قصيدة اعمار - فزاع

ديوان الشاعر حمدان ال مكتوم - فزاع ارسال إلى Twitter ارسال إلى facebook
  1. *مزون شمر*
    24-01-2009, 01:11 PM

    قصيدة اعمار - فزاع

    قصيدة اعمار - فزاع


    يشب الفكر بالمعنى وهاجوس القصيد يثور
    وحروف القافية تسكن لساني واتهجاها

    على طاري بحور الشعر ياللي تعشقون بحور
    قصيد الشاعر اللي يحسب الكلمه ومعناها

    يلامس كل بيت من بيوته لهفة الجمهور
    قبل تنزل بصوت المطرب اللي شاد بغناها

    قصايد يمتزج معنى وصايفها بصدق شعور
    لفت والفكر ساق عنانها والليل سراها

    تراقص كانها بنت الرمك يوم الثرا ممطور
    تهادت القلوب لبعضها والشوق وداها

    وانا لي من خيول السبق خيل فعلها مذكور
    على صهوة جوادي اكسب الطولات وارقاها

    ولي باهل الصقارة باع و من اغلى الصقور صقور
    تنوش الصيد لوترقى السحابة وتعداها

    ولي فالهجن خير الهجن واسبقها بدون قصور
    اصيلة كل مالزت لها الضامر تحداها

    اذا قلنا اعمار المجد يشهد والجناح يثور
    تروم المستحيل اللي تمنته وتمناها

    يغطيها الصفار تقول كانها شعلة من نور
    مزاياها عديده وانشدوني عن مزاياها

    مفارقها وساع ومن مفارقها يلين الزور
    مع طول رقبتها وصفها يوم اتحلاها

    منارة مسجد مع قبته يا عندها والكور
    من عيون الحسود الله يحفظها ويرعاها

    متى ماعرضت كن اكثريها للصدر منذور
    ولا عقب السنام وطيها ولا خف موطاها

    فريدة عصر هالة نصر صفوة وطر سمحة طور
    تقول كان الله من عروق ناقة صالح انشاها

    اذا تورد اعزل النوق عنها خمس ست شهور
    اذا تصدر اوردهن واذا تورد صدرناها

    على مرباعها فزن ولا رامن بحق وزور
    ميادين البطولة ملكها والهجن تدلاها

    متى ما روحت كان الرياح المقبلات تبور
    بامر الله مسراها وبامر الله مجراها

    ومتى مانحروها واقبلت رد الخصر منحور
    تروم تحمد راعيها وصعب تحمد عقباها

    تقل ميدانها ساحة قتال وفوقها تيمور
    على ضرب الدروب الكايده والسبق رباها

    اذا قامت تقوم لحالها لو شوطها محشور
    وهي بين اندر الهجن العمانيات و اقواها

    ماخلقت باخر الطابور خلقت لاول الطابور
    زعيمة كاس والسيف المصقل من ضحاياها

    بلا جنحان ماتقدر تحلق فالفضا الطيور
    وهي تقدر تحلق فالفضا لان الله اعطاها

    مايكسر تيمها اعمار غير اعمار ياهل الشور
    كان التيمات معروضات عليها وتنقاها

    اعشيها على كفي محب وعاشق ومسرور
    وهي لوودها كفي تعشاها .. تعشاها

    اجي بحامها جي الضمار وادي الممطور
    واسايرها وتفهم نظرة عيوني وتقراها

    اسميها معجزة الهجن ولا باسم محظور
    من اسلحة الدمار الشامل المحظور مبناها

    هي البحر المحيط الهايج اللي كل موجه سور
    او البرق الذي من ناره الغيمه نزل ماها

    شسميها وهي اكبر من الاسما وانا معذور
    تعب فيها الخيال وماقدر يكشف مسماها

    بوصفها لكن من يقدر يوصف بنات الحور
    بنات الحور فالجنة وهي فلارض مرباها

    لو ان فرعون مصر اللي بنى الاهرام قبل عصور
    حضر مركابها فالشوط الاول يوم سقناها

    هدم الاهرام والاهرام مشهورة وهو مشهور
    على هيكل اعمار مصر عاد مبناها
  2. سميا
    18-04-2009, 08:31 PM

    قصيدة اعمار - فزاع


    حلوه
    يسلمووووووووووووووووووووووووو
  3. أروى
    19-07-2009, 02:02 AM

    قصيدة اعمار - فزاع


    يسلمووووووووو