قصيدة ماتوا احبابك - عبير بنت أحمد


من قصائدها العاطفيه ....

~ ماتوا احبابك ~






على بيض النوايا والقلوب الطاهره تنويك
وانا ادري فيك تدري بي وتدري فيني ادرى بك

وانا مابين ايه و لا .. سألتك لو يجي تشكيك
أبي بس اعرف ان اللي ذبحني ما بعد صابك !؟

يشوفون الربيع فعيني اللي لا حضر طاريك
نبت جفني زهر وانفاس روحي تنشر اطيابك

تبيني لك هوى ؟ خذني خفوق جعله يسليك
وش احلى ما يجيني غير حبك واجمل عتابك

أحبك والذي حط الحنان ف راحتين يديك
أحبك والذي خلى الشدايد تحسب ا حسابك

ويمكنك تعرف اني احبك واعشقك واغليك
ولكن لو تعرف اللي كتمته.. ضاعت ركابك

أغير وما بغير إن غرت لامن ذا ولامن ذيك
باغير امن (العبير)اللي سكن في زهرة اهدابك

واناذكر لي عيون ( بالعسل) مخلوقة تشفيك
و( سودها ) الكحل لما بكت من هاجس غيابك !

وفي لحظة تلاقينا سجدت لخالق معطيك
طهر كل القلوب و دعوة تلهج ب محرابك

حبيبي لا تقول الاه ماعاش الألم يشقيك
ابقطع له يدينه لو لمس بك طارف ثيابك

حبيبي لا تقول موادعك.. لوهالوفاة تجيك
بأودع باقي ا سنيني واضم فقبري ترابك

حبيبي لا تموت ميته ما عاشت الا فيك
وانا لا مت فدوة وان حييت؟ و ربي / احيابك

ياليتك يا حبيبي بس / تبيني مثل انا مابيك
بتدري ليه احس الموت كل ما مرني / جابك

ولو مات الهوى اللي بك تغلغل / لاحشا مأرثيك
متى حنا عرفنا لك حبيب حي واودى بك ؟!

انا والله مأرثي غير بيت ما كتبته فيك
عسى الله يغفر ذنوبه على انه مات باسبابك

بتبقى هالجبال الشامخة توقف لك تحييك
ويبقى هالبياض اللي تباهى فيك.. يحلى بك

بيبقى هالشعور اللي جرى في دمي يناديك
وتبقى هالقصيدة تحتري .. لو ينقفل بابك

و رغم ان النوايا بيض / ابطلب ربي يجازيك
وانا ادري ما يموت الحب لكن.. ماتوا احبابك







قصيدة ماتوا احبابك - عبير بنت أحمد