الغاز شعرية (مع الحل)

الشعر, قصيدة , شعراء, القصايد إرسال إلى Facebook ارسال الى تويتر
  1. الغاز شعرية (مع الحل)

    الغاز شعرية ( مع الحل )

    يا الشاعر اللي بالقصايد ترنم
    جاك الخبر مني وفكري مقره
    بنشدك عن عود عمى لاتكلم
    يكشف ستر عذراه للي يجره
    عود على كشف الحقايق معلم
    علمه يفرح شخص واخر يضره
    هات الخبر وارسل جوابك معمم
    باربع بيوت من قراها تسره
    الحل(عيار الزيت والمكينه)
    لصالح النفيعي
    ===
    الله على الثلاث ليا صرت ماشي
    يحمنك من طعن الظهر والخديعه
    ماينقلن كلام كاذب وواشي
    ياتنك بالاخبار كنها الطبيعه
    -فلاح العجمي
    المرايات الثلاث اللي بالسياره
    ===
    انشدك عن رجل يجيب العلم من بطن السواد
    لو ماتحط اصبعك في عينه ما يعطيك العلوم
    جالس بطن امه لكنه هايم في كل واد
    ناس تشوفه فالسفر وناس تشوفه كل يوم
    هو عيار الزيت
    ___
    انشدك عن خمس تقابل مع خمس
    صوب السماء ترقاوتنزل وترقا
    تنشاف شوف العين ماتلمس لمس
    الشكل واحد والفعل فيه فرقا
    ان غيبن من عقبهن خاطرك عمس
    كنك تحس بداخل القلب حرقا
    الارسال والشحن حق الجوال
    ===
    ياويش الشيفه الي شفتها ياهل الوفا بالامس
    طبيعي وضعها لاكنها ماهي طبيعيه
    مواطيها ثمان انفوسها اربع والجماجم خمس
    واصابعها عددها ياوجيه المعرفه ميه
    الجنازه
    ===
    انشدك عن حين حياته غريبه
    كائن غريب وغربته فى حياته
    الى مسكته مات لو تعتني به
    ان مات ولاحي صمته صفاته
    السمك
    ----
    انشدك عن رجل مسمى ومعروف
    وقت الشدايد ينفعك بس ينعاف
    ينفعك بظروف ويحرجك بظروف
    ويركب عليك ولا تشيله بالاطراف
    دين الفلوس
    ---
    ياويش بنتن مقعدت مقعدالعيب
    الله خلقها يالنشاما شريفه
    من فوقها ماتطلع الشمس وتغيب
    ومنزالهافوق الجبال المنيفه
    تهدم وتبني بيت مابه عذاريب
    ثقيلتن ساعه وساعه خفيفه
    شهادةالحق
    -------
    ياويش بنتين على ظهر رجال
    متقاسمات الزاد بأمر المعازيب
    واللي يغذيهن عجوز على الجال
    من شان بنت صابره للواهيب
    مساحات السياره
    ------
    انشدك عن رجل كتم وش جراله
    ما يعترف يا كود تكويه بالنار
    ترى الولد طيب يحب الجماله
    وليا تعب يمكن يجيب لك الاخطار
    قوري الماء
    -----
    أنشدك عن بنت(ن)ابوها تحتها
    والبنت تولد ساعة العود مولود
    لا كنها ماتقعد لناس(ن) بغتها
    تاخذ شوي وتختفي داخل العود
    الرغوه
    ------
    انشدك عن قبر دفن فيه راعية
    معروف حتى في العصور القديمة
    كل يحاول يظهر جنازت فيه
    ولايظهره غير العقول الفهيمة
    اللغز
    ------
    ويش الثلاث الي يحفضن الاسرار
    الاسم واحد والشبه بين ثنتين
    متقاربات وفيهن صغار وكبار
    عند الفقير وعندراع الملايين
    مخابي الثوب
    -----
    أنشدك عن رجل ليا طال بك سرت
    وليا قصر ضاقت عليك الوسيعه
    أهو رجل لكن سكن في حظن بنت
    لا قادرن تشريه ولا تبيعه
    النظر
    ----
    انشدك عن رجل صله بين بنتين
    وبين البني دايم صفاته حميده
    يهولك شكله له افمين وافمين
    ويطق في روس الاصابع حديده
    الاشتراك والبطاريات
    ----
    انشدك عن رجل بتوع بممشاه
    امير قوم تتبعة ما تحاكية
    شيخ ليا منه زعل زاد ممشاه
    وليا وقف ساعه ذبح ما حواليه
    القلب
    ----
    انشدك يارجال عن زاير زار
    بين السماء والارض داره سكنها
    لو تنشده وتقول ما يجيب الاخبار
    ولاهوب يرجع ديرة قد سكنها
    الجنين
    ----
    انشدك عن عذرا عفيفه مزكاه
    لقحت بطفلن ماله ابو نسميه
    يوم وضعت ماعندها ماتغداه
    كلت ضنا الجاره وزين لها فيه
    مريم العذراء=ام سيدنا عيسى عليه السلام
    ----
    انشدك عن بنت لها شعب وحزاب
    ولوقتها كل يحسب حسابه
    احد يحاولها على دخلت الباب
    وحد يحاول ماتجي حول بابه
    كرة القدم
    -----
    بنشدك عن رجل عزيز فقدناه
    ماعاد يطري كود حزة وحزة
    أخير لزيم لو بغينا انتمناه
    وفي عصرنا قليل منهو يعزه
    راضي الهاجري
    الكتاب
    ----
    انشدك عن بنت خذت صيت رجال
    فازت بصيته واقتنع بالمهونه
    من عقب ماهو للمشاكيل حلال
    اليوم ياكثر البشر يجهلونه
    المطحنه واخذت صيت النجر
    ===
    انشدك عن بنت تركب على بنت
    خدعه لواحد ودهن يطرحنه
    وحده تقول انا بعينه تزينت
    طماع يحسبني على قد ضنه
    وحده تقول انا مسكته ولا خنت
    لو ان مسكي له على غير سنه
    الحمامه والشبكه
    لصيد الصقور
    ----
    انشدك عن ليل غريب ومشبوه
    يضفي على رجل به الناس دارين
    ثم ينجلي زوله ترى الزول مكروه
    مايوضعه ياكود ناس مقفين
    الصبغ الاسود حق الشيب
    ---
    منهم ثنين قبل عصر النبي نوح
    سرع البواخر في البحور انسجوها
    طبوا بحر تسعين والكل سابوح
    متواعدين القوع لين المسوها
    واحد خسر روح وواحد ربح روح
    والله مع اللي كلمته قومووها
    قابيل وهابيل
    ===
    أنشدك عن عودن تراقل سنونه
    وتجوده بنتن بقضبت علابيه
    عودن قوي عزوم ماينطحونه
    ينده بسم ابنه واسمه يخفيه
    ابو جلبمو
    ===
    وش اللذي من نوعها ماسبقها
    في وسطها سبع بنات شريفات
    لها مكانه عند شخص عشقها
    ومن عافها خسران لوذاق لذات
    الفاتحه والايات 7
    ===
    انشدك عن بنت هواها عذابي
    من حبها ينحل وحاله تسومي
    نوماسها يحفي نفوس الشبابي
    تفنى لجل ترضي الحبيب الهيومي
    تحرق عروق القلب ومنها الذهابي
    وفي هجرها العاشق يصير محشومي
    الزقاره
    ===
    وش رجل عياله لهم وارد وصدير
    وله هنوف كل ابوهم يجون ضيوفها
    بنت وحده وتقلب كل وقت باسم غير
    والرجال من اجل بنت تشد صفوفها
    الرجل المسجد..البنت.الصلاه
    ===
    ياويش رجال ربطوه بجماعه
    مره يفكونه ومرات مربوط
    يمشي بدرب الضيق مو بالوساعه
    وما يسمح لغيره ولو كان مضغوط
    ماياكل العيشه ولابه مجاعه
    وان قيل فيه اسنان فالقول مضبوط
    المفتاح
    ===
    وش غلام لا ظواه الليل يسري
    ولاتشوفه لو يمرك بالنهار
    نوب للساري على الثنتين يغري
    ويخلفك نوبات من خلف الستار
    الصوت
    ===
    وش رجلن يفعل الطيب وافعاله قديمه
    له قصص ومبالغاتن كثيره ماتعد
    قد ذكر بالدين مظلوم ويا شين الظليمه
    فارسن من مارثت فرسان من عمن وجد
    الذيب
    ===
    ابنشدك عن رجلا يحمل حرمته في كل ديره
    ويهج لديارا بعيده يولدها
    وبسقي عيالها من الماء بحسن تدبيره
    وليل أرتوت ماتت وماتو عيالها
    الرجال هو قبطان السفينه وحرمته السفينه وعيالها ركابها
    ===
    ابنشد الشعار واللي يحلون
    ويش الهنوف اللي لها الخلق تشتاق
    بنت لها زوجين والناس يدرون
    والبنت حامل والمخاليق عشاق
    عطت ولدها جدة صانته صون
    والبنت قف والغنادير سواق
    (المزنه)البرق والرعد والارض
    ===
    حجرف تذكر قصتة مع خروفة
    للغز حلالة وللمعرفة ساس
    من البحر ومن السماء خذ وصوفة
    مشروب لكن دون طاسة ولا كاس
    ان شربة الرجال محدن يشوفة
    وان شربتة حرمة يشوفونها الناس
    ( المطر )
    الرجل البحر ---- الحرمه الارض
    ===
    اسأل عن اللي راكز بالوطى ركز
    في قمته مطماع ناس رقت له
    إلا هنوف هزته ياعرب هز
    من قمته جاها ولو ماعنت له
    مريم عليها السلام(يوم هزت الجذع النخلة فتساقط عليها الرطب )
    ===
    انا بنشدك عن بنت جمليه ماعليها راس
    عجب لله كيف البنت خلقت مالها راسي
    ولايفها عليهن روس واصناف البنات اجناس
    ومن يدخل محبتها تلين قلبه القاسي
    سورةالتوبه لانها بدون البسمله
    ===
    انشدك عن رجل يحرسك ويحميك
    ماياقف الا يمسكنة بناتة
    رجل يجى بنواع مافية تشكيك
    روحة وجية دوم هذى حياتة
    الباب والبنات ايديه او قفاله
    ===
    دم ولحم وعظام من بطن الحجر
    ثم اصبحت تمشى على صم العظام
    لاوالدين الها ولاهى من بشر
    ادت مهمتها بترتيب ونظام
    ناقة صالح
    ===
    ويش بنت شانها شان كبير
    ماتصير الا مع كبار البخوت
    فى حشاها ورع مجهول المصير
    مايتكلم كود هاعذراء تموت
    الصندوق الاسود
    ===
    انشدك عن بنت على غير راده
    جت مقبله واقفت بلحظه سريعه
    بأ مان ولا بخوف للبنت عاده
    باالعين شفناها وهذي طبيعه
    رمشةالعين
    ===
    ياويش بكره يدايرها قعود
    وان دارها درت على حلابها
    لتشرب من الماء ولا ترد العدود
    وراعيها من راس هضبة(ن) جابها
    الرحى
    ===
    وش الثمان اللي على راس مخلوق
    من خلقت الدنيا ليا منتهاها
    متلاحمات وبينهن دم وعروق
    حكمة ولي العرش رافع سماها
    محيطتن رجال تاقاه من فوق
    في الباديه واللي سكن في قراها
    عظام جمجةالانسان عددها 8
    ===
    أنشدك عن رجل ياكل القوم
    ياكلهم بهونه ويقذفهم بهونه
    يطير ويوقع على حد محتوم
    ولا له جرة منها يعرفونه
    اللفت



    __________________

    تقول أمي‏ إذا ودك تشوف الخير قدامك تبسم وابتسم واضحك بوجه اللي يعادونك
    واقول الخير يا يمه اشوفه جنة اقدامك فداك الضحك والبسمه وفداك الكل لعيونك
    عبيرالعبير

  2. رد: الغاز شعرية ( مع الحل )

    يعطيك العافية ...بس مكانها في قسم الشعر مو ب قسم (الرجة والهبال )..!
    نوآف بن عبدالعزيز

  3. رد: الغاز شعرية ( مع الحل )

    ينقل للانسب
    &جوري&

  4. رد: الغاز شعرية ( مع الحل )

    ماشاء الله موضوع قيم كثير وجميل الغاز حلوة والاجوبه احلى ابدعتي في طرحك الراقي والذكي بنتظار كل جديد
    طير القوافي

  5. رد: الغاز شعرية ( مع الحل )

    موضووع راقي ومميز نال اعجاابي كثيرا أشكر لك طرحك الرائع
    عانقتني حسرتي

  6. رد: الغاز شعرية ( مع الحل )

    انشدك عن ثلاث مع ثلاث راحلات من مكان اليا مكان وان مشن يامعين الصابرين بليز ساعدوني ف الحل ابي الاجابه ضروري اذا ماعليكم امر
    عانقتني حسرتي

  7. رد: الغاز شعرية ( مع الحل )

    يعطيك العافيةة خيتو ع الطرح الحلو :) تقبلي مروري
    ᵽ¡ҋʞ ║•

  8. رد: الغاز شعرية (مع الحل)

    هلا شباب شكرأ على اللغاز بس عندي لغز ابي احد يحله ممكن
    ᵽ¡ҋʞ ║•