قصيدة معز الفهود – خالد الفيصل



لى جتني الكلمة من الراس ازود
بالخص لى صار الفهد مصدر القول


تبقى الحروف ايام عمري شهودي
تاج على راسي من العز محمول


ورضاك عني ياعريب الجود
غاية مناي اللي له العمر مبذول


أفوز بك وانهض وتقوى زنودي
وأمشى وانا وثق على الدرب واطول


الله يعزك يامعز الفهود
يامجد الأمجاد ياملقح الشول


إنت السحاب اللي يشيل الرعود
فيه المطر نعمه وفيه الخطر هول


وانت الهبوب اللي هواها ينود
نسيمها ينعش و عاصوفها صول


وانت البحر غوره بعيد الحدود
وسره ولو قلنا عرفناه مجهول


وانت الفضا تضيع فيك اللهود
كم كوكب بسري بمسراك مكفول


تسابقت كل المراجل وفود
في مجلسك ياللي عن العيب معزول


لأهل الكرم عد و وعنك عدود
دايم على حاجات الأجواد مشغول



وإن ثارت العجه والأيام سود
وقفوا على بابك و ماقلت مقبول


فهد ولد عبدالعزيز السعود
زعيم شعب كنه السيف مسلول