12345678

ديوان الشاعر / الداهية محمد جار الله السهلي

ديوان قصائد الشاعر - ديوان قصائد الشاعره ارسال إلى Twitter ارسال إلى facebook
  1. ღ حلمي وجودك ღ
    19-07-2009, 04:34 AM

    ديوان الشاعر / الداهية محمد جار الله السهلي


    لا يطول سكوتك ولا يطول سكاتي
    ترى الدعاوي بسيطه لا تكبرها

    خلك على خبري وظني وهقواتي
    خابرني الضيق والضيقات خابرها

    وسع لي البال يا سيد طموحاتي
    ولا تغير النظره اللي كنت تنظرها

    تقول : حب البشر طوق مساراتي ؟
    ابك انت حبك مساراتي يسيرها !!

    ان غبت عانت عيوني من معاناتي
    وذكرك يصبرني وطيفك يصبرها

    لا يا بعد شهرتي واعظم نجاحاتي
    وكل القصايد من ابسطها ليا اشهرها

    ولا يا بعد من يدور لانكساراتي
    شعار سبب وجودي ضيق خاطرها !!

    انت اجمل اللي تسجل في سجلاتي
    ان جيت : وين البشر ؟ وان رحت : مكثرها

    يا اول واخر قصيدي واروع ابياتي
    محد يحب القصايد كثر شاعرها !!

    ما فاق حبي لك الا حبي لذاتي
    يعني احبك محبه ما اتصورها

    يا اصدق من النشوه اللي في بداياتي
    لا قلت لي كم بيت .. وقالوا انشرها

    واغلى من الدمعه اللي كل صدماتي
    تطلب يدييها !! واحجرها ولا انثرها

    واحن مني علي ان شفت زلاتي
    القاك بررتها لو صعب ابررها

    واطهر حكاية محبه في حكاياتي
    من قبل لا عيشها حسيتك اطهرها

    لا تلومني لا بديت اخاف واحاتي
    كل حاجة غاليه ما ودي اخسرها

    ولا تضايق ليا كثرت جياتي
    ضيعت فيك السنين وجيت ادورها

    تعال رتبني ورتب حساباتي
    او تدري شلون ؟! رتبني و بعثرها !!

    مو مشكله لو تصير اطول مسافاتي
    المشكله لابديت احسك اقصرها

    اكبر عيوبي : بديتك من نهاياتي
    واكبر عيوبك : لقيت اولك باخرها !!

    يا مكتشف عالمي واقدم حضاراتي
    حرام كسر الخواطر بيد جابرها ؟!

    مدام تقدر على اللي فوق قدراتي
    لا تذخر الفزعه اللي قلت ذاخرها

    رجعني لوقتي او رجعلي اوقاتي
    عامين تنطرني .. وعامين ناطرها

    وتقبل الود والشكر وتحياتي
    يا ساكن الروح والروح ومشاعرها

    وروق وركز وحاول تفهم الاتي:
    فكره تأكد قليل اللي يفكرها

    لو ان غيري معاك يسوي سواتي
    قلت : انت نعمه وهو عاجز يقدرها !!
  2. ღ حلمي وجودك ღ
    19-07-2009, 04:43 AM

    المسأله**

    ديوان الشاعر / الداهية محمد جار الله السهلي


    احضرك واتلوا عليك البسمله
    والفاتحه والغاشيه والزلزله

    واعلمك وش الحديث المنطقي
    من شان تعرف كل شي تجهله

    خدمه .. بقدمها بلا شرط وثمن
    يا صاحب افاق الخيال الممحله

    وماهيب من باب الموده والغلا
    لكن من باب احتواء البلبله !!

    كنت احسب ان سود الليالي ربتك
    واثرك على نفس العلوم الاوله

    موسوس وحالتك حاله مزريه
    الحلم قدامك وعاجز تاصله

    على مدار العام من قل الثقه :
    بينك وبين الشك والريبه صله

    ذكائك المزعوم حاجه مؤسفه !!
    تضحك على تفكيرك وتستغفله

    سويت نفسك فاهم الوضع وذكي
    وكليتها يا بو الشباب مفلفله !!

    ما احد جبرك تضيع وسط المعمعه
    وتستصعب الموقف ولا تستسهله

    القصد واضح والمعاني واضحه
    ليه اتمادى في الحكي وتؤله ؟

    طويق ثابت والجبل يبقى جبل
    فلنعتبر هذا سؤال وعلله ؟!

    شفت ان مالك بالثقه موطأ قدم
    كب الغرور المفتعل ولا اقتله

    وان عودت نهج وقناعات وفكر
    الاجوبه ترضي غرور الاسأله

    المرجله لا صارت هايط وشعر
    ما عاد ابيها لعنبوها مرجله

    وان كانها مواقف وقول وفعل
    ماعندي الا : تم وابشر وازهله

    خذ لك نصيحه كانت تسام بجمل
    يا مسيلمه او بالاصح يا عبهله !!

    لا عاد تخطب في شباب المجتمع
    ريح .. وخل الدين والنصح لهله

    ولا عاد تشهد زور فارجاء البلد
    وتبقى كذا من مرحله لا مرحله

    حتى ابليس بيستحي من كذبتك !!
    من كبرها ما هيب من ضمن عمله

    واليا بغيت الجد سجل مايلي
    واستحمله واستوعبه واتقبله

    ماهوب عيب انك تغير منهجك
    العيب وانواع الخطا والمهزله

    انك تجي كلك وتستنقد فئه
    على فعل وانت اول اللي يفعله !!

    راجع حساباتك وفكر واتعض
    واضرب على نفسك جميع الامثله

    ان كان ما انت بكلها مثل مثل
    ماوالله اقول الشعر واسترسله

    خلاصة الموضوع كله ( من - إلى )
    بيت يوضح لك غموض المسأله :

    أنا .. لو اني ما لعبت بحسبتك
    ما كان يسبب لك قصيدي مشكله !!
    ::::::::::::::::::::::
  3. ღ حلمي وجودك ღ
    19-07-2009, 04:46 AM

    كلها ساعتين ,,,

    ديوان الشاعر / الداهية محمد جار الله السهلي


    ... ألا انت سولف لي عن احوالك وخل عنك القصيد
    يعني وش اللي في غيابك راح اقوله واكتبه ؟


    شعري .. على حطة يدك !! في غيبتك ما من جديد
    البيت من قبل اكتبه .. افكر اني اشطبه !!!


    دامك تعرف ان الشعر لا يقنعك ولا يفيد
    استوعب حضوري ! وهو انساه لا تستوعبه!


    ركز معي .. الله يرضالي عليك ولا تزيد
    الهم هم .. وعدني ضيف نويت توجبه


    ما ابيك من بعد الجفا ترجع لي بقلب بليد
    حسسني بشوقك ! ودمعك من عيونك اسكبه !


    ضيعني بشهقة بكاك .. وجيب فيني ألف عيد !!
    بحكيك اللي حافظه ولا عرفت ترتبه !!


    هي كلها هالساعتين وعقبها ببقى وحيد
    لا تشح بشعورك علي ولا اتمادى !! وانتبه :


    لا شفتني سجيت ( عنك / فيك ) جودني من ( إيد
    قلبي ) ووصلني لقلبك برضاه او اغصبه


    هذه سنه ! ان ما سكنت القلب ! مسكنك الوريد !
    ونفس السنه مرت ! وحقي فيك ضايع واطلبه


    يا ادمي مدام نظراتك باحاسيسي تشييد
    لا تترك ( اسألتي ) تموت ولا لقت بك ( أجوبه )


    ليه انت راضي بالعناد ؟ وبالرضى تصبح عنيد ؟
    ليه اتساهل بالجفا ؟ ليه الوصل تستصعبه ؟


    وليه اتمنى الموت في بعدك واحس انه بعيد ؟
    وليه اشعر ان الموت في لحظة وصولك ما اقربه ؟


    وليه اعتبر نفسي إذا ذبحني شوقي لك شهيد ؟
    ولا انت حتى الشوق لا ردك علي تستغربه !!


    جاوب وريحني !! أو انسى كل شي .. ولا تعيد :
    سؤالك عن شعر شطبته من قبل لا أكتبه !!
  4. ღ حلمي وجودك ღ
    19-07-2009, 04:50 AM

    أحزن الفرح ...

    ديوان الشاعر / الداهية محمد جار الله السهلي



    وقتها كن خافقك ( جالي ) وحزنك ( شيخ لابه ) = اتصدد .. لكن الدنيا تحدك.. تنتخيه ..!!


    يا رفيق الهم .. علمني اذا عيني ربابه .!=منهو يسمع نزفها لامن نظرها ويحكيه ؟؟


    بسئلك بالله قلي : عن شقا الدرب وسرابه = كيف علقني بكذبة .. (( باكر اوصل وارتويه !! ))


    لو فقلب الليل رحمه ما فتح للجفن بابه := وعشمه في حب نجمه .. يدري انها ما تبيه !!


    ولو يضيق الكون بالطعنات تلقى بي رحابه= لا تعكر بال خنجر .. تركض ظلوعي تجيه !!


    لا يشيل الهم ( همه ) دام تجمعه القرابه = في صدر شاعر يعده : واحد منه و فيه ..!!


    له علي .. دامه يبيني ما اخونه في غيابه = كان ما جالي اجي له .. يحتويني واحتويه ..!!


    ولي عليه .. انه ما ينساني ويصفطلي عذابه =ولا يعرضني لضحك صدق ما عاد اشتهيه ..!!


    اقسى من حزني وهمي الفرح حضرة جنابه !!= لا طرى ما يطري الا.. منهو عرفني عليه ..!!


    ذاك من يحكي على عيني وتقنع باغترابه =لجل تعتق صورة فيني سجنت كل الوجيه ؟!


    غايتي ( فرح الحزن ) لا ينكسر بالقلب نابه = وخوفي لا ( حزن الفرح ) يخنق لي انفاسي بيديه !!


    من ورى قلبي رسمتك غيم يحكي بوح غابه=كل غصن منحني فيها يمدله راحتيه .؟


    هاك صدري شوف بعيونك متاهات الغلابه =في شوارع هالحنايا كم متشرد نزيه ؟؟


    لا قبل عطف السنين .. ولا رضى بسلم الذيابه = ما سئل كود الاماني .. يا الاماني جاوبيه ..!!


    ويش اقول وويش اخلي .. والبلاوي ما تشابه =غير لا قالت في قلبي لا حشى مالي شبيه !!


    ليت في وجه الزمن (( ذرة حيا )) واحسب احسابه =احشمه لجل يحشمني .. دون شي أحتريه ..!!


    وليت شعري ما يخيب هقوة اللي قد هقابه = لا تولج هاليمين وصحت فيها اكتبيه .!!.


    وليت دربي لا نثنت رجلي يقدرني ترابه =كان وربي ما احاتي قولت : ( ازرى ينتهيه ) ..!!


    بعدها بذيل اسمي باخر دموع الكتابه = دام كل بيت بقصيدي شال دمعة ما يليه !!


    هذا انا يا صاحبي حلمي الاقي لي اجابه =لا انفجر صدري وضاقت دنيتي بحروف (( ليه )) !!

    ::::::::::::::::::::::
  5. ღ حلمي وجودك ღ
    19-07-2009, 04:53 AM

    ((مختلف ))

    ديوان الشاعر / الداهية محمد جار الله السهلي


    الكلام احيان ما منه ثمره
    خلني ساكت وسو اللي تبي

    ضيق الخاطر كلامك وكسره
    اه .. من كسر الخواطر وتعبي


    واعد الجمال فالبال عشره
    كلهم ما حققوا لي مطلبي


    والقصيد إن مر ليلي وسهره
    احطب ضلوعي و اولع فحطبي


    مختلف فكر وشعور وحنجره
    أخطف الألباب واسبيها سبي


    والعفو ( توبيخ ) عند المقدره
    مير ماش عراش في راس الضبي


    صاحبي يا صاحبي لو اخسره
    مستحيل إن الخساره بسببي


    الغبي منهو يصدق له مره
    والمره ما تصدق الا مع غبي


    علمه لا يزعجك بالثرثره
    عبهله كذاب ومحمد نبي


    لا يحسبها كذا بالمسطره
    فرق بين الأعجمي واليعربي


    كم قبر في قبور المقبره
    يحفره شايب ويدفن به صبي


    وكم رجل شاف شي يقهره
    من ولد عمه على شان اجنبي


    وكانها مابين ذنب ومغفره
    لحيتي تكرم وكرمت شنبي


    الكلام احيان ما فيه ثمره
    خلني ساكت وسو اللي تبي
    ::::::::::::::::::::::
  6. ღ حلمي وجودك ღ
    19-07-2009, 04:59 AM

    نهر سكر <<

    ديوان الشاعر / الداهية محمد جار الله السهلي


    أمسيه واعلام واضواء وصحافه
    وانا لاوقفت مابيني وبيني !

    اتساقط ضيق واحباط وحسافه
    كني اخنق حلم عمري في يديني !


    واتسامى فكر واحساس وثقافه
    واكسب التقدير والاعجاب فيني


    يا طويل الحزن والواقع خرافه
    كذبة ماهيب تسلتطف يقيني !


    ليه ماغنيك تحنان ولطافه ؟
    وانت نبض الروح وانفاس تحكيني


    ماتهز الريح غصن لارتجافه
    ينكسر صوتي ! وتستاحش يميني !


    كل مامر المسا صدري وحافه
    قلت له والشمس مشرقها جبيني :


    من مشت رجله على درب السخافه
    طاح من عقلي قبل قلبي وعيني


    الرجل لاصار مابه دين : تافه
    والعدو لاصار يعجبني : خديني


    والفشل لاصرت ترضى بالوصافه
    وانت قادر تستبد وتحتويني


    وكان انا من لاربط فعله بقافه
    جعل تبكيني عيون اللي يبيني


    وجه صبح من حياه وعفافه
    استحي من طيف زوله لو يجيني


    نهر سكر من ضفافه لاضفافه
    اغنيات الملح وانشودة حنيني


    ناسي النسيان !! طبعه واختلافه
    واصبح اللي راح واللي يحتريني


    عاشقه .. وقف هنا والعمر طافه
    هو متى يرجع وترجع لي سنيني ؟!


    الفراق .. شعور من شدة جفافه
    يبذر عيوني !! ويقطف دمعتيني !!


    القلوب تعاف طاريه وتخافه
    يعتريها شئ .. عانه يعتريني :


    كلبوي طعون واحزان وكلافه
    لانتهاني جرح الاخر يبتديني


    ليت حظي مارمى عمري خلافه
    ولا ترك لي تمتمة وينه وويني ؟!


    وليت مابيني وبينه من مسافه
    مثل مابين السهر وجفون عيني
  7. ღ حلمي وجودك ღ
    19-07-2009, 05:04 AM

    الضيق ^

    ديوان الشاعر / الداهية محمد جار الله السهلي


    ياللي تحد قلبي على أقصاه
    ماعاد بي حيله على الضيق

    وقت الردى كل شي سواه
    رخومه تذم المطاليق


    ماعاد اطيق الهم وأقواه
    شلت بشبابي فوق ما اطيق


    ذي اخر أحوالي وطراه
    يومك تقول إن كني طويق


    إيه والله إن فيني مزاياه
    وإن بيني وبينه مواثيق


    بس صاحبك ماجاه كفاه
    مليت من قولة (( توافيق )) !!


    حتى الشعر شكلي أبظماه
    ماعاد تغري بلة الريق


    كانت معاليقي تمناه
    واليوم !! هو جرح المعاليق


    يطري علي واقول عزاه
    يانشوة الفرحه ابتصفيق


    واطري عليه ان تاهت اخطاه
    يلمحني بروس الشواهيق


    حتيش لو إنا حشمناه
    ماتردع الحشمه مطافيق


    في ذا الزمن ماتت بقاياه
    روح امسح دموع الطواريق


    غنى لك اللي متعب اغناه
    لاجر صوته همه يفيق


    لايكتب الضحك ولا يقراه
    كنه لحزن القاف عشيق


    بتصدق شعوري !! أو إنساه
    بصرك ترى ما احتاج تصديق


    قد قلت لك واوصيتك وصاه
    لاتنبش جروح المخاليق !!


    هالقلب لاتحده على أقصاه
    مالك ومال الهم والضيق !؟
  8. ღ حلمي وجودك ღ
    19-07-2009, 05:07 AM

    جروح الأماني

    ديوان الشاعر / الداهية محمد جار الله السهلي


    إستريح شوي .. واسمعني ثواني
    بعدها مسموح .. قول اللي تقوله ..

    جيت لك والقلب ماهو بالمحاني !
    شف قبل لوصلك سابقني وصوله !!


    ووالله ان لو لا الغلا ما جاك عاني
    يا بعد منهم بكوله و ضحكوله ..


    عاشقك سواح !! وعيونك مواني :
    اخذني .. من الحزينه .. للخجوله !!


    أبتسم خلني افضفض لك عشاني
    الحكي غصن عجز صوتي يطوله ..


    تعقد احجاجك وتعقد لي لساني !!
    المطر يا غيم ضميان لهطوله !!


    خاطري مكسور من قسوة زماني
    وانت ( كنك إياه ) وفعولك فعوله !!


    تعتبرني .. شخص مغرور وأناني
    واعتبرك .. الكون في عرضه وطوله ..


    اه لو تحس بجروح الأماني
    كان ما تزعل علي بهالسهوله !!


    حط ( عمرك ) يابعد ( عمري ) مكاني
    وان لقيت قصور ؟؟ قول اللي تقوله ..


    وأنتبه يا سيد الغيد الغواني
    التشره والمعاتب له أصوله ..


    لا تساومني ولا تجرح كياني
    كل شي إلا الكرامه والرجوله !!
    ::::::::::::::::::::::
  9. ღ حلمي وجودك ღ
    19-07-2009, 05:10 AM

    الياسمين

    ديوان الشاعر / الداهية محمد جار الله السهلي


    أي والله اني ضايق ومرهق ومخنوق وحزين
    وإما بموت من الوله ولا بموت من القهر ..


    واللي لعب في حسبة ايامي وخلاها سنين
    إني على ذا الحال يا شعري لي اكثر من شهر !!


    بعت ( المدينه ) لجل ( عين ) وقالوا الخافي يبين
    ودفنتك ( بجوفي ) وقالوا وش بقابك ما ظهر ؟!


    يا مطول الغيبه يا طول الشوق .. مير الله يعين
    العاشق اللي عاش ظامي بين عدك والنهر .!


    عيدبي غيابك ( سنه ) والليله من العايدين
    ولا عاد عيدك يا الجروح اللي بقلبي من دهر ..


    يا صاحبي لو تعتذر عن غيبتك عذرك سمين
    حبك بعد ما غبت عن عيني تمادى وازدهر ..


    من يوم شفتك ( والنعاس ) بعينك النجلا ( سجين )
    ومن نفس ذاك اليوم و عيوني ( سجينه للسهر ) !!


    علقتني بالضحكه اللي تسبق .. الغمازتين
    وتركت لي شاعر !! كتب فيك القصايد واشتهر ..


    سيلت دمعك واستباح الدمع ستر الياسمين
    وعلمتني كيف الندى يجمل خدود الزهر !!


    ليتك عقب ما غبت غيبت اشتياقي والحنين
    أو ليتني ما قد دفعت احلام عمري لك مهر ..


    وياصاحبي .. لاعاد تسألني عن الحزن الدفين
    أقسى الطعون : ( الطعنه اللي من حبيب و فالظهر ) !!
    ::::::::::::::::::::::
  10. ღ حلمي وجودك ღ
    19-07-2009, 05:19 AM

    التجربه ...

    ديوان الشاعر / الداهية محمد جار الله السهلي


    تقدم الدنيا لنا درس جديد بكل يوم
    والناس تسلم من غثا الدنيا بحفظ دروسها !!

    وعلى حسب حفظ المواجيب وتعاليم السلوم
    نعرف مقاسات البشر بالمرجله ونقوسها

    صيت الرجال الوافيه بأفعالها .. ولا الرخوم
    ينبيك عنها : قل نفعتها وشين نفوسها

    تطرد ورى الدنيا وتكشخ بالمواتر والهدوم
    مثل ( الحريم ) أغلب دراهمها على ملبوسها

    والإمعه والشايب الكذاب وضعيف العزوم
    ناس مع العالم بلا هيبه تدربي روسها !!

    والبخل : خلانه بهايم !! لا تسام ولا تسوم
    لا شفتها ترفع يدك حمد وشكر وتبوسها

    على الصحن هم أول الجلاس واخر من يقوم
    يعيفك حلو الاكل والشرب طول جلوسها

    ماهيب لللازم سند ولا ذخر عند اللزوم
    تموت ماسرك مهايطها وكثر فلوسها

    وسوالف الخبلان .. رفعة ضغط وصداع وهموم
    فلاوة تخطف علوم العرب وتحوسها

    واجب عليك إليا حكت عن جملة حكاها تشوم
    الهند ما يرأس حكومتها سوى هندوسها

    وربع المصالح والمجامل خوة ماهيب دوم
    اقولها والتجربه قطع وريدي موسها

    وقت الرخا .. مثل الصقور اللي على المرقب تحوم
    في يذري ساقك الرمضا وحر شموسها

    وإليا احتمت صكات بقعا وامست علومك علوم
    اتلوي خششها وتجحد خوتك وتدوسها

    من عقب ما انت الطيب وقدرك معزز ومحشوم
    تصير اردى ما خلق ربي ودم ضروسها

    أبعد عن الأشكال ذي .. بعد الثرى عن النجوم
    وش حاجتك في قرب رديان العرب ونجوسها

    ماهوب عيب إليا عزموك تقول يالربع .. معزوم !
    العيب : لارحت لعزايمها وجيت عروسها

    وخلك فطين تعلمك دنياك درس بكل يوم
    والرجل يسلم من غثا الدنيا بحفظ دروسها !!
12345678