ديوان الشاعر متعب التركي المطيري


الفاتنه


يامبارك الريم شفته واقف ابابك ..... مكحول الاعيان لابس ثوب دراعه

سميته الريم يوم انه تذرابك ..... والخاتم الماس ويلمع لمعة اصباعه

يابو لثام جميل الشوق غنابك ..... يالشامخ الروح صارة بيدك وداعه

اهلين في طلتك مرحب وحيابك ..... لو أن روحي عليك اليوم ملتاعه

ياويل حالي بصدي ملتوي دابك ..... معك شلع قلبي وردنه اصباعه

جيت اتقضى تكمل ناقص ثيابك ..... وحنا لك ارواحنا وقلوبنا بضاعه

تكفين يالفاتنه قولي لمن جابك ..... إن البشر تشتكي من حسنك ضياعه

حوادث الناس صارة كله اسبابك ..... من فندق الخالدي لشارة الساعه

وتكفين يالفاتنه لايطول غيابك ..... حبك زرعته انا في قلبي زراعه

والله لو إن قلبي حسب حسابك ..... قلبي من اجلك تسوقه راحة ذراعه

ويمبارك الزين لاشفته على بابك ..... قل متعب يسلم ويشكي لك اوضاعه

وإن جتك يمبارك وقصده تقضابك ..... ببلاش عطها عليك السمع والطاعه

شعر / متعب عبدالله التركي المطيري
 

الجوهره


ياميرة المينا وياعقد الالماس ..... يافتنة الشاطي ويالمعة الطوق

يالجوهره يامعجزة كل عطاس ..... دونك هلاك الموج حاميك من فوق

وحوت البحر والقرش لعينيك حراس ..... واللي تجرى يسرقك صار مسروق

وحكم عليه الحوت يعدم وينداس ..... وعذر الملك لشعب هذا جزا البوق

يالجوهره لروح حبك ك الانفاس ..... والقلب ينبض به ومشاه بعروق

ولو تاقف الانفاس مع شلعة الراس ..... حبك بقا فيني وساكن بمعلوق

ياميرة الاحساس يا أصدق احساس ..... يانجمة الاشعار وياروعة الشوق

يامنبع الالهام مع نشوة الياس ..... ياسلسبيل الحب وياقمة الذوق

يالجوهره ماشفت مثلك مع الناس ..... انتي غرامك غير عن كل مخلوق

شعر / متعب عبدالله التركي المطيري
 
منيره


الديره منيره اثره منك يامنيره ..... وانا احسب انه من اللي كبسه مدور

صحيح والله قمرنا به قمر غيره ..... والكون كله ترى من طلتك نور

مفاتن الحور وانتي توك صغيره ..... الله يستر علينا منك نتهور

شدي لثامك ترى في شدته خيره ..... لاتوضحين المبيسم لجل مافور

انا معاك احترق بخلاصة الغيره ..... حتا بعيونك هلاكي شفته مصور

لا واخسارة زمان فات تبذيره ..... انتي هوى قلبي وغيرك فلا ادور

ياعل تفداك روح بعدك بحيره ..... وحبي لغيرك ترى يامنيره مزور

ويامنيره القلب دوم يخون تعبيره ..... لكن غلاك بظميري كون ومسور

والديره منيره اثره منك يامنيره ..... وانا احسب انه من اللي كبسه مدور

صحيح والله قمرنا به غيره ..... والكون كله ترى من طلتك نور

شعر / متعب عبدالله التركي المطيري
 

نوره


النور من نورك منور للانوار ..... واكبر دليل اسمك مع الناس نوره

ياعزوة الحكام ويانسل الاخيار ..... يامنبع الامجاد وياساس سوره

الله يفكك من تصاريف الاقدار ..... يابنت من مشى الاوادم بشوره

ياسيدة ذالجيل وياجيل بدار ..... انتي حظور صار واجب حظوره

يامنتهى الاحلام ومفتاح الاسرار ..... ياجمل شعور ضمني في شعوره

متشكله في رقتك مثل الازهار ..... ومن طيب قلبك خصني في عطوره

والله انا مانساك لو صار ماصار ..... رسمت لك بالقلب يابنت صوره

فيك افتخر واقولها سر وجهار ..... انا اشهد انك نجمة في عصوره

الشعر في شرواك والله يحتار ..... محد يلومه فيك تنضب بحوره

وإن كان به تاج على روس الاشعار ..... انتي ترى تاجه وقمة سروره

شعر / متعب عبدالله التركي المطيري
 

الهنوف


اسألك بالله قولي يالهنوف ..... اللعيون اشلون تقدر تشبعك

وش بقول انتي كمال بالوصوف ..... الحلا والزين كله منبعك

قلتها مجبور حدتنا الظروف ..... القصايد يابنيه تجزعك

إن كتبت البيت ضيعة الحروف ..... ابتدي ثم انتهي ثم ارجعك

القلم وشلون يكتب والكفوف ..... تردد التصفيق لجل تسمعك

طارة الطيران مع راع الدفوف ..... إن وقفتي ثم مشيتي بصبعك

وإن تمايلتي تصاقط لك الوف ..... صرتي الفايز وكل شجعك

لعنبو حيك طغيتي بالردوف ..... كنك تقولين جيت اولعك

والشعر منثور من فوق الكتوف ..... الله الله ياحلاهم مروعك

من يقول الموت في ضرب السيوف ..... والله إن الموت ساكن مدمعك

شعر / متعب عبدالله التركي المطيري
 
الريم


الريم كثرة عجايبها ..... والوصف بيح لمكنونه

الشعر والله يحير ابيها ..... غطة على كل مزيونه

طول على الكيف صار ابها ..... لاقصر لاطول موزونه

لامن تخطة اراقبها ..... ودي تمشى على هونه

إن شالة الردف يتعبها ..... وضافي على ردفه قرونه

الخصر وشلون قاضبها ..... معذور لو مالة غصونه

بالهون بالهون ياعنبها ..... شلعة قلبي من حصونه

الرقه اللي تلاعبها ..... تطغى على العود ولحونه

ومن الغنج طاح غاربها ..... لولاه ثابت على متونه

وشفته لولو مرتبها ..... العقد كنه على سنونه

الزين يضمى ويشربها ..... والزين نصه على عيونه

العين فارس وحاجبها ..... سيف عطيبات اطعونه

صاطي وجراح مخلبها ..... وللقرب ماتعرف العونه

إن شفتها قلت بنهبها ..... واعوذ بالله من الخونه

ليت المحبه تداعبها ..... وتظفي على الحب قانونه

اتحس في حب كاتبها ..... وتمشي على الحب وفنونه

متى لي الله يقربها ..... هي علة القلب وحزونه

الحال دقة سبايبها ..... والزين مقفي بمرهونه

الروح لا لا تعذبها ..... ياصاحبي فيك مجنونه

النوم عيني محاربها ..... مدري عن النوم وش لونه

شعر / متعب عبدالله التركي المطيري
 

ليه وطيت عن خيل السروج
.......................ليه مديت عقب القراح الهماج

لا تجمل لي الغلطات والعوج عوج
.......................يضحك احجاج او ينعقد لي حجاج

اصبر اشوي وش علمك تهوج وتموج
.......................ميت القلب مثلك مايعرف الهياج

ماتعودت اجامل معتلين البروج
.......................الزم العلم قبل يصير هرجك سماج

المشاعر تحي مثل المعاصير هوج
.......................ونت مالك على هوج الرياح احتجاج

جيت وقلوب حسادي تميل وتروج
.......................لا صفى جوهم ساعه قفاه العجاح

ابتسم لك وهمي فوج يقفاه فوج
.......................من يحبك لزوم ايصر مثلك هجاج

بس قلي ونا غلطان لك ومحجوج
.......................وين يلقون لجروح النواعس علاج

القمر غاب وانت اطفيت نور السروج
.......................قلت يكفيك نور الوجه الاصبح سراج

كن بين الضلوع العوج صفقات موج
.......................يوم فاض الغلا والشوق والقلب هاج

ضيقة الصدر لو بين المحاني تلوج
.......................كل ضيقة لها عند الكريم انفراج

ماهو الغيض سبت كل ابو هالهروج
.......................بس مالي على بعض السوالف مزاج

متعب عبدالله التركي المطيري
 

قبل اسافر وتنسى جيت اسلم عليك
.......................جيت ابي عمري اللي من يديني غدى

ضاعت اجمل سنيني من عمايل يديك
.......................اكذب ان قلت راحت لاجل عينك فدى

فرصة العمر قالوا لا غدت ما تجيك
.......................جتني اكثر فرص عمري وضاعت سدى

جرب الخوف مره حس به يعتليك
.......................وارفع الصوت ماتسمع لصوتك صدى

تدري اللي ذبحني قولتك ما ابيك
.......................مابقالي لثاري لو بغيته مدى

ما هقيت المشاعر كلها ترتجيك
.......................قل لها بالمفارق منهو اللي بدى

هاك دمعة عيون(ن) باكيه تشتكيك
.......................هاك ريح ضمير(ن)ما استراح وهدى

ما تناظر عيوني زول هذي وذيك
.......................ما يهز المسامع اسم ريم وهدى

قلت ماعادلي رغبة وشوفات فيك
.......................قلت يا نفس طيبي يفرحون العدى

قلت عايف ونفسي بالخفا تشتهيك
.......................عزة النفس تدري طيب ما هي ردى

خل عينك تهل دموعها وش عليك
.......................انت خدك ورود ودمع عينك ندى



متعب عبدالله التركي المطيري
 


ضايق البال مايستانس الحاله
.......................وانت لاغبت عني كني الحالي

جتك الاشواق رجليه وخياله
.......................غير الاول تحمل شوقي التالي

ليت من قال متعب خابت اماله
.......................شاف بعيونك الخدرات منزالي

واحدأ فيك ماهو منشغل باله
.......................اشهد انه بها الدنيا هو السالي

راوي العود يزهالك وتزهاله
.......................عاد من يقدر ايلومه إليا مالي

صاحبي والقصايد فيك مختاله
.......................وأنت لك حق فيهن يوم تختالي

دام نفسك لحب الشعر مياله
.......................ليه ماصير شاعر وانت في بالي

من تمناك لاتنشد عن احواله
.......................كيف عقب العسل يستطعم الحالي

عقبك النفس مذعوره ومهتاله
.......................سود الايام هزت برجي العالي

لكن القلب من يمك على حاله
.......................في تناسيك ليه اكذب على حالي

قلت لك نعمة النسيان00 زواله
.......................ذكرياتك بعضها قام يبرالي

كل مامرني طيفك على فاله
.......................قلت يامرحبا في ريحة الغالي

شلت همك وهمي ماحدأ شاله
.......................كن قلبك غدى ياصاحبي خالي

إبتعدنا وكلن راح في حاله
.......................بين هالناس لكن كني الحالي



شعر / متعب عبدالله التركي المطيري
 

يا سعودلا تنشد ترى ماني مجيب
.......................خل الذي خافي له شهور.. خافي

إن شفتني مغتاظ.. لي حق و مصيب
.......................يا سعود مزعلني جديد اكتشافي

الغالي اللي كان من قلبي قريب
.......................بيني و بينه.. صار مثل التجافي

إن قلت زله.. مثلنا زلته عيب
.......................من قال لك شمس الضحى ما تشافي

إن قلت هقوه.. يمكن تصيب و تخيب
.......................كم لي سنه .. ما شفت فيه اختلافي

و إن صار في نفسه بعض شكة و ريب
.......................حتى البحر ما هو على طول صافي

صرنا من الصده .. سوات المصاويب
.......................كلن نقل جرحه و قال: امتعافي

أصعب فراق.. فراق عكف الأشانيب
.......................ما هو مفارق لابسات الغدافي

و الذيب لا منه عوى.. جاوبه ذيب
.......................و العلم حامض.. بس وين الأشافي؟

دامه لقى له غير قلبي معازيب
.......................الله يسمح درب هاك السنافي

يروح.. لا يرجي رسول و مكاتيب
.......................هو خابر إني.. ما اتلفت خلافي

واللي تعلى فوق روس المراقيب
.......................أكيد ما تسقى عليه السوافي

رح بشر اللي _شال شلفا_ تريحيب
.......................قله: تراها كلبوها عوافي

اليوم نفسي طابت.. و باكر يطيب
.......................جرحي.. لو انه من يدين المشافي

خلصت.. و الدنيا دروس و تجاريب
.......................سجل يا بو عبدالعزيز اعترافي


شعر / متعب عبدالله التركي المطيري
 

يا وسيع البال .. ضيقت الصدور
.......................رحت ما علمتني وين انت ساري؟

في غيابك.. ما لخلق الله حضور
.......................وفي حضورك.. ما لهم بالبال طاري

ليه ما تختال يا بدر البدور
.......................و القصايد لك وصيفات و جواري

لك بنات الفكر ربات الخدور
.......................يكشفن الثامهن.. و الجرح عاري

جعل قلب ما ملاه الصدق نور
.......................عند وجه اريح.. ما يلقى مزاري

التغاضي عجز لا طال القصور
.......................ليه أداري؟.. و انت عني منت داري؟؟

الزمان قصير .. والدنيا تدور
.......................كل يوم يضيق في عيني مداري

صاحبي محتاج لك شعر و شعور
.......................و إحتياجي شي.. ما كان إختياري

من متى و الغصن يختار الطيور
.......................من متى و البال يختار الطواري؟

لا تسمي صمتي البارح .. غرور
.......................إنكساري خلف هالصمت امتواري


في غياب الشمس وش ذنب الزهور
.......................و المطر لا شح وش ذنب الصحاري؟

اللقا لحظات و الغيبه شهور
.......................تقصر الخطوات و يطول انتظاري

لو قريت المنكتب بين السطور
.......................ما كتبت لغلطة العمر اعتذاري

صمت هالمينا.. مثل صمت القبور
.......................ما رسى مركب.. ولا لاحت صواري



شعر / متعب عبدالله التركي المطيري
 

كل حاجه طعمها مر في هذا الزمان
.......................هم هالدنيا و حنا نعيش لهمها

المكان اللي عرفناه ما عاد المكان
.......................و القلوب.. أحداث الأيام زادت غمها

صاحبي حتى أنت ما عاد تستاهل حنان
.......................أنت بعثرت المشاوير و انت تلمها

البكا في مثل هالحال نوع من الهوان
.......................و المهونه كل رجال حر يذمها

صاحبي.. لو كان للناس و الدنيا أمان
.......................ما تموت ورود الأحلام قبل نشمها

خل عنك علوم الأحباب .. واللي كان
.......................انتهت..وسيرة الأشواق ماني يمها

كلما تظما لياليك قمت اكتب عشان
.......................تنزف جروحي و الأيام تشرب دمها

الكلام الموحش يخاف نور الشمعدان
.......................تحترق أسمى معانيه قبل يضمها

من زمان أكتب على شان تقرا.. من زمان
.......................بس ما شفت المكاتيب جابت همها



شعر / متعب عبدالله التركي المطيري
 

ذكراك لاهبت يجي عطرها صلف
.......................واستنشقه بالصدر مثل الخزامى

إي والله إن غيابهامكلف كلف
.......................إي والله ان عروق قلبي توامى

رمش النواعس والحجاجين والزلف
.......................ياماخذن قبلي قلوب النشامى

أمضى من المصقول واسبق من الشلف
.......................سهم الهوى لوكنت عنه اتعامى

لا يخدعك صبري على الجرح ماخلف
.......................هالشعر غير جروح قلبي تدامى

لي خاطر بينه وبين الشقا حلف
.......................ياماعثت فيه المقادير ياما

من عاش هالدنيا بلا صاحب وولف
.......................عزالله إنه عاش عيشت يتامى

خل السوالف والمشاريه والحلف
.......................مبطي وأنا على الجروح اتسامى

قلب(ن)يضيق بذكريات الهوى جلف
.......................وقلبي مثل جرد القفار يترامى


شعر / متعب عبدالله التركي المطيري
 


ماهو خطاعشان ادور معاذير
.......................ولاهوغلط عشان ادور صوابه

اليوم توه عود لوكره الطير
.......................واصبح يشوف العالم اكثر رحابه

مستغربين انه ملى قلبي الخير
.......................ليه الغرابة! وين وجه الغرابة؟

تعبت ادور للخطاوي مشاوير
.......................لين التعب زاد الليالي رتابة

يبكي فرح من شاف بعض التباشير
.......................معذور لو دمعه يبلل ثيابة

من كنت بأول خامسة طفل صغير
.......................كنت امتلي حزن وغموض وكأبه

كنت أشعر اني غير والمدرسه غير
.......................هيمان في جو النبي والصحابة

كنت المح بوجه الليالي تعابير
.......................وأقراء همومي قبل أعرف الكتابة

والشعر غاب وله محبة وتقدير
.......................اول غيابه شلت هم لغيابه

بالنفس كان لبعض هالأمر تأثير
.......................والليلة اهون من جناح الذبابه



لشاعر
متعب عبدالله التركي المطيري
 

مفتوح باب الرجى لو هب مليون ريح
.......................والريح ماتاخذ الغرسه من عروقها

القوس مكسور والرامي يقوم ويطيح
.......................والسهم منعاج والايام خازوقها

لو لبسو ساقط الهرجه ثياب المديح
.......................قلنا سحابة وبلة يابس حلوقها

ياحادي الركب لا توده عليه وتصيح
.......................ماعاد هي سالفة ليلى ومعشوقها

مديت شوفي وشفت الكون رحب وفسيح
.......................والارض حدر المواطي والسماء فوقها

مادام عين الرضا ماها هماج وشحيح
.......................ابتبع الغيمة اللي رفة بروقها

مدري عن المقبلة لكن عسى الله يبيح
.......................اللي تهز القلوب وهزني شوقها

غنيت للحب ولسان المحبة فصيح
.......................والبدو سبة غناها ضيقة خلوقها

باكر يروح الشتاء والثلج قصره يسيح
.......................مايفضح الثلج غير الشمس وشروقها





لشاعر
متعب عبدالله التركي المطيري
 

نسيتني علمني شلون ابنساك
.......................في هالزمن نسيان الاحباب عادي

وشلون لامرت على البال ذكراك
.......................وطيفك سرق مني لذيذ الرقادي

وشلون لا قالوا لي الناس وش جاك
.......................من كنت في لذة منامك تنادي

وشلون اعيش اللي بقالي بلياك
.......................لا من غدينا كل واحد.. بوادي

لو قلت اداوي جرحي اللي تباطاك
.......................ماكل جرح يفيد فيه...الضمادي

اعلنت حبك لين كل .. تمناك
.......................غلطه وغيري من خطاي استفادي

لو لي..مثل قلبك تمنيت..فرقاك
.......................واكيد قبلك بالجفا.. صرت بادي

حلوه عذاريبك وحلوه..مزاياك
.......................حتى بيوم فراقنا.. كنت هادي

كن الليالي ودها تكسب رضاك
.......................وانا يطول مع الليالي .. جهادي

في ذمتي.. ماهي غريبة خطاياك
.......................مبطي وقلبك لو تنبهت.. غادي

سهله على من كان مثلك..وشرواك
.......................مثل الثياب.. يغيرون .. المبادي

علمني اكره..ذكرياتك..وطرياك
.......................وانسى من الليلة.. صدوق الودادي

ولاني بقايل عقبها ..وين ابالقاك
.......................راضي لو ان جروح قلبي .. جدادي

ولا القصايد.. جعلها من فداياك
.......................لبستها..مبطي ثياب ..الحدادي

باكر على المخطى يدورن الافلاك
.......................ونشوف.. من يصعب عليه البعادي


لشاعر
متعب عبدالله التركي المطيري
 

حسي بلوعات الليالي والاحزان / بعدين حسي بالهوى لا بغيتي
وش به يهمك لو يقولون زعلان!؟ / لو فيك ذره من غلا .. ماجفيتي
يالي تقولين الخطأ زلت لسان / في زحمة الايام ليه اختفيتي
خطاي وان جا مدري الذنب وش كان / ليه انتهى ذاك الغلا وانتهيتي؟
وقفت في وجه الزمن قدر الامكان / وانتي جنح فيك الخيال .. وغفيتي
غلطان انا في كل الاحوال غلطان / اسرجت لك خيل القصيد وسريتي
جيتي وقلت الجرح يوم اقبلت هان / واثرك على الجرح القديم ارتكيتي!!
قلتي لي ان الحب لابد ينصان / واليوم ماكنك دقايق هويتي!
شافوك حساد الهوى شوف الاعيان / يومك على رجم القصيد رقيتي
العام لك طاري بقلبي ولك شان / واليوم احس بغلطتي لا طريتي
وان قدر المولى وعشتي بحرمان / ومن حر لوعات التجافي بكيتي
تذكري قلب له سنين شفقان / شوفي بحقه ياكثر ما خطيتي
كل القصيد اللي اقوله على شان / تهزك الذكرى عقب ما نسيتي


لشاعر
متعب عبدالله التركي المطيري
 

لا يا علي الوضع هذا ما يناسبني
قله يفارق ترى لي بان تزييفه

يروح يبعد..وثم يرجع يقربني
يبيني اتبع هواه واخضع لكيفه

يخطي..ويزعل ويرجع لي يؤنبني
اسكت وانا اسمع تفاهاته وتخريفه

ماني بتمثال وقت الضيق ينصبني
عنه اتلقى خطا غيره وتهديفه

عذروبي اللي يعرفه ما يعيبني
كتاب مكشوف واضح فيه تحريفه

الموقف اللي حصل بالحيل متعبني
ولا يحاول بثوب الكذب تلحيفه

قله فراقه ترى ما عاد يرعبني
ما عاد يسوى بعيني(ربع تعريفه)

انغام عزفه ترى ما عاد تطربني
عندي تساوى برود شتاه مع صيفه

ماني معاتب وقله لا يعاتبني
جوي تعكر ولا اطلب منه تلطيفه

نهر العطا جف قله لا يحاسبني
القلب مما علق به صعب تنظيفه


الشاعر / متعب عبدالله التركي المطيري
 
عودة
أعلى