عبدالحميد الشاعر
Member
(حال البنت اللى واثقه من حبيبها بتقوله)
هفضل اقربلك من ناسك
مهما اتغريت .
منا ستك برضه وتاج راسك
ولا انت نسيت .
عرفاك عاشق وهواك
باين فى كلامى معاك
ولو تعند هعند وياك
وهتبقى انت اللى باديت .
مشكلتى ان انا بهواك
وعشان كده عاشقه أساك
بزعل منك فى حجات
وبضحكه الاقينى نسيت .
حبك ياحبيبي مش راسي
وتعبت معاك احساسي
بتتقل وبتعمل ناسي
ولما اتقل الاقيك حنيت .
ويبان فى عنيك احساسك
وبترجع وميل راسك
منا دهبك برضه وماسك
وعشقك ما انت اللى هاويت .
وهفضل اقربلك من ناسك
مهما اتغريت .
منا ستك برضه وتاج راسك
ولا انت نسيت .