قصيدة ميلاد انتحاري - عبير بنت أحمد



من قصائد الفراق...
ميلاد انتحاري ~



أدري انه ما يهمك بس جيتك : شوف عينك
منها اسلم عليك.. و.. منها ارد اعتباري

يوه لو تدري.. جهاتي الاربعه - بيني و بينك –
كلهم من زود حبك زاحموا فيني يساري !!!

علموك شلون ترفع راسك و تعقد يدينك
ما تشوف إلا عبيد وخافقك كله جواري !!

إلتهيت انت بغرورك قلت اجل خله رهينك !!
خفت لا تكسر كلامي، كافي فيني انكساري؟؟!!

يوه يا ذيك المحبة.. وينها.. ويني .. وينك ؟!
هو صحيح ان المشاعر كل مافيها تجاري !؟؟؟

أنتصر لك فالمحافل لاجل نقهر عاذلينك
وانت . قدام العواذل تنسحب ما جبت طاري ؟!

ما دريت اني بكيييييييييت ولا بكيت إلا لعينك
والمصيبة وش يهونها علي لا صرت داري ...!

وين كنت انت الذي لا شفتني يشرق جبينك
ما بقى من ذكرياتك غير تنهيدة نهاري !!

لا تعودني صدودك يرحم الله والدينك
كيف يتحمل دلال المترفة عيش الصحاري

كان جالك عز مني .. رده.. الله لايهينك
نفسي ارجع يوم والقى غير ذلي فانتظاري !!!!

قلي وين ألقى دموع في حياتي ما تدينك؟
إرتكب جرمك ولكن خل موتي باختياري !!

حست ابو التاريخ!! ادور عن ولادة ياسمينك
مالقيت الا وداع فيه ميلاد انتحاري !!!

ادري انه ما يهمك بس جيتك : شوف عينك
جيت باسلم عليك.. ورحت من دون اعتباري



قصيدة ميلاد انتحاري - عبير بنت أحمد