قصيدة إحتضار - عبير بنت أحمد


من قصائدها الوجدانيه ...


~ إحتضار ~




الموت امنا به إن مات محبوب
مير البلا من مات قلبه وهو حي !

ما ينفعه لو هو صبر صبر أيوب
دام الأماني ما تزيده سوى غي

يهرب من الدنيا ولا يلحق هروب
وتركض له الدنيا ولا شافها شي !!

كن الليالي لابسه طلعته ثوب
ما غير تفرق بأنها أبيض شوي !!!

وفكل أسبوع يمر....( سبعة قلوب..
..تموت في صدره) و لا مرها ضي

نصفه جماد .. ونصفه احساس مسكوب
واكثر جروحه ناضجه .. والعمر ني !

الله يفرج كرب من كان مكروب
يطوي همومه كلها بالرضا طي

الموت .. امنا به ومات محبوب
مير البلا ما عاش عقبه ولا حي



قصيدة إحتضار - عبير بنت أحمد