من قصائد الامير عبيد ال الرشيد

ديوان قصائد الشاعر - ديوان قصائد الشاعره ارسال إلى Twitter ارسال إلى facebook
  1. سااااكب الدمعه
    02-09-2008, 04:49 PM

    من قصائد الامير عبيد ال الرشيد

    من قصائد الامير عبيد ال الرشيد


    بسم الله الرحمن الرحيم

    وبه نستعين .... نبدا في هذ السلسله التي نتكلم به عن امراء وحكام حائل والجزيره العربيه من القرون السابق ونبداءبي
    الأمير , الفارس, الشاعر عبيد بن علي الرشيد , و الرشيد كما هو معروف فخذ من ال جعفر من عبده , أحد بطون قبيلة شمر. ولد عبيد تقريبا عام 1220 ه , و يعتبر من أشجع فرسان الجزيرة العربية في ذاك الوقت ..," كان بسيفه يشكل الدعامة الأساس لحكم ال رشيد بحائل, و كان قائدا للجيوش و محاربا صلبا علق روحه على طرف سيفه و خاض المعارك بجرأة و اقدام قلما يوجد لها مثيل و هو من الرجال القلائل الذين امتازوا بالقوة الذاتية و الجسارة و المهارة الحربية منقطعة النظير".
    ولد الامير عبيد في زمن كله حروب و اضطرابات , و كانت الحروب على وقتهم مثل شربة الما, أسهل شي عندهم انك تحارب, فما يمدي حرب تطفى إلا و تالع حربن أخرى. و عبيد نشأ على هالحياة و على هالحالة, على صوت الخيل و قرقعة السيوف, اللي خلته يصير فارس و شجاع. يقول في وصف احد الحروب:


    أصبحت منهن خالي كود ثنتين *** سعدي و مصقول يداوي الغلايل



    و يقصد ب " سعدي " فرسه , و المصقول هو سيفه اللي يداوي الروس , كقول عنترة بن شداد :



    و سيفي كان في الهيجا طبيبا *** يداوي رأس من يشكو الصداعا



    و يكمل قصيدته لين يقول مفتخرا :



    اللي ذبحت بشذرة السيف تسعين *** أيضا ولاني عن طردهم مسايل

    واللي وطينا ما تشوفه امحبين *** و الكذب تنفاه العلوم الصمايل

    و البيت الثالث تم تعديله من قبل احد شيبانا الله يطول بعمره , و سنتطرق لقصته اخر القصة

    مادا حقوق الدار كود الهزازين *** حنا ليا عدوا رجال الحمايل



    و في الحرب هذي, يقال ان سيفه المصقول , لصق بيد عبيد من كثر ما ذبح فيه من القوم اللي حاربوهم, ولا قدر يفك السيف عن يده لين حطها بماء دافي.



    ولا شك , أن الفارس البدوي, ما يقدر يتخلى عن حصانه لو يعرض عليه الذهب مقابله ما باع, و اللي صار لعبيد, إن أحد ولاة الأتراك طلب منه فرسه " كروش" , فما وافق عبيد, و بين ان فيصل الدويش و محمد بن هادي قبل البيه سألوه كروش , بس انه ما يبيعه ولا يبدله لو بغالي الأثمان :



    يا بيه انا لكروش ماعطي ولابيع ***قبلك طلبها فيصل و ابن هادي

    يا بيه لو كثرت بالقول ماطيع *** هو كيف تبغيني أسلم جوادي

    يا بيه ما يرهم على مثلها البيع ***ولا يجي مثله بقودة امهادي

    ما جمع أصله بالقراطيس تجميع *** أصله يعرفونه جميع البوادي

    باع الى من لقموا بالمصاريع **** و صاح الصياح و ثارعج الطرادي

    أنهج عليها و انعدي للتراثيع *** مثل الفحل لا صار وقت الهدادي

    و اصلها لعيون بيض مفاريع *** فوق الحنايا و السبايا غوادي

    هذاك بيعه و الصبايا مفاريع *** بين القنا و مخفرات الهنادي



    اما القصيدة هذي, تمثل فلسفته في الحياة و الحياة الي كان يعيشها, و ذهبت أغلب أبياتها أمثال دارجة :



    القلب من كثر الهواجيس قزان *** ما يستريح من الدهر ربع ساعة

    يا غافر الزلات يا والي الاحسان *** تجعل من التقوى لنفسي بضاعة

    أنا على لان و ربعي على لان *** متخالف رايي و راي الجماعة

    مانيب شاري غير بت من الضان *** يقنع باشراك البهم في ارضاعه

    أنا ولد علي سلايل كحيلان *** و ربي خلقني للسبايا وداعة

    الناس ما تسقيك لا صرت عطشان *** ولا يشرب المظمي حذا من ذراعه

    اضرب على الكايد لا صرت بحلان ***و عند الولي وصل الرشا و انقطاعه*

    عيبن على اللي يتقي عقب ما بان *** و عيب طمان النفس عقب ارتفاعه

    اما تجي بعقود حص و مرجان *** ولا فهي لابليس طار بشعاعه

    واطرابة الدنيا مع الفجر دخان *** واكرارة باطراف خطو الصعاعة*

    ملاحظة : اورد مؤلف الكتاب البيت السابع كما يلي :

    اضرب على الكايد لا صرت بحلان ** و عند الولي وصل الحبل و انقطاعه
    و اورد البيت الأخير ذاكرا الصماعة بدلا عن الصعاعة . و التعديلات اخذت من احد احفاده الامير عبيد

    و لعبيد بعض القصائد الغزلية النادرة, و هو مقل من ناحية الغزل, و قال هالقصيدة بعد رجوعه من إحدى الحروب البعيدة, يقول ياصف الضلع اللي مر عليه :

    لي بأيسره من لابسات العشاريق *** خشف يخلط المسك و الزعفراني

    وش عيشتي لولا رجا ذابل الريق *** لولا رجا لاما زريف المثاني

    ابو قرون كنهن دفن الهيق *** وامجدل فوق المتن له وقاني

    من حط فوق الصدر زين العشاريق *** حص و مرجان زها بالبياني

    روض البختري زاهي بالزماليق *** و امفلجات به كما القحوياني

    هي نقوتي من لابسات العشاريق *** من مصر الى غربه لشرقي عماني



    و هو يوصف زوجته بهالقصيدة .



    و في اخر ايامه له هالقصيدة اللي تحوي الكثير من الحكم. و مثل ماهي عادته, يعتز بنفسه و يفخر بأفعاله الحميدة, و يحق له الفخر و الاعتزاز, لأنه كان قول على فعل :

    طلبت ربي عالم السر و الغيب *** يقبل صلاتي له و يقبل صيامي

    و يحعل لنا عرض نزيه عن العيب **** و يفكنا من شر سو الاثامي

    بن ادم ملفا الخطا و العذاريب *** لو ما فعل رميت عليه التهامي

    حميت انا نفسي عن الشك و الريب *** ولا احسب ان يلقا بعرضي كلامي

    ربعي لقوا بي عقب ما شبت انا عيب *** تسطير كتب مفسرين الحلامي

    قلت اخبروني يا ملا وش ذالعيب *** قالوا على ساقة رفيقك اتحامي

    قلت ان هذا من قديم لنا عيب *** مستارثينه من خوال و عمامي

    العيب ترك المعرضه بالمواجيب *** والا الرفيق بطاعته ما نلامي

    رفيقنا كنه بروس الشخانيب **** في راس حد نايف ما يظامي


    من قصائد الامير عبيد الرشيد في فرسه

    -------------------------------------------------------------------------------



    كانت الفرس كروش ملكا لإبن هادي شيخ قحطان ،
    اشتراها منه الإمام فيصل بن تركي وأهداها للأمير عبيد العلي الرشيد
    تعلق بها الأمير أيما تعلق كيف لا وهي من أعز أصائل الخيل
    في شبة جزيرة العرب وهي هدية من صديقه المقرب "
    ومن شدة اعتزازه بها قال :
    ما ذقت شي عنك يا طوعت الراس .... لوهو من المطعوم شي قلايل
    ولادرت من فرجك مثامين واكياس ... اربع سنين فوق الأرباع حايل
    باغ عليك ان فرعت كل مكياس .... وذهلوا مصانيم الدروع الحلايل
    انطح عليك وجيه شرابت الكاس .... مع وجه مروين الغلب بالدبايل
    حلفت ماتنصين حي من الناس .... لابالثمن ولا برد الجمايل
    وهم ويش لو كز المراسيل عباس ... ماسلت عن راس به الزوم طايل
    انا بجا ماسلت عن باقي الناس .... ولولا المعزة مانزلنا بحايل


    وحدث أن طالبه ابن هادي بحق " المثنوي " وهو أول بطن تلده الفرس
    كروش هدية الإمام فيصل بن تركى وأرسل له هذه القصيدة
    موضحا له بطلان حقوقه السابقة في الفرس كونها أتته هدية :



    جانا جوابك يا الشجاع ابن هادى
    تقول لك بكروش عندي مثاني
    وكروش جتني من نحاز المعادي
    عز العرب عند اختلاف الزماني
    سلطان نجد حضرها والبوادي
    محيى من الجودة سمال المعاني
    ريف الضيوف وتاج رأس السنادي
    أنا وهى له إن بغاه أو بغاني
    ريف على غالى حلاله نفادي
    عطاه ما به يا ابن هادى مثاني
    هضيمة طلبتك مثاني جوادي
    وأنا بكفي حبلها والعناني
    ومخفر من مرهفات الهنادي
    وفعلي على الشدة يطاوع لساني
    ثم الصلاة لمن بتلعة اجيادي
    ينزل على قلبه حروف القران

    القلب من كثر الهواجيس قزان **** مايستريح من الدهر ربع ساعه

    ياغافر الزلات ياوالي الاحسان **** تجعل من التقوى لنفسي بضاعه

    انا علي لان وربعي علي لان **** متخالف رايي وراي الجماعه

    ماني بشاري غير بت من الضان**** يقنع باشراك البهم في رضاعه

    انا ولد علي سلايل كحيلان **** وربي خلقني للسبايا وداعه

    الناس ماتسقيك لاصرت عطشان****ولايشرب المظمي حذا من ذراعه

    اضرب علي الكايد لياصرت بحلان****عند الولي وصل الرشا وانقطاعه

    عيب علي اللي يتقي عقب مابان **** ويرضى طمان النفس عقب ارتفاعه

    اما تجيب عقود حص ومرجان **** والا فهي لأ بليس طار بشعاعه

    وطرابة الدنيا مع الفجر دخان **** واكرارة باطراف خطو الصماعه




    تمت القصيده والله يرحم الفارس الامير عبيد ال الرشيد
  2. رومنسييه
    22-09-2008, 06:41 PM

    من قصائد الامير عبيد ال الرشيد


    ღ♡♥ஓ .... ஓ♥♡ღ
    يعطيك العافيه خيوو
    طرح رائع جميل
    دمن لنا
    ღ♡♥ஓ .... ஓ♥♡ღ
  3. سااااكب الدمعه
    26-09-2008, 01:18 AM

    من قصائد الامير عبيد ال الرشيد


    الف مليووووون اختي رومنسيه على المرور
  4. سااااكب الدمعه
    05-10-2009, 12:49 AM

    من قصائد الامير عبيد ال الرشيد


    قاطعة الحب
    >>مجنونة اتكييت<<
    الف شكر لكم ع المرور
  5. طير القوافي
    24-12-2009, 11:04 PM

    من قصائد الامير عبيد ال الرشيد


    صح لسانك ولسان الرشيد
    شاعر معروف وغني عن التعريف
    شكرا لك
  6. ابن الكويت
    08-11-2014, 01:36 AM

    رد: من قصائد الامير عبيد ال الرشيد

    من قصائد الامير عبيد ال الرشيد


    رحم الله الامير الفارس الشاعر عبيد العلي الرشيد الشمري
  7. حياة العرب 2020
    11-04-2018, 10:29 PM

    رد: من قصائد الامير عبيد ال الرشيد

    من قصائد الامير عبيد ال الرشيد


    رحمة الله على شاعرنا الكبير