قصيدة ربعي الخالي - عبير بنت أحمد


من قصائدها العاطفيه ...

~ ربعي الخالي ~





قصيدة ربعي الخالي - عبير بنت أحمد






ول من ليلي اللي ضقت من طوله
وش بلا الصبح ما يشفق على حالي

وين محبوبي اللي لا طرى زوله
جاب فيني قديم الشوق والتالي

قد هجرت القصيد.. وقلت: وشوله ..
.. أكتبه .. قبل يعرفني و يقرالي

ويوم هو جا لنار الحب برجوله؟؟
الله يعين من حطيته ف بالي

صاحبي كل من في الأرض فزوله
كيف اجل ما يفز الشعر للغالي

وكانني ما كتبته فيه .. ما اقوله
فدوة له جديدي .. لو غدى بالي

كيف بأصبر وعيني دوم له توله
قمت اخيله / مع انه واقف قبالي !

له (من الراس لين اصابعي) .. دوله
و له علي الولا.. مادامه الوالي

مو غريبه اذا اني فيه معذوله
ومو غريب ان تولع فيه عذالي

ساد عامي ربيع .. فأربع فصوله
والزهر صار ميزة ربعي الخالي

صاحبي ذاك لا مثله ولا حوله
هو هلي ذاك لا عمي و لا خالي

ذاك دمعي لقى في حضنه هطوله
ذاك كتفي لقى في ساعده .. شالي

ذاك مالي عذر لوكنت مشغوله ..
.. عنه/ في غير خمس اوقات/ ب جلالي

أدعي الله عسى الدعوات مقبوله
يجعل اللي عجبني فيه / فعيالي

قالوا العمر واحد.. قلت: أبد.. هو له
يا نتقاسمه والا اموت بلحالي

قالو الجرح جرحه .. قلت : معقوله؟
وانا اقول اشعلام الجرح.. يحلالي !

وقالوا الظاهر انك صدق مهبوله
قلت من حب عقلي .. هاوي هبالي







قصيدة ربعي الخالي - عبير بنت أحمد