أنواع الشباب في الكويت

اجمل نكت مضحكة - اضحك على سوالف الشباب والبنات ارسال إلى Twitter ارسال إلى facebook
  1. ®][ بنات العز ذلتهم عيوني ][®
    24-05-2006, 06:50 PM

    أنواع الشباب في الكويت

    أنواع الشباب في الكويت


    راح اذكر السيئه فقط
    النوع الاول
    نوع تلقاه من يدش الديوانيه ولين يطلع بس يصارخ ومسوي لجه ولويه بالديوانيه جنه خبل وضحكته عاليه ضحكت واحد جنه مولود بالشارع جنه يبي يسمع اللى بالشارع انه هني في ديوانيه وطبعا ماكو اسلوب ولا شى بس مهنته انه يسوي لجه بالديوانيه وانه على باله انه اهوا اللى مسوي جو واهوا الكل بالكل مسكيييين
    النوع الثاني
    نوع غريب من اول ما يدش الديوانية تلقاه يسلم ويقعد شوية يسولف من يرن عنده الموبايل تلقاه سكت وخمر وقام يتبوسم ويتضحك ويتشقق ويتقلب من مسند ليه مسند شوي تلقاه طلع بره بعد ما يحس انه العين عليه او اذا صار صراخ بالديوانيه تلقاه يطول عادي ساعه ساعتين يسألون وين فلان يقولون بره طبعا ثلاث ارباع هالنوعيه متزوجين لانه ما يقدرون ياخذون حريتهم بالموبايل الا في الديوانية هههههه والمدام نايمه بالبيت ولا في بيت اهلها
    النوع الثالث
    نوع هوايته الجذب انا سويت جذيه انا عندي جذيه انا صارلى جذيه وطبعا من اول ما يدش الديوانيه يدق الريشه ويتفيخر جدام ربعه هالنوعيه مسكينه لانه اكثر ربعه يدرون شنو اهوا و يدرون انه كلكجي وودهم يحذفونه من الدريشه بس الاحترام للموجودين
    النوع الرابع
    نوع غرامة الفضايح بس يتكلم عن الناس ويطعن بشرفهم انا رفيجتي اسمها جذيه تسوق جذيه ساكنه هني كل كلامه عن البنات ويحب يسولف عن مغامراته ويا البنات اللي يعرفهم وعادي عنده ذكر اسم البنيه وعايلتها ما يهمه شى وطبعا اللي يكلمها نايمه بالعسل وعلى بالها انه تكانه هوايته انه يفضح ويطعن بشرف البنات يا ابن الحلال يعني ترضاها على اهلك بس ما اقولكم الا كما تدين تدان والستر زين اذا انت لك علاقه ويا اي وحده احتفظ فيها حق نفسك مو تقعد تتفيخر جدام الشباب بمغامراتك وافعالك وبعدين تدرون شنو مشكلة هالنوع على باله انه اذا تكلم عن مغامراته وسوالفه عن البنات ربعه راح ينعجبون فيه وراح يعدونه ريال مسكيييين حدك مسكين
    النوع الخامس
    هذا النوع معقد تسولف معاه ساكت تقوله شى ساكت الكل يضحك ويسولف واهوا ساكت شنو يبي ما تدري شنو في باله هم ما تدري نصيحه هالنوعيه عطها بو لباس لانك اذا قعدت وجابلته بتصير معقد نفسه واذا سولفت معاه ربعك بقولون عنك حجي بس تدرون شنو هالنوع يمتاز فيه انه من يدش الديوانية بس يطالع التيلفزيون غلطان ما عندكم تيلفزيون بالبيت
    النوع السادس
    هذا النوع غرامه انه يلعب جنجفه بالمصري ( كوتشينه) يموووت على انه يلعب من يدش الديوانيه تلقي ربعه يسولفون ولاهين بالسوالف يقاطعهم ويقولهم يالله قوموا بسكم هذره جنه ايي الديوانيه بس حق الجنجفه ومن يخلصون لعب تلقي قال يالله تاخر الوقت انا ماشى اشكره عينك عينك لا واذا وصل الديوانيه ولقي ربعه لاعبين تلقاه يبوز ويتحلطم عطي بس نص ساعه وتلقاه ماشى يشوف له ديوانيه ثانيه ما بلشوا لعب اخر عمره بتلقاه في لاس فيغاس يوزع ورق البوكر والبلاك جاك
    النوع السابع
    نوع يضحك بصراحه ما عنده لا شغل و لامشغله تلقاه يقعد يمك ويسولف معاك ويقولك شرايك نسوي لنا مشروع تساله شنو هالمشروع يرد عليك ويقولك شرايك نفتح لنا مصبغة المهم انت عاد تكمل وتقوله والله فكره خلاص مو مشكله خلني افكر في الموضوع المهم ايي الاسبوع اللى وراه وبنفس الديوانيه طبعا تلقاه قلب هم قعد يمك مره ثانيه يقولك شرايك نفتح لنا مطعم والاسبوع اللى وراه شرايك نفتح لنا صيدليه / بقاله / قهوة / محل / ..الخ غلطان افتح لك مجمع وحط فيه اللى تبيه واخلص نوعيه مو عارفه شنو تسوي بدنياها
    النوع الثامن
    بصراحه نوعية مسخره من اول ما يدش الديوانية ولين يطلع منها كل اللى في الديوانية يستلمونه اي شى فيه اطنازه يتعلق فيه حاطينه ربعه بس حق الضحك وكل المقالب تصير فيه يعني كبش فداء اي ورطه اي مصيبه اي مقلب على طول ينقط براسه المهم هالنوعية تري فيها ميزه انه على كثر ما يحطون عليه ربعه بالحجي ويدوسون على راسه الا انه تلقاه ماشى سيده كافي خيره وشره يعني مثل الزل الايراني كل ما دست عليه صار احسن
    النوع التاسع
    وهذا النوع يسمونه الخواف او سكانه مرته لانه من تدق الساعه 11 صار جنه سندريلا على طول قضب الباب ودق سلف وراح البيت مشاء الله توقيته توقيت غرينتش نص دقيقه ما يتأخر وطبعا اذا تأخر وحنوا عليه ربعه انه يقعد تلقاه قام يصبصب عرق تدرون ليش لانه حاط جهازه هزاز والمدام قاعده تدق عليه ومن بعدها شسوي عشان يلحق على عمره قبل لا ينام بره بالشارع وتقفل عليه الباب المدام تدرون شسوي يتثاوب ويسوي روحه فيه النوم ويتمقط ويقلب اعيونه ويقول حق ربعه يا جماعه عذروني انا دخت فيني النوم بمشى فمان الله
    النوع العاشر
    اخر نوع تدرون منوووووووووو هاهاها صاحب الديوانيه لانه متحمل كل هالاشكال اللى ذكرتها لالالالالالا وفوق هذا اهوا اللى عليه الجاي والمكسرات واهوا اللى يرتب ويسنع كلشى وياما استكانات انكتت علي زولية الديوانيه وياما اوراق جناجف قام ايمعها من وراهم من بعد ما يمشون من الديوانيه وياما ناس مليقه تحمالها تدش ديوانيته وياما ناس لزقه تسهر ليه الصبح وهوا قاعد ناطرهم يمشون مسكيييين محد طقك على ايدك وقالك حطلك ديوانية
  2. محترم
    24-05-2006, 08:42 PM

    أنواع الشباب في الكويت


    يسلموا خيو على الموضوع بس اقو انت ذكرت كل سلوك البشر من ------------- الى
    ولم تبقي منهم أحد ما هو في شباب الكويت هو بغيرهم من الشباب العربي
    يسلموا على الموضوع الحلو مشاركه جميله
  3. ®][ بنات العز ذلتهم عيوني ][®
    24-05-2006, 09:32 PM

    أنواع الشباب في الكويت


    خيووووووو المحترم انت فهمتني غلط قصدي باللهجه الكويتيه وتسلم على التفحيط فووووق صفحتي يا ذووووووووووووووووووق
  4. صدق الأحساس
    02-06-2006, 07:05 AM

    أنواع الشباب في الكويت


    ههههههههههههههههههههههاي

    الله يرجك يا شييييييييييييييييييييخ

    حلووووووووووووووه عليك اللهجه الكويتية

    هههههههههههههههههههههه
    لوووووووووووووووووووووووووووول

    مشكووووووووور على الموضوع
  5. خوخة
    27-07-2006, 07:38 PM

    أنواع الشباب في الكويت


    انا من اهل الكويت
  6. dam3العين
    28-07-2006, 01:37 AM

    أنواع الشباب في الكويت


    تسلم
    اي خلك كذا مواضيعك عن الشباب
    بلا ما تطلع فضايحنا حنى يا البنات
  7. روح الورد
    28-07-2006, 05:17 AM

    أنواع الشباب في الكويت


    هههههههههههههههههههههههه

    يسلمووو اخوي بس مو الكل متواجدين بالدوانيه الي انت قايل عنها في احسن من

    هالنوعيات ما كانوا متواجدين لحظتها خخخخخخخخخخخخ .
  8. الاميره ياسمين
    31-10-2008, 08:16 PM

    أنواع الشباب في الكويت


    المووضووع جدا حلوه للنقاش فعلا في من الشباب كده مو بس في الكويت حتى السعوديه ترى فيهم هاذي العادات السيئه
  9. Boya Zgrteeya
    06-02-2011, 02:34 PM

    رد: هناك 10 أنواع من الشباب لأخوانا أهل الكويت

    أنواع الشباب في الكويت


    Yslmoo 3la al.mw6'oo3