى الوفاه
    لان الحياه تكون فيه من الفساد بلا ثمن



    حنا عرفنا اسم المرض لكننا نجهل دواه
    حتى العيون من الرماد وقلة الحيله عمن



    مافيه شي به الزمان المر ياخذ مستواه
    ماكان فالطامن علا وماكان فالعالي طمن



    واليوم يوم المرتشي كلن يبي يكسب رضاه
    يقول له ياسيدي بالله وش تطلب تمن



    والناس تمشي تتبعه والى ركض تركض وراه
    حتى البنات بهالزمن لارضاه للشيله رمن



    الله ياوقتن به الرجال ماكمل بناه
    الله ياوقتن به الصعلوك بالرشوه سمن



    الجوع مايرحم وراع الطيب مافاده وفاه
    والنذل هذا وقته اللي فيه للعيشه ضمن




    ديوان الشاعر / زياد بن حجاب بن نحيت حامل البيرق
  6. *مزون شمر*
    13-03-2010, 07:23 PM

    قصيدة - مالك لوى

    ديوان الشاعر / زياد بن حجاب بن نحيت حامل البيرق


    والله اني ماتعذر عنك ياصوت الحفيف
    مير انا وياك يامجمول بالحاله سوى

    وانت مايخفاك بان الوضع بالغابه مخيف
    وكل ذيبن لاخلا بطنه من العيشه عوى

    وانت لاتمسي فقير وتصبح بعقل خفيف
    غير وضع الموت كلش عندي لطبه دوى

    مير لاتقعد تخبط بالعصا مثل الكفيف
    تركض وتومي ثيابك كل ماهب الهوى

    نعنبو غيرك ترا سيفي ماهوب ايات سيف
    لايحوشك سيف ابو طالب الى منه هوى

    وانت جيت بوجه عز وتدعي بانك شريف
    والنوايا خافيات وكل شخص ومانوى

    جيتني تشكي من اللوعات والحال الضعيف
    والضعيف اليا لقاء التاجر على بيته ضوى

    لايحلم الجندي المجهول باحلام العريف
    الفعل ماهوب واحد والرتب ماهي سوى

    والشتاء والصيف رحله ماذكر فيها الخريف
    لوذكر تاريخ عنتر حي لعيون الجوى

    ياهل الفكر الثمين وياهل الفكر السخيف
    الطمع من خلقة الدنيا لملعون الثوى

    والظلال يعيش به من يشكي الجلد الرهيف
    لايجي له شمس جلدن لاوجس الحر انشوى

    السمين اللي نسى انه كان من جوعه نحيف
    علموه انه يبي يرجع على مص النوى

    وان بغيت تطيع شوري خلها موقف طريف
    والا انا كانك ملزم قلت لك مالك لوى



    ديوان الشاعر / زياد بن حجاب بن نحيت حامل البيرق
  7. *مزون شمر*
    13-03-2010, 07:27 PM

    قصيدة - حضرت ولامعي

    ديوان الشاعر / زياد بن حجاب بن نحيت حامل البيرق


    حضرت ولا معي غير الوفا اللي يكتب الأبيات
    حضرت ولا معي غير المحبة محتفظ فيها

    و انا ما نيب مادح فيصلي طوع الصعبات
    على شانه يعز المنطقة و يعز أهاليها

    انا جيت و معي صك و وكاله ثابته بإثبات
    على كل المشايخ بالمحاكم تعترف فيها

    أخذها ابوي من جدي وانا جيتك بها بالذات
    ابيك تشوف بينها وابيك تشوف خافيها

    بها مكتوب من عقب مثل فيصل ولد ما مات
    وخالد من ملوك فعلها بالخير يحييها

    ترانا ما نسينا يا ولد خالد زمان فات
    زمان تفتخر فيه الرعية باسم راعيها

    رعاها خالد الوالد بحب الشعب مهي أصوات
    وخلد في كرم شعبه قصص للناس ترويها

    بنينا بعهد ابوك فلل عقب ما بيوتنا بويتات
    هو اللي أسس بناها قبل ما الناس تبنيها

    هقو فيه العرب هقوه ولاخابت به الهقوات
    ولا و الله يخيب هقوة محتاج هاقيها

    من اللي كان في عصر البداوة يصنع إنجازات
    من اللي سيرته ملح الحياة وعطر ماضيها

    أبوك السمح راع الرمح سيف ورمح باللقوات
    أبوك الشمس طهر الأمس كان الطهر يكفيها

    أبوك انسان عادي لكن الله خص بع ميزات
    مثل ماخص ابو متعب بميزات تحاليها

    مابين النار والجنة عيونه تحكم النضرات
    ولا فكر بهالدنيا وبأيعها وشاريها

    رجل حلم ورجل علم ورجل دين ورجل وقفات
    زهد فيها يعرف انه يبي بكره يخليها

    مصيفه كان بالطايف ومرباعه ورى التنهات
    صيامه في حرم مكه وطيبه ما يخليها

    بكى من خشية الله لين دمعه بلل الشيبات
    ومسح دمعات عين خوف فعل الله يبكيها

    وهذا المهرجان اللي نعيشه هالسنه بالذات
    بدا بأمرك من المسجد..(رساله) واضحه فيها

    بأن الفرق واضح فرقو ياناس بالاصوات
    تبي ترفع نداء الله والحفلات نلغيها



    ديوان الشاعر / زياد بن حجاب بن نحيت حامل البيرق
  8. *مزون شمر*
    13-03-2010, 07:29 PM

    قصيده - شارع الشانزليزيه

    ديوان الشاعر / زياد بن حجاب بن نحيت حامل البيرق


    هذي بداية شارع الشانزليزيه

    هذي نهايه للحيا والرجوليه


    جينا نشوف الناس وش عينو فيه

    ناس تقل تاخذ لمليه عموله


    مليان من راسه الي حد رجليه

    فيه الاوادم حذف من كل دوله



    احد(ن)يجي شحاد واحد(ن) يجي بيه

    كلن يجي شكله بحسب السيوله


    هذاك لابس له قميص(ن) مكفيه

    وهذا قيص اخوه ماهوب بطوله


    وهذاك مدري وين والله اوديه

    قمت انوثه والمواري فحوله


    شواربه تاصل الي حد اذانيه

    واليا حكي نغمات بنت معسوله


    كل شخص يبغي الي يسوي يسويه

    وكل شخص يبغي الي يقوله يقوله


    ما عندهم وشلون ما عندهم ليه

    ماعندهم كلمة خجول وخجوله


    متقاضبين وكلن بجال كافيه

    والزين كلن وده يصير حوله


    ماعندهم مبداء ولاعندهم فيه

    وكل شي صعب يصير فيه بسهوله


    وانا معي ديديه وش صار ديديه

    شكله وهو جنبي تقل ربع توله


    لو وقف بجنبي ولو يرفع ايديه

    لاهو بلاطولي ولاني بطوله


    لو مانتبهت لسكتي كان واطيه

    الله يفارق بين زولي وزوله

    لبيه يابريده ويا نجد لبيه

    عشقي من ايام الصبا والطفوله


    فقدت صوت(ن) خمس مرات نوحيه

    صوت المأذن لارتفع وش يطوله



    ديوان الشاعر / زياد بن حجاب بن نحيت حامل البيرق
  9. *مزون شمر*
    13-03-2010, 07:31 PM

    قصيدة - أنا مشكلتي

    ديوان الشاعر / زياد بن حجاب بن نحيت حامل البيرق


    أنا مشكلتي اني لا عشقت اعشق بدون شعور ..
    أصير من أمس الأول صيدة(ن) بيدين محبوبي ..

    أهيم ببحرها وأبحر ولو ماني خبير بحور ..
    على وجهي ولا أدري وين مرسايه ومكتوبي ..

    هنوف (ن) دربها شوك وغرابيل وشقا وعثور ..
    أبمشي صوبها وأقبل مدام عيونها صوبي ..

    وأبكتب في محبتها قصيد(ن) يطرب الجمهور ..
    مدام اني مع الشعار شاعر مالي(ن) ثوبي ..

    لها خصر(ن) نحيل(ن) يرتطم به شعرها المنثور..
    لها عنق(ن) طويل اليا انحنى غنيت مسحوبي ..

    غدا قلبي صويب من العيون الناعسات الحور..
    لو أهرب وأبتعد عن حبها ما أبطيت بهروبي ..

    وأنا لو ما قدرت أكتب قصيد بزينها معذور..
    وش أكتب عن جمال(ن) لاذكرته بانت عيوبي..

    أخطط قبل أقابلها ولا ودي يبين قصور ..
    وأجيها وأتجود وأحترص ويبين عذروبي ..

    هي أجمل بنت بالدنيا تعيش وعرضها مستور ..
    حسب ذوقي.. تقديري.. تعبيري.. ومطلوبي..

    هي اللي خلقها من نور كان أحد(ن) خلق من نور..
    لو أرسمها مثل ما هي قصر من دونها أسلوبي ..

    أنا دكتور دكتوره وهي دكتورة الدكتور..
    نداوي بعض ولا ينتهي عمري وأنا عزوبي ..

    ولا به غيرها من يملك دوا الخاطر المكسور ..
    ولو راحوبي وجوبي ولو جوبي وراحوبي ..

    وأنا طبحت مدري طحت لا راضي ولا مجبور..
    ولا أدري هو سببها حظ ولا أسبابها ذنوبي ..

    سقتني كوب ماء صافي وأثر فيه البلا منثور ..
    ومن هاكالنهار أقصد وأغني من بلا كوبي ..

    أمامي قصة(ن) ما اشوف فيها للشجاعه دور..
    ولا ماني أردى من صلاح الدين الأيوبي ..



    ديوان الشاعر / زياد بن حجاب بن نحيت حامل البيرق
  10. *مزون شمر*
    13-03-2010, 07:37 PM

    قصيدة - ياللي تفكر بجد بقتل عبدالله

    ديوان الشاعر / زياد بن حجاب بن نحيت حامل البيرق


    القصيدة هذي لحجاب بن نحيت الاب
    قصيده وطنيه في الملك عبدالله ملك الانسانيه ..
    اعجبتني ونقلتها هنا




    ياللي تفكر بجد بقتل عبدالله
    أو ما تفكر بجد أو بس يطري لك

    نفذ إذا تقدر التنفيذ هه ياله
    نفذ بنفسك ولا ترسل مراسيلك

    ما تدري إنك بقتله تقتل المله
    والعدل والحق تصبح من مقاتيلك

    وكل القيم فوق الأرض تصير مختله
    لا تحسب إنا نصفق لك وندعي لك

    قتله كما قتل شعب المملكه كله
    لا تحسب إنه رخيص العمر ياحليلك

    هذا الأمل كان رب البيت مهله
    تشوف فعله وما يخفاك يبدي لك

    وهذا الذي لو تجيه من الله العله
    ما نعرف إلا انت واعرف وش نسوي لك

    لو كان ما هو من اللي سهل يحبل له
    وفر حبايلك لا تصيدك محابيلك

    الشعب يعرف عدو الشعب ويدله
    انته وغيرك ويا ويله وياويلك

    بانت لنا شلتك يا ريس الشله
    وإن كان تقدر تعال اطلع مهابيلك

    وشريكك اللي توصي له وترسله
    لابد من يوم تشكي له ويبكي لك

    تدري وش اللي يقع لو نجحت الزله
    بتحليل عقالنا ما هو بتحليلك

    تولع الأرض تحت أقدام خلق الله
    سبة سواتك عسى الله ما يسوي لك

    ابعد عن الخط الأحمر زود وافطن له
    من قبل ما يقررون الناس تبديلك



    ديوان الشاعر / زياد بن حجاب بن نحيت حامل البيرق
1234