ضمها قبرها قبل لاأضمها قصة حقيقية

:a:
(ضمها قبرها قبل لاأضمها) "

السلام عليكم ورحمة الله وبركاتة

صباح الخير
صباح العسل



بداية:
{القصه صارت في السعوديه بمنطقة الخرج}
[عبد العزيز ونوره]

احب اعرفكم على الشخصيات عزوز{عبدالعزيز} والنوري{نوره} هم ابطال القصه وخلود اخت عزوز وصديقه نوره
وبيت عزوز وبيت النوري جيران يعني بيوتهم جنب بعض وكان صديق عزوز وولد خالته واسمه <بندر>__اللي هو انا__ وانا وعزوز اصدقا الروح بالروح وبيتنا بعيد عنهم شوي}

*** " نبدأ القصه " ***



كان عزوز في عز المراهقه وكان يموت في شي اسمه النوري ويسوي المستحيل علشان يشوفها وصارت بينهم مواقف كثيره ومضحكه وكان عزوز يخطط دايم للمواقف هذي ومعه بندر وبعض مواقفهم
كان عزوز يتحرى اليوم اللي تسوي امه فيه أكل وتقول وصله لبيت الجيران وهومايصدق على طول جاهز كله لعيون النوري وكان عند عزوز أخت في عمر نوره اللي هي خلود وكانت عارفه ان عزوز يحب النوري موت بس ماقالها بس عرفت من اسئلته عنها مثل:
1_النوري داومت بالمدرسه اليوم؟؟
2_النوري ليش طلعت متأخره اليوم من المدرسه؟؟
3_<ايام الامتحانات>النوري جاوبت زين بالامتحان؟؟
ومثل هذي الاسئله
وكانت خلود رافعه ضعطه لانها يالله يالله تعطيه الرد طبعا خلود قاصده لانها داريه انه يحبها
و عزوز مايخبي علي شي وانا بعد ماخبي عليه شي
وكان من ظمن مواقف عزوز إنه يتميلح ويترجى أخته علشان توافق انه يوديها للمدرسه على السياره مع انها كانت قريبه ماتحتاج سياره وطبعا مو لسواد عيون أخته كان كله لعيون النوري علشان تروح معهم
المهم مرت الأيام والسنين وتخرج عزوز من الثانويه والنوري وخلود صاروا في ثالث ثانوي
وعقل عزوز وصار رجال والكل يحترمه لأخلاقه وصار طالب بكليه الملك فهد الامنيه
اما النوري وخلود حالتهن حاله مع ثالث ثانوي ومن مدرسه عربي لمدرسه انجليزي طبعا مدرسات خصوصيات
ومرت الشهور والامتحانات وجا وقت النتايج النوري تبكي من الخوف اما خلود داجه ومطنشه
النوري:خلود النتايج اليوم
خلود:وش فيها اذا كانت اليوم عادي
النوري:خليده وجع ماعندك احساس ماتخافين لو جبتي نسبه شينه وش بيقولون الناس عنك
خلود:خلهم يقولون اللي يقولون مايهمني احد
النوري:ياربيه منك اقول بس شغلي النت خلنا ندخل الموقع نشوف النسب طلعت ولا لا
خلود:وش موقعه اقول بلا موقع نسب بلا نيله خلينا ندخل دردشه وبس وخلنا نسولف مع الشباب ونضحك ونستانس خلينا نفلها عطلنا يانوره خلاص ماعاد فيه مدرسه
النوري:يابرد اعصابك ياخليده احر ماعندي ابرد ماعندك بالله عليك هذا وقت دردشه
خليده والله لو اجيب نسبه زينه لاعشيك عشا على كيف كيفك واخليك بعد على الدردشه اللين تملين بس ادعي اني انا وانتي نجيب نسب حلوه
خلود:اووووه مادام المسأله فيها عشا ودردشه يارب نجيب نسبه حلوه مع اني غاسله يدي واحفر ان جبت نسبه زينه
النوري:هههه ضحكتيني وانا مالي خلق بس ابي اعرف ياخليده وش ذا الحب للدردشه حتى بالامتحانات تدخلينها لايكون تكلمين من وراي

خلود:اعوذ بالله مو لهدرجه يانوره انا مجنونه اكلم انا حدي دردشه وبس مكالمات مستحيل بس والله انها وناسه وفله وتنسيني العالم_
المهم اتصل عزوز على اخته خلود وكان معه بندر وطبعا النوري جالسه عند خلود
عزوز:النتايج معي
خلود:والله ياعزوز من جدك تكلم_ ماخبرتك مهتم فيني لذا الدرجه ولا عشان النوري ايييه الله يرحم حالي محد يهتم فيني
النوري ضربت خلود
[وكان عزوز مشغل السبيكر]
بندر:افا وانا ولد خالتك كلنا تحت امرك
استحت خلود وسكتت
عزوز:اول مره تستحين ياخليده ليتك دوم كذا وتفكينا من لسانك الطويل
خلود:سكر السبيكر والله ماخليك بس تعال للبيت ياعزيز
بندر مات من الضحك وكذلك عزوز
عزوز:قولي للنوري نتيجتها 95 % والف مبروك واما انتي يالداجه 89 %
النوري جلست تصايح مو مصدقه وخلود تضحك من الفرحه علشان النوري فرحانه
وانتهت المكالمه
خلود_النوري:فرحانات وراحو يبشرون اهلهم وصديقاتهن
اما عزوز و بندر:عزوز يشكي لبندر حاله ويا نوره ويقول انا ابي اشوفها بس ماعرف كيف وودي اتكلم معها بس كيف يابندر؟
بندر ساكت ويفكر في حال صديقه وولد خالته عزوزوقال:��جاتني فكره وانا ولد وخالتك تبي تشوفها بس ابشر اسمع خطتي ونفذها مثل ماهي ok‏ ‏
عزوز:والله يابندر تكفى قولها والله لا انفذها مثل ماتقول
بندر:شوف اليوم اللي بتجي عندكم نوره واذا كان خلود شغلت النت دق على جوال خلود وقول ابي جهازك الكمبيوتر وانتي روحي لغرفتي وشغلي جهازي واستخدميه طبعا خلود بتستغرب بس انت خلك جاد في كلامك معها واذا راحت لغرفتك وشفتها شغلت جهازك دق علي وانا بجي عندك وخل خلود تزين قهوه وشاي وقلها عندي ضيوف بس فيه مشكله
عزوز:وش المشكله
بندر:خدامتكم العله لازم نصرفها لان خلود اكيد بتقول لها سوي القهوه بس كيف انصرفها تعرف انها عله وصاحيه ماينلعب عليها بسهوله
عزوز:ماعليك بخليها تروح لخوالي بس كيف اخليها تروح
بندر:يالليل حبكت على الشغاله لحظه جتني فكره قولها في رساله عند خوالي لك من اندونيسيا وتعرف شغاله وجتها رساله وش بتسوي بطير من الفرحه
عزوز:بنيدر والله انك خطير وبنفذها ونشوف عساها تظبط
بندر:المهم وشرايك ندخل الحديثي مول
عزوز:بيطردونا لانا عزابيه
بندر:ماعليك انا ابو الافكار بعطيهم كذبه
المهم بعد محاولات من بندر وكذا كذبه دخلوهم الحديثي وكان السوق زحمه صبايا وشباب واطفال وعوائل وهات يامغازل ويابلوتوث من شباب وبنات
بندر مغازلجي درجه اولى وبكل صراحه مالوم البنات لانه وسيم وحلو مووت وسكسوكته جنان
بندر:عزوز ناظر المبرقعه اللي عند هرفي ياويلي ويلاه محلاها بس كيف ارقمها
عزوز:الحمد لله اركد ياولد لاتفضحنا قدام العالم
بندر:انا مرقمها _مرقمها
وفتح الجوال وشاف الالقاب يمكن يلقى لقبها
بس وين بيلقى لقبها بين ذا العالم_بعدين مايدري جوالها ببلوتوث أو لا ؟!
وقرب من عندها
وفتح البلوتوث ولقى القاب ومن ضمنها:
بدويه ولي الفخر
صحرا نجد
مزيوونه الدواسر
الفارس
الجذابه
الوسيم
سيده ملعقه
هلاليه والكل خاضع ليه
وقام بندر وقرب من هرفي لان البنت واقفه عنده تطلب
واخذ يرسل لكذا لقب وكان يتسمع للجوالات لين فقد الامل وباقي اخر لقب وارسله وصار لقب البنت المبرقعه اللي هو
مزيوووووونة الدووواسر
وصراحه هي قد لقبها من ناحيه الزين والرزه
واخذ بندر يتميلح قدامها لكن اللي جنن بندر انها ماعطته اي اهتمام ولاحتى التفت عليه وصمم بندر انه يكلمها ويعطيها الرقم
بندر:يامزيونه
البنت مانتبهت
بندر:ياحلو انتا
البنت اشكل ماسمعته
بندر:يامزيونه الدواسر
البنت ناظرته
بندر:فديت هالعيون ماحلاها
البنت طنشته و جلست تكلم العامل اللي بهرفي
بندر:ممكن سؤال
البنت:نعم
بندر:انتي دوسريه
البنت:ايه ليه بغيت شي اوتامر بشي
بندر:لاسلامتك _ ونعم والله بالدواسر بس ممكن تاخذين الرقم
البنت: مو معنى اني رديت عليك انك تفهم قصدي غلط اني اخذ رقمك تراني بنت رجال واخت رجال وماهي من سلومنا اخذ الارقام


اما بندر سكت وكبرت بعينه البنت وقال:اشهدنك بنت رجال
البنت راحت
ورجع بندر لعزوز

بندر: والله العظيم انها هزتني من داخل وكبرت بعيني
عزوز:اوف ليه وش صار
بندر:اه ياعزوز
عزوز: وش صار لاتكون من جماعتنا وعرفتك
بندر:ليتها من جماعتنا او حتى من قبيلتنا
عزوز:وشفيك طيب
بندر:احرجتني صراحه واستحيت لانها قالت انا بنت رجال وماهي من سلومنا اخذ الارقام
عزوز:بعدي والله وياحظ اخوانها بها يحقلهم يفتخرون بها
بندر:وازيدك من الشعر بيت
طلعت البنت دوووسريه لبا الدواسر كلهم والله اني حبيتهم بعدها
عزوز:اوف حبيت الدواسر كلهم علشان وحده بس والله اني داري من المبرقع انها دوسريه
بندر_بس لحظه كيف عرفت من المبرقع انهادوسريه
عزوز_أعرف لأن أغلب ربعي دواسر وإذا صادفت أهلهم أوسلمت على أمهاتهم هذي مبرقعاتهم
المهم يالحبيب
:اطلب لنا وجبات علشان نطلع
وراح بندر وطلب الوجبات وجلس ويا عزوز على الطاوله ويناظرون البنات وراحو يمشون وفجئه وهم يمشون شاف بندر الدوسريه تتسوق واخذ يتابعها من بعيد لبعيد وعزوز عارف ان بندر راح ملح مع الدوسريه
عزوز:بنيدر وش معنى ذا البنت اللي مصر انك ترقمها وتتبعها
بندر:بعض البنات سهل انك تعطيها الرقم وتاخذه وبعضهن صعب وانا احب البنت الصعبه وذا البنت جذبتني بثقلها ياخي مع اني مزيون ودايم البنات يذوبن اذا رقمتهن وياخذن الرقم على طول الا هذي ماخذته
عزوز:اخس يالثقه من شافك قال توم كروز بس اصابع يدك وانا اخوك ماهي مثل بعض والبنات بعد في الصاحي والطاحي

بندر:صدقت_والله اني احلى من توم كروز اقول يالله امشينا مع ان قلبي مايطاوعني اخليها
واطلع
عزوز:ابك وش بلاك من شافك قال تعرفها من زمان ترى اول مره تشوفها انت ووجهك
بندر:على قولتهم الحب من نظره وانا اخوك
عزوز:يالله بس امش
وطلعوا من الحديثي مول

ونوره وخلود من لقاهن من عزيمه لعزيمه
وجا اليوم اللي بنفذ عزوز خطه بندر وفعلا نفذها ونجحت
دخل على نوره وهي جالسه على الكمبيوتر بغرفته وتسمع قصايد لسعد بن علوش مخزنها عزوز بجهازه وهي مندمجه بسماعها ولانتبهت لعزوز وجلس يناظرها ويتأملها ولا تكلم
وجلست تناظر نوره صوره عزوز على طاولته وقالت:
اه ياعبدالعزيز لو تدري وش كثر أحبك
هو سمعها ولاماسمعها عزوز وطار يركض لبندر واخذ يحبه
عزوز:بندر قالتها يابندر
بندر: ابك وش بلاك لعنبو دارك من هي اللي قالتها وش سويت انت
وش السالفه _خلاص لعد تحببني فهمني
عزوز:انا دخلت على النوري بغرفتي وقبل لادخل قلت خلني اتأملها وفجئه جلست تناظر صورتي وسمعتها باأذني والله العظيم باذني سمعتها تقول اه ياعزوز لو تدري وش كثر أحبك والله قالتها يابندر والله والله
بندر:ابك خلاص والله مصدقك بس اقص ايدي اذا منت توك حاط الصوره متعمد علشان تشوفها نوره صح ياعزيز
عزوز:تدري ليش احبك يابندر لانك اكثر واحد فاهمني ياعز الخوي
بندر:المهم اللحين لاعاد تأذيني انت ونوره خلاص عرفت انها تحبك بس انا ؟؟
عزوز:بس ايش
بندر:ابي الدووووووسريه
عزوز:ابن ابوي بندر للحين مانسيتها
بندر:مانسيتها ولاأظن انساها بعد
عزوز:ياخي اقسم بالله يابندر انك غريب على كثر البنات اللي تعرفهن وتقلب روسهن لين ياخذن الرقم معقوله وحده ماقدرت عليها
بندر:انت تشوف ياخي لا رقمتها ولا نسيتها
عزوز:اقول انساها ماظن تشوفها مره ثانيه
بندر:وجع عزيز لاتحطمني يمكن نتلاقى مره ثانيه
عزوز:ايه قابلني ان لقيتها بنات الخرج وش كثرهن والدوسريات ماشا الله واجد من جدك بتلقاها بين ذا الناس مره ثانيه
بندر:اقول لايكثر حكيك وامشينا نطلع
عزوز:والقهوه قلت لخليده تزينها
بندر:ياخي القهوه علشان تشوف نوره ولا انا مابيها
عزوز: وش بتسوي خليده وش بيفكني من لسانها الطويل
ياليل
بندر:قل لها الضيف راح_لا_لا_لحظه اخاف تدعي علي واروح فيها عطها ارنب من عندك
عزوز:توكلنا على الله واللي يصير يصير
بندر:اقرا المعوذات _ها ها ها
عزوز:حشى داخل على وحش انا
المهم راح عزوز لخلود
عزوز:خلود خلاص لاتزينين قهوه مانبيها
خلود:وشو_وشو_وشو_ليه على كيفك اللحين مناديني وزيني قهوه وعندي ضيف ومخليه النوري لحالها بغرفتك واخر شي ماتبي قهوه
اقول مالت عليك وعلى ضيفك وراحت خلود وهي تحلطم وضايقه
عزوز استانس لانه انتهت السالفه على خير
وراح عزوز لبندر وهو ميت من الضحك علشان خليده
وقاله السالفه كلها
وجلس يضحك بندر
وراحو سوق صحارى يلفون
عزوز هو اللي يسوق
أما بندر يبي ينسى الحديثي والدوسريه اللي فيه
أما عزوز ماهو راعي مغازل لأن نوره بعيونه غير
ودي اقول نوع السياره بس اخاف اشتهر وانفضح عند جماعتنا
نكمل
عاد اللحين العطله الكبيره والدجه والوناسه فيها والسفريات
نوره واهلها وخلود واهلها وبندر واهله
[للمعلوميه بندر اوسط اخوانه واكبر منه واحد وماعندهم الا اخت وحده ومدلعينها اخر دلع اما نوره اكبر اخوانها واصغر منها ولدين واما خلود وعزوز هم وحيدين اهلهم بالعربي العوائل الثلاث قرروا يسافرون لأبها ويجلسون اسبوعين
وتحدد يوم السفر وصار يوم الاربعا وبالفعل سافروا لابها وعاشوا اجمل اللحظات عزوز وبندر ونوره وخلود والشيبان والنسوان
عزوز عايش جو مع نوره لعبته يناظرها على كيف كيفه اما بندر جالس ومحظر للمغازل ويتصيد البنات واخته لميا عمرها{5‎‏}سنوات معه يلعبها بالالعاب وهو قلبه مع البنات وعزوز يلعب اخوان نوره{ عبودي ونواف واختها جود }
يتميلح علشان تشوفه نوره بس الجد انه يحب اخوانها لانه ماعنده اخوان ويعتبر اخوان نوره اخوانه
ياهو صارلهم موقف بتروح سنين وبتجي سنين ونوره وخلود ماراح ينسونه لانهن سبب الموقف
كانت نوره جالسه وخلود راحت تجيب ايس كريم لنوره ولها وفجئه مرو شله شباب على نوره وقطوا الرقم وقطوا كذا كلمه عليها وجات خلود عاد خلود ملسونه
خلود:خير انشألله ماتستحون على وجيهكم
واحد من الشباب جرئ ويرد عليها
المغازلجي:لا مانستحي
في شي
خلود:حلوه في شي جاي تغازل وقاط الرقم وتقول في شي ياقليل الادب صدق وقاحه
نوره:خلود خلاص خلينا نروح شوفي الناس تجمعوا لاتكبرين المسأله
المغازلجي:اروح ملح معك انتي يالثانيه {قصده نوره}
خلود:يالله بس ضف شلتك وانقلع يالتافه
وكان عزوز وبندر يمشون شافوا الناس متجمعين وحبهم للفضول راحو وبغى ينجن عزوز لقى اخته ونوره وبندر فيه حميه وغيره موطبيعيه
عزوز:خير وش عندك انت وياه
المغازلجي:انت اللي خير تدافع عنهن ولا اعجبنك وناوي ترقمهن وتسوي نفسك رجال يابطل علشان يمدحنك
بندر:اقول حسن الفاظك وحنا اذا قلنا فعلنا يالمره
الممغازلجي:ورني وش بتسوي انت وياه
عزوز: نوريك ابشر
وتهاوشوا الشباب وحصلت مضاربه وتجمهروا ناس كثير وكل ماحس بندر ان عزوز تعب اخذ ينتخي بندر وعزوز مع العزوه نسى الوجع
ونوره وخلود يبكن وخاصه نوره تصارخ لأنها ماتحب الهواش والمغازلجيه تقريبا خمسه وبندر وعزوز لحالهم ونوره تبكي والناس حاولو يفكون المشكله ولاقدروا بس عزوز وبندر سووا اللازم وضربوهم ضرب الين عافوا المغازلجيه الدنياوبيحرمون يغازلون مره ثانيه وراحت نوره تمشي ومسكت عزوز وتقول:
تكفى عزوز خلاص وتبكي
وتدخلت الشرطه وفكت الهواش ولاتنازل عزوز وبندر الا اللين اعتذروا المغازلجيه منهم وانتهت المشكله
عزوز:بنيدر شفت وش صار من المغازل احذر لايصيرلك مثلهم وبعدين خاف ربك ترضى أحد يغازل اختك ياأخي هذولا بنات ديرتك تغازلهن ماعندك حميه ولاغيره
بندر:ها ها ها هذولا عليميه انا خبره وبعدين هذا شي تعودت أسويه والله أني كذا مره بغيت اترك هالمغازل بس من أشوف هالبنات يسبلن لي بعيونهن ويستعرضون أروح وطي صدقني من أشوف محتشمه ومستتره انها تكبر بعيني ولاتجرأ اجيسها لأنها حافظة نفسها وحافظه سمعتها عشان كذا أحطها فوق راسي واعتز بها واعاملها مثل اختي ولاأرضى أحد يتعرض لها ويأذيها
بس والله اني مرهق يديني تعورني وخاصه من الدب
عزوز:سلامتك بس كل ماتذكرت يومك ماسك ابو شعر بيد والدب بيد اجلس اضحك
بندر:افا عليك ولد خالتك خطير
عزوز:شفت نوره يوم مسكتني ياربيه والله موقف روعه
بندر:والله انك فاضي اقول شف ثوبي من اختك خليده حاستني وبس
عزوز:ليه وش سوت خليده وش ذا
بندر:معها ايس كريم ومع الهواش وهي تبكي قطت الايس كريم تبي تقطه على الولد ابو شعر الا الايس كريم في ثوبي ووجهي
عزوز:ها ها ها بس والله موقف مستحيل ينسى
بندر: ولا فيها اكيد علشان نوره مسكتك وانت قبل شوي تنصح سبحان الله
عزوز: لا أنا ونوره حب عذري طاهر وربي شاهد علي يالله مشينا وراحو للفندق وبدا التحقيق من الاهل وش صار وليش وكيف واسئله مالها نهايه وخاصه الحريم اوووه اللي تبكي واللي تعطيهم ماي وعصير
وعزوز وبندر عورتهم روسهم من كثر الحكي وراح كل واحد لغرفته ونام
ونوره وخلود يضحكن لانهن هن اساس المشكله
ومرت ايام وناسه ومواقف حلوه
ورجعوا للخرج
ونوره قدمت في الكليه لغه انجليزيه وقبلوها
واما خليده رافظه انها تدخل الكليه تبي تجلس بالبيت
وعزوز باجازه من كليته
وبندر عاطل عن العمل ابوه يبي يوظفه لكنه رافض ودايم كلمته لأبوه:
خلني استانس يايبه لاحقين على الهم والشقا
وقرر عزوز انه يخطب نوره وبالفعل خطبها ووافقو اهلها وتمت الخطبه وتحدد زواجها بعيد الفطر وبندر مستانس علشان صديقه واخوه وحبيبه وولد خالته بيتزوج
اما خلود فرحتها فرحتين علشان اخوها الوحيد بيتزوج والفرحه الثانيه ان العروس صديقتها
ونوره وعبدالعزيز محد حاس بالفرحه اللي عايشينها بعد حب دام لمده اربع سنوات
ولكن اه يالقدر

صدق من قال (نمشي على كف القدرولاندري عن المكتوب عباره كنت ارددها صدق من صاغ معناها)

المهم كان عزوز يحضر لإمتحانات اخر مستوى وبعدها يتخرج
أمانوره كانت أول سنه كليه وأتفقت مع عزوز عن طريق أبوها انها ماراح تترك الدراسه وراح تكمل بعد الزواج
وطبعا كلهم يحسبون الأيام والليالي لأن زواجهم كان ثاني ايام عيد الفطر
وكان عزوز عنده اخر إمتحان وكان يوم الثلاثا وكان عزوز قاعد يراجع ودق عليه بندر
بندر_هلا عزوز هاه وش سويت
عزوز_هانت ابشرك كله بس إمتحان بكره وبعدها التخرج وبعدها____
بندر_كمل وش بعدها يعني استحيت هاهاها بعدها النوري صح على العموم الله يوفقك
عزوز_وانت بعد تصدق بندر والله احسب متى يجي اليوم بشوف نوره فيه
بندر_بيجي ياولد إنشالله يالله ذاكر زين مع السلامه

عزوز_مع السلامه يالحبيب
وجلس عزوز يراجع الين قبل الفجر وغفى شوي وبعدين صحى وهو خايف لأنه يقول وانا نايم أحس بشي غريب حلم ومو حلم كأني أشوف
نار وفيه صوت وصراخ
المهم يوم ناظر الساعه الاهو متأخر لأن وراه مشوار من الخرج لرياض وبعدين الحبيب ركب سيارته ومشى وكانت الساعه _ خمس ونص_

وبعدين أتصلت عليه خليده وكانت تسأله عن مفتاح غرفته لأن على قولتها عاطله وتبي طقطق على النت شوي لأن جهازها عطلان المهم وافق وسكرت
وهنا حدثت الكارثه اللي حطمت الجميع
_بيت نوره واهلها_ صحت نوره من النوم علشان الكليه وخذت شاور وجلست بغرفتها في الدور الثاني و اما اخوانها الصغار وامهم بالدور التحتي وكانت امهم تنتظر الباصات علشان يروحون عيالها للمدرسه وابوهم طلع للدوام
وكانت نوره مقفله عليها غرفتها وكانت بغرفتها توصيله وشابكه فيها كذا فيش وفجئه وهي تعدل شعرها انفجرت التوصيله وطلع دخان وكانت نوره تصارخ وتحاول تفتح الباب لكن ماقدرت وطلعت من الشباك لان الدخان كتمها وامها ماتدري وش صار ولاخذت امها الا الخدامه تقول مدام غرفه نوره كلو دخان وراحت امها تركض فوق وحاولت تفتح الباب لكن الباب مانفتح واخذت تصارخ وبسرعه وانتشر الحريق بالدور الثاني وتجمعوا الناس واتصلوا بالدفاع المدني وحضروا
وطفوا الحريق
اما خلود كانت تصارخ لانها ناظرت من الشباك الا الدخان طالع من غرفه نوره وفجئه وهي تركض طاحت على التلفون وانعاد الرقم على عزوز لانه هو اخر رقم دقت عليه واخذ يسمع عزوز صراخ ولايدري وش السالفه
واتصل عزوز على بندر يسأله وش السالفه وقاله بندر ورجع عزوز بدال ماهورايح للرياض ويمتحن اخر امتحان رجع للخرج
وبسرعه جنونيه
اما خلود واهلها والناس واقفين ينتظرون نوره
وامها كأنها مجنونه
وبعد ماكسروا الباب على نوره لقوها جثه طايحه ولكن مافيها اثار حريق الدخان هو اللي كتمها وراحت

نوره الحبوبه
نوره الدلوعه
نوره الخجوله
نوره حبيبه عبدالعزيز
يعني
_ _ ماتت __



طلع واحد من اللي طفو الحريق وقال
ادعولها ماتت

بندر اخذ يترحم ويدعيلها
خلود اغمى عليها
ام نوره من الصعب اوصفلكم شكلها تخيلوا ام وفقدت بنتها الكبيره والوحيده لان ماعندها الاولدين وبنت والنوري أكبرهم
ووصل عزوز ولايدري وش اللي صاير عالم وناس وحريق وشرطه وإسعاف وصراخ وواجه بندر لان بندر عارف ان عزوز اذا درى ان نوره ماتت يمكن يموت معها ولقى سياره الاسعاف واقفه وبجنبها سرير ومغطى ولايدري مين وراح يركض عزوز وفتح الغطا الا هي نوره وضمها ويبكي ويصارخ بحرقه وماعلى لسانه الا ليش يانوره تموتين ليه ليه وبندر يهديه ولكن
اووووه الولد مافي امل يهدى
تخيلو إنسان فقد حلم عمره يصارخ ويركض في الشارع مايدري وين يروح كأنه طفل يقوم ويطيح
<مريت انا بديارك والناس مجتمعه
صوت وصريخ بدياركم واسمع أنين
مات الحبيب اللي صورته في البال روعه راح وتركني بدنيتي كني طعين يالله انا مالي بشوفكم طمعه مير اللي حايل بيننا اقدار السنين>
والله تنطبق على حال عزوز
المهم نقلو نوره وأمها للمستشفى لكن القدر كان أسرع وللأسف حالت امها كانت تعبانه
وكذالك الصدمه كانت كبيره لأبوها
اماعزوز مومقتنع ولا هومصدق ان نوره ماتت
واللي يذبح يوم كان في المقبره يوم نزلو المرحومه في قبرها وانتهى الدفن ظمني عزوز بقوه وهويبكي ويقول {تكفى يابندر ظمها قبرها قبل لا أظمها} واناماعاد قدرت ارد عليه من كثر ماتأثرت وبكيت من كلمته لأني عارف وش كثر عزوز يحب نوره
علشان كذا حطيت عنوان القصه
والحين مر على السالفه هذي ثمان شهور لكن أقسم قسم ان اللي يشوف عزوز يقول ان وفات نوره اليوم مو من ثمان شهور وأنا معه على طول وصار يتردد على طبيب نفسي وجلسات متكرره لكن ماعاد مثل قبل إلى الان مو مستوعب وفاتها تخيلوا ينام طبعا بعد منوم يستخدمه ويصحى مفزوع على اسم نوره
والحين أدعي من كل قلبي لعزوز ان الله يثبته ويقوي عزمه ويعافيه
صحيح ان عزوز ماراح ينسى نوره لكن اللي أتمناه أنه يعيش بذكراها ولو انها ذكرى مؤلمه لكن وش نسوي هذا حال الدنيا
وياصدق اللي قال على كف القدر نمشي ولاندري عن المكتوب


وبالنسبه لي انا بندر اللي كاتب القصه كنت أفكر اني أحب يعني أعيش قصه حب لكن بعد اللي صار مع عزوز حرمت على نفسي مجرد التفكير‎ ‎‏ وأبشركم تركت حركاتي الطايشه لكن لافات الفوت ماينفع الصوت "


_مع تحيات_
إنسان عاش معاناة قصة حب مع انه مابعد حب............!!!!!




منقوووووووووووووووووووووووولة
 
التعديل الأخير بواسطة المشرف:
عودة
أعلى