قصيدة الزفة - ربيع القلب

بنت زآيد

Active member
السلام عليكم ورحمة الله وبركاتة


::الزفة::


ابد ما كنت اظن فيوم شعري في عيوني يشين

ولا كنت انتظر لو لحظه فيها تخونني الابيات

تبيني عقب ما صغت الحروف في حبي لج كل حين

اصيغ في عرسج بغيري قصايد يالغلا وزفات

ابعرف انتي وش قصدج.. دخيلج انتي وش تبغين

ابعرف بين هالشعراء لي يعني انا بالذات

لجل تتجدد جروحي.. لجل ارجع ورا لسنين

ابي يطمن قليبج.. ترا جرحج ابد ما مات

غرامج اه منه ..ما تركني ..بسبته تطرين

كأنه حالف يسهرني واهوا في جروحي يبات

تبين الصدق .. انتي من كثر ما في خيالي تجين

احس بكل ماحولي يرجع كل ماهو فات

اذا انه حد ناداني كأنج انتي اتنادين

واذا انه حد زعلني طرت فيامج الزلات

واذا هل القمر شفتج وكنج بليلج اتهلين

يذكرني سكونه يوم الومج ..والردود اسكات

صراحه كل شي خلاج ويا طيفج اتمرين

قصائد.. امكنه .. نكته.. مسلسل..أغنيه.. شلات

وانا وش بيدي غير اني اقول فقلبي الله يعين

قسم بالله مو ناقصني الا تجيني فالصلوات

انا حاولت اسوي كل ما يمكن لجل ترضين

بغيت اتقرب لقلبج حبيبي مره وامرات

وهو المعروف انه الشخص لو سلم يمد يمين

انا لو قلتي سلم باليسار ابقلب العادات

اجي مني اجي مناك ..ما أدري اجي من وين

واذا انها فالخريطه أربعة وياج عشر جهات

دلع .. بكثر من دلع حسبتج بنت ست سنين

غزل من كثر متغزل مخلص معجم الكلمات

رومانسيه ..بها مذوب حجر وانتي ولا تذوبين

وحتى قمت احس اني غلبته قيس انا فاوقات

مزعل ناس من عقبج ..مهي وحده ولا ثنتين

انا يلي مزعلهن عشانج والله بالميات

انا مقصد انقص في قدر يلي له تميلين

ولكن ودي اعرف وش من افعاله علي فات

وانا اللي قلت من قدي.. طلعت ابقصتي المسكين

بكل اللي يصير انا معذب فحسن الحالات

حسبت اقدر على موجج اذا انج بالهوى اتهيجين

نعم مو كل من غاص البحر يرجع معه دانات

تبيني بعدها اكتب قصيده فيها تنزفين

اقول الا تبيني بس اسطر في رثائي ابيات




الشاعر الاماراتي : ربيع القلب



قصيدة اعجبتني واتمنى تنال اعجابكم

تحيتي لكم
 
ربنا يفرح جميع العزبية ,, :k: <<< فكرنا بالزواج ,,

يعطيكِ ألف عافية بنت زايد,,

دام عطائك و نشاطك لنا ,,

ربنا يحفظك و يسعدك,,

دمتِ بألف خير,,
 
ابيات جمليه ومشاركه متميزه منك بنت زايد

الله يعطيك الف عافيه على النقل الاكثرمن رائع
 
ربنا يفرح جميع العزبية ,, :k: <<< فكرنا بالزواج ,,

يعطيكِ ألف عافية بنت زايد,,

دام عطائك و نشاطك لنا ,,

ربنا يحفظك و يسعدك,,

دمتِ بألف خير,,

الله يوفقك ونشوفك معرس :eek::

الله يعافيك ويسلمك

يسلمووو على المرور الطيب

تحيتي لكم
 
عودة
أعلى