قصيدة يا فاتني يسعد مساك - مطلق النومسي

*مزون شمر*

عضو مؤسس
يا فاتني يسعد مساك .. وتو ما حلوّ الكلام
إحلو .. والليل وعيونك .. زوّدن حلاوته

تعال أسولف لك .. وأفرّش وجنتك ريش النعام
وأمسح على راسك وأجيب من الحكي طراوته

وأترك عيونك .. في عيوني .. تطوي الرمش وتنام
والرمش ياخذ من عيونك .. لا إنطوى صحاوته

سولف .. وخل النور يلغي بك تضاريس الظلام
وإستشرب بروحك .. حياة عروقي المتماوته

وإلا بلاش ؟ إسكت ؟ وأنا أحكي بك حكايات الغرام
وإلا شرايك نفترض ؟ دام النسب متفاوته

لو نفترض إن البحر .. يلثمك .. من تحت اللثام
أكيد ريقك .. يشترط على البحر نقاوته

ولو نفترض إن القمر .. صلا على خدك وصام
أكيد يعقد من صفا خدك أمل صفاوته

ولو نفترض إن الظبا .. بعيونك أخبره .. الحمام
أكيد نار الغيره .. تزوّد حطب عداوته

ولو نفترض إن الهوى قايم .. وشرطانك قيام
أكيد يعلن بين شرطان الذهب .. هداوته

ولو نفترض ان الجبل .. صدرك بمتنيه إستقام
أكيد يرضى بإنخفاضه عن فشل علاوته

ولو نفترض إن الوطا القاسي .. حضن رجلك وهام
أكيد يلقى في ترف رجلك .. وهم قساوته

ولو نفترض إن الفضا .. صدفة لقى منك إهتمام
أكيد يشعر بالرهاوة .. والأصل رهاوته

لو نفترض إنك طفل .. ليش أفترض ؟ والله حرام
إلا طفل مسرف دلاله .. وأسرف بشقاوته

طفلٍ شقي .. حط الحضارة والبداوة بإلتزام
وأعطى الحضاره بعد ثاني .. من قيم بداوته

هذا أنت يا فاتن مساي .. وصدق حلّيت الكلام
ولولا غزل عيني لعينك .. ما أشعر بحلاوته
 
عودة
أعلى