12345678

ديوان الشاعر / الداهية محمد جار الله السهلي

ديوان قصائد الشاعر - ديوان قصائد الشاعره ارسال إلى Twitter ارسال إلى facebook
  1. ღ حلمي وجودك ღ
    19-07-2009, 05:28 AM

    أكبر نعم رب العباد ...

    ديوان الشاعر / الداهية محمد جار الله السهلي


    يا قاف لاتزعل علي لو زاد لومي حبتين
    شاعرك ذي ثالث سنه قصيدته ما قالها

    غيبتها عني وعذرك لاحشى ماهو سمين
    سوق المعاني سوقها واترك علي موالها

    محبوبتي ماهي بتستاهل كذا ! يا اغلى خدين
    ان ما سعت لي بالشعر غصب علي اسعالها

    الدره اللي لو يعذربها ( جموع الحاسدين ) ؟
    ما عذرب عذوق العنب غير الذي ماطالها !!

    من عادني وسط المهد وهي سقتني باليمين
    فنجال حب لا رشفته زاد حب دلالها

    مرت سنين وحبها يكبر على مر السنين
    ونذر علي لاموت ماهزت يدي فنجالها

    من وين ببدى يا شعر ؟ يا وين بوصل بك يا وين ؟
    وانا اقتنعت اني بقصر قبل اعد خصالها

    الترفه اللي زينها طاف وتعدى كل زين
    ما تشبه الا غيمة احلى الشهد همالها

    الظفره اللي بالقسى تصمل ولا يمكن تلين
    تشهد لها وقفاتها .. تشهد لها افعالها

    مجربه واداحم التاريخ بالجنب المتين
    لانها اذا جت للكرم !! متفرده ولحالها

    وان قلت منهي ؟ قلت لحظه ! لجل ارفع لك ( جبين
    كل الحكي ) و انطق لك اسم شلته واشتالها

    ذي دار ( اخو مريم ) عريب الجد والحصن الحصين
    ذي عيدي اللي كل يوم يهل في هلالها

    هذي الكويت وخل فراغ وحط بعده نقطتين
    واكتب ( عباره ) تعتبر وصية لاجيالها

    ( اكبر نعم رب العباد انه خلقنا مسلمين
    وانه جعل الكويت ديرتنا وحنا عيالها )

    دار السلام اللي تحب انا نكون مسالمين
    لانها اذا ضاقت تعرف شلون فعل ارجالها

    في كل صبح وبحرها يحكي لك بشوق وحنين
    عن هية ( الرقه ) وكيف الموج ( قبل ) جالها

    و ( القصر الاحمر ) علم الاجيال وش معنى عرين
    دامه يعبر لك عن ( الجهرا ) وفعل ابطالها

    تاريخ .. والتاريخ يحفظ .. واسمعوا يا الطامعين
    ذي دارنا .. وامالنا ..واحوالنا .. من حالها

    انحبها والطق ما ينفع بكم يا الميتين
    مير اقصروا شر ( العجوز ) اللي ( تبث ارسالها )

    مهما حكيتوا وابتليتوا ذي عجين و ( ذي ) طين
    يعني على قول المثل : فال الله ولا فالها !!

    مير الله الله بالفلس يا اهل الفلس يا المفلسين
    لا واخاسرة كدكم .. والخيل من خيالها

    وتبقين يا دار السعد مدهال كل الطيبين
    في ظل من لا عقدوها قال : انا حلالها

    نعم ( الامير ) ونعم ( الارض ) ونعم يا ( الشعب الامين )
    ولاهنت ياقاف تجمل بي قدم موالها

    ويالله حقق مطلبي مدام همي حاجتين ؟
    ( اموت ما جاها ضرر ) وان ( اندفن برمالها )
  2. ღ حلمي وجودك ღ
    19-07-2009, 05:48 AM

    أسبوع *

    ديوان الشاعر / الداهية محمد جار الله السهلي


    أسبوع مر !! ولاوصل منك مرسال
    ياقو قلبك كيف تقطعني أسبوع ؟!

    الجوع كافر ! وانت ماترحم الحال
    وانا عليك من الوله ميت جوع

    ياللي غيابك صعب يطري على البال
    تركتني ضايق وحاير ومفجوع

    ماكني الا: شايب فاقد عيال
    وماكنك الا: محرم حق مشروع !!

    يفوع لك قلبي ليا مر الاطلال
    ياليت مالي قلب يشتاق ويفوع

    حسبي عليك شلون قطعت الامال
    باموت لاصار الامل فيك مقطوع

    ياصاحبي ماكل نزال رحال
    انت الحيا من وين مارحت متبوع !!

    نسياني لزول بالاعماق يختال
    اصعب على صاحبك من حبة الكوع

    لو الثمن في شوفتك عمر رجال
    كان الثمن من يوم ماغبت مدفوع !!

    ولو القدر ما تم قوله ليا قال
    ماضاق صدر ولا انحنى راس مرفوع

    ياصاحبي عشقتني فعل وخصال
    وانا عشقتك شعر واحساس وطبوع

    وشلون تتركني كذا لا اشهب اللال
    وقدام عيني تجف ينبوع .. ينبوع !!

    وانا عشانك جيت والغيم همال
    اسيل الوديان واداحم جموع

    ماردني عنك سواليف عذال
    تزعل علي ربوع وتقدر ربوع !!

    كان المهم اعيشك جنون ووصال
    ويكون لي كلمه ولي راي مسموع

    واليوم ضاقت بي من الجال للجال
    فرقاك تقصم ظهر وتحز وتلوع

    لو جيت شفت الحال ماسرك الحال
    في غيبتك ضايق وحاير ومفجوع

    هذا غياب اسبوع وشلون لو طال
    طالبك .. لايطول غيابك عن اسبوع
  3. ღ حلمي وجودك ღ
    19-07-2009, 05:54 AM

    تنهيد نااااااي...

    ديوان الشاعر / الداهية محمد جار الله السهلي


    جمع اللي ودك تقوله وبعثرني عتب
    الملامه شي عادي دامها منك وجاي

    أنت تامر وأنا ألبي ما تبي بليا سبب
    بس كان لجيتي خاطر تلبي لي رجاي


    رجوتي لا تلحق اعيونك مشاريه الهدب
    لا تضايقه بدموعك والتفاتتك وخطاي


    كل شي الا دموعك واعرف انك من شطب
    صفحة الطيش بحياتي وابتدا صفحة شقاي


    سق فديتك كل ما تملك من جنون وغضب
    وابشر بصدر يضمك حيل دام انك هواي


    ولا رويت عتاب ناظرني وقل طاح الحطب
    واسأل شرايك وابنسج لك من الأعماق راي


    باتناثر لك رضا واحساس صادق ما كذب
    وأنت رتبني على كيفك وشكلني برضاي


    وان تلعثم حضورك ثم نطقني لك تعب
    حاول انك تسمع أشواقي وسط تنهيد ناي


    اسمع دموعه وقرب لي وقرب وأقترب
    واسألأ عيوني عن طيوفك وقصتها معاي


    كيف كانت في غيابك فجأه تطري واغترب
    اركض لمنفى خيالي وارمي الواقع وراي


    اوجدك ما بيني وبيني واسولف لك واشب
    ليلة حضورك قصايد تشتكي لك من عناي


    اه لا منه بزغ فجر الحقيقه وانسحب
    طيفك اللي ساكن عيوني وضاقت بي سماي


    وقتها ليتك تحس شعور من حظه ضرب
    اخر اماله بعرض الهم والوحده مداي


    اكتشف وشلون يموت الصوت برماح الطرب
    لحظة جيت أتغنا بك وعاندني غناي


    واكتشف كيف السهل فجأه يتحول لي صعب
    لا نويت ابكيك ثم أزريت القابي بكاي


    أقسم بربي وربك فيني احساس غصب
    كل كلي في غيابك ينجذب لك ياهناي


    ما نسيتك لو نسى التاريخ أمجاد العرب
    وما تركتك الا بين ضلوع صدري وبحشاي


    لأنك أكبر من غلا الشاعر لاخر ما كتب
    ولأنك أقرب لي من سكوتي اذا عانق شفاي


    ولأنك أول من تمكن بي وعلمني أحب
    ولأنك الشخص الوحيد اللي يجي في مستواي


    صاحبي جمع كلامك ثم بعثرني عتب
    والله أن كل شي عادي لا غدى منك وجاي
  4. ღ حلمي وجودك ღ
    19-07-2009, 06:00 AM

    شآعرها ...

    ديوان الشاعر / الداهية محمد جار الله السهلي


    لا يطول سكوتك ولا يطول سكاتي
    ترى الدعاوي بسيطه لا تكبرها

    خلك على خبري وظني وهقواتي
    خابرني الضيق والضيقات خابرها


    وسع لي البال يا سيد طموحاتي
    ولا تغير النظره اللي كنت تنظرها


    تقول : حب البشر طوق مساراتي ؟
    ابك انت حبك مساراتي يسيرها !!


    ان غبت عانت عيوني من معاناتي
    وذكرك يصبرني وطيفك يصبرها


    لا يا بعد شهرتي واعظم نجاحاتي
    وكل القصايد من ابسطها ليا اشهرها


    ولا يا بعد من يدور لانكساراتي
    شعار سبب وجودي ضيق خاطرها !!


    انت اجمل اللي تسجل في سجلاتي
    ان جيت : وين البشر ؟ وان رحت : مكثرها


    يا اول واخر قصيدي واروع ابياتي
    محد يحب القصايد كثر شاعرها !!


    ما فاق حبي لك الا حبي لذاتي
    يعني احبك محبه ما اتصورها


    يا اصدق من النشوه اللي في بداياتي
    لا قلت لي كم بيت .. وقالوا انشرها


    واغلى من الدمعه اللي كل صدماتي
    تطلب يدييها !! واحجرها ولا انثرها


    واحن مني علي ان شفت زلاتي
    القاك بررتها لو صعب ابررها


    واطهر حكاية محبه في حكاياتي
    من قبل لا عيشها حسيتك اطهرها


    لا تلومني لا بديت اخاف واحاتي
    كل حاجة غاليه ما ودي اخسرها


    ولا تضايق ليا كثرت جياتي
    ضيعت فيك السنين وجيت ادورها


    تعال رتبني ورتب حساباتي
    او تدري شلون ؟! رتبني و بعثرها !!


    مو مشكله لو تصير اطول مسافاتي
    المشكله لابديت احسك اقصرها


    اكبر عيوبي : بديتك من نهاياتي
    واكبر عيوبك : لقيت اولك باخرها !!


    يا مكتشف عالمي واقدم حضاراتي
    حرام كسر الخواطر بيد جابرها ؟!


    مدام تقدر على اللي فوق قدراتي
    لا تذخر الفزعه اللي قلت ذاخرها


    رجعني لوقتي او رجعلي اوقاتي
    عامين تنطرني .. وعامين ناطرها


    وتقبل الود والشكر وتحياتي
    يا ساكن الروح والروح ومشاعرها


    وروق وركز وحاول تفهم الاتي:
    فكره تأكد قليل اللي يفكرها


    لو ان غيري معاك يسوي سواتي
    قلت : انت نعمه وهو عاجز يقدرها !!
  5. *مزون شمر*
    12-06-2010, 09:29 PM

    البارحه ما بين همي والاوراق

    ديوان الشاعر / الداهية محمد جار الله السهلي


    البارحه ما بين همي والاوراق
    جر القلم طاروق حزن(ن) يسليه

    واسترسلت ابيات شعري من اعماق
    الموقف اللي مر وازريت اعديه

    موعد لقا مبني على نيه افراق
    كان الاخير وضيق الصدر طاريه

    وماهي غريبه لو بقول الصدر ضاق
    لاكن الاغرب كيف بودعه فيه

    كانت دموعه تختنق بين الاحداق
    ونظرات عيني تقتله ثم تحييه

    كني جلست اعلمه كيف يشتاق
    وكنه يعلم شعري شلون يرثيه

    شح الزمن بموادعه والمسا ساق
    حزن القصايد والعتب والمشاريه

    ياليل والله ماورى ليلك اشراق
    النور عانه يسحبه في خطاويه

    عشاق قلي ليش او ويش عشاق
    الا ضحايا وقت مدري شسميه

    يقطع سنين العشق يا درب الاشواق
    ياليت بيدي شي واقدر اسويه
  6. *مزون شمر*
    12-06-2010, 09:44 PM

    جساس والزير

    ديوان الشاعر / الداهية محمد جار الله السهلي


    يا كذبها قولت : ( ترى الناس للناس )
    والسالفه ما عاد تحتاج تفكير

    اما تصير بموقف يرفع .. الراس
    ولا عساها ما تحقق ولا تصير

    قد لي ثلاث ايام حاير ومنحاس
    الحال ما به خير واقول انا بخير

    خايف تشمت عاذل فيه وسواس
    مهما تصاغرني يحس اني كبير

    من زود همي ما جذب عيني انعاس
    كن السهر ( حاتم ) وجفني ( مسايير )

    كل النتايج تعترفلي بالافلاس
    واضحك على نفسي واسوق التباشير

    يا حظ ليتك تحشم معرب الساس
    ما كان جاني منك.. زله وتقصير

    مابيك تغريني بضحكه ومجلاس
    لو القناعه كنز عندي انا غير

    لا ماقتنع بالطيب بحدود وقياس
    يكبر فعين الغير وبعيني صغير

    وان قلت شوف فلان يحطب بلا فاس
    بقول : ( لو به خير ما عافه الطير )

    هذا وسجل يا قلم فوق قرطاس
    ابيات ما ودي تمر دون تفسير

    اللي يبي صيت وذكر بنوماس
    يقضي حياته ما يحسب المخاسير

    واللي يشوف الصح في فعل جساس
    بتشوم نفسه عن فعل سالم الزير

    واللي ما حاش المجد بالدرع والطاس
    ما هي بعيده.. لو يذم المناعير

    واللي ما تطرب نفسه لفزعة ( دباس )
    من دون فزعاته يحصل معاذيير

    يقوله اللي فوق خشم الخطا داس
    وطويق ما يشرهه على قاعت البير
  7. *مزون شمر*
    12-06-2010, 09:48 PM

    لاتساومني ولاتجرح كياني

    ديوان الشاعر / الداهية محمد جار الله السهلي


    إستريح شوي .. واسمعني ثواني
    بعدها مسموح .. قول اللي تقوله ..

    جيت لك والقلب ماهو بالمحاني !
    شف قبل لوصلك سابقني وصوله !!

    والله ان لو لا الغلا ما جاك عاني
    يا بعد منهم بكوله و ضحكوله ..

    عاشقك سواح !! وعيونك مواني :
    اخذني .. من الحزينه .. للخجوله !!

    أبتسم خلني افضفض لك عشاني
    الحكي غصن عجز صوتي يطوله ..

    تعقد احجاجك وتعقد لي لساني !!
    المطر يا غيم ضميان لهطوله !!

    خاطري مكسور من قسوة زماني
    وانت ( كنك إياه ) وفعولك فعوله !!

    تعتبرني .. شخص مغرور وأناني
    واعتبرك .. الكون في عرضه وطوله ..

    اه لو تحس بجروح الأماني
    كان ما تزعل علي بهالسهوله !!

    حط ( عمرك ) يابعد ( عمري ) مكاني
    وان لقيت قصور ؟؟ قول اللي تقوله ..

    وأنتبه يا سيد الغيد الغواني
    التشره والمعاتب له أصوله ..

    لا تساومني ولا تجرح كياني
    كل شي إلا الكرامه والرجوله !!
  8. *مزون شمر*
    12-06-2010, 10:01 PM

    أسطورة الحسن الرقيق

    ديوان الشاعر / الداهية محمد جار الله السهلي


    لا غشاك الليل واسرف بك الحزن العميق
    جنب وجيه البشر واسجد لخلاقها

    ادخل بغيبوبه من الهدوء .. ولا تفيق !!
    وراود دموعك على عينها واحداقها

    خل روحك تدرج !! من زفير اليا شهيق
    دمعة لحضورها .. دمعة لفراقها

    كن دمعك وقتها يغسلك ويبل ريق :
    وجه الارض !! وينتزع روحك من ارهاقها

    رتب انفاسك !! ودور على نفسك طريق
    واسترح بين الحنايا وفل ارواقها

    راجع ذنوبك على اقل من مهلك .. ويق :
    شوف وتفقد معاليقك وخفاقها

    الحزن : دافع قوي للرجال .. ولا يعيق
    غير ناس تخلق وذلها فاعناقها !!

    الشقيق يدعم الذل في اخوه الشقيق
    والبضايع تختلف باختلاف اسواقها

    وانت حاضرك يتفاخر بماضيك العريق
    شجرة عجز الزمن لا يحت اوراقها

    كنه شمس من الذهب والجواهر والعقيق
    كل صبح يلامس المجد نور اشراقها

    وكان عزمك ما رقى قمة الضلع المويق
    ما انت لاقي ( عز ) في جلالها ودقاقها

    نوخ ركابك .. وشكل من اشكالك فريق
    الرخامه في تزايد عدد عشاقها !!

    الاسامي حمل !! واللي حمل ما لايطيق :
    شاه ودك للصفاه الضحى تستاقها !!

    العرب ما تبغي الفخفخه ولا البريق
    تبغي امطار السحب ماتبي براقها

    لا تحسب المرجله : زول ولسان طليق
    الرجال رجال : بافعالها واخلاقها

    افرد اجناحك مدام السما تبغى عشيق
    اغتسل من غيمها وفج كبد افاقها !!

    خل اخوك الصبر !! واعجابك بنفسك صديق !!
    واعتنز بالله كفيل البشر وارزاقها

    لا تفكر في هل الهرج لو شبوا حريق
    الكلاب مربطه لا تحل وثاقها !!

    وكان صدرك من خبالين خلق الله يضيق
    والله ان تبطي ضلوعك بضيق خناقها !!

    وان تغنيت بشعر في فعولك ما يليق
    نقع جزال القصايد وبل اوراقها !!

    لا تكلف نفسك ( بزوبعة جال المضيق )
    ( المحيطات أربعه ) والدرر باعماقها

    مادرى الشاطي عن الخوف بعيون الغريق
    ولا لعب في حسبة الناس غير اشواقها

    فان دعاك الشوق للورد وانفاس الرحيق
    اذكر اجمل سيدات الترف واعناقها

    المهاه .. الفارع .. أسطورة الحس الرقيق
    ما ذبحك الا غلاها وطول فراقها !!
  9. *مزون شمر*
    12-06-2010, 10:03 PM

    ودي أرثيك قبل تموت

    ديوان الشاعر / الداهية محمد جار الله السهلي


    ادهم الليل موحش دون خل وخدين
    وابتلانى في ابوشيبه وانا مابتليت

    مير يامدغم انصت للكلام الثمين
    ودي ارثيك قبل تموت في كل بيت

    اربع ايام والهاجوس بينى وبين
    لذه النوم والاحلام وارض المبيت

    وليلة البارح اقسى من جفا الوالدين
    بعدها مافرحت وقبلها ماشكيت

    علموني بموتك وأنقطع الاكسجين
    وضاقت ضلوع صدري وأختنقت وسريت

    جيت أودع محيا وجيت اقبل جبين
    جيت ليتك تشاهد حالتي يوم جيت..

    يوم أشوفك قدم صفين متساويين
    لابس بشت عرسك وأسترحت وغفيت

    وجهك اطهر من احساس ودعا الخاشعين
    ومثل بسمه حجاجك يومها ما رأيت

    وجثتك ترتفع من فوق غيمة يدين
    جادت بغيث دمع عيوننا وانت ميت

    ياولد عم كل ذره بجسم الحزين
    والله انى قبل لا افارقك ماهقيت

    بانه بامكان دمعي يجعل القاع طين
    لين ماجيت قبرك وانكسرت وبكيت

    جعل منزلك منزل الاتقيا الصالحين
    وجعل تغفر ذنوبك كلها كومبليت
  10. *مزون شمر*
    12-06-2010, 10:07 PM

    سيد عشاقي

    ديوان الشاعر / الداهية محمد جار الله السهلي


    تدور الأرض وتدور السوالف والسنين تدور
    وأنا لو أعرف اللي راح ماني بعرف الباقي

    يقولون القصيد شعور والشاعر بدون شعور
    وأقول الله يعاقبني اذا ماهو من أعماقي

    انا لو أكذب بشعري وقف نبض ويبس حنجور
    وقادرأخسر الدنيا وعاجز أخسر أخلاقي

    ولأجل عنق المها والصوت الأدفى والعيون الحور
    وقف عمري ولادري ويش انا من وقفته لاقي

    قسم بالله .. ما قبلك غياب ولا بعدك حضور
    ولكن ودي بفرقاك .. لو ماودك فراقي

    تعاتبنا بما فيه الكفايه من ثمان شهور
    وسالت دمعتين وطاح قلب وماتت أشواقي

    تعدتك المشاريه وجفاك اللوم والمستور
    إذا ما يكشفه صوتي كشفه الحبر بأوراقي

    تعبت أضحك على نفسي وأبرر لك وأعيش الدور
    وتعبت أجامل ظروفك وأصدق كذبك الراقي

    يكفيني أغيب وخافقي ماجاك منه قصور
    ويكفيك اتذكر كل ليلة لهفة عناقي

    تذكر يوم أخليك اتباهى كبرياء وغرور
    يوم اني اتحدابك وأخيب هقوة الهاقي

    وتذكر يوم أعذرك وانت لاصادق ولامعذور
    أدورلك عذر وأصدقه وأكذب أحداقي

    وتذكر يوم جيت من الحزن متضايق ومكسور
    فرشت لك الضلوع وقلت لك ياسيد عشاقي

    خذ اضلوعي وابن فيها يسار الصدر بيت وسور
    ترى مافيه قبلك من سكن صدري وخفاقي

    وبعد هذا رحلت ولا بقى إلا بيتك المهجور
    وألا ياكبرها لا من رحلت ومنزلك باقي
12345678