أدخل وأضحك

--------------------------------------------------------------------------------

مرحبا حبايبي من جد شكلي مشفوح منتديات مسكت على الكتابه اليوم في المنتدى يويل الكيبورد مني
مع انه نص الحرروف عالقه مكبوب عليها بيالة شاهي لكن يالله اذا ما فهمتو الكلمه المكتوبه طنشوا لأنو
ما في شي مهم كلها قصه صغيره بقولها لكم .... ببدا بالقصه اللي معه زقاره يطفيها واللي بفمها علك تلزقه
على الجدار .
قبل عيد الأضحى بيوم العصر وقلت يولد اليوم الشعب فله خلنا نروح نتمشى بالأسواق انا واعز اصدقاني
الدحمي حليل وطيب وقلبه ابيض بس سنونه صفرا ومكسره ووجهه كله حب ومحفر تقول مفجرين بوجهه
قذيفه والموزه اطول من خشمه بس حبوب ما علينا دقيت عليه وقلت له الدحمي وينك يا سطل قال انا
بالبيت قلت يهوووه ردكنا صرنا نجلس في البيت قال لي ولا والله خاش النت يهب عليه هو ووجهه
قبل في خيمه وحتى ريموت التلفزيون يحسبه جوال وش عنده الولد تطور وانا مستغرب وكأن واحد
صاكني بماسوره على جبهتي قلت له من متى تعلمت النت قال اعرفه منذو مبطي من قال هالكلمه غسلت
يدي بصراحه قال تدري يا مصيول ( معيارتي لحد يمسكها علي ) تعرفت على بنت وجالس اكلمها
قلت له يا رجال لو تشوف وجهك البنت تمغطك على بطنك بعقال ابوها خلنا من البنت هالحين تعال نبي
نروح نتمشى اليوم فله الاسواق مليانه استانس وقال يعني اليوم بنرقم وبنشوف بنات ينعل ام الفله يا مصيول
قال ترقيم من هنا ما امداه كمل الكلمه الا انا طلعت رجلي مع سماعة الجوال ورفسته على خشته اللي
داعسها وايت قلت له ترقيم بخشمك انا قلت بنتمشى ما قلت ترقيم تسمع من منخورك الأيمن انت قالي طيب
قال حتى انا صدري ضايق ولا جا على مقاس اخوي عشان اعطيه ينكت بعد هو وسرواله اللي نبتت
عليه انواع الطحالب تخيلو اخر مره تروش يوم جابته امه والممرضه روشته والين اليوم ما لمس جلده
المويه صار جلده جلد تمساح اطعنه بسكين ينكسر السكين وتطلع من جلده ورقه متكوب عليها حاول مرة
اخرى
المهم قلت له بتروش واكوي الملابس عند المغسله واجيك لا تروح قالي زين قلت له لا تفضحنا نقع
جسمك بمويه واخلط معها ديتول وكلوركس وفلاش وانا عارف ان ما تختفي الريحه لكن انشالله
ريحة الفلاش تغطي ريحتك المعفنه قالي ابشر من عنوني قلت عيونك خلها لك من زينها كلها غمص
اخذت شاور على السريع وقلت بطلع اكوي الملابس واشتري لصديقي الدحمي هديه عطر هو يستاهل
وبعدين ما تسوى عليه الناس تشم معه ريحة كلوركس وبعدين يضحكون علينا طلعت للعطار وقلت وش
احسن عطر عندكم قالي رجال ولا نسائي قلت لا يكون انا اكلمك بصوت ناعم ولابس عبايه اكيد رجالي
قالي فيه عطر جديد حلو ومميز وتركيزه ثمانين بالميه وفرنسي قلت من الاخر سعره كم قالي بثلاث ميه
وخمسين ريال قلت له هات كلونيا ابو خمس ريال وخلنا اروح عندي شغل وغلفت له العطر بورق جرايد
زي الأصدقاء ما يسوون لبعض ورحت للمغسله عطيته ثوب وشماغ قلت له كوي مستعجل قالي صديق
اليوم لازم عشرين ريال كوي هذا انا طرطعت هالندي يضحك علي ويكوي بعشرين ريال وكان يبتسم
بخباثه الملعون كنه يقول مصيرك بترجع لي اخذت ملابسي منه بعد ما صكيته على خشمه بصندوق
الفلفل اللي حاطه على الطوله حقت المغسله ورحت لمغسله ثانيه قلت للهندي الثاني كوي مستعجل
قال صديق بكره عيد انتا يعرف وانا مسكين واهل ما في شوف وماما موت قبل واحد شهر وزوجه مال
يبكي في التلفون بصراحه انا تأثرت شوي بقصته وجلست ابكي واول ما بكيت قال صديق انتا يدفع
ثلاثين ريال ما في مشكل انا اصلاً نسيت اني جاي اكوي واندمجت بقصته ما انتبت لكلامه ورجعت
عشان اخذ مناديل وارجع اكوي ملابسي ويوم مسحت دموعي مخي توه يستوعب انه يستغلني ابو هنود
عشان العيد ويقولي قصص عشان اعطيه فلوس حقدت عليه بغيت ارجع اسطره لكن قلت حرام متغرب عن
اهله خله يولي قلت ارجع للهندي الاول الظاهر هو ارخص شي جيته ودخلت المحل قلت صديق
صرخ بوجهي وقال صديق انا في مشغول الحين انا استوعبت متأخريلعن بليسه ينفخ علي هو ووجهه
قلت يمكن يولد يمكن المسكين من الصباح شغال واعصابه تعبانه مشكلتي قلبي طيب ما علينا خذيت ثيابي
ورحت لبست وطلعت للدحمي صديقي اللي اول قلت لكم عنه ابو سنون واول ما شفته قال ياخي البنت
طلعت توها من النت بدون ما تودعني قلت من زينك تودعك انت وشعرك اللي مفجرين فيه شراخي
كان حاط على شعره جل مسوي كاشخ قال لي لا ياخي بس غريبه هي قالت بتضل معي الين ما اطلع
انا قلت طيب وش اللي صار بالظبط قال ابد تحمست وعرضت لها كام ببس تدري اتوقع انفصل
الاتصال عنها والحين رجعت شبكت بس انا طلعت قلت له والله اللي راحت البنت للمستشفى يعطونها
ابره تهديها ولا شي صار فيها انهيار عصبي من وجهك يابو العريص جلس يبكي المسكين مسوي يحب
وهو ما تعرف على البنت الا اليوم صكيته على ضروسه بشريط عبادي الجوهر والله راح الشريط خساره
بضروسه لو ابيع ضروسه كلها ما جاب حق الشريط هديته ووريته الهديه اللي جبتها له العطر
وفرح وظمني مسوي مثل الاجانب اللي اذا احد اهداهم شي يظمونه وهو ما يدري انه خنقني بريحة التايد
اللي متروش فيه فرح كثير بالهديه وحط كل العطر على اباطه لأنهم اكثر مكان محتاجه العطر ما علينا
قلت له هاه وش رايك اي سوق تبينا نروح قال لي خلنا نروح سوق الغنم عشان بشوف كم
الغنم السنه هذي قلت والله انا من عرفتك وانا كنت متوقع انك راعي بس الحين تأكدت صراحه
قال اجل وين تبينا نروح اذا ترقيم انت تقول ما تبي بس تبي تتمشى قلت له يا جنط نبي نروح نتمشى
بالاسواق لكن بدون ترقيم ومشاكل قال توني فهمت وانا عارف انه ما فهم لكن يالله اهم شي نروح
وخلاص طلعنا صحارى مول وصلنا للمجمع وهو يرقص ويناقز بوسط السياره لأنه جاب معه شريط
سكوتر مسوي فاهم غربي وانا لو اقوله يو ار دونكي قال لي اوكي ههههههههههه ما علينا جينا بدخل
قال السكرتي اللي عند الباب لو سمحت يا اخ ممنوع قلت له تكلمني انا قال لا طال عمرك ولد
جيراننا قلت ليش اليوم السوق عوائل قال لي لا انا فهيت بوجهه وقلت اجل ليش ممنوع تقول
قال لي ممنوع اصطحاب القرده قصده على صديقي وفلذة كبدي الدحمي الدحمي درى انه يقصده
ويا حبة عيني جلس يبكي لأنه كان متأثر من صديقته بالنت وهذا بعد تكلم عليه تهيضت المشاعر الجياشه
داخل خشمه وبدا يفرز حاجه لزجه وعيونه بدا يطيح الغمص اليابس فيها السكرتي والله قلبه طيب شاف
الوضع كذا جلس يهدي بالدحمي وقال مع ان اليوم السوق عوائل لكن ادخلو ظمه الدحمي ويوم ظمه
سطر الدحمي كف يسمعه توني بلير بمكتبه بلندن من ريحة الجل اللي على شعر الدحمي ههههههههه
ما علينا دخلنا السوق وقلت للدحمي انا عازمك تعال فوق نتعشى وبعدها نتقهوى قال ياخي
انا تركتني صديقتي ولازم اتعرف على وحده غيرها انا محتاج حنان قلت له مالت عليك من شاف
وجهك قال شف وجه القرد وسده واستريح بس بصراحه انا قدرت انه حزين اليوم بالذات وقلت خله
يسوي اللي يريحه رحنا عند المطعم قلنا ناخذ شي على السريع نشربه ونتمشى ما انتبهت الا وواحد
يقرس بجسمي يوم انتبهت لقيته الدحمي يقولي شف هناك فيه بنتين حلوات قلت يابن الحلال اطلب الله
انت دور اشين وحده بالسوق والله اعلم يمكن تصكك بالشبشب بعد قال لا ياخي يناظروننا ويتلكمون
ويضحكون شكلنا اعجبناهم قلت له يا دلخ ستات يا جنط 18 يا لوح فيبركلاس يا فلينه يا قارب شراعي
يا دبشه ذولا جالسين يتريقون عليك انت وهالجنز اللي مقطع من ركبك قال الا يبوننا وجلس يصيح
بنص السوق ويقول يا بنات ياللي تطالعون لنا وتضحكون تبون الرقم انا صكيته كف على وجهه ولزقت
يدي بوجهه من المرطب اللي حاطه مكثر حيل على وجهه وقلت له يا الطعس فضحتنا تبي حراس
الامن يمغطوننا المهم البنات ما ردو عليه راح قرب من البنت وقال لها تبين الرقم ترا هوايتي الترقيم
قالت البنت من زينك عشان ناخذ رقمك ظف وجهك ولا تتحرش فينا هي قالت ظف وجهك هو المسيكين
انقهر وقالي عطني مفتاح السياره انا استغربت قلت يمكن احبطته البنت ويبي يجلس لوحده مع نفسه
عطيته مفتاح السياره وراح يركض انا قلت الدحمي اليوم مو طبيعي حساس مره زياده عن اللزوم
كلها دقيقه ورجع لي ومعه العجره وجا يركض على البنت وصكها بنص جبتها وجلس يرفس
فيها كأنه يرفس رجال في مضاربه حقيقه البنت المسيكينه طاحت على الارض ودمانها تتناثر على
الأرض انصرعت الا شوي وجا حراس الامن واشوفهم يضربون صديقي وهم كثار انا قلت ادري اني
اليوم منحوس من طلع معي لكن الواحد يبقى مع خويه في الرخا والشده وخشيت بين المضاربه وتسطرت
انا والدحمي تسطيره لو نصورها ونرسلها بلوتوث تنتشر اكثر من برجس ههههههههههه
حراس الامن بعد ما سطرونا وحنا نصيح من الوجع حشرونا في زاويه ودقو على الشرطه ورحنا للقسم
وانا ادعي واقول يالله عدي هالعيد على خير وبالشرطه كتبو فينا محظر وجلسنا انا والدحمي نبوس
الظابط على خشمه وجبهته الكبيره الين ما سوينا مساج لكل وجهه من كثر التبويس وعلى قولة المثل
اذا كان اللي ساجنك ظابط الحس وجهه كله ههههههههههههههههههههه يالله واخيراً وبعد طول عناء قال لنا
الظابط طسو لبيوت اهلكم ولعد تطلعون قلنا ابشر بس نبي الفكه وانا والمقرود اللي معي وصلت البيت
الساعه اربعه الفجر وحنا متلحطين في التوقيف من المغرب الحين صار يوم العيد حطيت على قناة السعوديه
لقيت ورع يسعبل وراكب مرجيحه ويحرك يده ويسوي بي باي وحاطين اغنية من العايدين
ومن الفايزين انشالله وانا اقول بصدري الله لا يعيد اللي مرينا فيه انشالله والورع باقي يسعبل بالتلفزيون
انسدت نفسي وطفيت التلفزيون وتمددت على السرير اريح جسمي من كثر التسطير وما انتبهت الا اني
غارق بنومه غير طبيعيه وحتى حلمت بالفنانه اليسا انها تغني في ملحق بيتنا واني كنت طربان
المهم ما امداني الا وشبشب صكني على جبهتي وفزيت وقلت بدون ما احس بنفسي ابشر يا حظرة
الظابط ويوم استوعبت الموقف لقيت انه ابوي مصحيني على صلاة العيد رحت صليت معه وقال لي يولدي
انت اليوم بتضحي عن نفسك لأنك صرت رجال خلاص وانا ما بين عيوني الا النوم اقوله ابشر يا حظرة
الظابط المهم قال لي الخروف بالأستراحه استراحتنا جنب البيت على طول رحت للأستراحه وشفت
الخروف ويا ليتني ما شفته كبير وله قرون وكان مرعب حيل وكانت عيونه حمرا سهران المسيكين عارف
مصيره اول شي قلته للخروف كل عام وانت بخير يا حظرة الظابط لأنه بصراحه يشبه الظابط حيل
ما امداني كملت الجمله الا قرون الخروف خاشه بخشمي اتهجم علي وحاول يذبحني لكن فركت
بالوقت المناسب قلت الدعوه واحد ما يكفي يذبحه دقيت على الدحمي والحمدلله لقيته صاحي قلت الدحمي
وينك قال انا خاش النت قلته يلعن نص دماغك المصدي الناس عيد وانت خاش النت وش عندك قال
جالس اسمع اغاني حزينه وابكي على اللي صار امس قلت له خل عن الحزن يبو خشم سايل وتعال نبي
الخروف وقال لي اذبحه انت وقلت على اللي صار معي قال انا ولد ابوي قال خمس دقايق واكون
انتظرني عند الباب وفعلاً انتظرته خمس دقايق جايني على سيكل هندي سارقه من المحطه وسارق معه
رشاش ابوه وساطورين من مطبخهم وعلبتين بنزين عشان يخليها حل اخير يحرق الخروف اذا ما نفع فيه
جينا عند الخروف وقام يرافس يوم قام يرافس الدلخ الدحمي يحسبه مسكون جلس يقرا عليه ايه الكرسي
ويقوله اخرج اخرج ويمحط المسيكين بالخيزرانه الخروف ما رضح للأمر الواقع وما عرف الحقيقه
المره ما يدري ان عندي عجره بالسياره ورحت لسيارتي وطلعت العجره وجلست اصكه في قرونه الين
ما داخ ونام كأنه خروف صغنون وباين بوجهه برائه الخرفان الصغار وقال لي الدحمي اطعنه
بالسكين مع خشمه عشان يموت وانا اقول لا خلنا نطعنه مع بطنه احسن عشان يتعذب وابرد حرتي
وحنا محتارين من وين نطعنه لأني اول مره اشوف خروف ينذبح ما انتبهت لحالي الا واحد سحبني
مع رقبتي انا والدحمي وجلس يمغط فينا يوم استوعبت الموقف اكتشفت انه ابوي وهندي المحطه اللي
سرق سيكله قال ابوي مو حرام عليكم تعذبونه وتسوون فيه كذا انا صراحه انحرجت من ابوي ووجهي
صار احمر بس مو من الاحراج من الكفوف اللي جاته زعل علي ابوي قلت العيد ذا مر علي دمار
لكن خلني اكسب رضا الوالده واقولها كل عام وانتي بخير على القليل يعني اكون سويت بالعيد شي حلو
ولو انه صغير رحت لها بغرفتها وقلت لها كل عام و وانتي بخير واتممدت على سريرها ونمت بدون
ما احس بنفسي وفجأه جاني كف يمشي مليونين قلت معقوله للحين فيه ضرب؟ للحين ما خلص التصفيق
يوم انتهبت ولا انها امي تقول وين بوسة العيد قمت بست الدولاب ورجعت بنام الا جاني كف ثاني
وعرفت اني غلط مره ثانيه ورجعت بست راسها وايدها وقلت تبين شي يا امي وقالت لي لا تنسى
تصحي ترا بعد شوي يجون رجال وخلك مع ابوك في المجلس ومادري وش قالت بعد ونمت نومه
ثمان اليوم ....
وعلى فكره للحين وجهي مورم من كثر التصفيق ههههههههههههههههههههههه
والدحمي من ذاك اليوم وهو خاش النت للحين ما طلع ولا تروش لمن يهمه امر هالمسكين ...
على فكره شخصيات القصه خياليه والقصه كلها خياليه جالس فاضي قلت اجرب نفسي في بحر الكتابه
الحين اقدر اقول للرجال ارجعو ولعو زقايركم واقول للبنات رجعو العلك في حلوقكم
تقبلو تحياتي صديقكم الصدوق
.:: الساقط إلى الأعلى ::.​
 
جميل جدا قصه حلوه وطريقة الكتابه جميله
وكأني اشوف مسلسل طاش ما طاش
حلقه رائعه من طاش ما طاش ويسلموا واجمل مقطع هو
==============================
وراح يركض انا قلت الدحمي اليوم مو طبيعي حساس مره زياده عن اللزوم
كلها دقيقه ورجع لي ومعه العجره وجا يركض على البنت وصكها بنص جبتها وجلس يرفس
فيها كأنه يرفس رجال في مضاربه حقيقه البنت المسيكينه طاحت على الارض ودمانها تتناثر على
الأرض انصرعت الا شوي وجا حراس الامن واشوفهم يضربون صديقي
 
عودة
أعلى