قصيدة وقت الساعه - فزاع

ديوان الشاعر حمدان ال مكتوم - فزاع ارسال إلى Twitter ارسال إلى facebook
  1. *مزون شمر*
    24-01-2009, 01:05 PM

    قصيدة وقت الساعه - فزاع

    قصيدة وقت الساعه - فزاع


    وقت الساعه حسب توقيت الاحباب المحلي
    يا خفوق ما يهاب البحر ضيقه وإتساعه

    ويا نجوم الليل لا غاب السهر في العين طلي
    لين نور الصبح باكر يسطع فوجهي شعاعه

    يا قريحة شاعر فكره من اللهفه مولي
    علمي حسادي ان الشعر ابداع وبراعه

    وزعيني في قلوب الناس وانا في محلي
    يكفي اني فرد واحد و تأثر به جماعه

    صادق الاحساس لو انه ورى ضلع معلي
    ياصل لجمهوره الواعي بلا صحف واذاعه

    والزعل ماهو دموع وضيقه وحسره يا خلي
    ومن يقول انه دموع وضيقه وحسره اشاعه

    الزعل بين الحبايب مثل لحظات التجلي
    فرصة التفكير ياتي الوصل والا القطاعه

    والليالي من سنين العمر تاخذ ما تخلي
    من نشر فيها شراعه لازم يطوي شراعه

    واللقى مثل القناعه كل ما زاد التقلي
    والفقير ان ما تعذره مات من كثر القناعه

    والمفارق مثل طاري الموت ما عنه تخلي
    مؤمن به حق ايماني ولا جاني سماعه

    يا حبيبي لا تلوم انسان من طبعه يزلي
    ما خلقه الله رسول ولا جعل عنده شفاعه

    في الزعل ارفق علينا بالدلال وبالتغلي
    وان سمحت العفو عند المقدره والاستطاعه

    وان بغيت البعد قلت البعد قال شفيك قلي
    قلت ويش اقول ما عندي على الفرقى مناعه

    كنت احسب اني شجاع لا يهاب ولا يولي
    و اثر يوم البعد ما ينفع شجاع ولا شجاعه

    قال شكلك تبغي الدعوه مسرات وتسلي
    وانثنى ما عاد له في شوفتي شف وطماعه

    قلت له يا كامل الاوصاف انا طالبك باللي
    ملكك روح الضعيف وعلمك سمعا وطاعه

    دامك اخترت الفراق وعجزت من بعضي وكلي
    اخذ عيني واخذ عقلي واخذ خفاقي وداعه

    قال ليت وقلت عيني لاجل دمعاتي تهلي
    يمكن اذا شفت دمعي يحزنك كثر اندفاعه

    واخذ عقلي لاجل تدري كيف منك ما يملي
    كيف طيفك في خياله كل وقت وكل ساعه

    واخذ خفاقي معك لله في لله ياللي
    ما دريت بقيمته عندي سوى لحظة وداعه

    كان لا هذا ولا هذا ولا هذا حصلي
    الفقير ان ما تعذره مات من كثر القناعه
  2. سميا
    18-04-2009, 08:36 PM

    قصيدة وقت الساعه - فزاع


    روعه
    يسلموووووووووووووو
  3. الطرقا
    20-04-2009, 03:44 PM

    قصيدة وقت الساعه - فزاع


    مشكووووووووووووووورة اختي
  4. أروى
    19-07-2009, 02:03 AM

    قصيدة وقت الساعه - فزاع


    الله يعطيك الف عافيه على الكلمات الرائعه