رواية (ابوي ابوي لو صد عني ما ترجيته) كامله

في الدوام قلبي ياكلني ابا اعرف شو صار ..بس كل شي مر ابرود ...اتصلت ل خوله ارمسها..كانت سوالفنا عاديه..بغيت اعرف شي اخبار بس الظاهر للحين ماشي ...قبل ما اصكر عنها عزمتها ع عرس نوف رفيجتي يوم الاربعاء ...فديتها نوف قدمت لي خدمه انسانيه عمري ما راح انساها .. و اليوم خذت اجازتها..عشان زواجها..يا ربي بفتقد انسانه غاليه ع قلبي ...الله يسعدج نوف .بعدين ما بنتجاوف بتروح بوظبي ...يحليلج ..وصلت الشقه .. جفت عمور منسدح ع الكنبه يطالع التلفزيون و باين عليه سرحان ...
نوره: السلام عليكم...؟؟
عمور: عليج السلام..
نوره: تغديت ..؟؟
عمور: ما اشتهي ..
نوره: ليش ..؟؟ يبت معاي صحن عيش يكفينا...بروح اصلي و بعدين نتغدا مع بعض زين..
عمور: اونج من متى انتي جي..
نوره: ما برد عليك بس اجوف حالتك صعبه....


ما رد علي..دشيت حجرتي بدلت ملابسي ..و صليت الظهر...طلعت جفت عمور مب موجود في الصاله ...سرت حجرته ...بعد جفته محد يستهبل هاه ..قلتله اتريا.اونه لها الدرجه معذبه فراق نهله راعيه المشاكل فكه منها ...خطر ع بالي اسوي شي جايد يمكن ينفع اني ابعد نهله موليه عن عمور..سرت المطبخ اتغدا ...شويه و ياه عمور .
نوره: بسم الله من وين طلعت...
عمور: ليش ساحر ...؟؟
نوره: توني كنت ادورك عشان تتغدا ..
عمور: نزلت تحت ارمس فارس ...انتي مسويه له رعب مب رايم يوصل عند عتبة الباب ..
نوره: ههههههههههههه زين طلع فيه احساس ..
عمور:نوره بسج عن حركات اليهال ..شو تبين فيه ...
نوره: خليه يولي تعال تغدا..
عمور: ما ابا .."شرب ماي و طلع من المطبخ "
لحقته: زعلان عشان نهله ...؟؟
طالعني: و انتي شدراج ...؟؟
هزيت جتفي بكل براءه: البارحه قلت تبا تخطبها.. و بعد البارحه سمعت ام سيف انها تبا تخطب سيف ل نهله ..
حسيت ملامح عمور تغيرت...حسيت بغبنه يوم جفت حاله جي الله ياخذج نهله عذبتي اخوي ...طنشي و يلس ع الكنبه ...
نوره: انزين يوم تباها ليش ما اتخطبها ..
عمور: خلاص كل شي انتهى ...؟؟
نوره: ليش انخطبت رسمي ل سيف..
عمور: ما ادري ..بس نهله ما تباني ..
نوره: تسواك هي ...صج ما تستحي ولا اتعرف قدرك قلتلك من البدايه هذي وحده.....
قاطعني: بس نوره فكيني كافي الي فيني ..



اتجدمت منه و يلست ع الارض و هو كان ع الكنبه ...
نوره: ما اتهون علي اجوفك بهذي الحاله ..
عمور: من عيونج ما تبيني اخطب نهله..هذي ها راحت مني..
نوره: خلاص عيوني اتصل بها ..و اتفاهم معاها ..
رد بعصبيه : انتي ما تفهمين اقولج ما اترد عليه افهمي ...
نوره: زين لا اتحرج..ها يزاتي ابا اساعدك بس لانك اخوي و ما اتهون علي اجوفك بها الحاله"وقفت" بس انت مب ويه حد يساعدك انجلع ...
كنت بروح المطبخ اكمل غداي بس زخني من ايدي: خلاص حقج علي يالله شو بتسوين ...؟؟
نوره: بتصل ب نهله من موبايلي و كلمها ..شو قلت ...؟؟
عمور: علني فداج نوره ..ليش انا ما فكرت جي ...
نوره ابتسمت له: ثواني بروح اييب موبايلي ...
ضحكت ف داخلي هههههههه مسكين عمور ما يدري اني ابا اعميها له و هو يتحراني ابا اكحلها...اتصلت ب نهله ..
نوره: ما اترد علي ..
تضايج عمور و قعد ع الكنبه: جفتي الظاهر تبا سيف بن عبدالله ..
نوره: تبا الصراحه احسن. "طالعني عمور" بس انا بساعدك ...
رديت و اتصلت ب نهله قلت في خاطري هاي الدبه بعد امسويه لها راس صج ما تنعطى ويه ...ردت علي
نوره: السلام عليكم...
نهله: عليكم السلام ..
عفد عمور من مكانه يبا يير عني الموبايل بس انا ما خليته و اشرت له يصبر ..
نوره: شحالج نهله..
نهله: بخير شحالج انتي ..؟؟
نوره: الحمدلله طيبه ..
نهله: غريبه متصله بي ...
نوره: قلتلج البارحه لازم بتصل بج تذكرين ...
نهله : هي الظاهر كلامج صحيح ...





يحليله عمور مب فاهم شي يتحراني ارمسها بموضوع ثاني ما يدري انه اقصد ..قاعد ياشر لي دشي في الموضوع ...
نوره: عشان بس تصدقيني ..المهم مب ها موضوعنا ...
نهله: شو بغيتي نوره..؟؟
عليت ع الصوت ..عشان اسمع نهله شو بتغرد .
نوره: عمور يبا يرمسج..
يير عمور من ايدي الموبايل ..
عمور: الو نهله ...اسمعيني...و الله العظيم انا احب....
نهله صرخت عليه: انت واحد حقير ..و ما تستحي ع ويهك..انا خلاص انخطبت .. وافقت لا تقعد اطرش لي اختك علشان تقنعني مثل غيري ..
عمور: لحظه نه....."طالعني صكرت الخط.."
فديتك عمور بلحظه حسيت اني ابا احضنه اخفف عنه ..هالحيوانه ما تستاهله ..منو تطلع نهله عشان ترمس عمور بهاي الطريقه ...
نوره: عمور ..نهله ما تباك ..؟؟





حسيته مب رايم يتكلم ...اقشعر جسمي يوم جفت عيونه تدمع حط موبايلي ع الطاوله و طلع من الشقه..ابكل برود..شو الي قاعد يستوي..عمور عمري ما اتخيلته ولا توقعته في يوم اجوفه ضعيف.... و جي حالته ..هاي نهله شو تتحرا عمرها ...؟؟اخ بعيده عني و الله لو كانت جريبه كنت مسحت فيها الارض ولا هاي الذبابه اتسوي بعمور جي ..

سرت المطبخ اتغدا بس اتصدقون ..انسدت نفسي مدري ليش ...رحت حجرتي و انا اتخيل ملامح عمور يوم صرخت عليه نهله ...هالموقف و هاي الصوره مستحيل في يوم اتغيب عن بالي ...




يوم الاربعاء..يوم زواج نوف..اليوم بجوف صديقتي في الدوام عروس..عقبال ما اجوف خوله عروس ل عمور ..اتفجت مع خوله انها اتمر علي ..ع الساعه 8 العشا ...
صرت ما احب المناسبات و العزايم لانها اتخليني اسهر و اتخرب روتين حياتي ...لبست هالمره فستان مع ان الجو كان بارد الا . اني قلت ف القاعه اكيد بحس بالحر ...اتفاجات ان خالوه مريم يايه معانا العرس ...وصلنا خليفه ...يلسنا ع الطاوله الخاصه ...تعشينا و قعدنا انسولف ..ابصراحه المفاجاه الي قالتها لي خوله في العرس.. و ترا هاي البنيه ما اطلع لي مفاجاتها الا ف اوقات و اماكن ما اتخليني اعبر فيها ...
خوله: تدرين نوره ...؟؟
نوره: شو مستوي بعد ...؟؟
خوله: نهله انخطبت..
كنت بغص باللقمه الي كانت في حلجي ...شربت ماي ..حسبي الله ع ابليسج يا خوله ..
خالوه مريم: بسم الله الرحمن الرحيم شو فيج يمه..
نوره: هذي بنتج ..
خوله: هههههههههه و انا شدراني انج بتتفاجئن جي ...؟؟
نوره: انزين كملي شو السالفه ...؟؟
خوله: نهله انخطبت
نوره: درينا بس متى و شو السالفه..
خالوه مريم: انخطبت ل سيف ولد عم عيالي ..
نوره: و الله مبروك "بصوت واطي" تستاهل غريبه حميد ما قال لي !!
سمعتني خوله فقالت: ليش انتي ترمسين حميد..
دستها ع ريولها من تحت الطاوله لان خالوه مريم سمعتنا صرخت خوله متعوره ..
خالوه مريم: عفانا الله شو فيكم انتوا ...بقوم اغير الطاوله فضيحه انتن..
خوله: طاعي انتي الحينه امايه هي الي تستحي تقعد ويانا ..
نوره:هههههههههههه
خالوه مريم: مب عايبتنج شوه
خوله: لالا محشومه ...



ردت الفرقه اتغنى.. و صار من الصعوبه انا نرمس الا اذا علينا صوتنا عشان نسمع بعض لان الفرقه صوتها وايد عالي ...ساسرت خوله : متى بتملج نهله ...؟؟
خوله: نهايه هالشهر ...؟؟
نوره: الحينه نحن نهايه شهر يناير ..
خوله: يا الغبيه اقصد نهايه شهر فبراير..
نوره اعلي صوتي: مب جنه ابسرعه..
خوله: هي بس قوم عمي مستعييليين...
نوره: عيل متى عرس خليفه و شيما..
خوله ما تسمعني بسبب الفرقه الي شاله القاعه شل: شو
نوره عليت صوتي حسيت ان بلاعيمي طاحت: متى عرس خلييييييييييفه..
خوله: هييييييييييي شهر اربع بعد نهايته ..
نوره: انتوا كل مناسباتكم نهايه الشهر ...
خوله: حتى انا تطلقت نهايه الشهر..
نوره: هههههههههه ما عليج بتنخطبين نهايه هالشهر ..
ضحكنا: ههههههههه



شويه و نزلت نوف من فوق..و كانت مثل الاميره ...كل شي كان فيها روعه...ويها فستانها مسكتها تسريحتها..كل شي فيها جميل ...ابتسمت يوم جافتني..سرت فوق سلمت عليها ...و باركت لها.. و بنفس الوقت ودعتها..لاني خلاص ما بجوفها مره ثانيه حسيت انها بتصيح بس انا قعدت اضحكها ..ما ابا اتخرب مكياجها و ريلها بعده ما جافها ...سلمت عليها خوله و خالوه مريم و طلعنا برع الصاله بعد ما اتصلت خوله ب خليفه ...ركبنا السياره بس خالوه مريم تاخرت لانها كانت اترمس وحده من فريجنا جافتها واقفه برع الصاله .....كانت سياره خليفه بس الي داخلها مب خليفه هذا فارس الشيطان ...يلست اقرص خوله من تحت ل تحت ...كنت بنزل من السياره بس مسكتني خوله ..
خوله: لا تستهبلين...؟؟
نوره: ليش ما قلتي ان ها بوصلنا ...
فارس: قولي بعد الحثاله...
خوله: و الله انا شدراني اتصلت ب خليفه ..و تفاجات ب فارس شو بياكلج...
فارس: هي انا ما اكل اللحوم الي طعمها مر ..
رديت بعصبيه: انت اسكت محد رمسك..و انتي خوله دواج عندي بجوفين شو بسوي فيج..
فتحت باب السياره خوله: تعالي يا الهبله وين رايحه.
نزلت من السياره و انا ميته من الغيض اخر زمن هالحثاله يوصلني البيت...سرت ع الرصيف ادور لي تاكسي بس زختني خالوه مريم من ذراعي: طوفي السياره ابسرعه ...؟؟
عاد هني ما قدرت ارد ع خالوه مريم..صخيت .. و سرت معاها ..ركبت السياره و انا مقهوره.. ...يلست اقرص خوله من تحت ل تحت ...ما تكلمت ولا كلمه بس خالوه مريم و خوله قاعدين يرمسون عن العرس.. و عرفت ان المعرس رفيج فارس عشان جي حضرته ياي العرس ..


.اخيرا وصلت الشقه نزلت من السياره و من غير ما اسلم عليهم ...ولا اقولهم تصبحون ع خير ..صكرت باب السياره و عفدت فوق صوب شقتي ...أأأأأأأأأأأأأأه اخيرا نهله بتملج يلست احسب باجي اربع اسابيع وايد يالله متى ايي هاليوم ...صج برتاح بس بقعد اعد الايام و الساعات..عشان افتك من نهله.. و افتك من هاي الدبله فسختها و فريتها ع التسريحه.. فكرت اتريا عمور عشان ابشره ب ملجة نهله..بس ما ابا ازيد عليه عذابه..باجر يصير خير ..رقدت ابسرعه لاني كنت تعبانه ..
.اوني سهرانه كانت الساعه 11 ف ليل ...


في اليوم الثاني العصر ..رحت بيت خالوه مريم...ابصراحه ما كان ودي علشان ما اجابل فارس..بس الحمدلله ..ولا سياره كانت موجوده عند باب البيت..دشيت..و سرت حجرة خوله..البيت كان فاضي محد موجود ...و انا طالعه من الصاله جفت بويهي فارس ...



.​
 
.،؛"(( الحلقة الثانية عشر ))"؛:.,.0

خفت حسيت ابرجفه يوم جفت فارس داش كان امنزل ويهه و انا كنت اراقبه ..يلس ع الدري يفسخ جوتيه شكله ياي من برع يسوي رياضه..
سمعته يقول : الغاليه خوله ناوليني كلاس ماي ...؟ميت من العطش
الغاليه خوله !! بس انا مب خوله كيف اقوله..كل ها العيون و مانتبه اذا انا خوله ولا نوره...يعني ما يجوفني لابسه عبايه..لا يكون خوله طول الوقت تلبس عباه في البيت !!!تميت واقفه اطالعه يفسخ جوتيه ..
وقف : شو ب
بس ماتت الكلمات بشفايفه يوم جافني واقفه ابويهه حسيت به ارتبك ..
قعد ينظف ايده من التراب ابصراحه كان شكله مقزز كأنه متسبح بالرمل ..
ينظف ايده: سوري ع بالي خوله ...
صديت الصوب الثاني: وينها خوله محد ف البيت موجود ..
فارس: انتي اهلج ما علموج اتسلمين..
طالعته: اهلك اهلي ولا رباني رباك ...
اتجدم مني فرجعت تلقائي : زين يعني اعترفتي ان اهلي"واشر ع نفسه" هم اهلج "واشر ع علي"
رجعت قبل لا يتمادى..كنت ابا اتحرك بس ها الحثاله امصكر الدرب ..
نوره: وخر بطوف ..
فارس يتمصخر: طوف حد ميودنج...
نوره: حضرتك امصكر الدرب .طووف ..
رفع حياته : لها الدرجه انا ضخم ولا ما تخاف لا ادقيني..
حرجت منه شو يعني يستفزني: خووز
هز راسه بمعنى لا..حركاته ماصخه و انا مب طايقتنه ...فاجاني يوم جفته ياشر ع دبلتي ...
فارس: هذي ترا مكانها غلط..
رجعت ايدي ورا و صرخت عليه: ما يخصك ..
استفزتني ضحكته: هههههههههاي




مدري يوم سمعت رنة ضحكته حسيت اني رجعت ال 8 سنوات ورا ايام ما كان عايشين ف بيت خالوه مريم..تذكرت يوم كنا انخطط ل بعض علشان في النهايه كل واحد ياخذ ضرب من خالوه مريم او خالي احمد ..كرهت هاي الذكرى الي مرت ف بالي ...لورا و كاني مشمزه منه
فابتسم: لا اتخافين ما بخيسج ..
حسيت انه هو المتحكم بالموقف ..فقررت انسحب
صكيت ع اسناني: خوز عن دربي ..
طالعني بنظرات غريبه: لج معاي حساب طويل يا نوره ..بتدفعين الثمن غالي ..
نوره: هههههههههه اتهددني ..انت !!
فارس: للاسف الشديد انا ما اهدد حريم ولا احط راسي من راسهن..
اتمصخرت عليه: عيل ليش واقف و اتضيع وقت معاي خوز عن طريجي خليني اطوف ...
فارس: قلتلج طوفي ..ولا انتي تبين اتسولفين معاي...
نوره: بعد هالقاصر انا انزل مستواي و اسولف مع الحثاله للاسف خالي احمد ما علمني هالشي..بالعكس حذرني منهم ...و الدليل انه قام يروغ كل من حاول يشوه سمعته حتى لو كان من لحمه و دمه ..
فارس: انتي الي فرقتيني عن اهلي ..
رديت عليه بعصبيه: انت و بحركاتك الوسخه ..و انا قلت الي جفته ..يا محترم..




كان بيرد علي بس انا ما عطيته فرصه..و حسيت برجفه لو تميت ابمكاني بعرف اني ارتجف ..و انا ما اباه يظن اني خايفه منه .
..اتجدمت و طلعت دزيته ابكل قوتي عشان اقدر اطوف..رجع بعيد و سمعت ضحكته استفزتني من الخاطر...حسيت انه قدر يهزني و ها الي موتني غيض..و بدربي مريت ع جوتيه الممزور رمل شليته من الطرف.. صدت جفته دخل الصاله لحقته..التفت لصوته بطل حلجه يوم جافني واقفه عند باب الصاله..فريته بالجوتي بكل قوتي..سمعته يصرخ..مدري صابته او لا..لاني مجرد ما فريته ركضت برع ..بكل سرعتي...سمعت صوته يقول كلام وايد بس مدري شو كان يقول لان دقات قلبي كانت اترن باذوني ..تميت اركض ل ما دخلت بيت خالوه عايشه صكرت الباب ...و انا اتنفس بصعوبه من كثر ما كنت اركض يالله مدري متى اخر مره ركضت ..
.المهم بردت النار الي شبها في قلبي ..





فتحت عيوني..يوم سمعت صوت حميد:- شو بلاج نوره ..شو فيج اتنافخين.جي..
يوم حسيت اني خلاص صرت بعيده عن فارس غطيت ايدي بويهي و يلست اصيح منهاره ابصوت عالي ما قدرت ايود عمري خلاص فارس ظهر بحياتي من يديد..و انا ها الشي ما اريده ..بيقعد يكتم ع انفاسي كل مره شرات الياثوم...
حميد: نوره هدي شو بلاج ..
حسيت ابعمري هبله... و انا قاعده اصيح و حميد مب عارف شو يسوي ...مسحت دموعي بظهر ايدي...
و انا احاول اتماسك: خوله داخل ...
رد علي: لا بس خلود موجوده و نهله..دشي ارتاحي داخل ..
انا ما صدقت افتك من فارس بعد تباني اجابل اختك نهله..عشان انفجر بعد...
نوره: لا انا بروح بيتي ..
حميد: ليش دخلي الحينه و بعد ما ارجع من التدريب بوصلج ...ابروحي..
عاندته: لا بروح البيت .."رفعت راسي اترجاه" بتوصلني..
حميد: هي اكيد...
سرت صوب سيارتي و كنت ميته من الخوف لا يطلع فارس فجاه و يضربني شرات ما ضربته ..بس زين حميد موجود جريب مني..ركبت سيارتي و شغلتها ابسرعه ..اتحركت بسيارتي و لحقني حميد..حسيت بالامان يوم جفت حميد يلحقني بسيارته..لو عمور كان هني بالعكس بيودني عشان فارس يضربني مثل ما كان يسوي زمان ..




وصلت البنايه..اتصلت ب حميد قبل لا انزل ..
حميد: هلا نوره...
نوره: مشكور حميد ...ما اتقصر ..
حميد: ما سويت شي..بس ما بتخبريني شو مضايجنج..
نوره: الحينه لاه ..بس ما اباك اتخبر حد ..اتمنى الي صار يكون سر من بينا..
حميد: انتي وايد غامضه بس مب مشكله ...سرج ف بير...
نوره: مشكور حميد انا لولاك ما كنت عارفه شو بسوي ..
حميد: فديتج انتي الغاليه ..
نوره: تسلم لي يالله فيمان الله..
حميد: الله يحفظج مع السلامه..




وصلت الشقه..قررت هذي اخر مره اروح بيت خالوه مريم..و الي يباني اييني ف بيتي ...سرت اشرب ماي ابرد ع قلبي ..انسدحت ع الكنبه اطالع السقف..مر علي الموقف يوم ضربت فارس بالجوتي ضحكت من الخاطر..ضحكت و انا اتذكر صرخته..و مت من الضحك يوم ركضت و اسمعه يتحرطم بس مدري شو كان يقول...يلست اضحك شرات المينونه...بس سكت يوم تذكرته يقولي ..حسابج طويل و كانه يوعد و يهدد...حسيت ببروده داخل جسمي ...خايفه من الي ياي ..و ليش اخاف دام انا بعيده عن فارس و كل الي اباه يتحقق ...
ما صدقت اذن المغرب رحت صليت و سويت لي عشى خفيف..تعشيت .. و يلست اقرا روايه لي ما اذن العشا..صليت و انخمدت بعد ما لبست زلاغي و كوتي ...اقصد كوت عمور ..





باليوم الثاني يتني خوله الشقه..لاني حلفت لها بالتلفون اني ما مستحل امر عليهم و فارس موجود عندهم في البيت ...
طلعنا انا و خوله رحنا كارفور بعد ما اتفجنا ..ان انسوي غدا ..في الشقه..استانست خوله بتتغدا معاي يا رب يكون عمور موجود..يقول الوصول ل قلب الرجل عن طريق معدته ..و اذا خوله طبخت عمور بيقعد يتمدح و يسوي شرات هذاك اليوم..المهم فهمتها ان عمور ما بيكون موجود ع الغدا بس اتمنى العكس...انا كنت شرات المرافق..خوله الي كانت تشتري الاغراض ..و اللوزام حق الغدا. جفتها اتشيل دياي ..و خيشه عيش صغيره.. و خضره.. مدري شو بتسوي لنا يمكن غوزي ...؟؟
سالتها: خولوه ها كله يسونه بالغدا.
خوله: هي طبعا..
نوره: وين !!
خوله: هههههههه شو وين انتي ما اتعرفين شي..اتعلمي باجر شو بتطبخين حق حميد...
نوره: هههههه ها اذا تميت خطيبته..


طالعتني بنظرات ان كلامي ما عيبها..بس طنشتها حياتي و انا الي اقررها..
نوره: بس خلصتي ...؟؟
خوله: هي خلصت انتي مب خاطرج شي ...تشتري قبل لا انحاسب ...؟؟
نوره: امبلى بشنترى عصاير ..و حلويات و كاكاو ...
خوله: ياهل شوه..
نوره: هي مستحيل اطلع من كارفو و انا مب مشتريه هالسوالف ...
خوله: يالله زين خلصينا ..



بعد ما دفعنا الحساب..اتفجنا انروح صوب المطاعم نتريق ..كنت الساعه عشر ..شي وقت ع طباخ الغدا..
خوله: نوره لو حد جافنا بجتلونا...؟؟
نوره: ما عليج الصبح اتكون المطاعم فاضيه...
خوله: انتي نسيتي اليوم الجمعه و اجازه ..يعني الكل هني...
اشرت ابيدي مب مهتمه: عادي شو يعني ما سوينا شي جايد..صح اول مره نظهر فيها ارواحنا بس اول مره و اخر مره ..
مرينا ع ميرانا غاليري ...
خوله: تعالي انجوف يمكن شي حلو ينلبس ف ملجة نهله...
نوره: جوفي انزين انا بترياج ...
خوله: ليش ما بتشترين من هني..
نوره: من قالج بشتري .. اصلا من قالج اني بحضر الملجه..
خوله: ما بتحضرين ليش..انتي خطيبة اخوها و بنت خالتج ..تبين خالوه عايشه تزعل..
نوره: بتزعل شويه و بترضى ..بتحجج باي شي..
خوله: ولا اتازرين عمور اخوج ..؟؟
نوره: عمور !! اصلا عمور مب مهتم بالسالفه ليش حد قالج ان عمور ميت بنهله..؟؟
خوله: لا بس اذكر مره قلتي انه يبا يخطبها ..
نوره: كان يبا يغايضني..عادي عمور عنده اصلا ما يفكر بالزواج...





الحمدلله ان خوله صدقتني ما فيني ترفض عمور اذا فكر يخطبها بحجه انه كان يبا نهله..احلى شي سووه نهله و عمور ان علاقتهم تمت بالسر محد يعرف غيري انا كشفتهم..و كان هالشي من صالحي ...و صار الي صار و كل واحد اصبح ابطريج...المهم ما بقى شي ع ملجة نهله ...طلعنا من المحل..
خوله: ما عيبني شي الظاهر بروح مع نهله...
نوره: وين ...؟؟
خوله: بتروح دبي ادور لها فستان للملجه..
نوره: ما يحتاي كل هاه...؟؟
خوله: ليش ما يحتاي الملجه بتكون ف قاعه..
نوره: اونه ..ما عندهم سالفه مدلعين نهلوووه ..ما يدرون شو طينتها..
خوله: حرام عليج..خليها تستانس جم مره بتعرس ف حياتها ..
نوره: متى بتروح دبي ...؟؟
خوله: مدري امحمد بيوديها.خلود طبعا بتروح و انا بروح معاهم و انتي طبعا اذا تبين ادورين فستان لج...





وصلنا المطاعم و يلسنا ...صوب مكانا المفضل الركن الفرنسي...
نوره: متى بتروحون مره ثانيه عشان تشترون فساتين ل عرس خليفه ما بقى شي للعرس..
خوله: مره وحده بنششتري..
نوره: نععععععم شو مره اسفه ...لا تشترون فساتين ل عرس خليفه خلوها مشيه ثانيه عشان بروح معاكم...
خوله: اوكى بنجوف ..و الله محد قالج ما اتتييين..
رديت عليه: لمي ثمج خوله ..
طلبنا كرواسون.. و بيتزا.. و تركش كوفي بس خوله طلبت كابتشينو ...
رفعت راسي يوم سمعت خوله تزقرني: نوره ...
طالعتها من غير ما ارد عليها نبرة صوتها اثرت فيني ...
خوله: جابر امطرش لي شيما بنت عمي عبدالله..
بلعت اللقمه ابصعوبه ردينا ع طاري جابر ما صدقت افتكينا منه ...ما رديت كنت خايفه لا اتقول بعد وافقت عليه...
خوله: يبا يتفاهم معاي ..
رديت بنبرة جديه: كيف يعني يبا يتفاهم معاج...؟
خوله همست: يرمسني بالتلفون..؟؟
نوره: و انتي شو رايج..
خوله: قلت شيما ما ابا منه شي..و طلبت منها انها ما تطري لي اسمه موليه..
استانست: توج حرمه...
خوله: خلاص الي ياني منه وايد..
نوره: زين رفضتي ترمسينه شو يتحراج..صح انه ابسرعه ياثر عليج علشان طلب يرمسج ما عنده طريقه غيرها..
خوله: بس تعرفين يوم طلب مني ارمسه ها يدل ع انه له علاقات بالتلفون ..و الي اتصلت لي من فتره ما جذبت بشي..​
 
فديت نوف ...حبيبتي هاي الخاينه تزوجت و روحت عني بوظبي الحينه ابروحي هناك في الدوام..اتغشت خوله فجاه...
نوره: شو بلاج...؟؟
خوله: مدري شلت شباب يطالعونا..
نوره: لا يكون جابر منهم..
خوله: ما ادري تدرين بي عميه ما اجوف من بعيد بس لا اطالعين ورا علشان ما يحسون انا انتبهنا لهم..
نوره: فيني فضول ابا اعرف منوه ...اخاف جابر؟؟
خوله: ابسرعه كلي خلينا انروح ...
نوره: وين نظارتج البسيها ..و جوفي منوه ...
خوله: انتي بعدج..
لحظه فضول صديت لورا...
شهقت: خوله يا الخبله عمور و اخوانج ...احيدني هديته ف البيت راقد ..منوه وصله هني..
خوله: حلفي...اخواني ...
نوره: و الله لمحت خليفه..ابيه لا يكون هالحثاله معاهم ..
خوله: حثاله !!!
نوره وقفت ابسرعه: يالله قومي انروح ...
خوله: شفيج نوره مب من ساعه اتقولين عادي..
نوره: انتي ما تدرين انا شو سويت البارحه يوم ييت بيتكم...قومي طوفي...
سمعت صوت من وراي: صباح الخير ...
اتنهدت مرتاحه: خليفه حسبي الله ع ابليسك..
خليفه: وين شارده..
جفت خوله بعدها يالسه ابمكانها فرجعت و يلست و خليفه يلس معانا...
خليفه: شو ها الزط دوم تعزمونا و الحينه ابروحكم قاعدين تكرفون...
خوله: قل اعوذ برب الفلق..
نوره: و نحن ما انروم نطلع مكان الا لحقتونا..حميد معاكم "بيني و بينكم ابا اعرف فارس هناك اولا "
خليفه"يشيل البيزا و ياكلها" لا محد لا اتخافين...
رديت بطنازه: اخاف !!!
خليفه: لو جفت شيما معاكم كنت سحبتها من كشتها ...بس انتن متعود اجوفكم بها المكان و بهاي الطاوله جنه طاولة طوايفكن..
خوله: ههههههههه و الله هذي اول مره نقعد بهاي الطاوله و انت مب موجود معانا ...
نوره: بعد مره كان حميد معنا تذكرين يوم كنا نشتري فستان علشان ملجته
حط خليفه ويه ب ويهي: ها لقاءات من ورانا..
ضربته ع جتفه و ضحكنا و قلته: يا السخيف..
خوله: اعطيك بيزات عشان تطلب لك و لربعك الظاهر امفلسين اجوفك صرطت فطورنا كله...
خليفه: لا طالبين لنا بس فطوركم لذيذ...اقول نوره..
نوره: هلا ؟؟؟؟
خليفه: انتي شو مسويه البارحه ب فارس تراني كنت موجود في البيت ..
خوله: شو السالفه ..؟؟
نوره: يستاهل
خليفه: هههههههههههههههه و الله يا نوره ليومج كل ما اتذكر صريخ فارس انقع من الضحك ههههههههههههههههههههههههههه
خوله: اسكت فضحتنا الناس قامت تطالعنا ..
ضحكت ع ضحكة خليفه: ههههههههههه
خليفه: ههههههههههههههههههه وين شردتي ..دورناج انا و فارس ما لقيناج...
نوره: ههههههه رحت البيت خليت حميد يوصلني...
خوله: ايه ابا اعرف شو السالفه ..
خليفه: هاه حميد من صغره امسوي روحه بطل و ينقذج تذكرين..
نوره: هي اذكر ايام حلوه..
خليفه: الظاهر هالايام ردت..برجوع فارس بس الي تغير ان كبرنا..
خوله: اوووووووووف شو السالفه ..
نوره: بخبرج و نحن رادين البيت...اقولك خلوف بيتكم ما بدخله الا بعد ما ينجلع ضرس النحس..
خليفه رد راسه لورا: هههههههههههههههههههههههههههههههههههههههه
خوله: فضحنا جوفي كيف يضحك..
نوره: هههههه خليفه لا تستوي بايخ...
خليفه: تعال فارس اسمع يقولون عنك ضرس النحس...
خوله: عيب خليفه حشم الناس اطالعنا ...
خليفه: هههههههههه و الله نوره اسميج سوالف ..
بلعت ريجي: فارس هني معاكم..
خليفه: قصدج ضرس النحس هههههههههههههههههه هي موجود ...
سمعت صوت عمور من وراي: السلام عليكم...؟؟
الكل : عليكم السلام ...
عمور: شو عندك تضحك فضحتنا ...نوره شو اتسوين هني...
خوله: شحالك عمر..؟؟
عمور: ابخير شحالج انتي..
خوله: الحمدلله طيبه..
نوره: ماشي اتفجنا انا و خوله انسوي اليوم غدا ييني نشري السمان و قلنا بالمره انمر المطاعم نتريق...
خوله: اسمحلنا عاد ما بنضيفك خليفه بلع كل شي موجود..
عمور يبتسم: زين ما بلعكن...
خليفه: عمور ما قالت لك اختك شو البارحه..
عمور: ليش انا اجوفها عشان اتقولي..
نوره: خلوف لا تستوي بايخ اوووووووف يا ثجل دمك...
عمور: يالله روحن البيت شو تتريون ما خلصتن ريوق..
خوله: يالله نوره..
خليفه: مشكورين ع الريوق و ع القعده الحلوه ابصراحه من زمان ما ضحكت ...
نوره : عفوا تعال كل يوم...اقول عمور حاول اتيي تتغدا اليوم انزين..
طالعت خوله جفتها اطالعني بنظرات ...ابتسمت لها..
عمور: زين بجوف جان عندي وقت...يالله تغشي جوفي خوله متغشيه...
نوره: اووه ما احب اتغشى..مب متعوده..يالله خوله انروح ..فيمان الله خليفه
خوله: مع السلامه
خليفه: مع السلامه..




سرنا صوب سيارتي..
خوله: اول مره اجوف عمور جي جاد شو بلاه..
نوره: يمكن لانه ناش من الرقاد..
خوله: يمكن بس ليش خلنا انروح البيت ...؟؟
نوره: تلقين ها السبال قاله تعال عمور خاتم بصبع فارس
خوله: اونج انتي..يالله خبريني شو السالفه الي مخليه خليفه ينقع جي من الضحك ...




وصلنا الشقه خوله سوت الغدا..و انا كنت قاعده اراقبها..و اسولف لها بالي صار البارحه..ضحكنا ..سرت اصلي الظهر..بعدها لحقتني خوله وقامت اتصلي..و انا كنت قاعده ف الصاله و مليون فكره ادق ف راسي كيف اخلي عمور يفكر ب خوله و يخطبها.
.اقدر افرق و اسوي لكن صعب اجمع بين قلبين..صعب اني اتدخل في مشاعرهم ..خوله يمكن عندها عادي ..بس اليوم عمور حتى انه ما فكر يسلم ب خوله لولا خوله هي الي بدت...ليش طنشها !!! يمكن اعتزل الحريم بعد ست الحسن و الدلال نهله ...يت خوله ..و قعدت مجابلتني...
خوله: نوره ..لي متى...؟؟
طالعتها: شوه ...؟؟
خوله: اتعاملين فارس جي..
نوره: هالحقير ما رجع حياتنا الا هالاشهر..خليه يولي سود ويوهنا..
خوله: زين السالفه مرت عليها سنين...و كلنا نسينا الا انتي شايله ب قلبج..
نوره: البارحه هددني اونه بدفع الثمن لاني انا الي فرقته عنكم..
خوله: و انتي شو يخصج
نوره: مدري ..بس عشان تفهمين انه يبادلني نفس المشاعر ...
خوله: يمكن لانج انتي هذاك اليوم خبرتي عليه ابوي..
نوره: انا قلت الي جفته ..ما غلطت ابشيء...
خوله: الله يهديكم..
نوره: هو خلاص بتم هني كل ما اروح فريجكم لازم اجوفه يعني ...؟؟
خوله: لا وين..ما ايينا الا نهايه الاسبوع ..اقولج عنده اشغاله هناك..
نوره: زين عيل نهايه الاسبوع ما بطب فريجكم ابصراحه هالانسان امسوي لي رعب...
خوله: زين يكون احسن عشان ما اتصير مشاكل من بينكم ...
نوره : احسن بعد..بتصل ب عمور بجوفه جان بيي يتغدا...
خوله: بروح المطبخ بشيك ع المجبوس...
نوره: روحي الشيف خوله..
خوله: هههههههه
نوره: هلا عمور ...
عمور: هلا نوره شو ..؟؟
نوره: شو شو.......؟ شو ها الدفاشه ...؟؟
عمور: عندي شباب بغيتي شي..؟؟
نوره: ما بتيي تتغدا..
عمور: لا
نوره: قول و الله انت بس..
عمور: نوره انا مشغول.
نوره: خلاص عيل بخلي لك غدا..
عمور: ما اشتهي ..انا ما برجع البيت الا بعد التدريب..
نوره: مب كيفك..
عمور: اوووووووه شو براسج انتي
قهرتني جملته: ماشي بس انت ما تنعطى ويه.."وصكرت التلفون ابوييه"
طلعت خوله من الطبخ: بلاج...؟؟
نوره: ماشي يالله نتغدا..
خوله: اخوج ما بيي
نوره: يولي..






دشينا المطبخ و تغدينا..عقبها سرنا اطالع تلفزيون..و قعدنا نشرب شاي ..و انسولف بمواضيع كثيره..كانت خوله تقنعني اروح معاهم دبي بس انا موليه ما رضيت..اتولي نهله هالقاصر اروح ملجة نهله ...قبل اذان المغرب بشويه روحت خوله..محمد و خلود مروا عليها...
استانست بوجودها..صدق هاي الانسانه تملي علي حياتي ...لو لاها مدري شو صار فيني..يا رب اتصير من نصيب عمور اخوي ...
بعد ما صليت المغرب..ما كان لي نفس اكل..فيلست اقرا مجله كانت موجوده ع الطاوله يلست اتصفحها بها الحزه دش عمور : السلام عليكم..
طنشته
عمور: السلام لله..
رديت من غير نفس: عليك السلام...
عمور: زين ممكن اتسخنين لي العيش لي ما اسبح..
طالعته و رمسته من طرف خشمي: ماشي عيش خلص و الباجي طرشته بيت خالوه مريم ..
عمور: زين بعد ما كان لي نفس بس كنت ابا ارراضيج..



دش حجرته من غير ما يسمع ردي..ما تستحي ع ويهك ..قليل الادب..امصدق روحه ايحب امسوي روحه قيس بن الملوح ..رن موبايله..عفدت من مكاني اجوف منوه المتصل جفت اسم " طارق" رجعت ابمكاني..يوم سمعت باب حجرته ينفتح..شل موبايله و رد علي رفيجه بعد ما دش حجرته ..ياني شعور اني اغيضه ..اترييته يظهر من حجرته...جفته كاشخ ع الاخر مب بالعاده !!
نوره: شو هالكشخه..؟؟
عمور: و الله كاشخ ..حليو
هزيت راسي : عسل ...وين بتروح..
عمور: بروح دبي مع الشباب..
نوره: حتى انا بروح دبي بعد جم يوم...؟؟
عمور: شتسوين ..و مع منوه بتروحين..؟؟
اتنهدت اغايضه: مع قوم خالوه بنشتري فساتين عشان ملجة و نطقت اسم نهله بكل رقه" نهله..
اونه طنش: زين روحي." بصوت واطي".متى بتملج ...؟؟
نوره: ما ادري متى بالضبط بس جريب وايد...
عمور: باركي لها..​
 
و طلع من الشقه..ضحكت ابصوت عالي ...غايضته يستاهل خليه يتادب..بس شي يقهر من زينها هاي الي اسمها نهله عشان تجلب حاله و حياته جي ..و الله مدري شو جايف فيها ...
خطفت علينا الايام شرات البرق ...كل شي مر ابسرعه ..بس بيني و بينكم انا الوحيده كنت احس ان الايام اتمر ببطيء وايد و كانت ممله...
ما قمت اروح فريج بيت خالوه الا نادرا بس عشان كنت اخاف لا اتصادف مع فارس..اتفاجات يوم اتصلت بي خوله اتقولي اليوم الصبح ملجت نهله..مع اني كنت احسب الايام..الا ان نسيت سالفتها...حسيت برعشه..ملجت نهله يعني حميد و الكل بفكر ف ملجتي ع حميد..مب مهم اليوم الدنيا مب شايلتني..اخيرا نهله صارت في ذمة ريال مب عمور..زين سيف يناسبها..انا احس جي...رن موبايلي يقطع حبل افكاري..
نوره: السلام عليكم...؟؟
خالوه عايشه: عليج السلام حالج بنتي.
رديت مصدومه: الحمدلله ابخير اشحالج انتي...؟؟
خالوه عايشه: الحمدلله بخير شوبلاه صوتج..
نوره: كح كح تعبانه شويه..
خالوه عايشه: سمعت ما بتين حفلتنا الليله صج هاي الرمسه..
نوره: كح كح كح كيف اقدر ايي كح كح و انا ميته من الكحه..
حسيت ف خوف بنبرة صوتها: ليش ما اتروحين الطبيب ..
نوره: ما احب الدواء و اخاف من الابر كح كح كح
خالوه عايشه: سوي لج زعتر زين للصدر..
نوره: ان شاء الله كح كح كح كح
خالوه عايشه: ماجوره ان شاء الله ...معذوره عيل ما بنلومج
نوره: سامحيني خالوه كان ودي احضر ملجة اختي نهله بس تعبانه كح كح كح
خالوه عايشه: ما عليه سمي بالرحمن و ارقدي..
نوره: ان شاء الله سلمي ع نهله و باركي لها..
خالوه عايشه: يبلغ يمه فيمان الله..
نوره: كح كح مع السلامه





ههههههههههههههههههههههه نقعت من الضحك بعد ما صكرت خالوه عايشه و الله انفع اكون ممثله..يصلح لي ..يحليلج خالوه عايشه علني فداج..ما ودي اجذب عليج بس بنتج ما اطيقها...سرت ارقد بس ما ياني رقاد خاطري اجوف عمور شو حالته ..خليت باب حجرتي مفتوح علشان انش ع صوت باب الشقه يوم بنفتح..يمكن اجوف عمور.. رقدت ..وعيت ع اذان الفير..قمت ابسرعه صوب حجرة عمور جفته ما ياه هاه وين راح...صليت الفير و قرأة القران ..ع الساعه ست..نورت الدنيا ..


.لبست زلاغي و الكوت الاخضر.. يلست اتجلب ع الشبريه ..افكر ب عمور وين راح...ها اكيد تخبل ..معقوله يسوي بروحه شي ..مثلا ينتحر !! لالا مب لها الدرجه ..عمور انسان مؤمن ..و راضي بكتبة ربه...يالله لها الدرجه انا شريره حطمت قلوب..و انا شو يخصني ها كله قسمه و نصيب...انا مالي دخل...نشيت يوم سمعت صوت الباب ينفتح..عفدت صوب الصاله..
جفت عمور: عمور .....؟؟
التفت صوبي..حسيت بهزه بكل جسمي يا ليتني مت قبل لا اجوف حاله عمور جي جنه انسان ضايع ..الله ياخذج يا نهله...اتجدمت منه حسيت اني بصيح ...


نوره: كنت احاتيك....؟؟
عمور: ليش اول مره اتاخر..
نوره: ليش جي حالتك..
مسح ع ايده و شعره: تعبان مب راقد ابا ارقد...امواصل من البارحه...
نوره: خليني اسوي لك شي تاكله
طافني و راح حجرته : ما ابا شي ..
لحقته ..يودته من ذراعه..حسيت بالدموع تتيمع ف عيوني ..
عمور مستغرب: شو بلاج ..؟؟
نوره: لا اتسوي ابروحك جي ما في شي بالدنيا يستاهل ...
ابتسم بس كانت ابتسامته باهته : ما فيني شي..
صرخت عليه و انا اصيح: انت اتقص ع روحك و الا علي ..
مسك ايدي الي كانت ع ذراعه و نزلها طالعني بنظرات مبهمه ما عرفت شو يقصد و سار حجرته..بس انا لحقته ...ما خليته ..كنت اترياه من البارحه علشان اشمت فيه..بس يوم جفت حالته جي ما هان عليه ...انا لو ادري جي بيصير له و الله ما فرقت من بينهم ...
عمور بصوت ميهود: ظهري خليني ارقد...
نوره: بالاول اوعدني انك ...
قاطعني: نوره مب فايج لج..خليني بحالي شو تبين فيني ...
مسحت دموعي بظهر ايدي: ابيع دنيا كلها علشانك..عمور انت الوحيد الي بقى لي في الدنيا..لا اتسوي بروحك جي ..لا اتخليني ..حرام عليك..كافي ابوي الي هدني "ويلست ع الارض منهاره اصيح.."
اتجدم مني عمور و حضني و قعد يمسح ع راسي ..
كملت كلامي : اتسوي احساب لكل البشر الا انا ..ليييييييش ...؟؟
عمور همس: لا اتقولين جي..انتي اختي الوحيده ..حتى انت الوحيده الي بقت لي بها الدنيا ...
رديت عليه بنبره اترجاه: عيل لا اتسوي ابروحك جي..الله يخليك
عمور: غصبن علي نوره ..انسانه حبيتها من صغري و كبرت و كبر حبها ف قلبي ..ف لحظه اتصير من نصيب غيري شو تبغيني اسوي ...


كنت احس قلبي يتقطع ابكل كلمه ينطقها عمور...انا حطمت حبه الي انولد و كبر من الايام..انا بانانيتي..ما تخيلت هالكثر عمور متولع ب نهله..ما اتصورت هالكثر عمور يموت ب نهله..و الله عمري ما اتوقعت ان بتصير جي حالة عمور بزواج نهله من سيف...فديت عمور..حسيت ب شعور اول مره احس به شعور الندم...حتى ها الشعور ما حسيت به يوم خوله يتني هذاك اليوم منهاره يوم اكتشفت ان جابر يقص عليها..يا رب سامحني ..
رفعت راسي ارمس عمور: سامحني.. كل مني انا السبب "ورجعت اصيح"
باسني ع راسي : انتي ما يخصج .. يالله قومي ارقدي ف حجرتج ارتاحي و خليني انا بعد ارقد ولا ما اهون عليج...
هزيت راسي بمعنى نعم و انا ابتسم له.بالغصب.
نوره: حاسب ع نفسك..
عمور : ان شاء الله ...
وقفت عند باب حجرتي اراقبه لي ما دش حجرته و صكر عليه الباب ...رجعت شبريتي و يلست اصيح منهاره..و شي غريب اني رجعتت ورقدت وبها الوقت​
 
.,:؛" (( الحلقة الثالثة عشر )).":.؟؛،,..0

ما كنت ابا اطلع معاهم الرحله بس عمور ترجاني و ما بغيت ارده.. طلعنا ب4 مراكب..مركب فيه خالي احمد..و خالوه مريم و خالوه عايشه و انا و خوله و خلود و نهله و محمد.. و المركب الثاني خالي عبدالله و معاهم ام سيف و سيف و شيما و عزه و بنتها مهره..اما ريل عزه فكان راكب المركب الثالث و معاه خليفه و حميد و محملين معاهم الاغراض ....

و المركب الرابع فيه فارس و عمور فيه باجي الاغراض و شنطتنا تمينا ف البحر خمس ساعات كنا طالعين وقت الفير مره..كان الشمس روعه و هي تشرق صج من قال عنها شرات العروس و خيوطها جنها طرحتها ...خمس ساعات قضينها بالبحر ..كانت من اروع الاوقات الي عشتها ...
حسيت كلنا محتاجين هالتغيير .. و مدري أي دقه خبال طلعت في خالي احمد و خالي عبدالله ..
.نطلع رحله ع جزيره قشم الايرانيه و سوينا حسابنا انتم فيها اسبوع...ضحكنا و سولفنا..حسيت نهله اتغيرت.. بس ما اقدر اقولكم تغير سلبي و لا ايجابي..
المهم لا حظت عليها وايد تسولف عن سيف.. جنها هي اول وحده تملج..
المهم الظاهر ما كان حبها ل عمور لهاك الزود لانها امبين عليها ابسرعه نسته ..من طريقة كلامها عن ريلها سيف..طالعت دبلتي هاي لازم افسخها و جريب ..



.كنا انسولف و نضحك.. و ف البدايه كنت احس برهبه و خوف من الفكره و اني اتم ف البحر خمس ساعات بس بعدين..اتعودت ع الجو.. و زين ان يبنا معانا كاميرات فيديو .. اكيد ها الاسبوع بيكون تاريخي و حافل في حياتتا ..سكتنا يوم خالي احمد و خالي عبدالله و ريل عزه قاموا ينهمون و يغنون اغاني زمان اول...
ساسرت عزه: ريلج كم عمره...؟؟
عزه: ههههههه 27
نوره: يعني ابعمر حميد..
عزه: تقريبا ليش ..؟؟
نوره: اجوفه قاعد يغني مع الشواب .. طاعي الباجين شرات البقر الي جايفين حريجه..
ضحكت عزه ابصوت عالي ...ضحكت معاها ...
خوله: شو اتقولون ...؟؟
نوره: ما يخصج اسرار..
خوله: اعرفها اسرارج اتحشين ب فلان و علان .. و عزه مره ع الدقه تنقع من الضحك...






للحظه الكل سكت..مب سالفه انا حسينا بالملل لا..المكان الي نحن فيه مستحيل الواحد يحس بالملل..الطبيعه وايد روعه...بس يمكن كل واحد يتامل و يسرح و ف عالمه ..وصلنا الجزيره.و قارب خالي احمد كان اول الواصلين .....وقفوا حذالنا كذا قارب..الظاهر قفر السواحل التابعين ل ايران..حسيت بالخوف..من شكلهم و لبسهم..
سمعت خالوه مريم: يخوفي ما انرد دارنا..


يتني ضحكه...بس خالي احمد طلع ورقة لترخيص.. ما قدرنا نتحرك ..ل ما وصلوا باجي المراكب..فتشوا كل المراكب.. و خذوه ورقة الترخيص الي تسمح لنا انا اندش الجزيره..الحمدلله هاي لحظات كلنا حطينا ايدنا ع قلوبنا ...قمنا نحن الحيم انزل الاغراض و الشنط.. الشباب قاموا يربطون المراكب ابمكانها انا سرت صوب المركب الي فيه ريل عزه و خليفه و حميد.. و تم حميد يناولني السامان.. و معاي خوله و خالوه مريم.. و الباجي روحوا صوب المركب الي فيه حميد و فارس ...
بعد ما خلصنا..سرنا داخل الشاليهات ...انترتب الاغراض ..خالي احمد و عبدالله انشغلوا...بالخيمه الي كانوا يسونها ع السيف ..علشان يلستهم و يراقبون المراكب..


طالعت حولي اتوقعت اجوف الجزيره ممزروه زراعه..بس كل شي جريب منا كله صخور و رمل...شي يخوف..فتره اسبوع اتخوف ...بس دام خالي احمد و عبدالله موجودين عندنا ان شاء الله كل شي امان ..
سمعت حميد: ليش واقفه ابروحج هني..
طالعته: اتامل البحر و الجزيره توقعتها غير ...
حميد: شو رايج انيي هني شهر العسل..
ضحكت: هههههههه مينونه ..انا الحينه مب حاسه بالامان...؟؟
حميد: انا جريب منج بتكونين ابخير..
ردت عليه اتمصخر: اتمنى ..
سمعت صوت محمد يزقر حميد: روح يبونك..
حميد: تعالي لا اتمين ابروحج هني...
نوره: محد بياكلني..
حميد: تعالي نوره سمعي الرمسه..





رحت معاه ...ابتسم لي وراح صوب الشباب ..الي قاعدين يعابلون بخيوط الصيد اونهم عاد بيصيدون وشلكم ف البحر و اهواله ...
خوله: نوره تعالي معانا اندور حطب علشان النار ...
ركضت صوبها..
خالي احمد: لا اتروحون بعيد خلكم جريب منا ... فهد "ريل عزه" اتحمل فيهم..
فهد: ما يهمك..
طلعنا فوق انا و خوله و نهله و عزه و ريلها...اما خلود تمت هي و شيما مع اليهال ...ركبنا فوق الصخور..
عزه: وين هني مستحيل انلاقي حطب..
فهد: امبلى داخل شي ..بتتفاجاون يوم بنوصل فوق اخر الصخر..
وصل فهد ويير وساعد عزه ووصلت انا و ساعدت نهله و خوله.. انصدمنا..عالم ثاني ..طالعنا تحت يعني نحن يالسن ع الشاطيء... و هني باجي الجزيره بس ابصراحه جنان..
خوله: خساره ما يبنا الكاميرا ...
هني كله اشجار صغيره و كبيره ...
عزه: فهد ماشي ناس هني ساكنين...؟؟
فهد: امبلى شي بس نحن بطرف الجزيره و من ورا... و لو سرنا داخل بتجوفون بيوت و سكان ومحلات كل شي ...
نهله: ليش ما نسكن هني..
عزه: خلاص خبري سيف يسكنج هني..
خوله: ابصراحه رهيب المكان..




انا ما علقت علي شي لان روعه المنظر شل كل عقلي و تفكيري ...يمعنا اشكثر حطب .. و شي حطب كان فهد يرده لانه ما يصلح لنار او اونه صعب يشب ب بالنار ...يمعنا حطب اشكثر يكفي لايام...
نوره: كيف بنوصل كل ها الحطب ع السييف؟؟
عزه: صج كل ها نحن بنشيله..
قام فهد و رتب الحطب .و ساعدناه.. و ربطه بالحبل .. و سوا تقريبا خمس حزم ...
فهد: وحده اتروح تزقر الشباب اييوون يساعدونا..
خوله: انا بزقرهم بس مشغولين في الصيد..
نوره: يا حافظ..الا يسمعج يقولون بييبون هوامير ...
ضحكنا: هههههههههههههه
سارت خوله يلست اتزاعج..: تعالوا شيلو الحطب ...تعالوا...
فهد شل حزمه: تعالوا نرجع ..خلي الباجي الشباب بيشلونه ..
رجعنا مكان ما يينا.. و نزلنا من الصخور..المتيمعه... و ما شاء الله عليه فهد نزل بسهوله و بيده حزمة حطب اشكثر .. خليفه و سيف و فارس يوو علشان يشيلون الحطب..
خليفه: وين انلاقيه..؟؟
فهد: بتجوفه ع طول ..



ردينا ع السيف..سوينا نحن البنات برزة و يلسنا عليها..طبخنا الغدا.. و شوينا كذا سمجه صادوها الشباب ...راقبت عمور حسيت نفسيه وايد صارت اوكى ...ارتحت من داخلي ..بعد ما تغدينا قمنا نتمشي.. و نستكشف المكان بس خالي احمد ما كان يخلينا نبتعد وايد.. وقت المغرب ..حسينا ف البدايه بالخوف من الظلمه ..مع ان النار كانت اتشب ...شويه و توزعنا نحن الحريم في الشاليهات و رقدنا و الشباب تموا سهرانين يسولفون و يضحكون .. مر يومين ..و نحن مب حاسين بعمرنا كنا في قمة الوناسه.. و الضحك..



كانوا الشباب ابروحهم و البنات ابروحهن و هالشي الي كان مريحني..احيانا اتصير تعليقات يوم خليفه يسولف مع شيما.. و حميد يسولف معاي ...و نهله مع سيف ..كنت اراقب عمور يوم اتصير التعليقات ع سيف و نهله.. ما كنت اقدر اجوف او اقرا ملامحه كانت شبه غامضه..
المهم كنت احس انه مرتاح...



فتره ما كنا بالجزيره كنت احاول اجرب خوله و عمور ...بس كل واحد يحمل مشاعر لطرف الثاني مشاعر الاخوه و هالشي اللي كان يغيضني شويه ...
في ثالث يوم..نشينا الفير ع صوت اذان خالي عبدالله ...اتييدنا بماي البحر و صلينا.. و كالعاده سيف كان الامام..الي صلى بالرياييل..الكل رجع يرقد الا انا كنت اطالع الشمس يوم تشرق..سبحانك ربي ما اعظمك..؟؟!!منظر رهيب...قمت و اتمشى صوب البحر ابتعدت ع الشاليهات..خذت معاي الكاميرا..كنت ابا اصور الشمس و هي تشرق.

.ما كنت ابا اطول ف التصوير عشان البطاريه ما اتفضي..بس لفتني صوت ف البحر اتروعت و قفت ابعيد..الظاهر سمجه عوده جريبه من السيف.
.ضغطت ع الدجمة التصوير و يلست اصور اراقب حركات الماي الي يتناثر في الهوى من حركة السمجه..شويه شويه اتجدمت مني.اتروعت..فكرت اصرخ بس الكل رقود..بعدين بحصل الهزبه و الضرابه ..
.تميت ارجع لورا و انا اصور ..شهقت..هاي مب سمجه ..جدمت عدسه التصوير ذراع بشر !! حوريه بحر !! امبلى حوريه..يعني الحوريه صج بالواقع مب بالخيال.
.بس ذراعها اسمر..انا سمعت ان الحوريه اتكون جميله و بيضه.من بياضها جنها نور .رجعت لورا متروعه و انا اجوف هالمخلوق الغريب يتجدم مني.
.حسيت بخوف طحت..ع الارض .. حسيت بيغمي علي..حطت ايدي ع حلجي و انا اجوف هالحيوان الي ظهر من البحر و ياي صوبي ...بالبدايه كنت اظنها سمجه و بعدين حوريه بحر...
حسيت اني ابا اصرخ بس كنت مخنوقه.. كانت الكاميرا بعيده عني طاحت مني يوم طحت ع الارض..شليت حصى جريب مني كنت بفره علشان احمي نفسي..
فارس: يا ويلج .الجوتي و سكت عنج ...؟؟
تميت يالسه ابمكاني امبطله عيوني ها شبح ولا انس ..
سمعته يضحك: ههههههههه و الله انا فارس مب جني...





انتبهت ل نفسي و ل حالتي و ل فارس الي كان لابس بنطلون من غير فانيله اتلومت ... فوقفت ابمكاني انفض ايدي من الرمل ... سرت صوب الكاميرا و شلتها ..
فارس: شتسوين بها الوقت ...؟؟
نوره: انت الي شو اتسوي..انا من يومين اراقب الشمس يوم تشرق..و بعدين انتوا هناك مكانكم شو اتسوي ياي صوب الحريم...؟؟
ابتسم: اونج اتراقبين الشمس يوم تشرق ..ما اتناسبج الرومانسيه موليه و الله العظيم..
طالعته باحتقار و صديت عنه
سمعته يقول: كنت اسبح هناك..بس جفت وحده خبله واقفه هني "و اشر ع مكان كنت واقفه اصور" و قاعده اتصور ع بالي جنيه ولا ساحره فاتجدمت اجوف شو هالمخلوق و طلعتي انتي هههههههههههههههههههه
رديت عليه بعصبيه : ما يضحك ...
فارس: امبلى يضحك بس انتي شرات الدرام وارمه يبالج ابره اتفجرج يا ثجيله الدم.
طالعت : انا شرات الدرام يا...........





بس ركض صوب البحر يسبح... ها الانسان من شو مخلوق الدنيا برد..ما يحس ..وين يحس شرات الحيوان بس الحيوان يحس !!! متفيج يسبح ولا بها الوقت..جفته يبتعد...و سبح ناحيه المراكب...رديت الشاليه حطيت الكاميرا ابمكانها و انخمدت ...فتحت عيوني ع حشره جسوم و صياحه تذكرت السوري ..ابتسمت شكل اليوم حلو..نشيت ..طاحت عيوني ع شنطة الكاميرا..تذكرت الموقف الي صار الفير !! كنت احلم ...؟؟ شكيت اذا كان حلم او واقع..طلعت بعد ما اتغسلت.. جفتهم يالسين يتريقون يلست اتريق معاهم ...نشن الحريم يسون الغدا...و نحن البنات تمشينا ...لمحت عمور يالس ابروحه ع صخره يعدل خيوط الصيد رحت صوبه..
جافني ابتسمت له : ليش قاعد ابروحك ...؟؟
عمور: اعبل بالخيوط..ليش ودرتي رباعتج ...؟؟
يلست حذاله: جفتك ابروحك قلت ايي اسولف معاك...ما تنجاف ...
عمور: هههههههه لازم عندج هالبنات وين بتذكرين اخوج الوحيد..
نوره: علني فداك..
عمور: ياه ياه نوره تتفداني زين ابوي فادتج الرحله اتغيرتي 80 درجه..
نوره: لا تستهبل بس تصدق احس الكل تبدل يمكن جو الرحله مؤثر..
عمور : وايد..
نوره: عمور خذني هناك ابا اروح بعيد...؟؟
عمور: روحي بروحج..
نوره: خالي احمد يراقبنا ..انت لو خذتني ما بيقول شي دخيلك ابا اجوف الجزيره من هاك الصوب...
عمور: صبري خليني اخلص الي بايدي...
نوره: متى بتخلص بعدين بنتغدا..
عمور: زين بعد الغدا..
نوره: اتقص علي بتروح عند الشباب ...
فر الخيوط: امري لله يالله طوفي ..
رديت مستانسه :- فديتك و الله "زقرت خوله" تعالي خوله تعالي ..
عمور: لازم ..؟؟
نوره: عيل هي بعد خاطرها اتروح هاك الصوب ...
عمور اتجدم : يالله زين...
نوره: تعالي اركضي ..
خوله: شوه .
زخيت ايدها :- تعالي عمور بياخذنا هناك...امشي ..
خوله: ابوي بيحشرني..
نوره: لا اتخافين عمور معانا ما بيقول شي..
عمور: بتييون ولا اقعد اعابل بخيوط الصيد...
نوره: يالله يالله ..​
 
تمشينا انا و خوله و كنا مستانسات.. و عمور كان يمشي معانا بس شويه كان بعيد عنا...سرنا ع الطرف..ركبنا الصخور..ساعدني عمور..لي ما وصلت اخر الصخره و بدوري ساعدت خوله...كان شكل البحر رهيب من ابعيد ...الامواج تضرب بالصخور ردت خوله لوراء..
ضحكت عليها: هههههههههه خفتي ...
خوله: هي شكله المنظر يخوف ..
نوره: بس حلو..وايد..انتي خوافه..
خوله: شسوي..؟؟؟
مسكت حصى و اتفتت ابيدي بسهوله : جوفي خوله الحصى بسرعه يتفتت..
خوله: ابيه اخاف انطيح ..نوره جوفي ها الحفره الموجوده هني ..
نوره : هي شكلها يخوف..عمور شي حفره ..
طالعت عمور جفته سرحان و كأنه كان بعالم ثاني يتأمل البحر ..
زقرته: عمووووووور
طالعني من غير ما يرد..
نوره: شي حفره صوبنا ..
عمور: هي نسيت اقولكم تحملوا عن تطيحون ترا الصخر الي تحتكم يزحلق ...
نوره: زين ..
خوله: نوره تعالي نحفر حرفي و حرفج ..يمكن يوم من الايام نمر هني..
يلسنا ننحت حرفي و حرف خوله..بصعوبه..و نحت حرف عمور شويه بعيد عن حروفنا لانه هو يايبنا هالمكان ...
عمور: يالله نرجع ....؟؟
نوره: ما طولنا شو هاه ...
خوله: بس لاه نرجع..المكان من هني يخوف وايد...
اتجدم عمور : يالله تعالن بنزلكن..




مسك يدي و مسكت يد خوله.. و نزلت من ع الصخور...و نحن و نازلين تزحلق عمور و طاح ع ركبته ...بس انا و خوله تماسكنا لان خلاص وصلنا تحت...بالبدايه تمينا اطالع بعض انا و خوله مستغربات من طيحت عمور..
همست: عمور.
عمور رفع راسه فجأه : بووووووووووووو
ضحكنا عليه كان امبين منحرج من الطيحه يلسنا نضحك عليه..بس سكتنا يوم طلع ركبته و جفنا الدم..
نوره: ابيه انجرحت...
عمور: ما عليه بسيطه...يالله انروح...
مشينا و جريب نوصل صوب قوم خالاتي..
نوره: يالله يا ممرضه داوي عمور ..
عمور: ما يحتاي بغسل الدم و خلاص...
خوله: بس انت تنزف ..اصبر بييب المطهر و لزقه الجروح..
نوره: يا عيني..
قعد عمور: صج ممرضه امسويه احتياطاتها ...


اتجدم منا فارس ما لاحظته الا يوم سمعت صوته: شو بلاك عمور...
عمور: طحت من هاك المنحدر..
فارس: شتسوي رايح هناك ما تدري هناك خطر ع الطرف ..و شي حفره
عمور: شسوي نوره الحت علي الا اخذها..
فارس: منو يلعب بمخك غير ها البنات ما وراهن الا الشقى..
رديت عليه ابسرعه: انت ما يخصك سالفه بين اخوي و بيني ..لا تدخل ..
عمور يعاتبني: بس نوره عيب..
كان بخاطري اروح بس كنت اتريا خوله لي ما اتيب المطهر ابا اجوفها يوم اداوي عمور ..
فارس: كل شي يتغير بالدنيا الا لسان اختك..
صرخت عليه: لا تطريني ع لسانك مفهوووووووم..و بعدين انا و اخوي واقفين انت ليش تحشر نفسك..
بطلت عيوني يوم جفته يقعد حذال عمور ابتسم: لا يكون ملكتي الجزيره ...
صديت عنه اطالع البحر الصوب الثاني سمعت عمور: نوره روحي عند البنات ..
رديت من غير ما اطالعه: ما بروح أي مكان بتريا خوله ...
شويه ووصلت خوله..يلست اطالعها فتحت شنطة الاسعافات الاوليه الي يابتنها معاها
فارس يقول ل خوله: علني فداج يا الغاليه..
طالعني يوم رقصت براطمي يمين و شمال ..
خوله: لا ترفسني يوم بداويك..
عمور: مب لهاك الزود يعورني ...
خوله: بنجوف ...
فارس يحاول يستفزني: لو انت مب سامع رمسه هذي " و اشر علي " كنت مرتاح
رديت عليه بسرعه: ما يخصك محد طلب رايك ..
فارس و جنه قاعد يتسلي : ما وراها الا المشاكل..
صرخت: عمور سكته و الله بفره بالحصى ..هالحثاله...
كانت خوله تفرك جرح عمور بالمطهر و كان عمور يتألم : أي أي شوي شويه خوله..
خوله: تحمل عشاني..لا ترفسني ههههههه
فارس: يالله ذوق الويع بسبب هاي الشيطانه..
طالعته بنظرات: و انت ليش غيران انت لو فيك خير ...
قاطعني عمور و هو يتألم : بس نوره صخي عن الريال ...




رديت و انا مقهوره: سكت ربيعك ليش اييي معانا الرحله هاه ..تدري بكل مكان يتواجد يخترب كل شي ..
فارس: و الله انا ياي مع ابوي و اهلي مب ياي معاج.. و بعدين عمور بسبب منوه يتويع ..
رديت عليه و احس اني احترق بداخلي: انت رزه مالك اب كلهم متبرين منك..
خوله: بس اسكتوا خلوني اعرف اشتغل...
نوره: سكتي هالحثاله لو انا منج احرقه ..
فارس: و لو انا منك عمور كنت فريتها بالحفره الموجوده ع الطرف ما منها فايده ام لسان طويل...
طلعت لساني اغايضه: ها ها اطول عن شفيتك بعد ها ها "و انا امد لساني حسيت انه عورني"
فارس: عله القص..
نوره: قص الله لسانك..
عمور: نوره صخي شويه اووووووووف..يعور خوله..
خوله: خلاص بلزق الجرح بس لا تسبح ف البحر..
فارس : هاه شو خذت من ورا هاي"و اشر علي"
صرخت: عمور سكته ترا و الله بفلعه بالحصى..
عمور: بس فارس صخ عنها ..
فارس: هههههههههه علشانك بس..يالله بروح ويا قوم عمي حرقت دمج شويه..
عطانا ظهره فرديت عليه: بالي ما يحفظك..



ما رد علي و كمل طريجه و كأنه ما سمعني..يلست ع الارض مضايجه اكرررررهه و يلست اصيح ...بصوت واطي...
عمور: نوره من صجج اتصيحين..
رديت و انا اصيح: قاعد يقرضني و انت صاخ عنه عايبنك..
خوله: زين ما قصرتي فيه جوفي حتى ما رد عليج اخر شي ما قدر عليج..
عمور: نوره انتي ياهل اتسوين هالحركات..
صج يوم فارس معانا احس بعمري ياهل..لها الدرجه استصغر نفسي جدامه...
خوله: ها خلصنا لا تسبح اليوم انزين حاول ..
عمور: ان شاء الله عادي امشي..
خوله: هههههههه هي عادي ...
نوره: ايه نسيتوني شوه ..
عمور: لا ما نسيناج تعالي وصليني ل برزتنا...
زخيت ايده: يالله ..
عمور ابتسم ل خوله : مشكوره الغاليه..
ابتسمت خوله: العفو ما سوينا شي..





استانست من خاطري يالله اتجرب عمور من خوله .. و اتزوجهم يا رب يا كريم ..اتغدينا و بعد فتره الغداء كنت اتجنب فارس .وما اتواجد بالمكان الي يكون موجود فيه ..مر الوقت بسرعه بس كنا نحس بالوناسه بكل ساعه اتمر علينا بعد ما خلصنا صلاة العشى..تعشينا.. و سرت انا الشاليه علشان ارقد..متعوده ارقد من وقت ...رحله ولا غيره مستحيل اغير روتين حياتي ...فتحت عيوني ع اذان الفير ع صوت خالي عبدالله ...نشيت يلست اراقب الشباب يوم يصلون الجماعه..ما شاء الله عليه سيف صوته جميل.. يا حظها نهله لو انا منها بخليه كل يوم يقرا لي قران علشان صوته العذب بس نهله مب ويه تسمع قران فقدتها ...نشيت اصلي الفير ..يوم جفت خالوه عايشه اتقوم خالوه مريم و ام سيف ..صليت معاهم ...و قاموا البنات يصلين بعد ما خلصن...فكرت اطلع علشان اجوف الشمس يوم تشرق بس خفت لا اجوف فارس يسبح..علشان جي تميت ابمكاني اتجلب لي ما نشرت الشمس نورها ابكل مكان...الله يا روعة المكان..يوم يصير منور بعد الظلمه ...نشيت ...بس الكل كان رقود الا ام سيف ..سرت صوبها كانت تيمع الحطب علشان اتشب النار
نوره: بساعدج..
ام سيف: شتسوين ناشه من وقت...
نوره: دوم انش من وقت..بس اتم بفراشي الحينه لمحتج قلت بساعدج...؟؟
ام سيف: بسوي خبز رقاق ..
نوره: زين بساعدج ما اعرف اطبخ بس اذا تبين مساعده ما بقصر..
ام سيف : زين تعالي...​
 
شبينا النار ..بين صخرتين صغار.. و حطت ام سيف التاوه ع الصخرتين..و يلست تخبز بعد ما عينت العجين..يلست اراقبها ..عطتني اول خبزه سوتها اكلتها كانت لذيذه...
نوره: خالوه اسوي حليب ع الغاز ..
ام سيف: اتعرفين..
نوره: طبعا ها الشي الوحيد الي اعرفه بعد البيض و الطماط...
ام سيف: هههههههه زين سوي ...
سويت الحليب و خلصت..بعدها نشت خالوه عايشه و مريم..و خلود الي ولدها كان يصيح..فقمت سرت اتمشي ع البحر..
خالوه مريم: خلج بعيد عن الموج..
نوره: ان شاء الله ..
يلست اتمشي ع الشاطيء و الموج كان يضرب ريولي ....رفعت راسي اطالع الدنيا..جفت الشمس غطتها الغيوم..شكل الدنيا بتمطر علينا...التفت لصوت الي كان وراي..
حميد: صباح الخير..
طالعته جفته شايل كوب حليب و خبزه و قاعد ياكل : صباح النور ...ناش من وقت...
حميد: صراخ جسوم واصل عندنا ...شتسوين..
نوره: حلو الجور ..
مشيت ف لحقني :بشو اتفكرين..
نوره: ماشي كنت اقول يمكن الدنيا اتمطر..
حميد: ما اظني..جوفي هناك الغيم وايد خفيف..
هزيت جتفي: يمكن ..."حسيت ابرجفه من البرد"
حميد: بردانه ..
نوره: شويه...
مد ايده: خذي الحليب شربيه عشان اتحسين بالدفى
نوره: ما عيبك طعمه..
حميد: امبلى بس عشان تدفين...
خذت عنه الكوب: شكرا انا مسويه الحليب..
حميد: تسلم ايدج...
طالعت وراي جفنا ابتعدنا زياده ع اللزوم: حميد تعال نرجع وايد ابتعدنا ...
حميد: يالله ...نوره..
التفت له جفته وقف ابمكانه يطالع السما: متى تبينا نملج...
بلعت ريجي بصعوبه هالمكان مب مناسب اقوله ما اباك ..سكت مب عارفه شو ارد عليه...
حميد: ولا بعدج تبين تتاكدين اني ودرت المغازله..
اتجدمت منه: مستحيل تقنعني ..انك ودرت اللواته..
حميد: وغلاتج ...علشانج بسوي أي شي...
نوره: قعدت ابمكاني: ادري ..
قعد جريب مني: كيف عرفتي ...؟؟
نوره: موافقتك ع شرطي..حميد انت وايد طيب.. و الوحده بها الزمن ادور الواحد الي يحبها ..و يحسسها بالامان...
حميد: الحب وينه ...؟؟
يلست افر الحصى ف، البحر: الوحده يوم بتحس ريلها اموفر لها كل شي و ما تقدر اتودره معناتها اتحبه..
حميد: هاه قصدج الحب ايي بعد الزواج...!!
نوره: طبعا ..
حميد: فديتج علشان جي كنت اباج لانج غير
طالعته و ابتسمت له: حتى انت غيررر عن باجي البشر..
مدري اذا كنت اقول شعوري الصجي ل حميد او اني اقص عليه..وقفت و مديت ايدي: يالله نرجع اكيد كلهم نشوا من الرقاد و بفتقدونا..
حميد وقف تم ماسك ايدي: عادي انتي خطيبتي و باجر بنملج...
التفتنا للصوت الي كان جريب منا: احم احم ..
فارس: قيس ليلى يبونكم هناك " اشر ع مكان يالسن الاهل .."
حميد: ههههههههه انت ليش لاحقنا..
فارس: انا كنت رايح بطريجي و طلبوا مني ازقركم..
كرهت قربه منا..اكررره اكثر و اكثر يوم اجوف نظراته الشيطانيه..
ييريت حميد من ايده: يالله انروح حميدان
حميد: نتجاوف هناك بو الفوارس..
فارس: ما يهمك..





يلست امشي ابسرعه و بعصبيه مدري يوم اجوف شيفه هالحيوان اتضايج جي...ييرني حميد فوقفت
حميد: شو فيج جنج تركضين..
نوره: اكررررررررهه ما احبه..
طالعني مستغرب : ليش!!!
نوره: طالع نظراته و بتعرف ليش ..الحينه جان فيك خير اسبقني ل شاليه..
ركضت و لحقني..حميد..كنت اسبقه و شي طبيعي بحسسني اني انا الفايزه عليه بس من جربنا صوب الشاليه سبقني..
صرخت: غشاش يا الغشاش استوب ما العب..
حميد: هههههههههههههههههه غلبتج خلاص ...
وقفت و انا احس ميته من التعب حميد سريع..خيبه ما يتعب ولا يعرف التعب عنبوه ..لازم ريال يتحمل..قعدت ع الارض الاهث..رفعت راسي اسمع صوته:تعالي يا العيوز انا وصلت ..
قمت و انا اضحك مشيت لي ما وصلت صوب قوم خالاتي..كانوا الشباب يتريقون..
شيما: شكلكم يضحك و انتوا تركضون
نوره: هههههههه جفتونا فشله
خلود: قص عليج حميد..
نوره: غشاش
حميد: اسمعج نوورووه ..
رفعت راسي اطالع صوب حميد..لفتني عمور قاعد و خوله جريب منه الظاهر اتغير اللزقه..سرت صوبهم ..
نوره: شتسوون...؟؟
عمور: وين كنتي انتي...؟؟
نوره: كنت هناك سرت بعيد مع حميد اتسابقنا ..
خوله: يعورك الحينه !!!
عمور: لا ابد ما احس موليه بويع.
خوله: خلاص عيل بلزق الجرح بس علشان يتم الجرح نظيف...
عمور: بعد ما بتسبح اليوم ...؟؟
خوله: هههههههه باجر تسبح..
عمور: ضيعتوا علي الرحله..
نوره: باجي ثلاثه تيام..يكفي تسبح ع كيف كيفك...
خوله: زين باجر تسبح زين بعد ماي البحر بنظف جرحك يقولون زين...
وقف عمور: زين مشكوره..




التفتنا كلنا ل صرخت نهله..يالله تعالوا انجوف حركات الدلع الحينه ...جفنا سيف قاعد يرشها بماي و الظاهر انه ماي بارد.. و اونها اتصرخ ..ويا ويها تدلع ...طالعت عمور جفت حزن انرسم بعيونه ..
عمور: انا بروح ..
فديتك اخوي:عمور جفت فارس هناك"واشرت مكان كنا انا و حميد"
عمور: زين بروح له...
بعد ما روح قلت ل خوله: خاطري اضربها...ضرب..
خوله: ههههههههه منوه ..؟؟
نوره: من غيرها هاي الدلوعه جوفيها جوفيها اونها تضارب ويا سيف تقهر..
خوله: ابرايها خليها ف حالها يالله نقعد صوب امايه ..





بجت ثلاثة ايام و بنودع ها الجزيره بوناستنا و ضيجنا و ضحكتنا و دموعنا .. و ها اليوم الخامس...لنا..وقت العصر اتيمعنا كلنا ع الشاطيء...
خالي احمد: يالله منو بسابقني بالسباحه...
عمور: انا اتحداك...؟؟
خليفه: انا اغر عنكم و بغلبكم..
خالوه عايشه: ههههههههههه يمه خليفه الريال كل ما كان عود كان اسرع الخبره اتساعده..
حميد: ماشي عود صغير انا الفايز...
فسخ فارس فاتيلته: الي يبا يتحداني يتجرب مني...
خالوه مريم: شووه كلكم بتسبحون ..ع الاقل واحد يتم نضمنه يردنا الدار ...
الكل: هههههههههههههه
سيف : خلاص علشان حرمة عمي انا بسابقك وياكم...؟؟
زخته نهله من ذراعه: انت لا سيف لا...
ام سيف: هههههههه ما عليج ماخذ دورات سباحه..
ساسرت خوله: يوم اقولج يبالها ضرب..
خوله:ههههههههه يحليلها خليها مستانسه بريلها...
محمد : يالله انا وياكم...
خالوه مريم: منوه بتم معانا عيل..



صاح جسوم يوم سمع صوت ابوه و يلس يصارخ...
خلود: اووه اشتغلت صفارة الحكم ....
نوره: انا الحكم يالله ...
طالعوني كلهم بنظرات و جني ما استحي ع ويهي رازه بويهي فسكت متلومه ...
خالي عبدالله: انا مساعد الحكم ..
نوره: ههههههههههههه انت الي فيهم
فارس: الحريم و البنات بعيد بعيد ...لا تدخلون ب شغل الرياييل ...



طالعته بنظرات كرهه و ما يستحي ع ويهه له ويه يوقف حذالنا و يسولف عادي مب جنه امسوي بلاويه من سنين..صج ان لم تستحي فأفعل ما شئت..
خالي احمد: خلهم خلهم مشجعين..الي بتشجعني توقف جريب منا ولا ما بتشجعني..اتروح بعيد ...
الكل: هههههههههه
خوله: انا بشجع باباتيه ...
خالوه مريم: انا بعد بشجع ريلي وولدي
فارس: و انا ...؟؟
خالوه مريم:علني فداك انت اول واحد بشجعه عيل...
اووووووووف اختربت اللعبه قبل ما تبدا...ام سيف: كل واحد يشجع اهله.
خالوه عايشه: كلنا اهل
عزه: قصدها كل واحد يشجع اقرب شخص له ..حبيبي ما بتشارك..؟؟
فهد: امبلى انا اولهم..
خالوه مريم: عيل منو بتم برع كلكم بتروحون مره وحده منوه بوصلنا الدار..
الكل: ههههههههههه
خالي عبدالله: يالله صفوا يا شباب الشباب هالصوب و الشواب هالصوب..
خالي احمد: تقصدني ها اصغر عنك انا ...
الكل: هههههههههههه
حسينا بالوناسه؟...كلنا مستانسين.. وينك يا خالي احمد اطلع لنا هاللعبه علشان كلنا نتيمع جي...رجعنا لورا ..شويه..و اصطفوا المتسابقين حذال بعض...
خالي عبدالله يأشر:ادورون هالبقعه كلها
خليفه: هاه
عمور: وين وين !!!!!!!!!!!
خالي احمد: ههههههههههههه وشلكم بالبحر و اهواله ...
خالي عبدالله:شفيكم توكم انا بفوز و انا و انا يالله راوونا...
حسيت ان خالي احمد بيفوز ...لان عنده خبره و حياته قبل كل ف البحر..بس ما يندرى..دشوا المتسابقين البحر..زخت خوله ايدي لا اراديا طالعتها فابتسمت لي...
خالي عبدالله: يالله بسم الله واحد اثنين ثلاث...






دشوا المتسابقين يسبحون..ف البدايه كلنا يلسنا نضحك عليهم كان شكلهم يضحك...ضحكنا من الخاطر بس بعدين انجلبت اللعبه جد.. و كل وحده تمت اتصارخ اتشجع ف البدايه عمور كان الاول.. و فهد الثاني..و فارس و سيف تقريبا متعادلين.. و عقبهم خالي احمد..بس حميد و محمد و خليفه فضحونا كانوا ورا وايد.
شيما: طالعوا خليفه حرام الاخير ...
الكل: هههههههههههههه
شيما: تسونه انتن ريلي علشان تضحكون عليه..
نهله: جوفوا سيف وايد متجدم عليهم شكله بيطلع الاول..
خالوه عايشه: فديت عيالي ثنينتهم الاخير..
الكل: ههههههههههههههه
خالي عبدالله: تو الناس مب الحينه تحدد النتيجه يوم بوصلون ...


قعدنا انصارخ و نشجع حتى خالوه عايشه قامت اتزاعج شراتنا و الله شي حلو..اتشجعنا اكثر يوم جفناهم رادين..
خالي حميد: حمييييييييييد طرد من السباق غشاش..
نوره :فضحني خطيبي...
خوله: ههههههههههههه
بالفعل حميد حاول يختصر...علشان جي يستاهل الطرد.. و اتجدموا جريب وايد ...ما كنا نقدر انحدد منوه الاول.. و حركتهم في السباحه وايد قلت يمكن لانهم تعبوا ...اتجدم خالي عبدالله داخل البحر ع اساس يحدد المراكز ...و كان اول الواصلين ..خالي احمد...اتناقزت خوله و حضنت خالي مستانسه و
خالوه مريم: كولولولوللووللوولوللوش
خلود: هييييييييي بابتيه الاول دام محمد الاخير ..
بعدها وصل فهد..عقبه فارس و الي بعده عمور.. و عقبه سيف...و بعدين محمد...و عقب دقايق ..وصل خليفه..
نوره: حمدلله ع السلامه زين انك وصلت...
شيما: حرام عليكم لا اتعيبون ع ريلي ...
اتجدمت من حميد: فضحتنا يا الغشاش..
حميد: ههههههههههههههههههههههههههه
محمد: هب هب خالي احمد
خلود: صل ع النبي بتاكل ابوي ...
خالي احمد: قلتلكم محد بغلبني..



ابصراحه ما اعرف اذا بتصدقون ان هاليوم كان احلى ايام رحلتنا ...لان اول مره جي نتيمع كلنا مع بعض ...المتسابقين تموا راقدين ع ظهرهم من التعب ..اونهم يرتاحون..عقب فتره ..
خالي احمد: منو بتحداني بالغوص...
خليفه: هالمره مستحيل تفوز...
نوره: دخيلك اسكت ...انا لو منك استحي ارمس...
خليفه: طاعي خطيبج انتي انسحب..
حميد: و الله ما انسحبت راغوني



اخرتها اتفجوا كلهم يتسابقون ع الغوص الي بتم اخر واحد هو الفايز...و بعد خالي عبدالله هم الحكم ....دشوا كانوا وايد جريب منا ...بدايه ما صفر بايده خالي عبدالله غطسوا كلهم..ها المره كانت ايدنا ع قلوبنا...مرت دقيقه محد ظهر...
خوله: ابيه ولا واحد ظهر..
و ع طول طلع فهد يشاهق...
عزه: سلامتك بو بنتي...
عقبه طلع محمد...و حميد و خليفه طلعوا مع بعض عقبهم سيف..تموا عمور و خالي احمد و فارس مرت ثلاث دقايق...
حسيت بالخوف اتخيلت للحظه ان عمور موليه ما بيظهر اتجدمت لا ارادي صوب البحر..
زخني خالي عبدالله: وين رايحه تمي هني أأمن لج..
طالعته: عمور ما ظهر تاخر ...
خليفه: زين فارس و ابوي بعدهم...
طلع عمور و يلست اصارخ مستانسه ..
حميد: عيل لو طلع الاول شو بتسوين نوره...
نوره: ههههههههههه استانست لاني جفته مب مهم جم يطلع ...



بس لحظه صمت كلنا سكتنا يوم تموا خالي احمد و فارس داخل..اتخيلت ان سمك القرش بلع فارس احسن فكه..بس لحظات و ظهر خالي احمد ..و بقى فارس ...
انصدم خالي احمد يوم طلع و جاف فارس بعده تحت الماي ع باله هو الاول ...
خوله: فارس وايد تاخر مب معقوله كل ها تحت الماي...
لي روعنا يوم جفنا ملامح خالي عبدالله و خالي احمد اتغيرت...معقوله فارس للحين تحت الماي مستحيل !! بيني و بينكم ما كنت مهتمه ...
عمور: شو فيكم فارس ما ينخاف عليه..
خالوه مريم: وينه زين ما بين وينه الصبي روحوا دوروه...
اتجدم خالي احمد علشان يغطس يدور فارس...بس قبل ما يدش البحر طلع فارس يشاهق و كانه مخنوق ...
طالعنا مستغرب : شو بلاكم ...؟؟
محد رد عليه لانه خوفنا عليه وايد...
خالي احمد: من وين لك كل هالنسخ..
خالي عبدالله: فارس الاول



استانسوا و باركوا له ..بس انا ما كنت مهتمه ...كان يهمني اني بعد يومين خلاص بنودع هالمكان الجميل..الي بالفعل قضينا فيه احلى و اجمل اوقات عمرنا ...مر اليوم السادس علينا ابسرعه.. و لحقه اليوم الاخير لنا .الصبح كلنا انيمع اغاضنا و انحطها في الشنط خلاص..كنا متضايجين لانا بنودر هالمكان ....خلاص و كل شخص بتكون له ذكرى خاصه له بها المكان...كنت يالسه سرحانه اشرب الحليب ...اسمع سوالف خالوه مريم و عايشه و ام سيف..
ام سيف: مهره لا تلعبين بالرمل اخييييييج..عزه تعالي شيلي بنتج..
عزه: قاعده ارتب شنطتي خليها عندج..
خالوه عايشه: خليها يمكن تكتب حرفها و حرف امها و ابوها و اتحوطهم بدايره..
طالعت خالوه عايشه مستغربه من رمستها
ام سيف: شدراها هاي الياهل بالكتابه..
خالوه مريم: ههههههههههه تذكرين عايشه يوم كنا انقيض بمسندم اخر يوم نكتب حروف اسامينا و اسامي رياييلنا و انحوطهابدايره...
خالوه عايشه: هههههههههه زمان..خرافات بس كنا نتسلى ...
سالتها مستغربه : و ليش الدايره شو معناتها...
خالوه عايشه: يقولون انا بنرجع نفس المكان و ما بنفترق موليه...
ام سيف: لا اتصدقين خرافات ..
خالوه مريم: هي بس يمكن يستوي ..شدراج...



شي غريب افكار عجيبه و غريبه ل العيايز ...نشيت من مكاني سرت ادور ع خوله..ما لقيتها داخل الشاليهات بعدين عرفت انها قامت تتمشى مع خوله الخاينه انا اراويها الخاينه ...رحت ادورها...سمعت صوت من وراي
فارس: شتسوين هني ...؟؟
من غير ما اطالعه: ما يخصك...
فارس: روحي يمعي اغراضج بنطلع عقب شويه..
طالعته بنظرات احتقار: و انت شو يخصك ايمع اغراضي ولا لاء ...
فارس: انتي ليش من بين كل هالبنات لسانج طويل ...نفسي اعرف ..
رفعت راسي اطالعه: بعد هالشي ما يخصك...
و سرت عنه سمعته يقولي : عشان ما عندج رد اتقولين ما يخصك..
كنت عارفه انه يحاول يستفزني طنشته
فارس: مدري عمور كيف مستحملنج بقوله ايي يسكن معاي ف بوظبي ..
طالعته و صرخت عليه: يا ويلك..


كنت اعرف تاثير فارس ل عمور وايد ..و عادي يقنعه..
فارس قعد ع الرمل: بنجوف يا انا يا انتي..
اتجدمت منه: انت بتم حثاله و حقير مهما سويت...انت لو فيك خير ما سودت ويه ابوك و راغك من البيت...
ابتسم ابتسامه خلتني ارتجف من الغيض: ع الاقل راغوني و ردوا فتحوا ذراعهم لي..مب شراتج فرج ابوج و ما يدري عنكم شي..عاد صج ها التبري بعيونه ..
بغيت احط حد لهاي المصخره و ل نظراته الي ترفع الضغط..شليت اجرب حصى مني و فريته..ييت ع راسي..وقف بس انا ركضت ابسرعه.. و الحمدلله قوم خالاتي وايد جريبين مني سمعته يهدد بس طنشته لاني حسيت بالامان مع اهلي...انشغلنا انحط الاغراض في المركب.



.التفت جفت خوله تضحك مع عمور...ابتسمت من الخاطر اتذكرت سالفه خالوه عايشه الي يحوط حرفين ف مكان انهم برجعون بنفس المكان ويا بعض..طالعت الطرف الثاني صوب المنحدر الي خذني له عمور انا و خوله..لقيت شي وقت ع الاقل لي ما اروح هناك احوط ع حرف عمور و خوله..يمكن يردون هالمكان ف شهر العسل..غافلت خالاتي ..وركضت صوب المنحدر..ركضت بكل سرعتي ..
.ركبت و كنت اتزحلق بس حاولت اتماسك...اخرتها وصلت فوق...جفت حرفي و حرف خوله .. و حرف عمور الي نحته بعيد عن حرفي و حرف خوله..شليت حصى ابيدي و حاولت احوط حرف خوله و حرف عمور ابتسمت ..يمكن اييون هني يوم من الايام..فديت حرفي تم ابروحه.
.سمعت صوت التفت جفت فارس ياي صوبي رديت ورا خايفه لا يضربني ..لاني من ساعه فلعته...فتزحلقت اريولي و طحت بالحفره...صرخت من الويع
فارس: نوره نوره ..
غمضت عيوني حسيت اني بموت خلاص..بس جفت فارس يمد ايده..
فارس: تعالي ..عطيني ايدج..
رديت لورا: لا بتضربني..
فارس : ما بضربج يالله بروحون عنا ..
نوره اتجدمت ازخ ايده بس غيرت رايي انا ما احط ايدي بايد هالحثاله ...كنت احس جسمي كله متكسر يعورني بس كنت احاول اتماسك...
فارس: ترا بروح عنج محد بفتقدج بتمين هني ابروحج ..
نوره صحت : ازقر عمور ايي يطلعني.
عصب علي: تعالي اقولج بظهرج من هني ..
نوره: ما اباك ..انا ما احط ايدي بايدك يا الحثاله...ازقر عمور..و يلست اصارخ عمور عمور ..
فارس: لو تموتين محد بسمعج ..
مد ايده : تعالي يالله ...حلفت بالله ما بضربج..
نوره : ما ابا ازقر عمور ..
فارس: يالله شو هالعناد الي عليج..لو سرت ازقره...بشكون بالسالفه و بحتشرون عليج تبين هالي يصير ..
نوره: هي اهون علي من انك تظهرني من الحفره..
فارس بنبرة تهديد: ما بتيين...؟؟
نوره: ازقر عمور ...
فارس: خلاص عيل بروح عنج.. و انتي خيسي هني محد بفتقدج خالي احمد بتحراج ف مركب خالي عبدالله و نفس الشي خالي عبدالله بتحراج ف مركب خالي احمد ...
مد ايده: يالله تعالي و الله اني ما بضربج تعالي ...
نوره صرخت عليه و انا اصيح: جذاب ازقر عمور اخوي ..
وقف فارس: ابرايج انا امروح شغلوا المراكب ..
و اختفى من عيوني تميت يالسه مستحيل ما يفتقدوني اكيد خوله بتسال عني ...و عمور لازم بيحس اني مب موجوده ...
سمعت صوت محرك المراكب.فيلست اصارخ
صرخت باعلي صوتي و كان صوت المراكب اتغطي ع صوتي..
حطيت ايدي ع اذوني و يلست ازقر فارس لانه يمكن يكون جريب مني ..
صرخت: فارس فارس تعال طلعني لا اتخليني ابروحي فارس ..تعالي اضربني اجتلني لا اتخليني هني بروحي ...فارس فاررررررررررررررس ..​
 
0":.,؛،’,((الحلقة الرابعة عشر )),.،؛."0.

يلست اصرخ باعلى صوتي :فارس فارس..
بس ماشي كان رد..راح و خلني ابروحي: فارس تعال طلعني الله يخليك..فارس.
عمور: نوره نوره نشي نوره..
نشيت و انا اشاهق : شو وين انا ...
عمور: شو بلاج اتزاعجين حلمانه شو..
سالته: ردينا...؟؟
عمور: من وين..
نوره : من جزيرة قشم...!!
عمور: جزيرة قشم "وانفجر ضحك" ههههههههههههههههههه تحلمين


حطيت ايدي ع رقبتي اطالع حجرتي الظاهر اني كنت احلم !!معقوله ..كل ها حلم..؟؟ جزيره و مراكب و رحله و ضرابه سوالف و ضحك كله حلم ..
عمور يبتسم: شو بلاج اتزاعجين تبين فارس ...
طالعته :فارس !!
عمور : هي فارس ما يسمعج حميد ..
نشيت من ع الشبريه : كنت احلم..
سرت صوب التسريحه امشط شعري بعصبيه ..حتى بالحلم اتضارب معاه النذل ...
عمور: انا بطلع
نوره: عيل ليش قومتني..
عمور: شدراني سمعتج تزاعجين تبين فارس..
صديت عنه: طووووووووف ..
عمور: جزيره قشم هاه ...ههههههههههههه
صرخت عليه: اطلع برررررررع





طلع عمور هو يضحك ابتسمت بس الحلم ابصراحه كان حلو و جميل..اتذكرت حاله عمور الصبح يوم داش علي..ركضت الحقه..
زقرته: عمور عمور..
عمور: هلا ..
نوره: شحالك الحينه...؟؟اتذكرت الفير كنت مضايج..
عمور: الحمدلله احسن...
ابتسمت له: جفتك بالحلم..بستوي لك شي حلو "كنت اقصد ارتباطه ب خوله"
تطنز علي: وين بالجزيره ..


طلعت لساني و دشيت حجرتي سمعت ضحكته ..حالته اتحسنت وايد..طالعت الساعه كانت 12 الظهر ...معقوله انا ارقد لها الوقت ..اخترب رقادي كل من عمور ...سرت المطبخ سويت لي معكرونه ..بعد صليت الظهر..اتغديت ...كنت ابا اتصل ب خوله ابا اعرف شو كانت حفلة ملجة نهله ..


.بس غيرت رايي ما يهمني شو كانت ..المهم الحينه كيف ابطل خطوبتي عن حميد و من غير ما اجرحه لانه ما يستاهل ...بس ما اعرف كيف ..الحينه بقعد يز باذوني متى بنملج و متى بنملج ...اووووووووف يا هي بلوى بس تدرون ما ببطل ع الخطبه الحينه بعد ما يقرر عمور يخطب خوله.. و بتم أأجل الملجه قد ما اقدر ...بس يا رب خالي احمد ما يتدخل بالسالفه ..


يوم الخميس و الجمعه حسيت بملل فضيع..لاني كنت حابسه روحي بالشقه..ما رحت بيت قوم خالاتي لان ويه النحس فارس هناك...؟؟ و بعدين ما ابا خالوه عايشه تطري لي سالفه ملجتي مع حميد ...انا صج وهقت عمري ...اخيرا ياه يوم السبت...رحت دوامي ابدا يوم يديد و اسبوع يديد من حياتي ...بس بعد زواج نوف حسيت ابفارغ كبير .. و رفيجتي سوسن مب وايد معاها اصلا ما احس بالراحه من صوبها علشان جي مب وايد احتك فيها ....خلص الدوام..اتصلت بعمور اذا بييب غدا او انا اشتري بطريجي...
نوره: هلا عمور ..وينك..
عمور: توني داش الشقه...؟؟
نوره: شريت لك غدا ولا انا اشتري..
عمور: زين بعد فكرتي فيني ..لا خلاص انا اشتريت...؟؟
نوره: زين عيل ..كنت بمر اشتري خلاص دقايق و بوصل البيت..
عمور: لا يكون انتي الريال و انا لاحرمه..
نوره: هههههههههه اجلب ويهك..
عمور: ههههههه مع السلامه..



شي جميل ان عمور تحسنت نفسيته و الدليل انه طلب له غدا زين زين شي طيب..مر ع بالي يوم رمستني خوله امس ف ليل تسالني ليش ما ييت بيتهم.. و مع اني مخبرتنها اني ما بيي نهايه الاسبوع ابسبب الحثاله الموجود ف بيتهم...بس انا سالتها اذا جافت عمور مر بيت خالوه عايشه..لان بالعاده كل جمعه يكون هناك..علشان يجوف الحبايب ..مدري اذا تغيرت العاده او لاء...بس قالت انها جافته واقف حذال باب البيت ما دش..طلعت له خالوه عايشه و سلمت عليه...



استانست يوم قالت لي ان جافها و قعد يسالها و طلب منها ان تطبخ له غداء ...ما يستحي ويه لووح ..مرابع فارس شو بتعلم من هالاشكال ...يس الظاهر تبدلت الصوره الحينه قامت اللقاءات تتغير ..صارت ابيت خالوه مريم.. و الحبيبه صارت خوله..بس ها تفكيري و امنياتي لان كل مره الاحظ خوله اتسولف عن عمور مثل ما انا اسولف عن خليفه..يعني مشاعر اخوه لا اكثر شي ينرفز و يقهر ....سالتها عن حفله ملجة نهله..قالت كانت حلوه بس ناس وايد و زحمة لازم بصاله شي طبيعي بيكون زحمة ....و قالت بعد اونه نهله يلست اتصيح..هاي عليها منكر دلوعه..لو فيها خير ما نست عمور بهاي السهوله جان صدق اتحبه..ولا صدقتني بالكلمتين الي قالتها...هذاك اليوم..



.امممممم ما بجى شي ع عرس خليفه...هالاسبوع بنروح دبي بس انا بخلي هالمره عمور ياخذنا...بس ان شاء الله هالحثاله ما يرز ويهه...وصلت الشقه...اتوقعت اجوف عمور منسدح ع الكنبه كالعاده بس ما كان موجود...سرت حجرتي بدلت ملابسي و صليت..لبست زلاغي و الكوت ابصراحه اليوم وايد برد...طلعت من الصاله جفت عمور واقف بوسط الصاله يجلب التلفزيون من قناة ل قناة ...
نوره: انت من وين طلعت يا الساحر....؟
نقز عمور يوم سمع صوتي: انا الساحر ولا انتي..؟؟متى ييتي...!!
سرت المطبخ و انا اقول: من شويه بدلت و صليت..تعال نتغدا..
عمور: اوووه ييبي الغدا هني ف الصاله..
نوره: اوكىىىى احمد ربك بغديك بعد تشرط..."ما اعتقد سمعني لاني ما سمعت أي رد منه"
حطيت العيش في الصحون ويا السلطه..و شلت الصينيه.. و سرت الصاله..قعدت ع الارض و يلس عمور جري مني...
عمور: غريبه !!
نوره: ادري ادري شو بتقول..ليش متغيره !!
عمور: صدق ليش !!
نوره: تبا الصج..
عمور: اكيييييييييييييد..
نوره: اممممممم بالاول خلص غداك علشان ما اسد نفسك..بعدين بقولك..
عمور: احسن بعد...
نوره: عمور اخوي حبيبي انته..
عمورمندمج ف بالاكل: شو تبين...؟؟
نوره: يوم الخميس نهاية الشهرخذني دبي
عمور: يوم الخميس بنروح بوظبي سباق التجديف بيكون يوم الجمعه
نوره:اممممم خلاص يوم الاربعاء الصبح
عمور: و دوامج..؟؟
نوره: بترخص
عمور من غير ما يطالعني: شو عندج...؟؟
نوره: فساتين حق عرس خليفه..ما بقى ع عرسه غير شهر
عمور: خلاص يا ابوي خلي خليفه يوصلج...
نوره: ما ارررررررريد انت خذني..
عمور: اوووووووه ما اقدر...
نوره: ما يخصني فضيحه كل مره قوم خالاتي ياخذوني ...
عمور: زين زين.تونا بالاول الاسبوع..ل يوم الاربعاء ربج يفرجها.."ونش يغسل ايده"





لحقته بدوري و غسلت ايديني...شربت ماي ..كنت بطلع من المطبخ بس جفت عمور يترياني عند الباب ..طالعته بنظرات استفهاميه
عمور: نسيتي شوه...؟؟
نوره:شو..
عمور: ليش كل هالتغير مب قلتي بتخبريني عقب علشان اخذ راحتي ف الاكل هذا ها انا خلصت...
نوره: هيييييييييي
دزيته اطلعه من المطبخ ..هو جدام و انا وراه ادزه..
عمور: خوزي عني يا الياهل..
نوره: ههههههههههههه اقعد ع الكنبه...
قعد و يلست مجابلتنه ...
عمور: ها اكيد تبين اخبر حميدان انج تبين تملجين..
نوره: لاع
عمور: امممممممممم عيل تبين اخذج دبي
نوره: لاع
عمور: اخذج المنار
نوره: لاع لاع لاع
عمور: زين قولي
نوره ابتسمت و غمضت عيوني: شو رايك اتخطب خوله بنت خالوه مريم..
فتحت عيوني اطالع ردت فعله طالعني بنظرات... ونش من مكانه رايح حجرته..
.لحقته :لحظه لحظه ما خلصت كلامي...



كان بيصكر الباب بس دزيته احاول افتحه...بس عمور غلبني و صكر الباب : ما عليه يا الدب...
رفست باب حجرته بغيض و سرت الصاله انظف مكان ما تغدينا...رجعت حجرتي متغصصه الظاهر عمور عمره ما بيفكر يخطب خوله بموووووووت من الغيض شي ينرفز يا ربي ...لي متى لي متى بتم جي اووووووف اترييت يأذن العصر ..



صليت و بدلت ملابسي غايتي بيت خالوه مريم..قبلها اتصلت اتاكد اذا فارس موجود او لاء و الحمدلله طلع مش موجود و انه ذلف بوظبي البارحه ...طلعت من حجرتي.. قبل لا افتح باب شقتي علشان اظهر تذكرت عمور..رجعت وصلت حجرة عمور و رفست باب حجرته حتى حسيت ان ريولي انكسرت صرخت من الويع "الله يغربل عناد عمور" و طلعت رايحه بيت خالوه مريم ...دشيت كالعاده البيت ما به حد الا خوله..زين جفتها اليوم بعد..قعدنا انسولف بوايد مواضيع و منها عن عرس خليفه..بس كنت اتعمد وايد اطري عمور ف كلامي يمكن هاي بعد اتحس و اتحبه..
قلتها: خولووه ع فكره ترا عمور احتمال ياخذنا دبي شو رايج...؟؟
خوله: مدري ع حسب ماماتيه ...
خوله: اونج..بنروح انا و انتي و خلود..طبعا نهله الحينه معرسه ما اظن ريلها يسمح لها...
خوله: هي يمكن...شو رايج انروح بيت خالوه عايشه
نوره: اووووووه فكرت انا و رايحه امر عليهم بسلم و بظهر ما فيني يحشروني متى الملجه صار الموضوع ممل..
نشت خوله تلبس عبايتها: نشي نشي استحي حرمة ولدهم و للحين ما باركتي ع نهله قومي
عاندت: ما بروح كيفج شوه...؟؟
خوله: نووره كافي انج ما حضرتي ملجتها...
نوره: بعد عرسها ما بحضره...؟؟
خوله: زين عرسها بالصيف ...بتغيرين رايج ل يوم عرسها..
رديت ابرود: بنجوف...
خوله: يا برووووودج قومي ...
رديت طفرانه من خوله: زيييييييييييييييييييين اوووووف لو ما ييتج احسن...
خوله: اتهبين انتي طوفي جدامي..
طلعت من الحجره و هي وراي: يا رب تزوجين عمور
حسيت ابكس ع ظهري صرخت من الويع خوله: هههههههههه دواج...
نوره: يعور يا الدبه...​
 
صخينا يوم طلعنا من البيت مره.. و سرنا صوب بيت خالوه عايشه دشينا و كالعاده خالوه يالسه تحت البلكونه بس هالمره ابروحها .بس جسوم علني فداه راقد جريب منها .....سلمنا عليها...
خالوه عايشه: يمه نوره شحالج الحينه ان شاء الله احسن..؟؟
نوره: الحمدلله ..صدري بس شويه يعورني"طالعت خوله بنظرات فردت علي بنظرات حاده لاني اجذب "
خالوه عايشه: رحتي الطبيب
نوره: هي سرت عطتني ابررررره اووووف و انا اتويع قلت الله يسامحج خالوه عايشه..
خالوه عايشه: ههههههههههه المهم صرتي احسن ...مب زين اتمين بويعج يمه ما زين...
نوره: الحمدلله...
خوله: الا وين امايه ع بالي هني ...؟؟؟
خالوه عايشه: لا طلعت مع خلود و محمد ما ادري وين تبا اتروح بس جنها تبا تشتري عطور عشان عرس اخوج...
خوله: هي ما بقى الشي نهاية الشهر الياي ...
خالوه عايشه: حتى التجديف ما بقى له شي شادين حيلهم قاموا عيالنا ما ينجافون ...الا المعرس وياهم يجدف
خوله: عيييييييل احسن عنهم شوه...؟؟
خالوه عايشه: هههههههه يحليله...
خوله: امايه كل يوم ضرابه مع ابويه اتقوله ها معرس و انت بسوده تحت الشمس المفروض ما اتعبه...
خالوه عايشه: هههههههههه صدقها امج..بس ما عليه ريال اخوج و الريال ما ينعاب "طالعتني و ابوي ها الي كنت خايفه منه الله يغربلج خوله يوم يبتيني هني" عقبال حميد و نوره طولت خطبتهم
ابتسمت و انا اطالع خوله بنظرات عتب و لوم : يالله خل سباق التجديف يخلص و نملج عقبها علشان حميد يدش الصاله و بشرته زوينه و حلوه مب شرات خليفه..
خالوه عايشه: يبتيها هههههههه نهله مرتاحه ريلها لا تجدف ولا شياته...
نوره: الا ع طاري نهله وينها كنت ابا اسلم عليها و ابارك لها ترا ما جفتها ...
خالوه عايشه: داخل مدري شتسوي
خوله: جي ما تيلس وياج امخلتنج ابروحج...
خالوه عايشه: كانت يالسه بس من شويه دشت مدري وين سارت دشوا شوفوها ...
نشينا انا و نهله افففففف تعالوا جابلوا شيفة نهله الحينه..دقينا عليها باب الحجره..
نهله: منوووووووو
قلدتها منووووووووووو فضربتني خوله: انا خوله و نوره معاي نبا انسلم عليج...
نهله: لحظه ...
نوره بصوت واطي: جفتي هاي ما فيها مذهب الله يغربلها ان شاء الله تطلق..
ضربتني خوله بايدي: ايه حرام عليج ...ليش تتفاولين ع البنيه..
كنت برد ع خوله بس نهله فجت الباب : السلام عليكم..
ابصراحه نهله محلوه جي الزواج يغير شكل الوحده عيل من باجر بملج سلمت عليها و باركت لها ...
خوله: شتسويييييييين...؟؟
نهله: كنت ارمس سيف ..
نوره: يا حبيبي
خوله + نهله= هههههههههههه
نوره: حبيتيه ...؟؟
نهله اونها استحت صدق ما تستحين ع ويهج من جم اسبوع قاعده اتصيحين ما تبينه اونج تبين عمور اخ يا منكر البنات ...
خوله: نوره لا تحرجين البنيه...
نوره: زين قال احبج...
نهله اونها متلومه ما اترد..
خوله: بس نوره شفيج..
نهله: بعد ما تملجين ب حميد و اتعرسين برد ع اسئلتج و بسالج نفس السؤال ...
نوره: زين يوم بملج يصير خيرررررررررررر
طالعتني خوله بنظرات تباني انجب لان ردي كان امبين و جني اقول ل نهله يوم بيبيض الديج بملج ب حميد\ان
نهله: خوله ما انخطبتي بجيتي انتي ...
خوله تبتسم بس انا احس ابداخلها انجرحت الحماره ما اتعرف ترمس: لا ما انخطبت خلاص راحت علي
ضربتها بيدها: شو راحت عليج توج عمرج 21 ترمسين جنج عيوز..
نهله:هههههههههه بعد جم شهر بدش 22 سنة..
خوله تنهدت: صدقها نهله..
نوره كنت منقهره من نهله و اسلوبها الدفش: ما توقعتج جي خوله ..اول مره اكتشف فيج هالصفه..
خوله تطالعني مستغربه : شوه ...؟؟
نوره: اجوفج قمتي اتسويت شرات بعض البنات الي يخشون كل شي زين يخافون الحسد..حتى لو يحلفون جذب..
نهله: هههههههههه ع شو بحسد خوله ..خوله شو عندج ما تبين اتقولينه و اتخافين احسدج...؟؟
طالعتني خوله ابتسمت اغايض نهله: ترا اقولج ما بتقولج..
نهله :قولي انتي انزين ....؟؟؟
نوره: ليش ما تدرين ان عمور يبا يخطب خوله..






ههههههههههههه ضحكت ع ملامح خوله الي تغيرت.. فجت عيونها و جنه شويه بتطلع منها..بس خوله جفت الابتسامه اختفت من ويهها و جنه حد صفعها ع ويها..ما كانت تتوقع الخبر..شو تتحرا هي بتعرس و عمور بتم عازب طول حياته عشانها ....لا يا حبيبتي لا عمور بيخطب خوله ..
خوله: اممممم نوره ..جب عن......
نوره: جفتي نهله كيف تبا تنكر...شو بلاج نهله ههههههههههه
نهله بصوت واطي: ماشي مبروك خوله
خوله: هذي نوره و الله..........
ييريت خوله ووقفنا: يالله نهله بروح الحينه بيأذن المغرب لازم ارد البيت ..في أمان الله..
وسحبت خوله معاي و خوله كانت تعترض بس الظاهر نهله ..من الصدمه ما كانت تسمع شو اتقول خوله...ادري خوله محرجه مني الله يعين ..سلمنا ع خالوه عايشه و بسنا جسوم الي كان بعده راقد...و سرنا بيت خالوه مريم من دشينا واجهتني خوله : انتي شو الي سويته..
نوره: شوه..
صرخت علي : شوه شو ما بغيتي تطلعين هاي الجذبه الا جدام نهله الحينه بتحشر كل المخاليق و بتطلع عني اشاعه..
طنشتها رايحه داخل : شو يعني..
يرتني من شيلتي للحظه حسيت اني بختنق: لازم ما بتهتمين لان انتي ما بيمسج شي لكن انا...
ييريت شيلتي من ايدها و صرخت عليها: نهله ما بتقول شي انا اعرفها لا اتكبرين السالفه ...و شو يعني لو انتشرت هاي الاشاعه شو بلاه عمور اخوي ...
ردت اتصرخ علي بالاول كنت خايفه صوتنا ينسمع برع بس الحينه يسمع الي يسمع ما يهمني هالغبيه عصبت فيني فردت علي خوله: ما بلاه شي بس انت ثمني رمستج لا اتعقين أي رمسه اذا انتي عندج عادي انا لا ما اسمح لج



هذي اول مره نتضارب فيها انا و خوله صرخت عليها: بس صخي ..شو تتحرين عمرج و شو يعني شو بيصيبج كل ها علشان انتي مطلقه و خايفه ينتشر عنج شي..."جفت ملامح خوله اتغيرت و جني جرحتها بس كملت كلامي" وايد ناس تطلقوا ما سوا الي انتي سويته ...و بعدين نهله ما بتطلع الرمسه الي قلتها لاي مخلوق .. و اذا وصلتج الرمسه الي قلتها ل نهله عن طريق غير نهله..هذيج الساعه تعالي صرخي و عقي رمسه ع كيفج ...
سكت يوم جفت خليفه داش البيت جنه رجع من التدريب: شو عندكن فضحتونا صوتكن واصل برع ...
دشيت داخل اييب شنطتي و سويج سيارتي و طلعت امطنشه خوله و خليفه من غير ما اقولهم أي كلمه ...سمعت خليفه يقولي: سلمي زين ...؟؟



ما رديت صكرت باب لحوي بعصبيه ركبت سيارتي و الحمدلله ما جفت حميد بطريجي ..مب فايجه اسولف معاه..كنت امفوله بداخلي..لي متى هاي بتاخذ أي سالفه عنها بحساسيه زين تطلقتي شو يعني شو صابج ..اففففففففف الله يغربلك يا جابر ...
انا مب هبله اعق أي رمسه انا ما قلت عمور يبا يخطب خوله ل نهله الا لاني متاكده انها مستحيل تطلع هاي الرمسه برع.. لان الملامح الي انرسمت ع نهله ..اكددت لي انها بعدها ما نست عمور... و انا بهاي الطريقه جرحتها فشيء طبيعي انها ما بتروم اتقول لاي مخلوق عمور يبا يخطب خوله ما بيهون عليها ..بس خوله ما تنلام لانها ما اتعرف علاقه عمور نهله كيف كانت لو كانت تعرف ..ما بتحرج جي هاي السخيفه ...
دشيت شقتي و صكرت الباب بعصبيه ..
.اتفاجات ب عمور طالع من الصاله الصغيره: شوي شوي كسرتي الباب ..شو عندج انتي اليوم تدريب اتقوين عضلالات ريولج ب بيبان الشقه ..
صرخت عليه حتى انه نقز مب متوقع ردي: ما يخصك انا كيفي اكسر ارفس حتى لو اكسر راسك ما يخصك فيني م ا ي خ ص ك فيني مفهووووووم ولا لاء ..
وسرت داخل حجرتي لو ما كنت محرجه كنت بضحك ع شكل ملامح عمور بس يولي مب فايجه له..فسخت عبايتي و شيلتي بكل عصبيه و فريت شنطتي بعصبيه فوق الشبريه ...
عمور: شو فيج..
رديت ابسرعه من غير ما اطالعه: ماشي
عمور: كنت بشك انج جفتي فارس لان حالج ما ينجلب جي الا اذا جفتيه..بس فارس مب موجود هني شو بلاج..
طالعته بنظرات ناقصه انا يطري لي هالحثاله : انت تشبه خوله بشي واحد بس ..
عمور: هاه يعني خوله .."اتجتف" و بشو ان شاء الله اشبه خوله ...؟؟
اتجدمت منه و اشرت ع راسه بصبعي: اثنينتكم فيكم مخ حمار...
دزيته و دشيت الحمام اتيدد علشان اصلي المغرب ...جفت عمور واقفني عند باب الحمام ها ما يستحي صج ويه لووح..
طالعته: نعم ...؟؟
عمور: اتسبيني و بعد اتقولين نعم...؟؟
رديت بعصبيه: شو تبا...
عمور خذ نفس طويل : ترا حتى انتي و فارس تشابهون..
و قبل ما يكمل جملته شليت علبه الشامبو علشان افره بس صكر باب الحمام..يا كرهه يوم يكون رايق و متفيج ينكت و انا اعصابي بتتلف من القهر و الغيض..



طلعت من الحمام و صليت المغرب ..سرت المطبخ سويت لي سندويج جبن..و كوب حليب مع نسكافييييييييه ...بعد ما خلصت..يلست ع الكنبه اجلب قنوات التلقزيون..حسيت اني للحينه محرجه..اتذكرت كيف طريقه اكلي جني اتضارب مع السندويجه و الحينه كيف افر قنوات التلفزيون بعصبيه حق شو كل ها ...حاولت اهدي نفسي ...ما صدقت اذن العشىى قمت اصلي .. وانخمدت
مر اسبوعين مقاطعه قوم خالاتي انا معانده و خوله معانده بس ف نهاية الشهر قامت خوله .. كل شويه ادق لي و انا كنت ما ارد علشان مره ثانيه تتأدب و ما ترمس معاي بهاي الطريجه و بهالاسلوب و انا ف بيتهم..خلال الايام الي مرت كنت منتفخه حتى ل عمور مع انه ماله ذنب في مره كنت طالعه من المطبخ بعد ما تعشيت..فاجاني عمور ياي صوبي.
عمور: انتي ليش منتفخه ..
طالعته و طنشته زخني من ذراعي: انا ارمسج..
ييريت ذراعي بعصبيه فضحك: هههههههههه
رديت عليه ابسرعه: ما يضحك..
عمور: ها يزاتي اني ياينج اقولج خلاص انا باخذكم دبي و انتي جي اتعامليني...
ابتسمت: و الله بتاخذنا
عمور: عيل الحينه تكلمتي..
نوره: ناس ما اتيي الا بالعين بالحمره ...
عمور: معاج انتي الوان قوس قزح
نوره: ههههههه
عمور: بظهر ربعي يتريوني تحت ...
زقرته: ايه لحظه انت اكيد بتاخذني دبي
عمور: هي اكيد..



و ظهر من الشقه عفدت ادور موبايلي اتذكرت اني فريته تحت شبريتي ..سرت ادوره لقيته جفت بعد خوله متصل بي.. و امطرشه لي مسج" اذا ما رديتي علي بييج البيت" طرشت لها "اذا تبين ارد عليج..قولي انج بتروحين دبي باجر انتي و خلود .. و اذا ما بتروحين لا اتعبين روحج و ادقين .."



اتعشيت و صليت العشى و الحينه بنخمد و خوله ما ردت لي خبر الظاهر ما بتروح تقهر الغبيه..بندت الليت علشان ارقد بس وصلني مسج نقزت اجوفه و كانت خوله " خلاص مروا علينا انا و خلود بس ما قلتي ع الساعه جم بتظهرون..؟" "طرشت لها مسج ع الساعه 8 الصباح ممنوع دخول الشاحات"نهله" .."
و يوم الخميس ع الساعه 8 كنا واقفين حذال بيت خالوه مريم ركبنا خوله و معاها خلود ...و يايبه الحشره جسوم ...بس ابصراحه كان جسوم امونسنا ب طول الدرب...
طالعت خوله: شحالج..
ردت : ابخير يا ..........؟؟
نوره: ما اتوبين..
خوله: هههههههه
خلود: اخيرا تصالحتوا..
خوله: هي امكبره السالفه..
عمور: و اظني دخلتني بالسالفه و انا مالي ذنب...
نوره: جذاب
عمور: امبلى سبيتيني و قلتي اقول ولا ما اقول ...؟؟
خوله: هههههههههه و انت شو دخلك عمور ...؟؟
نوره: هيييييييي كنت معصبه و طلعت حرتي في عمور..يقهر يجوفني محرجه و هو قاعد يستفزني ...
عمور: المهم اقول ولا ما اقول ...؟؟
خلود و خوله= هي قول ...
نوره: لا تستهبل انطم ولا تسوي مشاكل خلنا نشتري ع راحتنا ...؟؟
خوله: ليش شو بعد قلتي ...غير عن الي قلتيه جدام نهله..
اووف انجبي يا خوله ولا يخور لسانج ..طالعني عمور بنظرات استفهمايه بس انا رديت له بابتسامه ...
خلود: هي قالت لي خوله..
نوره: بس اسكتوا "وبطلت عيوني افهمهم انهم يسكتنون و ما يقولون شي جدام عمور"
عمور بصوت واطي: ادريبج مسويه سالفه انتي ما وراج الالمشاكل



ابتسمت له ..ما فيني اقوله شي عن ينزلني بنص الدرب...الله يغربلكن يا خوله و خلود.. وصلنا دبي .. و اليوم الخميس الخط كان وايد زحمه..بس سوالفنا..نستنا تعب الخط....مرينا ع مركز الغرير ما عيبنا شي.. وصرنا مركز سيتي سنتر بعد ما عيبنا شي...و سرنا المنار بعد ما جفنا شي حلو ..اخرتها حرج علينا عمور و حلف يكون مركز البستان اخر مركز.. و اذا ما شرينا خلاص بردنا راس الخيمه ...و قبل ما انروح انجوف لنا فستان مرينا المصلى صلينا الظهر .
.و اقترح علينا عمور ان نتغدا قبل و عقبها ...انكمل جولتنا ...



سرنا صوب المطاعم...قعدنا و عمور راح يطلب لنا..كنا ميتين يوع من الصبح ما كلنا شي قاعدين انلف بهاي المراكز ...قعدنا نتغدا.. و كنت وايد احاول اجرب عمور من خوله...
كنت اعلق تعليقات.. و خلود مره اتمشي معاي.. لدرجه ان عمور مرات ينحرج.. و مرات خوله تحمر و تزرق و انا و خلود نضحك عليهم .. خلود كانت اتعلق و اتسولف بحسن نيه..
بس انا ككنت اتعمد علشان اجربهم من بعض.. و لها السبب طول الوقت تمت خوله صاخه و مستحيه ووايد يتني قرصات منها ...بس كنت اتحملها ...مرينا ع المحلات الموجوده ...و اخيرا لقينا فساتين عيبتنا .
.انا شليت لون الوردي و خوله كان لو فستانها سماوي مع بيج ...
اما خلود فكان لو فستانها زيتوني ... المهم خلصنا و ريحنا عمرنا...مرينا نشتري اكسسوارات ...و بالمره مرت خلود محلات الاطفال ..تشتري بدله حق جسوم ... و انا شليت فستان عيبني شريته ل مهره بنت عزه ...
خلصنا ع اذان العصر...كان عمور يمشي معانا خطوه خطوه ..زين زين طلع يعتمد عليه ...صلينا العصر .. و ردينا ..ابصراحه كانت الطلعه وايد حلوه... ضربت عصفورين بحجر.. بس يا رب عمور يغير رايه و يفكر بخوله ك زوجه مب ك أخت ....​
 
......ف يوم الخميس ...ساعدت عمور بترتيب شنطته لانه طالع بوظبي..ويا الشباب و بيكون الجمعه سباق التجديف...طلب مني اروح ارقد بيت خالوه مريم..انا رفضت لاني خفت يكون فارس هناك بس أكد لي انه بيكون ف بوظبي يطالع السباق ...
نوره: انا دوم ارقد ابروحي بالشقه و انت ما ترجع الا ع الفير شو تفرق..
عمور: يصكر شنطته: الحينه غير بكون بعيد ف بوظبي و بعدين انا مليون مره قلتلج سهرتي كل اتكون جريب من البنايه يالله روحي زهبي روحج ..باجر بترجعين..
نوره: زين بالاول بتصل ب خوله خلهم يستقبلوني..
عمور: مالت ..
اتصلت بخوله و فاجاتها اني بيي ارقد الليله عندهم ...وصلني عمور بيت خالوه مريم ...
نوره: شدو حيلكم لا تفضحونا ...
عمور: ما عليج بو الابيض دوم ف المقدمه ..
نوره: بنجوف ع هالتدريب كل يوم شو بيطلع لكم..
عمور: دعواتكم لنا..عاد انتي دعوتج ما توصل السقف
نوره:ههههههههههه الله يوفجك...
نزلت و قبل ما اصكر الباب سمعت عمور يقول لي: نوره...؟؟
نوره: خير..
عمور ابتسم : سلمي ع خوله ...؟؟
ما صدقت اذوني: شو شو قلت ..
عمور: يالله صكر الباب السياره ..
نوره: هههههههه يوصل..



صكرت الباب بقوه من الوناسه سمعت عمور يصرخ: كسر راسج كسرتي الباب
ههههههههههه اشرت له بايدي مع السلامه و دشيت بيت خالوه مريم ...دشيت الصاله و كانت خالوه مريم و خوله يتعشون..
نوره: السلام عليكم...؟؟
_ عليكم السلام..
خالوه مريم: قربي نوره تعشي معانا..
نوره: مشكوره الغاليه تعشيت مع عمور الحينه وقت رقادي
خوله: هههههههه ماشي رقاد اليوم بنسهر...
خالوه مريم: بطوفكن السباق عيل..جان بتسهرون
نوره: ليش ببدا السباق بعد صلاة العصر الا خالي احمد وينه..
خالوه مريم: وييييييه خالج احمد من البارحه مروح بوظبي ماخذ الشاحوف و خليفه من ساعه طلع جنهم بروحون بالباص..
نوره: هي قالي عمور..
خوله: طاعي امايه نوره مستانسه و متحمسه جنها هي بتسابق ..
رقصت حياتي: لا حبيبتي شي مونسني بس ما بقولكن.
خالوه مريم: جنها جافت خطيبها حميد..
نوره +خوله: هههههههههههه




بعد ما خلصوا عشى..دشينا انا و خوله حجرتها ..انسدحت ع الشبريه و هالمره سويت احتياطي..فتحت شنطتي و طلعت زلاغي
خوله: انتي ما تملين من ها خلاص الجو ما صار بارد شرات قبل ..
و انا البس زلاغي: امبلى حتى بالصيف عندي ثلج مب برد..
خوله: عفانا الله
قامت اتشغل الكمبيوتر اما انا انسدحت ع الشبريه: عمور يسلم عليج..
ردت ببرود ما كنت متوقعتنها:: الله يسلمه
نوره: بس !!!
طالعتني: عيل شو تبين اكثر ...؟؟
نوره: ما استانستي..
خوله: ههههههههه ليش استانس..؟؟
نوره: زين ما حسيتي بشعور غريب و انا اقولج عمور يسلم عليج..
طالعتني مستغربه : شعور غريب ..بعد لاء ..
شليت المخده و فريتها : ما عندج قلب..
خوله: ههههههههه انتي اصلا هبله..عمور شرات اخوي لا تقعدين تلمحين..
نوره: زين لو خطبج..
طالعتني: اممممممم تبين تضاربين معاي شرات هاك اليوم.. و بعدين ازعلي ولا اتيين بيتنا بالاسابيع ..
نوره: زين سؤال و بعدين سؤالي منطقي مب شي من الخيال صح ولا لاء
ردت علي بعصبيه: اذا صار هالشي هذيج الساعه ربج يفرجها...
اتغطيت بالحاف: مالت عليج...




ما سمعت منها رد اتخاف اكيد لا تضارب معاي و بعدين اقطعهم شرات ما صار قبل اسابيع بسبب هذيج السباله نهله...فتحت عيوني جفت الساعه ست..نقزت هني ما ينسمع صوت الاذان...قمت اتيدد و صليت الفير و قعد بالكرسي الهزاز اقرا قران..بعد ما خلصت..قعدت اتذكر الكلام الي دار بيني و بين خوله ..اتخيل لو تقدم لها عمور و رفضته ..يا ويلها صج بنجلب عليها هذيج الساعه..جفتها تجلب ع الفراش
بطلت عيونها بالغصب: بندي الليت انتي شو اتسوين ناشه بهالوقت..
ييرت عنها اللحاف: قومي بسج رقاد...قومي صلي ..ع الاقل..
خوله تتجلب: زين زين بقوم...
رديت عليها: بروح اسوي لي حليب و اذا ما قمتي يا ويلج...



و ييرت عنها اللحاف فرتني بالمخده بس زخيتها..و فريتها عليها عفانا الله يوم ترقد ..جنها مب راقده من سنين...طلعت من الصاله و سرت صوب المطبخ الظاهر خالوه للحين راقده ...سويت لي حليب ..دورت كافيه بس ما لقيت...المهم شربت الحليب و خلصت رجعت حجرة خوله جفتها بعدها راقده ...انسدحت حذالها ع الشبريه احاول ارقد بس ما رمت..اخرتها جفت الساعه 11 الضحى..قومت خوله بالغصب ضحكت عليها يوم سمعتها تتحرطم و اتقول لا ترقدين هني مره ثانيه ...
اتفجنا نتغدا و بعد الغدا انروح بيت خالوه عايشه علشان انجوف سباق التجديف ع قناة الامارات الارضيه...اتصل فينا خالي احمد و قال انهم في الشوط الرابع و لون العلم ابيض.و رقم القارب 7..اتريينا السباق بشوق..كنا نحسب كل ثانيه و دقيقه و ساعه ...اخيرا طلع سباق التجديف ..اتخبلت يوم عرفت المعلق حارب السويدي فنان تعليقه و ينقل السباق جنه جدامج .صلينا العصر .. ومن بدا الشوط الثاني ربعنا بيت خالوه عايشه..دشينا الصاله.. و جفنا خالوه عايشه و خلود و محمد و نهله متيمعين صوب التلفزيون..
خالوه مريم: خوزي خلوني اجوف ريلي و ولدي...
خالوه عايشه : يا رب الاول يا رب ..
محمد: صعب شوطهم معاهم الصاروخ و الريف وين بيفوزون ...
خوله: ان شاء الله بيفوزون ..
.يلسنا نشرب الشاي ...ما بقى ع الشوط الرابع شي.. و محمد كل شويه يتصل ب خالي احمد..لانه الوحيد يرمسه هو النوخذه ..
خالي احمد: لا تنسون اتسجلون السباق ...الحينه بنبدأ يالله في أمان الله
محمد: بالتوفيج..
حسيت برجفه و كاني انا الي اشارك معاهمم. و لاحظت كلنا متوترين .من بدا الشوط الرابع عفدنا صوب التلفزيون ...
نهله: وينهم ما ينجافون ...
محمد طفران من حشرتنا: اسكتوا خلنا نسمع المعلق..
نوره: للحين ما طرا بو الابيض ...
خالوه عايشه شويه و بتصيح: خساره تعبهم..
محمد طفران: اصبروا توه بدا السباق اففففففف محد يتابع مع الحريم ...
خالوه مريم: اتصل ب فارس هو يتابع هناك اكيد يعرف كم مركزهم..
محمد: زين زين خالوه صبري توه الناس
حطيت ايدي بحلجي: الريف للحين الاول
خالوه مريم اتصيح: الله يوفجهم..
محمد معصب: عيز خالي احمد من يقولهم تدربو وين الحين ما يبينون ...
خوله: هذوو القارب مال منوه يتجدم ...
نهله: جم رقم قاربهم ...؟؟
محمد: سبعه..
صرخت: عيل هم بو الابيض ..جوفهم



صرخنا يوم سمعنا حارب السويدي يقول بو الابيض يتجدم ... تمينا تتناقز .. و انصفق .. و كل وحده اتقول يا رب يارب يطلعون الاول ..طبعا الشاشه ما تقدر تعطيك الصوره الكامله لسباق..حسيت بقلبي يدق بقوه و انا اتخيل عمور علني فداك يا رب تطلع الاول ...اتصل محمد ب فارس لانه الوحيد الي يقدر يقولنا باي مركز هم ...؟؟
محمد: كم الثالث ....؟؟؟
خلود: اساله منو الاول و الثاني و جم باجي ع السباق...؟؟
ساله محمد فكرر اجابه فارس: ما بجى شي ع النهايه و بو الابيض الحينه ينافس الصاروخ ع المركز الثاني و الريف للحين الاول ....
حطينا ايدينا ع قلوبنا و نحن ندعي ف سرنا ان بو الابيض ياخذ المركز الاول .. و بلفعل فجاه اتاخر الصاروخ .. و تم و حارب السويدي يصارخ ان الريف و بو الابيض يتنافسون ع المركز الاول.. يلسنا انصارخ و نتناقز حتى خالوه عايشه الي دوم تشتكي من ركبتها شاركتنا.. و محمد بس قاعد يضارب و يصارخ علينا يبا يركز بالسباق .يا بروده .. و اخيرا ظهرت المنصه .. و بو الابيض توج المركز الاول...كلنا حطينا عيونا بالشاشه...
صرخت خوله: ابوي جوفوا ابوي ...رفع العلم ...
و انا بعيوني ادور عمور: صرخت جوفوا عمور .. جفته من الوناسه نقز في البحر.. و معاه جم واحد...
نهله: هذا حميد لابس فانيله..
محمد: يغطي كرشته..
ضربته خالوه عايشه: بتاكل ولدي صل ع النبي ...




بس شويه كل الشباب الي بالقوارب عفدوا البحر من الوناسه...الا خالي احمد ...شويه و اتصل فارس يخبر محمد و يأكد له ان بو الابيض طلع الاول ...اتريينا لحظات التتويج.. و كان الشيخ سلطان بن زايد امزين الحضور بوجوده.. و يلس يكرم الاوائل.. و صارخنا يوم ظهر خالي احمد يسلم بالشيخ سلطان و عطاه درع القارب من ذهب..قعدنا انغني و نترقص ..انتصرنا و الناصر الله عاشووو ..اتنصرنا و الناصر الله .ايووا
.صج حسيت اليوم بشعور جميل ..



و اكيد الكل يشاركني بهاي الوناسه..يستاهل بو الابيض هالمركز.. يستاهل خالي احمد و حميد و خليفه و عمور يستاهلووون ...بجت لحظه وناستنا الصجيه يوم يرجوع راس الخيمه و هم رافعين الراس ..كلنا ننظر اللحظه الي بنورون فيها راس الخيمه ..ترجينا محمد ياخذنا معاه في السياره نشارك بالمسيره و خاصه ان سيارته عاكس..
خساره ما ييبت سيارتي ..بس محمد عنيد ما رضى..ترجيناه..حتى خالوه عايشه كانت شويه و بتصيح عليه بس علشان يرضى ...بالاخير وافق بعد ما ذلنا ذل ...اتصل ب حميد علشان يخبره متى يوصلون راس الخيمه علشان نطلع بالنسيان مع محمد...تعشينا...و صلينا العشى..



و شويه اتصل فينا محمد يخبرنا نظهر..عاد جوفوا المذله ..خمس دقايق اذا محد طلع بروح عنكم..عفدنا كلنا برع نترياه .. و خوله شلت معاها كاميرة الفيديووو ...ركبنا النسيان...و خالوه عايشه يلست جدام محمد..صرنا صوب البوابه و اتفاجانا ان وايد سيايير يتريون بو الابيض..دقايق ..
.ولا نسمع صوت المسيره و الشباب يدقون و يغنون ..اتخبلنا عاد تمنيتن لو يبت سيارتي لاني مب ماخذه راحتي مع محمد ...اتجدمت سياره حميد الي كانت تسحب القارب ووراه سيايير و الباص الي فيه الشباب الي شاركوا في السباق و معاهم خالي احمد...كانوا يغنون يابوووووه يابوووووه شكلهم كان روعه...
دورت عمور..اتذكرت انه طلع بسيارته... لمحت سيارته...جدام و كان معاه واحد...
خالوه مريم: انا ما جفت خليفه اتصلوا فيه..جوفووه
محمد: الله يهداج خالوه اكيد بيكون وياهم ..





اتصلت خلود بس ما يرد..اتصلنا ب شيما يمكن اتكون رمسته..قالت لنا انه ف الباص و مع خالي احمد ...المهم...دشينا في المسيره.. و هذي اول مره ب حياتي ادش في مسيره شباب ..بس بصراحه كانت روعه ..
ما توقعت هالكثر بيكون الحضور..الكل كان يلحق سياره حميد لانه يسحب القارب ....
.سمحولي ما اقدر اوصف لكم الموقف...من روعته .
.الي طالع من دريشه السياره و الي شايل علم الامارات..و الي قاعد يرزف بالعصايه من فوق السياره ..اليوم الشباب طلعوا كل حركات الخبال .. من حقهم بو الابيض طالع الاول ...
ابصرحه هاليوم حسيت كل الي ف راس الخيمه يشارك في هذي المسيره ..



.حتى الشيخ سمح انهم يصيحون ويلات ع الشارع ...و جريب جمعية الخاصه بالقارب بو الابيض دش حميد ..داخل الجمعيه...بس الباجي تموا ع الشارع و صكروا الشوارع و قاموا بعض الشباب يعبرون عن وناستهم بالويلات الي حرقوا فيها الشوارع حرق..اتخبلت و يلست اصيح يوم جفت سياره عمور معاهم ...بس محمد كان يطمني و يقول عمور يسوي اكثر عن ها شويه ...
ها اليوم مستحيل يروح عن بالي او يغيب من سجل ذكرياتي ...و خاصه انها فرحه شاركت فيها اهالي راس الخيمه ... كافي ان القارب نوخذته خالي احمد و اليريره هم اهلنا و خوانا.. و الاهم من ها كله ان بو الابيض يشيل اسم صاحب الدوله و ها اكبر شرف لنا ....و تمنيت لهم من كل خاطري ان يتمون ع هالمستوى و الانتصار بكل سباق او مشاركه لهم ...​
 
":؛.,0.(( الحلقة الخامسة عشر )).0"؟.,؛،’

فتحت عيوني و انا مصدعه البارحه رقدت متاخر رديت ع الساعه 12 ف ليل..بعد ما ردنا محمد بيت خالوه الساعه 11 مر علي عمور..اتذكر اني هزبته يوم جفته يتخبل بالسياره ...حطيت ايدي ع راسي ..نشيت ادور لي حبة ادوول..اخيرا لقيت لي بلعت الحبه و سرت اشرب ماي ....سويت لي حليب و انا ابتسم ...اتذكر خبال البارحه ..حلو و يا ليت يتكرر هالشي كل مره ...اه هذا سباق التجديف و خلص... و الاسبوع الياي عرس خليفه...يالله ...الحينه بحشروني متى بملج ع حميد لازم الحينه احط حد و انهي كل شي بسني لعبت ب حميد لعب .. حرام اخليه جي معلق امال ...

مر يومين ب هدوء و لا جنه من جم يوم كلنا نتخبل بفوز بو الابيض ..قبل عرس خليفه بيومين صارت المفاجاه الي كنت خايفه منها ...ياني عمور ع وقت العشى قبل ما ارقد ...
عمور: حميد كلمني..
طالعته من غير ما ارد عليه ..
عمور: اكيد تدرين شو يبا ...
نوره: شو..؟؟
عمور: يبا يملج ...
كنت ابا اقوله انا غيرت رايي خلاص ما اباه ...بس شي منعني ..
عمور: شورايج ترا سالفه خطبتج طولت ما تلاحظين..
اتنهدت صج ورطت عمري: انت شو قلته..
عمور: قلته اتريا بعد عرس خليفه ايي هني و اتفج معاه شو رايج ...؟؟
ابتسمت له: زين ما سويت مشغوله انا بعرس خليفه ...
عمور: لا يكون انتي العروس..
فريته بالوساده: لا تستخف دمك..
زخ الوساده و حطها جدامه ونش : تبين شي بظهر ...؟؟
نوره: لاع
عمور: الناس اتقول سلامتك..
تثاوبت: فيني رقاد
عمور: بظهر عن تصرطيني
نوره: ههههههههههه ماصخ...
فج الباب و قبل ما يظهر طالعني: نوره..
نوره: شوه بعد ..........؟؟
ابتسم لي: خلاص انا فكرت و قررت
غمضت عيوني ابا ارقد : شو بعد..؟؟
عمور: بخطب خوله ..
بطل عيوني متفاجاه نشيت اركض صوبه: شو قلت..




بس الطفس ضحك و صكر باب الشقه بويهي...دورت ع موبايلي و اتصلت به ما رد علي اتصلت به مره ثانية
سمعت صوته: شو عندج..
نوره: شو قلت ...؟؟
عمور: يايتنج التفاصيل عقب شويه ..
نوره: شو قصدك !!
عمور: ماشي جلبي ويهج.."وصكر التلفون ابويهي"

صرخت عمووووووووووووور يا السبال ..اتمنيت بهذيج اللحظه يطلع لي جناح علشان اطير و اطير و اطييييييييييييييييييييير..بتخبل من الوناسه هالاسبوع احلى اسبوع مر علي ..روعه ...اخيرا عمور فكر يخطب خوله بس يا رب ما يغير رايه ...رن موبايلي جفت المتصل خوله
رديت عليها: ساحره يا الدبه ...
خوله: انتي الدبه و البوتمبه و كل شي ..ليش ما خبرتيني ...
نوره: شووووو!!!
خوله: لا تستهبلين شو يعني اتحطيني تحت الامر الواقع..
نوره: اسمعي ارمسي زين لايي اكفخج
خوله : و الله لو انتي جدامي كنت دستج ف بطنج..
نوره: لا حول هاليوم ابطوله ممل اتريا اللحظه الي برقد فيها و يوم يت هاللحظه كل واحد قام يرمس بالالغاز شو عندج قولي
خوله: ليش ما قلتي لي ان عمور طلبني من ابوي




انصدمت حد يصفعني علشان اصدق اني مب قاعده احلم
خوله: الوووووووووو ارمسي
نوره: متى خطبج عمور..؟؟
خوله حرجت علي: لا تستهبلين مب فايجه لج ..
نوره: قسم بالله توه عمور خبرني بالسالفه حتى قال بخطب خوله ما قال لي خطبتها و خلصت ها علشان جي يقولي يايتنج التفاصيل يقصدج انتي ..شو السالفه..
خوله: شو هالخربطه انتي قاعده اتقصين علي...؟؟
نوره: و الله لاء ..و الله ما عرفت الا الحينه ..خبريني ذليتيني الله يغربلج
خوله: هههههههه
نوره: عيبتج الدعوه
خوله: لا عيبني عمور يوم سوا لج طاف و ما خبرج هههههههه
نوره: ما عليه حسابه عندي بس خبريني بالسالفه يا بروودج
خوله: ماشي بس قبل شويه ابويه ياه و قال لي ان عمور طلبج مني يوم كنا ف بوظبي ...
نوره: و بعد..؟؟
خوله: ماشي قاله انت متفيج ...
نوره: هههههههه هذا عمور خبله
خوله: هي .المهم ابويه قاله بكلم البنيه بعد ما انخلص من ربشه السباق ... و هذا هو توه قالي السالفه..
نوره: و عمور شدراه ان ابوج قالج !! مب غريبه ..
خوله: اكيد فارس او خليفه خبرووه ...
نوره: خوله تعالي اصفعيني تعالي كفخيني و الله ما تعرفين اشكثر انا مستانسه..حلم عمري تحقق...
خوله: ههههههه
نوره: اجوفج مستانسه...؟؟موافقه يعني
خوله: عمر ما ينعاب ريال و النعم فيه و اشك اني لو فكرت ارفضه ابوي و فارس و خليفه ما بيرحموني
نوره: و انا وين سرت
خوله: هههههههه صح انتي قبلهم كلهم..
نوره: المهم قلتي خالي انج موافقه ولا لاء ...؟؟
خوله: قلته بفكر
نوره: شششششششششو تفكرين ..حرام عليج روحي قولي انج موافقه...
خوله: شو ما صدقت خبر
نوره: انا الي ما صدقت خبر و الله ..كيف برقد اليوم كيف..عمور طير الرقاد من عيني حسبي الله ع ابليسه
خوله: هههههههه روحي سمي بالرحمن و ارقدي
نوره: بحاول ..بس متى بتردين خبر حق ابوج..
خوله: امممممممم ورا باجر
نوره: لا تستهبلين ورا باجر عرس خليفه..
خوله: ترا باجر عرس الريايل ورا باجر يكون احسن ...
نوره: زين عيل باجر عندكم انا

خوله: هي تعالي بس من وقت لان ...العرس حذال البيت يعني ما بترومين عقب ادشين ...
نوره: خلاص عيل من الساعه 7 الصبح بيي اقومج..
خوله: زين قلتي بقفل حجرتي
نوره: ههههههههه بنجوف يالله بروح احاول انخمد اخييييييييييييرا لا بركه فيج ولا في عمور خبلتوا فيني
خوله: ايه شو فيج تدعين علينا..
نوره: استغفر الله ..يالله فيمان الله
خوله: مع السلامه ..





ف اليوم الثاني...طلعت من بيت خالوه عايشه انا و خلود و معاها جسوم و نهله..رايحات بيت خالوه مريم..كنت موجوده الصبح بيت خالوه مريم بس يوم عرفت فارس موجود..غيرت رايي و سرت صوب بيت خالوه عايشه....كنت ندمانه انيي ييت هاليوم هني..خالوه عايشه ما رحمتي متى تبين تملجين..يوم بتملجين جي بنسوي.. و يوم بتعرسين انتي و حميد..كلت فؤادي...حتى حسيت اني بصيح لانها بتغمضني اكثر عن حميد يوم بهون عن الخطبه ..


.المهم انتهزنا فرصة صلاة الظهر و روحت الريايييل المسجد ..كانت خيمة موجوده عوده صوب بيت خالوه مريم...دشينا..و ما شاء الله عليهن حريم فريجنا ما قصرن..دشوا المطبخ مع خالوه مريم و عايشه يساعدهن في تجهيز الفاكهة و الشاي و القهوه و يتريون الغدا يوصل من المطعم...




الله اليوم ربشه خليفه بيعرس...يحليلك خلوف ...سرنا صوب حجرة خوله ..اتذكرت سالفه خطبتها من عمور ..حسيت بوناسه..
خلود: اكيد راقده ...؟
رديت عليها: دقي الباب خاطري ابوس هالبنيه و احضنها..
نهله:!!!
طالعتها: لا تستغربين بعدين بتعرفون ليش
دقينا الباب فجت خوله الباب و كانت بترجع ترقد ع الشبريه..بس زخيتها من ايدها وخذتها الحمام و يلست ارشها بالماي و هي اتصارخ ...
خوله: خوزي عني نوره بجتلج..
قلتها: الناس مرتبشين و انتي حضرتج منخمده ..
يلست تمسح ويها : ليش كم الساعه...
نوره: الناس يصلون الظهر.."ضربتها بخدها"صحصحي يا ماما..يا العروس...
دزتني و طلعتني من الحمام: راويني عرض اكتافج..
نوره: هههههههههه ما عليج بتييييين بتعيشين معاي في الشقه..
قفلت الباب سمعتها اترد ما فهمت شو قالت..رديت الحجره.
نهله: جني سمعت كلمة عروس ..
اتجتفت: شو بلاج انتي كل شي تبين اتعرفينه..
خلود: شفيج نوره ما قالت شي مهما كان لا تنسين هاي اخت احم احم ريل المستقبل
ابتسمت لهن: ان شاء الله ..
نهله: يالله اشكثر حميد بيعاني..
حطيت ايدي بخصري: ليش ان شاء الله يعاني
نهله: بس بس بلاج ماكله فلفل ما اروم اقولج شي..
يلست ع الكرسي الهزاز: هي جي ثمني رمستج...
خلود: هههههههه صخن جسوم رقد لا تزعجونه ما فيني ع حشرته..




طلعت خوله من الحمام ...
نهله: محلوه خوله شو السالفه..
نشيت حضنت خوله و بستها ورديت ع نهله: مرتاحه بعد عمري علني فداها ...
خلود: جي خوله وافقتي
خوله: نوره خوزي عني بتخنقيني
فجيت عنها: ان شاء الله اليوم ما انروم انقولج شي
طالعت نهله الي كانت ملامح ويهها جنها علامة تعجب و حركت حيايي اغايضها فصدت عني...
خوله: لا بعدني
نهله: انخطبتي خوله..
قبل ما اترد خوله قاطعتها: مفاجاه نهله ..مفاجأه سبرايز
سمعنا دقت باب فجت خوله باب حجرتها ..
.دشت خالوه مريم بصينية العيش: تعالن تغدن
خلود: امايه كل ها بناكله ...
خالوه مريم: هي...لا تظهرون في الحوي ترا البيت ممزور رياييل ...
_انشاء الله
خلود: ما ييت الفرقه..
خالوه مريم :-العصر يالله تبون شي
خوله: نبا سلطه و ماي..
خالوه مريم: ان شاء الله بنطرش لكن...
نهله: بتييبون فرقه !!
خوله : هي فارس يايب فرقة الحربيه هديه ل خليفه..
رديت اتطنز: يا حافظ ...
خلود: عيل كيف بنجوفهم!!بنتم قاعدات هني
خوله: بنروح فوق السطح بنطالع شو رايكم...
نوره: زين بعد خوله للحين شي حمام ..
خوله: لا وين زمان الحينه ماشي...




كنت بقولها تذكرين يوم فارس ضربني فوق...بس ما بغيت حد يضحك علي..قعدنا نتغدا كنا انسولف و نتفج منو ياخذنا باجر صالون دبي ...اندق باب الحجرة..
خوله: نوره حبيبتي فجي الباب اكيد امايه يايبه السلطه و الماي...
نشيت رايحه صوب الباب": من الحينه تتأمرين علينا...
خوله: ههههههه علني افداج بس انتي اجرب وحده للباب ..
فجيت الباب و انا ابتسمت بس بعدين غابت ملامح ويهيي و انا اطالع فارس ايمد اييده لي بصينيه السلطه و الماي...
فارس: شحالج نوره ....؟؟؟
طالعت خوله: تعالي خذي عن اخوج ...


و دشيت داخل صح ادري مب حلوه حركتي بس يا ناس انا ما اطيقه ولا احب اجوف ملامح ويهه او نظراته الشيطانيه اكرهه..نشت خوله و حسيتها منحرجه...بس طنشت و يلست اكل..
خوله: امايه ما عرفت اطرش غيرك...؟؟
فارس: ابرايه الغاليه..انا رايح ابدل و البس ...
خوله: عقبالك
فارس: تسلمين شحالكن خلود + نهله..
سمعت رد : خلود ابخير ...اما نهله سكتت طالعتها كانت متلومه..الله ياخذج هذي ويها لوووح ..طبعا ليش تستحي من عمرها الي سوته معاه سنين..يمكن يكون عندها شي عادي..الله يغربلها ...
صكرت خوله الباب : حركتج موليه مب شي نوره ..
رديت عليها من غير ما اطالعها: خليني اتغدا ..​
 
حلفت جان وحده علقت ع الموقف بجلب صينيه العيش فوق راسهن بس زين طلعن يحسن و تمينا ناكل ..بعد الغدا تمينا انسولف و نضحك.. و كل وحده شو بخاطرها كيف اتسوي تسريحاتها و من هالسوالف ...بعد ما صلينا العصر ..نشينا روحنا فوق السطح...نهله و خلود و خوله لبسن عبيهم و شيلتهم ..

احتياط عن حد يجوفهن بس انا تميت بشيلتي ..و فسخت العبايه ...بعد هالقاصر البس عبايه في بيت خالوه...المهم عفدنا فوق ..خذنا زاويه اذا وايقنا منها ما ننجاف..انصدمنا يوم جفنا الرياييل اشكثر...يلست ادور عمور بنظراتي..
خلود: طاعي محمد و حميد لابسين ثوب سوده..
خوله: وينهم أي صوب..
طالعت مكان ما اشرت خلود
نهله: معاهم سيف يسولف صح...
خلود: هي اعتقد..



الجهه الثانيه كان الرييايل منهم خالي احمد و خالي عبدالله و كذا ريال يستقبلون المعازيم... و الجهه الثانيه..جفت عمور و معاه ويه النحس فارس و محمد و حميد و سيف و خليفه كلهم لابسين كنادير سوده وبيدهم خيزرانه..عدا خليفه كان لابس كندوره بيضه و ابيده بشت اسود..
علقت: اونهم متفجين ع اللبس
خوله: حركه
الكل: هههههههههه
نهله:: المعرس وينه !!
خلود: يا ويلي ع المعرس...




يلسوا الرياييل يرزفون..و يدقون...لمحت جابر بس ما قلت خوله..حتى لو خبرتها شو يعني صارت خطيبة عمور..
بصوت واطي: خوله هناك جابر..
خوله: شو ابا فيه ..ما ابا اجوفه..
ابتسمت و استانست من رمستها ...جفت خالي احمد يرزف ويا الجماعه ...عقبها دش عمور
نوره: طاعوا عمور علني فداه يرزف فديتك و الله ....
خلود:جوفوا فارس قاعد يلعب بالسيف..

صج ابهرنا فارس الي كان يفر السيف فوق في العالي و يمسكه بسهوله..ابصراحه الكل التفت له.. شويه و شارركه سيف ريل نهله...خليفه قعد ع الكنبه الموجوده برع و كانوا يالسين حذاله رياييل توقعنا هذيل الناس المجربين ل خالي احمد و خالي عبدالله ...العرس كان وايد حلو..




و طوال فتره العصر كان عمور و حميد يرزفون..اما محمد يدش شويه و يطلع..الي كان اميز الحفل هذيلا الخمسه الي كانوا لابسين اللون الاسود...حميد كان اكثر واحد لايق عليه اللون لانه وايد ابيضاني...فكان وايد ملفت .....
خوله: وصلت الفرقه..
نوره: بعد شو يوم بأذن المغرب ..
خلود: طاعي نهله هذاك سعيد مزيود شكله وايد غير بالطبيعه
خوله: اصص لا اخبر عليج محمدوووه ...و انتي بعد بنخبر عليج سيف..
نهله: بس اليوم خوله هههههههه




هاه الحينه عرفت ليش قوم عمور اخوي لبسوا اللون الاسود لان الفرقه كانت لابسه ها اللون..اونهم يتحرون اعمارهم من الفرقه مالت عليكم...ضحكوني ابصراحه...نزلنا بعد ما اذان المغرب علشان انصلي و نرجع فوق...بعد ما طلعوا الرييايل من المسيد تيمعوا مره ثانيه منهم في الخيمه و منهم برع ..شويه و غنت الفرقة الحربيه ...و كان شي عجيب ابصراحه فن و ذوق و استعراض و اداء جميل...



اتمنيت اكون وحده مشاركه للفرقه لو قلت خوله هالرايي بتضحك علي...شي جميل ..الكل انبهر بهالاداء اتيمعوا المعازيم كلهم يطالعون..كانوا مسوين صفين..و شي اربعه ميودين ايد بعض امسوين دايره...و كذا واحد كانوا يولون جريب منهم ..صرخنا مستانسات..يوم جفنا عمور و حميد و محمدوووه و فارس سيف زاخين اييد بعض و قفوا بين الصفين..ابصراحه ما كانوا امبيين ان هذيلا مب من الفرقه ع العكس..كان ادائهم حلو...كانوا بقمة الابداع...زين زين هالحيوان فكر اييب الفرقه علشان يرتبشون شويه...عقبه وقفوا...
نوره: ليييييييييش خساره..
خوله: يمكن العشا..
طالعت فارس يحضن واحد و يبوسه.
اشرت: خوله منو ها الي قاعد يسلم ع فارس
خوله: هاه خاله الي ف بوظبي يحليله ياه العرس ...
خلود: هي خاله .. و معاه ولده اعتقد اسمه فيصل ..



خذه فارس صوب خالي احمد و سلموا ع بعض..و ضيفهم خالي احمد و يلسهم داخل الخيمه..تقريبا كلهم دشوا الخيمه علشان يتعشون.. و قوم عمور قاموا يدشون بيت خالوه مريم علشان ياخذون صواني العشى من الحريم...الله يعينهم قوم خالوه مريم و حريم الفريج غدا و عشى ..صج فقر .. و تعب ...بس مقابل ها ربشه ووناسه ...نزلنا تحت نتعشى ابسرعه ..



.من سمعنا ان الفرقه ردت اتغني..ربعنا فوق..عاد انا موعد رقادي بس نسيت الرراقد.. و انا اجوف الفرقه...تربشنا و اتونسنا...رزفت الفرقه كذا اغنيه..عقبها ردوا قوم عمور و دشوا..كل واحد بصوب يرزف..محمد دش بالصف..و عمور و حميد فارس تموا ب وسط الصف يرزفون...و سيف دش بالصف الثاني...
ابصراحه شي روعه ما ينوصف...متى بيعرس عمور.. و يصير جي بعرسه..طالعت ادور ع المعرس جفته يالس ابمكانه..من قد خليفه مستوي اليوم شيخ ...انت و يا هالبشت...رديت اطالع صوب الفرقه...جفت خالي احمد يسحب فارس.ويعطيه السيف اها يباه يلعب بالسيف...


حميد و عمور زخوا اييد و يلسوا يدورون ابمكانهم...بس ابصراحه ما كان ودي اقولكم لاني منقهره من داخلي بس فارس بعد ما يود السيف لفت الانظار.. قام يسوي حركات جميله...و كنا نشهق يوم يفر السيف فوق بالعالي و يزخه بكل سهوله...العرس كان بكل الوقت ربشه..دق و رزيف و يوله طوال الوقت ..

.عقبها طلعوا قوم عمور و راحوا صوب خليفه..الظاهر حسوا لدمهم.. انهم رازيين ويوهم في الفرقه..بس زادوها حلالا




طالعت الساعه كانت 11 و نص..معقوله مر الوقت من غير ما انحس..نزلنا..بغيت اروح البيت...زين خلود و نهله.. طلعوا من ورا البيت..لحقتهن لان سيارتي كان موقفه حذال بيت خالوه عايشه...اتصلت ب عمور ما رد علي..اتصل كذا مره ما يرد الهرم مخترش الحينه وين بفتكر فيني ...اتصلت ب حميد..
حميد: هلا و الله...

نوره: شو هالابداع احييك ابصراحه..
حميد: وين جفتينا !!
نوره: جفتك و خلاص...سكتوا ابصراحه
حميد: ههههههههه
نوره: امممممممم عمور جدامك..؟
حميد: هي..
نوره: امانه عطه كف ع ويهه
حميد:هههههههههه تبين تجلبين العرس ضرابه شوه..
نوره: اتصل به ما يرد علي السبال ..
سمعته يرمس عمور: وين تلفونك ...؟؟؟سمعت صوت عمور بالسياره ليش !!
رد علي: ف السياره موبايله..
نوره: عطني ارمسه زين..
عمور: هلا نوره حتى هني لاحقتني..
نوره: تستهبل امخلي موبايلك ف السياره..
عمور: وين انتي..؟؟
نوره: في بيت خالوه عايشه اباك اطلع سيارتي... و اتوصلني البيت..

عمور: الحينه !! مقدر تمي هني ارقدي..
نوره: لا تنكت ويا ها الكندوره السوده امصدق روحك من فرقه الحربيه ...
عمور:هههههههههههه جبببببببببببببببببببببب
نوره: ههههههههههه و الله
عمور: تتمدحين حميد و تطنزين علي...
نوره: زين تعال طلع سيارتي ...
عمور: بطرش لج حميد يالله..
كنت برد عليه بس سمعت صوت حميد: هلا نوره..
نوره: شو ها اللوث الي عندك...
حميد:ههههههههههه الله يعينج...خلاص انا بيي اطلع سيارتج زين ..ابوي
نوره: ما يخالف..جدامك خليفه..
حميد: تبينه
نوره: ابا ابارك له..
سمعت صوت خليفه: مرحبا
نوره: هلا و الله بالشيخ ...
خليفه:هههههههه و الله شكلي شيخ..
نوره: عييييييل مبروك بو زايد
خليفه: الله يبارك فيج ..عقبالج..
نوره: بعيد الشر
خليفه: شووووووو تعال حميد اسمع
نوره: لا ايه عن تفضحني
خليفه:ههههههه تبين حميد
نوره: مب لازم بس قوله اترياه ..علشان يطلع سيارتي انا في بيتهم..
خليفه: اوكى الشيخه
نوره: مع السلامه.




.ياه حميد و عطيته سويج سيارتي..طلع سيارتي من الزحمة الموجوده حذال بيت خالوه مريم و عايشه..عقبها ركبت سيارتي ..ولحقني يوصلني ..مشكور حميد من كل قلبي اشكرك يا ليتني احبك و اقتنع فيك عشان اتكون من نصيبي بس ادريبك اكبر لوتي ..مغازلجي عود..البنات يركضن بدمك ...علشان جي ادري اني ما برتاح معاك....اتنهدت..ضربت له هرن يوم نزلت من سيارتي رايحه الشقه ...مدري متى خلص عرس خليفه...اكيد شباب طول الليل دق و سهر...



اليوم الثاني..خذنا محمد ريل خلود دبي ..ف البدايه رفضت..بغيت عمور ياخذني علشان اخذ راحتي بس عمور ما رضى اونه تعبان ....سلمت امري لله و رحت مع خلود و محمد و طبعا نهله و خوله معانا ...
طلعنا ع الساعه عشر الصبح..تغدينا في الدرب.. و خلصنا ع العصر ردينا ع طول الصاله ابصراحه كان تعب و الله يعين و يعدي هاليوم ع خير ...ع قد ما كنا مستانسات ع قد ما كنا تعبنات..قمنا بالاستقبال بعد الساعه 8..استقبالنا الناس ..الكل كان يسالني عن ملجتي مع حميد..علشان جي قررت اني انهي موضوعي مع حميد خلال هالايام..بسس بعد ما اضمن خطبة عمور ع خوله رسميا ...​
 
العرس كان حلو و فرقه الطيران كانت روعه ربشه الحفل ...و الاروع شيما..كانت صج جميله..طلتها روعه..ابتسامتها العذبه..ابهرتنا ابصراحه...كنت اجوف بكل بنيه بالصاله تتمنى اتكون مكان شيما..حتى اتكون بجمالها و روعتها...

دش خليفه...ما شاء الله عليهم ثنائي...مدري حسيت هاليوم وايد يشبه خوله...صح انهم توم بس ما كان فيهم شبه وايد بس اليوم حسيت انه نسخه من خوله...خلود احلى عنهم ...لانه تشبه ابوها..مع ان فارس يشبه ابوه بس ما يبين اخوهم بالعكس كل شي غير عنهم حتى انه اجمل عنهم ...و الي يميز فارس.. عيونه يالله عليهن و الرمش ما عليهم كلام و جنها طلعت بس علشان تحمي جمال عيونه ..غير تقاسيم ويه مرات احسه يشبه عيال الشيوخ جماله و هيبته غير طوله جنه يبل شامخ و هالشي الي كان يخوفني منه يوم كنت صغيره...خلص العرس ابسرعه...كنت مصطله ع الاخر..حتى اني ما حسيت بعمري الا و انا راكبه سياره فارس ...




مع خوله الغبيه...طنشت و ما اهتميت منو بيوصلنا ...ع بالي محمد ريل خلود..لان خلود يلست جدام و انا خوله ورا
بس اتفاجات بنص الدرب يوم سمعت خلود اتقول: فارس جوف جسوم يطالعك...

فارس: ع باله ابوه...
بطلت عيوني حتى انا ع بالي ابو جسوم...قرصت خوله: انتي يا السباله..
خوله:هههههههه شو صحصحتي...
خلود: نوره راقده شوه هههههههه
صديت عنهم اطالع برع متى اوصل بيتي ...الله يغربلك يا عمور ...انقهرت يوم جسوم يصيح يبا فارس يشيله..
خوله: خلووووود عطيه ل فارس فكينا من حشرته ...
مالت يحليلك جسوم ما اتعرف منو يطلع خالك..جان تمنيت انك ما انولدت...
خوله: نوره ارقدي ف، بيتنا
رديت عليها: مينونه بايعه عمري ...
خلود: جي منوه بياكلج...
رديت متعمده: و الله نهايه الاسبوع يقولون وحوش تسكن في بيت ابوج..
خوله: هههههههه سخيييفه..الحينه فهمت قصدج...



الحمدلله طنش و ما علق ..يدري اني اقصده...خليه يولي ...اتذكرت خطبه خوله
ساسرتها: رديتي خبر ع خالي احمد..
خوله:بنفس النبره: لا ماشي وقت باجر ان شاء الله..
فارس: انا مب موافق...
رديت من غير تفكير : و انت شو يخصك...
خلود : ليش شو بلاه عمور ....؟؟
هز جتوفه: بس من غير ليش...
خوله : فارس !!!

حسيت بغيض الحينه انا من متى اخطط و اخرتها ها يخرب علي كل شي ...

رديت: مب كيفك..انت اصلا متى دريت عنهم غير الحينه...
فارس: انتي ما يخصج لا تدخلين...
خوله:بس لاه ..اسكتوا..فارس لا تصدمني كافي صدمات..
قهرني رد خوله: شو لا تقهرين..انت من صجج بتسمعين كلامه...اصلا هو ماله علاقه..مدري عمي كيف دخله في السالفه ...

خلود : غريب انك غيرت رايك..
فارس: ابوي ولا غيره تعنيني اختك ..و انتي لا تدخلين..
صرخت عليه: انت ما يخصك اطلع من حياتي ...
خوله: بس نوره لا اتحرجين جي...
وقف فارس السياره : انزلي من سيارتي يوم بتتعلمين الادب تعالي اركبي..



منو يتحرا عمرها..كان يتكلم ابرود..خلت الدم يفور في جسمي...ودي اكفخه باي شيء جريب مني...بس طنشته ع باله ما بنزل بيذلني ع هالتوصيله..كنت فج الباب زختني خوله..
بصوت خايف: نوره دخيلج ..فارس لا تستهبل عليها..
رديت عليها بتهديد: هديني
خلود: يسولف معاج نوره شفيج...؟؟
فارس و كانه يكتم ضحكته: لا انا ما اسولف..
خوله: بس فارس ...




فتحت باب السياره سمعته يقول: الله معاج...
صكرت الباب بكل قوتي ...تمنيت انه ينكسر...تحركت ادور تاكسي..بس لاحظت ان فارس تم واقف ابمكانه...شو يتحراني خوافه...شويه نزلت خوله تربع صوبي
يرتني: تعالي اركبي دخيلج لا اتسوين مشاكل..
سحبت ذراعي: هديني ما يخصج فيني ...
خوله بنبرة خوف: كيف بتركبين تاكسي و انتي جي
طالعتها: شو بلاني..متغشيه و ساتره روحي..
خوله: ما اقصد جي انتي تعرفين كم الساعه و يايه من عرس...مينونه..
نوره: اهون عليه من اركب ويا ها الخسف الي قاعد يسوق..
خوله شويه و بتصيح يوم جافتني أأشر ع تاكسي: نوره الله يخليج تعالي الله يخليج..
نوره: ما بركب قلتلج ما بركب سيارته انا مدري وين كان تفكيري يوم ركبت سيارة هالحثاله..."اشرت لتاكسي" ووقف جريب منا اتجدمت اركب..بس زختني خوله ..تترجاني..كنت بحط ريولي داخل التاكسي بس تفاجات فارس يايي صوبنا..و اشر لتاكسي يروح ...

حرجت عليه: منو امرك
فارس: تعالي ركبي السياره كنت اسولف يا الله كيف دمج حار
خوله: يالله قلتلج كان يسولف..
و انا ماشي كنت احاول اهدي نفسي بس مب رايمه اكرره و اكره حركاته...عاندته و سرت بخطوات بعيده ...
خوله: نوره بس عاد...
نوره:بتصل باخوي عمور اييني...
تم فارس واقف ابمكانه سمعت خوله اتقولي: نوره متى بييج عمور يالله تعالي اركبي ..
نوره: اسفه روحي خلي هالحثاله يوصلج شو تبين فيني..
فارس شكله طفر: تعالي خوله خليها تنقع ..
خوله متضايجه: فارس بس عاد اسكت عنها..انا ما اصدقت اهديها شويه...
فارس خذ نفس طويل: اوكى يالله هديها متى بتخلصون الفير ...؟؟؟
خوله: نوره اترجاجج و الله اترجاج اتيين تركبين السياره..
غمضتني خوله..فديتج و الله كنت بغير رايي بس جفت فارس يطالعني فعاندت..
خوله: دخيلج نوره !!
اتجتفت: بالاول خلي اخوج يعتذر لي ..
فارس: نعم ..عيل خوله تمي معاها هني انا رايح.."ومشى صوب سيارته"
وقف يوم زقرته خوله: فارس كيف اتخليني بالشارع بها الوقت ...
فارس: تعالي زين خليها ادق لاخوها يوصلها



يا كرهي لك الود ودي افسخ انعالي و اكفخه لي ما اتعب ...اتجدم منا ابصراحه خفت بس بعدين غلبني عنادي رفعت راسي بكل كبرياء و صديت الصوب الثاني ...
خوله: فارس لا اتزيد الطين بله كافي الي قاعد يصير ..
اتوقعت اييرني من مكاني و يعقني داخل السياره بس تفاجات يوم همس: انا اسف نوره
حسيت برجفه و كان هوا بارد لفحني..ما صدقت اذوني طالعته مستغربه...
خوله: يالله ارتحي يالله طوفي السياره..

يرتني خوله من غير ما اتكلم ولا كلمه و كاني مسحوره ....كنت بعالم ثاني ..همسة فارس و اعتذاره معقوله ها الحيوان ينزل مستواه و يعتذر لي..زين المهم غلبته و علشان يتادب...تمينا ساكتين لي ما وصلنا الشقه نزلت من غير ما اودعهم...ع طول من دخلت شقتي .اتغسلت و بدلت ملابسي لبست زلاغي و انخمدت ..ما ابا افكر بشي حتى بعرس خليفه و شيما ...فتحت عيوني ع صوت الاذان ..الفير نشيت سرت صوب حجرة عمور جفته راقد زين ياي من وقت...رحت اتيددد و اصلي و بعد ما خلصت قراية القران...رجعت ارقد حاولت اتجلب و اتجلب بس ما قدرت...خايفه ان فارس صج رفض عمور...لالا ما اظن يمكن كان يبا يغايضني ..

اسلوبه و بروده يدل ع ها الشي..يا كرهي لك..يا ويلك لو وقفت بويه خطوبه عمور و خوله صج ما برحمك...بالاول كان ممكن عمور ما يخطب خوله مب مشكله لكن بعد ما ابعدت جابر عن طريجها و حرمتها من نصيبها صار لازم و شي اساسي اعوضها لاني انا السبب ...




بعد يومين دش علي عمور طاير من الوناسه لان خالي احمد رد علبيه خبر بان خوله موافقه ...انا كنت اعرف قبله بس حبيت يتفاجا ابروحه ...كنت مرتاحه و فرحانه من الخاطر لاني جفت عمور مستانس..و طاير من الوناسه ...حضنته و بسته ابارك له ..
عمور: يالله عاد حميد حشرني يبا يملج ...
نوره: .................." ماشي رد"
عمور: هههههههه خالي احمد قال لو تبا تملج اليوم انا راضي..
نوره: هههههههههه
عمور: حميد كان موجود علشان جي تخبل ..يبا يملج هالخميس..
تروعت: شو هالخميس وايد جريب..
طالعني عمور بنظرات: شو جريب من متى انتي مخطوبه الحينه..يالله ملجي..انا جربت دورتي باخذ خوله معاي و بسافر..
عفدت صوبه: و انا بتخليني ل منوه ..
وقف بعد ما رن موبايله و ابتسم: ل حميد...ها متصل فيني ..شو اقوله الخميس !!خلاص..
رديت ابسرعه: لا لا شو الخميس خلاص..بالاول خليه ايي هني اتفج معاه..

هز عمور راسه: انتي اسميج بلوه الله يعينه ..
نوره:هههههههه خليه ايي ف ليل ..
عمور فج باب الشقه يبا يظهر و جنه بيرمس حميد برع: اوكى ما يهمج ...
يلست ع الكنبه و انا بموت من الصياح...عمور يبا ياخذ خوله برع و انا اتم هني...انا ما ابا حمييييييييييييد محد راضي يفهمني ليش ... ..ها سبب ثاني يخليني ارفض حميد علشان اروح مع عمور و خوله...ما ابا حميد..ركضت حجرتي اصيح...اتصلت ب خوله ...
خوله: هلا نوره شحالج..؟
رديت و انا امش دموعي: مضايجه...؟؟
خوله: شو فيج نوره قاعده تصيحين شوه ....؟؟؟
رديت عليها: ما ابا حميد ما اباه
خوله: ليش شو مستوي...؟؟
قلتها: عمور يباني املج هالخميس انتي بس اتعرفين موقفي شو اسوي
خوله: قلتلج من البدايه لا تلعبين بالنار ما سمعتي رمستي..
هاغبيه ما تدري انا ليش سويت كل ها علشانها و عشان عمور سكت ما رديت عليها..
خوله: شو تبيني اسوي لج نوره انا حاضره...



خفت لا تدخل خوله بالسالفه و تأثر ع خطبتها ل عمور علشان جي طلبت انها ما تدخل و صكرت بويها..انا اصلا ليش اصيح محد له حق يزوجني غصب ...نشيت اسوي لي شي اكله...عقبما صليت العشى..لبست و لبست الدبله...يلست اتاملها و اطالعها...شويه اتصل بي عمور ...
نوره: ها
عمور: شو ها لها الدرجه مرتبكه...
ما كان لي نفس ع ثجل دم عمور: شو تبا
عمور: حميد ترا بتعشى معانا ..
نوره: ها متفيج..
عمور: شو متفيج استحي ع ويهج يا الزطيه..
نوره: اففففففففففففف
عمور: ههههههههه كل البنات جي يرتبكون يوم يصيرون عرايس
نوره: هي جي شو تبا بعد...
عمور: ماشي خلج انتي يا الاميره...انا بييب عشى من المطعم..
نوره: احسن بعد..



وصكرت الخط ابويهه متفيج...قاعد ينكت .. و انا ابا افكر شو اقول ل حميد...و كيف افسخ خطبتي منه...يلست افكر لي ما دش عمور يقول لي حميد داخل ..ارتبكت..شويه ..و ليش ارتبك ..منو يطبع حميد علشان يربكني جي..شجعت عمري بها الكلمتين ...و طلعت من الحجره جفت حميد قاعد و محطي جدامه باقة ورد حمره يتني الضحكه شو يتحرا عمره ف فلم هندي..بس الريال كاشخ امصدق روحه ...
عمور: حيا الله ب حميد..
حميد: الله يحييييييك..شحالج نوره..
طالعت عمور و رديت عليه: بخير ...



نشيت رايحه المطبخ علشان اضيفه..عمور ويه لووح عادي ما يشرب الريال أي شي..سويت عصير كنت اسمع سوالفهم..كانوا يرمسون عن عرس خليفه..ما ملوا !!! لاحظت ان عمور ما ياب عشى بفضحنا هاه..زقرته..
عمور مبتسم: ها العروس شو تبين...؟؟
نوره: وين العشى !!
عمور:هههههههه تعشينا برع مع الشباب
نوره: و ما سويت حسابي
عمور :قلتي ما تبين !!
نوره: زين انجلع ويا ويهك..
عمور: شدي حيلج هاه...
ضربته و دزيته برع المطبخ...
عمور: ههههههههههه
طلعت من المطبخ عطيت حميد عصير و عطيت عمور ..شكل عمور مستانس اكثر عن حميد...يلست ..مجابله حميد و ع يساري عمور قاعد... و جفت باقة الورد محطوطه ع الطاوله ..شكلها حلو..طلع راعي ذوق حميدان
عمور: ها نوره ما قلتي متى تبين الملجه...؟ترا حميد مستعيل..
الله يغربلك يا عمور الرزه..يلست العب باصابعي مرتبكه اخ لو اطير بكس من هني ل ويه عمور ...
حميد: انا ما عندي أي وقت تبين..انا حاضر ...؟؟
عمور: بس الخطبه طولت ولا انت شو رايك...؟؟
حميد: ابرايه المهم نوره شو تبا ...
طالعني عمور: ها شو تبين...
وقفت..و اتجدمت من الطاوله و انا ارتجف..فسخت الدبله و حطيتها ع الباقه
و قلت بصوت مبحوح : انا غيرت رايي ما اباك حميد..​
 
.,؛"،‘((الحلقة السادسة عشر))‘،"؛,.

ربعت داخل حجرتي و قفلت ع الباب ادري عمور الحينه بلحقني و بكسر الباب ...يلست اصيح من الخاطر..حرام الي سويته بحميد..حرام بس شسوي ما اباه ...حسيت بلحظه هدوء..بس بعدين تروعت يوم حسيت عمور بكسر باب الحجره ع راسي /: افتحي الباب يا الحيوانه افتحي..
صرخت: ما ابا ..
عمور كان محرج: فتحي الباب ...اقولج و الله اكسره فضحتينا
يلست اصرخ باعلى صوتي: ما اباه انا ما ابا..مب ع كيفك تجبرني
رفس الباب عمور: فتحي الباب ...
نوره: ما بفتح ولا باعلى خيلك اركبه ...
عمور: ماعليه نوره انا اراويج و باجر باخذج المحكمه بسحبج من شعرج..
يلست اتنقز ابمكاني شرات المينونه و اضرب ويهي و اصرخ: ما ابا ما ابا ...



وطيحت عمري ع الشبريه..اول مره اصيح هالكثر ليش ما ادري..هل هو خوف من عمور.. او من الفضيحه.. او من شي ثاني مدري ...غلقت موبايلي ادري الكل بتصل بي يوم بتنتشر السالفه...حسيت بالبروده ...اتغطيت و انخمدت حسبت كل شي بمر بسهوله..بس الظاهر ان الموضوع بيصير عود و كبير ...



ايام كنت اتجنب عمور ما كنت اخليه يجوفني علشان ما يحتشر علي..اخر زمن صرت اخاف من عمور..المهم ..حتى بيت خالوه مريم و عايشه بقطعهم فتره لي ما ينسون شويه و ما اظن هالشي ينتسى...كانت خوله ادق كنت ما ارد عليها..اتوقعتها تنقز هني بس بعد ما ييت..يمكن تعرف ان حالتي النفسيه تعبانه ....وصلني مسج من حميد "ليش سويتي جي انا شو عيبي علشان ما تبيني" مسحت المسج..متفيج هاه ...كافي المشاكل الي بتصير ابسببك...فتحت باب شقتي هلكانه من التعب..اتفأجات عمور قاعد ع الكنبه و الظاهر كان يترياني و هذا اول لقاء بينا من بعد هذيج الليله ..طنشته كنت بسير داخل بس وقف بويهي حسيت بالرجفه..بكل جسمي..لحظه و انا ليش ارتجف عمور شو يخصه بحياتي انا ع كيفي اختار الي اختاره ...حياتي و انا حره فيها ...علشان جي طالعته بعناد..يرني و يلسني ع الكنبه بعصبيه ...شهقت بس مسكت روحي علشان ما ارد عليه ..
عمور: ليش سويتي جي...
نوره: شو سويت ..حرام الوحده اتغير رايها..
عمور و كانه ماسك اعصابه: زين ما تبين الريال خبريني و انا اقوله حق شو اتخليني اعزمه في بيتي و اهنيه بهاي الطريقه..
نوره: هذي حياتي و انا حره فيها..
صرخ علي: و هاي السوالف مب لعبان وقت ما تبين و قت ما ترفضين مب كيفج ...
رديت عليه و انا احاول احافظ ع هدوئي: خلاص انزين انتهت السالفه...
رد علي بعصبيه: منو قالج انتهت السالفه.. انا مب رايم اجابل خالوه عايشه بسببج شو اقولها ...
صرخت عليه: اوووووووه و انت شو يخصك..
رد علي و صرخ: شو شو يخصني ترا من نحاستي طلعتي اختي ف دنيا...
حرجت عليه: شو يعني ..انا مسوده ويهك...
رد علي بنفس الاسوب: عيل شو تتوقعين هاه ...تحسبين ممكن الي سويته ما يأثر ع خطبتي ع خوله...


طالعته مب مصدقتنه شو علاقه قوم خالوه مريم ب خالوه عايشه...
اتجدم مني و صك ع اسنانه: يا ويلج و الله يا ويلج اذا خالي احمد ..ردني..بتسودين ويهي جدام الناس..
صديت الصوب الثاني منحرجه: خالي احمد ما بسويها...
يلس عمور ع الكنبه و كانه تعب: حميد رد يكلمني يباج...
وقفت رايحه حجرتي: انا ما اباه...
دشيت حجرتي كنت بقفل الباب بس دزه عمور فرجعت لي ما وصلت شبريتي : مب كيفك تجبرني..
صرخ علي: امبلى كيفي و الاسبوع الياي بتملجين..
صرخت و انا اصيح: ما ابا ما ابا حميد...
رد علي بعصبيه: ليش ليش...ما تبينه عطيني سبب مقنع...؟؟
نوره: راعي بنات و مغازلجي عود...
عمور : هههههههه كل الشباب جي ...
رديت و انا اصيح ..: حميد غييير ...
رد عمور بعصبيه خوفتني: شو غير..الريال يباج مستعد يسوي أي شي علشان توافقين ..
يلست ع شبريتي انا ميته من الصياح: ما اباه ما اباه....ها ما عنده كرامه ...مب ريال..
اتجدم مني عمور و زخني من رقبتي..هذي اول مره بالتاريخ تستوي عمور يمد ايده علي .للحظه غمضت عيوني اليوم بنخمد ف القبر ..حاولت ابلع ريجي بس ما رمت..عمور زاخني بالقو...
غمضت عيوني و انا اصيح منوه بساعدني الحينه ...؟؟؟ يلست اضرب ايده علشان يفج عني ...بس و كاني اضرب صخر ماشي احساس ...
سمعته يقولي : بتزوجين حميد غصبن عنج..محد قالج اتوافقين..ع بالج محد وراج يوقفج عند حدج...و يلس يهزني يتزوجينه ولا لاء..



تميت ساكته مستحيل اوافق لو تموت ...تضربني علشان حميد..اكرررررررهك عمور..انت ما فيك خير... اموت اهون علي دام انك اتفضل علي اهلك تراضيهم و تبا تجتلني علشان ترضيهم..لو تموت ما برد عليك لا هي او لاء..تميت ساكته ...حسيت اني خلاص بموت...يلست اشاهق..هدني عمور و عقني ع الشبريه..حطيت ايدي ع رقبتي احاول اتنفس طبيعي يلست اصيح.. حيوان ما فيك ذرة رحمه ..
هددني: عندج اليوم بس اتردين علي بموافقتج ...بس اليوم ...




و طلع من حجرتي..اول مره اجوف عمور جي وحش..من غير تفكير..شليت شنطتي و سويج سيارتي.. وربعت تحت رايحه بيت خالوه مريم..مستحيل اتم مع هالخنزير لحظه وحده...بخبر عليه خالي احمد...يعله ما تزوج خوله..احسن خوله ما تستاهل هالاشكال..وصلت بيت خالوه مريم...دشيت..لهم و انا ميته من الصياح..تفاجأوا فيني داشه عليهم اصيح بصوت عالي...كانوا يتغدون...نقزو كلهم...خالي احمد و خالوه مريم و خوله...الحمدلله فارس محد..طحت ع الارض اصيح..منهاره للحظه حسيت ان محد لي بالدنيا غير...قوم خالوه مريم...حضنتني خالوه مريم :شو فيج نوره شو فيج...
طالعتها و انا اصيح: عمور يبا يجتلني..
جفت خوله اتصيح من جافت جي حالتي..
حاولت خالوه اتهديني يريت شيلتي اراويها رقبتي مكان زاخني عمور: جوفي شو سوا فيني يبا يخنقني...
حطت خوله ايدها ع حلجها يوم جافت رقبتي...
خالوه مريم: حسبي الله و نعم الوكيل..
خالي احمد: ليش سو فيج ليش يمد ايده عليج..
كملت و انا اصيح عاد منوه يسكتني يوم اصيح: يبا يزوجني غصب يباني اتزوج حميد غصب ...
هز راسه خالي احمد: لا حول ولا قوة الا بالله...
كملت كلامي و انا اتقطع من الصياح: انا مستحيل اتم معاه بجتلني بس علشان يرضي قوم خالوه عايشه..
خالوه مريم: لا حول ولا قوة الا بالله الزوواج بالغصب شوه ...
خالي احمد: مب من حقه...مريم خذي البنيه داخل شكلها تعبانه ...




يرتني خالوه مريم و ساعدتها خوله ..صوب حجرة خوله.. و رقدتني ع الشبريه..ياني احساس و شعور بالامان....طلعت خالوه مريم اترمس خالوه عايشه الظاهر السالفه كبرت ر.. و انا بييتي بيت خالوه مريم..عطيت السالفه حجم اكبر ...يلست معاي خوله..مب ناقصتنج انتي و نصايحج صخي عني...
سمعتها اتقولي: فديتج نوره..ما يسواج عمور..
يلست اصيح..مسحت دموعي و يلست تحضني ...اتصدقون اني رقدت!!! من متى انا ارقد الظهر...المهم اني رقدت.. ما حسيت الا خالوه مريم اتقومني..تباني اكل...كان وقت العصر ...حسيت ان مالي نفس ..بس من طاحت لقمه في حلجي يلست اكل و جني مب جايفه خير ...
سالت خالوه: وين خوله !!
خالوه مريم: راحت اتجوف خلود بيت خالتج.."سالتني" شو اتحسين الحينه اهون
هزيت راسي بمعنى هي: الحمدلله ارتحت...
خالوه مريم: ليش ما تبين حميد..؟؟
طالعتها فردت علي تضحك:هههههههه لا تحاتين ما بقنعج ولا بسوي فيج شرات ما سوا عمور بس بغيت اعرف السبب
جذبت عليها: حميد راعي سوالف و بنات..رغم ها وافقت عليه.. عقب من يومين جفته مواعد وحده يتجابل معاها قولي خالوه بذمتج الوحده بتقبل اتزوج واحد شرات حميد..
خالوه مريم: مسود الويه..انا الحينه بمنعج لو وافقتي عليه مثل هالشباب محد يأمن عليهم؟؟؟
سالتها: اخاف خالي احمد يغير رايه و يرد عمور عقب ما سوا فيني جي...
خالوه مريم:هههههههه لا ما بيرده بس رمس عمور و عطاه جم كلمه
استانست: شو قاله..
خالوه مريم: سمعته يفاتن عليه..و قاله مالك حق اتمد ايدك ع نوره دام انا و خالتك عاييشين..
نوره: دواه جان ضربه بعد..
خالوه مريم:هههههههههه
نوره: هو سوا كل ها علشان خاف ان قوم خالوه عايشه يلومونه و بعد خاف خالي احمد يرده..
خالوه مريم: اخوج تخبل شو يخص خطبتج ب خطبته..
شربت ماي: حيوان اساليه...




دشت علينا خوله...و اتفاجات ان خالوه عايشه معاها ...اتلومت منها بس سلمت علي..الظاهر ام لسان خوله خبرتها السالفه ...
خالوه عايشه: شحالج الحينه نوره..
هزيت راسي اوني تعبانه: الحمدلله احسن..
خالوه عايشه: اخوج تخبل من متى نحن نجبر بناتنا ع الزواج..
تميت ساكته..................."اوني تعبانه و احاول اعصر عيوني علشان اصيح بس مب راضيه الدمعه تنزل الله يغربلها"
خالوه عايشه: ما تبين حميد كل شي نصيب..لا ولدي يعيبه شي ولا انتي يعيبج شي ما فيها شي يمه..
حضنتها لان غمضتني و يلست اصيح هالمره صج: عمور بغى يجتلني..
خالوه عايشه: مسود ويه ما يستحي...
رديت عليها: متلوم منكم علشان جي حاول يجبرني..كنت بموت"ورديت اصيح"





حضتني خالوه عايشه اتخفف عني استانست كل شي انجلب لصالحي..ما غلطت يوم ييت بيت خالوه مريم..احسن خليهم كلهم يلومونه ...
خالوه عايشه: خلاص لا اتصيحين..انا قلتلج قبل انتي شرات بنتي... و اذا ما تبين حميد محد بغصبج عليه ...
طالعت خوله و ابتسمت لها..وردت لي الابتسامه ...مر هاليوم.. و قررت اني ارقد بيت خالوه مريم مالي خلق اروح الشقه..الحمدلله الحمدلله..ان خالوه عايشه اتفهمت موقفي و زين انها ما سالت ليش ما ابا ولدها..عاد ما فيني اجذب عليها شرات ما جذبت ع خالوه مريم...ع الفير طلعت من بيت خالوه مريم.ما حست فيني خوله كانت راقده ...سرت شقتي بدلت ملابسي.. و رحت الدوام..زين اني ما جفت ويه النحس هالخنزير ...




يلست ع مكتبي اقص كروت لناس..حاولت اشغل نفسي...مليت ..حسيت بالغصه..نوف تزوجت و راحت عني...تذكرت ان خوله هني تدرب بس بالطابق الرابع فوق...و ممنوع انها تظهر من القسم..فكرت اروح لها بس خفت اسوي لها مشاكل ....الشهر ياي حفلة تخرجها تستاهل ..الحمدلله الله وفقها بالتخرج و الخطبه من ها التعبان..خلص دوامي..اتصلت ب خوله اعزمها ع الغدا بالمنار..وافقت ...مريت عليها صوب قسم الطواري...
خوله: محد خليفه جان بيي معانا..
نوره: متى بردون ..من شهر العسل..
خوله: مدري يوم سالته امايه قال بعدنا بنتاخر...
نوره: وين هم راييحين...؟؟
خوله: ماليزيا ...شفيج ما تدرين..
نوره: بعد الموقف الي صار مع اخوج التيس نسيت كل شي عن عرس خليفه و ما حبيت اعرف شي..
خوله: الله يهداج انتي دوم اتحطين راسج براسه..
نوره: نعم .. لا تقعدين ادافعين عنه زين..انتي اكيد لاحظتي انه كان يستفزني..
خوله: زين خلاص غيري الموضوع..
نوره: شو تبين انسولف عن ها التيس التعبان..الثاني
خوله: هههههههههههههههه انجلبتي عليه..
نوره: يولي بس تدرين ما توقعت السالفه بتجلب لصالحي..حسبت خالوه عايشه بتقوم الدنيا و بتيلسها...
خوله: لا بالعكس انا ما توقعت لها جي..​
 
وصلنا المنار..بركنت السياره...طلبنا لنا غدا ..و تغدينا.. زين فاضي..و ماشي ناس وايد..
سالتها: متى بتملجين...؟؟
ردت علي: عند اخوج الجواب..
قلتها: تدرين هو سوا سالفته معاي لانه كان خايف ان ابوج يرده ..
خوله: بس رفضج ماله علاقه بخطبتنا...
نوره: روحي اسليه هالتعبان مدري كيف يفكر ..اكرررررهه
خوله: يمه منج يوم تتحولين شريره ...
نوره:هههههههه خفتي مني..
خوله: ادريبج انتي مستحيل اضريني
نوره: علني فداج..محد فاهمني غيرج ..
خوله: شكرا







خلصنا...وصلتها بيت خالوه مريم.. ورجعت بيتنا..دشيت الشقه يوم أذن العصر ...صليت.. بعد ما بدلت ملابسي...يلست في الصاله اطالع التلفزيون..زين غيرت جو احس نفسيتي تحسنت ابوايد...
و قبل ما ياذن المغرب دش عمور الشقه..سويت عمري مب مهتمه ...
جافني : ارتحي سويتي لي مشاكل و رديتي...
فريت الرموت من ايدي من غير ما اطالعه و رحت حجرتي بس الذبابه لحقني ...قلت بقول اطلع برع حجرتي بس طنشته ..
عمور: ليش سويتي جي..
طالعته باحتقار ما اتوب : ما يخصك فيني...اطلع من حجرتي
بس دش حجرتي و يلس ع الشبريه: و الله كل الي سويته علشانج...باجر انا بسافر منوه بتم معاج..
رديت عليه: علشان جي تبا اتلصقني باي واحد ..
اتنهد: مب انتي الي وافقتي عليه..
رديت بعناد: و غيرت رايي ..


نش من مكانه بصراحه خفت لا يضربني غمضت عيوني يوم رفع ايده بس فاجاني حضني و باسني ع راسي..
طالعته فقالي: انا اسف الظاهر البارحه مصختها معاج ...
ابتسمت له: بسافر معاك انت و خوله..
رد علي و كانه يتطنز علي: هي بتسافرين معاي ..






و طلع من حجرتي ..فريت بعمري ع الشبريه مستانسه ها الي انا اباه ...اتم معاك انت و خوله ...ضرب و لقيت و رمسه و حصلتها بس اخر شي حصلت الي اباه...شي ممتع و حلو..كل شي تبينه يتحقق بسهوله او بصعوبه...
بها اليوم كان تخرج خوله بس للاسف ما حضرته لاني كنت اعاني من الحمى..بس هي ما قصرت وصفت لي كل شي ع العموم باركت لها...و اتفاجات عمور يايب اسويره ذهب هديه ..ل خوله بمناسبة تخرجها..شي جميل ...سرت بيت خالوه مريم ...كان البيت فاضي كالعاده... بس خوله كانت موجوده..دشيت عليها بستها و باركت لها ع التخرج...
قلتها: غمضي عينج..
غمضت قدمت لها الهديه الي كانت امغلفه...مسكينه كانت اتحسب الهديه مني حضنتي و باستني...
و قالت لي: انتي اول وحده اتييبين لي هديه التخرج..
قلتها: افتحيها و قوليني شو رايج فيها ..
فتحتها ابسرعه و كانها خايفه ان الهديه اطير عنها ..شهقت يوم جافت الاسويره عيبتها ...حضنتي مره ثانيه
خوله: مشكوره مششششششششكوره نوره ..
نوره: ههههههههه مب انا ..
طالعتني خوله ضحكت عليها من نظرات ويها : هذي من عمور ..
خوله بصوت واطي: جذابه..
نوره: ههههههههههه قسم بالله ...
ضربتني ع جتفي و نشت من مكانها متلومه: حركتج بايخه..
حطيت ايدي ع بطني و انا ميته من الضحك..ههههه هههههه هههههههه هههههههههه
خوله: بس اسكتي ما يضحك لها الدرجه.
نوره: هديتي بعدها ما وصلت..تعالي بخبرج شو الهديه الثانيه !!
خوله: شوه !!
نوره: اليوم شوه...؟؟
خوله: الاربعاء..
شهقت: هي صح الاربعاء اخوج الحثاله هني..
ابتسمت لي : متفيجه انتي خبريني شو سالفتج..
نوره: بالاول هني..اخوج..؟؟
خوله: هزت راسها لا مب هني رايح مطار راس دبي اييب خليفه و شيما..
انصدمت: خليفه ياي اليوم..
خوله: ما تدرين شو..
حرجت عليها: محد قالي .. زين المهم باجر عمور بيي و بييييييييب المهر يا ويلي خوله اخيرا بتكونين حرم عمر ال.......
خوله: قولي و الله بها السرعه
نوره: أي سرعه من شهر انتي مخطوبه اممممممم لا يكون بسوين سواتي و بتغييرين رايج و الله اجتلج..
خوله: لا طبعا ما بسويها شو تتحرين شراتج..
نوره: هي ع بالي...المهم خوله من يكون عندج المهر خبريني علشان نطلع نتسوق
خوله:ليش !!
نوره: شو ليش ما تبين تزهبين و بعدين بنسافر مع عمور بالخارج..
صرخت خوله مستانسه: بتسافرين معانا ..
نوره: عيل بتم مع منوه..
حضنتي خوله : موليه ما بنفترق انا و انتي ...



حسيت ان خوله مستانسه و مرتاحه الله يديم عليج..حتى انا كنت احس بنفس شعورها..فكرت اتم لي ما يوصلون قوم خليفه..بس غيرت رايي لان فارس بيكون موجود...رجعت شقتي ..ع اذان المغرب ..جفت عمور يترياني ...
نوره: خير !!
عمور: عطيتها الهديه..
ابتسمت له: هي استانست وايد
عمور: عيبتها؟؟
نوره: وايد..تدري ان خليفه اليوم بيرجع من السفر ..
عمور: هي علشان جي قلت باجر بنحدد الملجه بوجود خليفه بعد اخوها ما يستوي
سالته: متى ناوي تملج ...؟؟
عمور: عادي بعد اسبوع لاني بسافر بعد شهر..
شهقت: شهر سبعه عرس نهله ...
عمور: ليش خوله تبا صاله و ها السوالف بعد..
حطيت ايدي بخصري: طبعا ليش هي غير عن باجي البنات ..
عمور: مدري بس انا حطيت في بالي حفله صغيره عقبها نسافر ..
اتجدمت منه مستانسه: بروح معاكم..
عمورابرود: هي ..بروح اسلم ع خليفه هم ع وصول بتيين..
نوره: لا باجر بروح لهم او يوم الجمعه ...
عمور: زين في أمان الله..





الحينه عرفت ليش عمور فكر بخوله..ع باله خوله امطلقه و اكيد ما بتطلب قاعه و ها السوالف.. و بجذا بسافر برع..كل شي امخطط له و امسوي حسابه..علشان جي بغا يجتلني هاك اليوم خربت عليه خططه..يا عيني يبا ياخذ راحته مع خوله برع و انا اتم هني ..لا حبيبي لا زين اني رفضت حميد بالوقت المناسب..زين بعد بالمره ما بنحضر عرس نهله عادي عندي اتولي و ما اتهمني ...



اتحددن ملجة خوله..و بتكون بعد اسبوعين..خلال هالاسبوعين لازم انقوم نشتري اغراض حق السفر انا ما بشتري وايد اشياء..بس خوله لازم تزهب لانها عروس ... و كان خوله و عمور متفجين ..ما بغت خوله أي عرس باي قاعه..حتى عمور بغى حفله صغيرونه بس هي رفضت..بس اخيرا اقتنعت بحفله عائليه.. و عقبها يسافرون...يعني ما بقى لنا غير شهر اسبوعين نتزهب فيه .. و اسبوعين نقعد في الدار عقبها بنسافر بدايه الصيف..حسيت ان حياتي بتتغير ...




اتفجت مع خوله ان نبدا من يوم الجمعه نتشري اغراضنا حق السفر ...علشان جي مريت قوم بيت خالوه مريم ..سلمت علي خالوه مريم و عايشه كانت هناك موجوده ...تمنيت اجوف نهله كيف حالتها متالمه ولا غيرانه ولا صار عمور بالنسبه لها ماضي..بس اتولي ما ابا اضيع وقتي بهالتفاهات ... ورانا سفره ..
طلعنا من بيت خالوه مريم... و اتفاجات فارس بويهنا..
خوله اترمسه : ها بتروح الحينه ..
طنشت و ركبت سيارتي..ما سمعت رده يزول اخيرا عمور بعد بفتك من هالشيفه ..شويه و ركبت خوله سيارتي ..
خوله: يسلم عليج..
شغلت سيارتي: الله لا يسلمه...
خوله: حرام عليج..
نوره: خوله خلينا مشيتنا حلوه لا اتخربين علينا
خوله: هههههههه ان شاء الله وين بنروح..
نوره: شو رايج نبدا بسوق راس الخيمه..
خوله: اوكي يالله ..
نوره: شو بتشترين..
خوله: ما حطيت في بالي بس ما بكثر ..لاني بنشتري في لندن بعد..
نوره: هي عمور ما قالج كم بنتم هناك...؟؟
خوله: مدري ابوي قالي سنه و نص او سنتين مدري..
نوره: شي زين بنغير جو ..




انشغلت بالايام الي مرت بالسوق تقريبا كنا نطلع يوميا نشتري حق السفر... ومرات كانت خلود اتيي معانا و مرات خالوه مريم... حطينا في بالنا ان خلاص ما بنحظر عرس نهله...علشان جي ما اشترينا فستان ولا شي..
مر اسبوع..و حيانتا كانت كل في الاسواق...و قبل الملجه باربعة تيام ...كنت طالعه من بيت خالوه مريم.. و قبل ما اركب سيارتي جفت حميد ياي صوبي هذي اول مره اجوفه بعد ما فسخت خطوبتي منه ...
نزلت دريشه سيارتي: مرحبا الساع
طالعنا بنظرات مب مفهومه: شحالج نوره ..؟؟
نوره: بخير..
حميد: ما شاء الله باين عليج مرتاحه ...
ابتسمت له: الحمدلله ...شخبارك..
حميد: الحمدلله يسرج الحال...وينج ما قمتي تنجافين من بعد ما رفضتيني..
ما عرفت شو ارد عليه : اممممم مدري انشغلت بخطبه عمور..
حميد: زين مب من حقي اعرف ليش رفضتيني..
نوره: توك تفيجيت تسال عن السبب
حميد: تدرين كل ما اسوي لج ما اتردين علي ...و الحينه جفتج بالصدفه ..
عاد شو اخبره السبب خلاص صار كل الي صار بعد جم يوم ملجة عمور و خوله..يعني ما بخسر شي لو خبرت حميد ..المفروض يفهمها بس طلع غبي ..
حميد: اظن من حقي اعرف ..
نوره: حميدان حسبتك يوم برفضك بتعرف شو كانت نواياي بس انت طلعت مب ذكي..
حميد: يعني وافقتي علشان مصلحتج بس..
هزيت راسي: طبعا.. ولا انا مينونه اربط نفسي ب واحد لوتي
جفت غضب بعيونه بس قال لي: وافقت ع شرطتج مقابل انج توافقين علي..
ابتسمت له استفزه: كل الي اتمناه ان عمور يتزوج خوله و تزوجها .. و انت موليه ما تعنيني بغيتك بس علشان اتساعد انك تبعد عمور عن نهله...و الحينه مالي حايه فيك...يسعد مساك حميدان





كان برد علي بس ما عطيته فرصه حركت سيارتي ضحكت ابصوت عالي.ههههههههه.ما يهمني عرف ولا ما عرف حميدان ما يقدر يسوي شي يمنع ملجه عمور و خوله..
.ضحكت ابصوت عالي حسيت اني انسانه جاسيه..بالاول ع خوله و عقب عمور و نهله و الحينه حميد...حلو اتعذبين القلوب بس حرام..ما عليه باجر حميد بنسى ...دشيت شقتي و انا طايره من الوناسه ..يلست اترقص احس من كلمت حميد كل شي غامض انتهى من حياتي..يلست ادور في الصاله ..فريت الشنطه.. و يلست ع الكنبه اضحك بصوت عالي و انا اتخيل شكل حميد ..
.يوم اخبره انه غبي .. دشيت حجرتي ..ارتب اغراضي الي شريتها في شنطه السفر..صح باجي اسبوعين ع السفر..بس علشان اخلص روحي .صكرت الشنطه و بستها..طلعت من حجرتي رايحه الصاله ...سمعت صوت مفاتيح..شويه دش عمور عفدت صوبه اخبره اني شرينا كل شي انا خوله..بس ملامح ويه ذكرتني بيوم ملجة نهله ...لا يكون زعلان لان نهله بتعرس جريب يسويها ترا لوتي بعد عمور..


اتجدمت منه: شو بلاك عمور..
يلس ع الكنبه و حط ايدينه بين راسه و كانه في مصيبه خوفتني حركته وايد..
يلست ع الارض جريبه منه: شو بلاك ...؟؟ زعلان ع عرس نهله ...؟؟
هز راسه بمعنى لا ..
سالته: ما تبا خوله غيرت رايك..
نش من مكانه و راح صوب الدريشه و اتساند هناك: سكتي نوره لا تسالين وايد..
شهقت: يعني ما تباك خوله..
عمور: خوله ما يخصها.. و مالها علاقه بالموضوع..
اتجدمت منه: حميد قالك شي ..
رد بعصبيه: لا لا مب حميد ولا نهله و لا خوله..
خفت اكثر يوم رد علي بها الاسلوب : شو مستوي عمور شو السالفه ..
رد علي و هو رايح حجرته: ماشي مشكله اتخصني ...
لحقته : قول لي شسالفه..
رد علي: انتي ما بتسوين لي شي..
حسيت بالغبنه: ليش تدري اني افديك بحياتي بس خبرني شو مستوي..ع الاقل قول لي منو بالسالفه ...
سكت هزيته اترجاه: احلف لك اني ما بخبر حد بس قول لي
همس :ماشي ..​
 
حسيت انه شويه و بيصيح اكيد شي مستوي و شي جايد بعد يلست حذاله: ما احب اجوفك جي عمور ...؟؟
عمور: نوره خليني ابروحي افكر..لو خبرتج ما بتسوين شي..ولا بتوقفين معاي انتي ما تحبين الا نفسج..
صرخت عليه: انت تحاول تستفزني ..انا ما احب الا نفسي و كل الي سويته علشانك..
طالعني: لا اتصرخين ..اقولج مشكله خاصه فيني و ابروحي بحلها..
زخيت ايده: ممكن اتاثر بملجتك من خوله..
هز راسه بمعنى نعم...
شهقت و حطيت ايدي بحلجي عيل حميد قاله شي..هزيته: حميد شو قالك انطق..
نش من مكانه: اوووووه اقولج حميد ماله علاقه..
سرت صوبه : عيل منووووووه ..و شو علاقه خطوبتك ب خوله شوه ...؟؟
عمور : ماشي نوره ظهري برع ..
صحت من الخاطر: ما بروح من حقي اعرف دام السالفه ممكن اتمس خوله..والله اني بساعدك احلفلك بس لا اتهد خوله ..
عمور: زين لا اتصيحين...نفسي اعرف انتي ليش هامتنج سالفه اني اخطب خوله..
شو اقوله لاني فرقتها عن جابر.. و اني ما اباك تاخذ نهله شو اقوله ها الحينه ...
قلته: لاني احبها و اباها اتكون جريبه مني..
تنهد عمور: شو اقول حق خالي احمد..شو اقول نوره...
حسيت الدنيا ادور فيني يوم سمعت جملته الاخيره: شو السالفه عمور
سكت ماشي رد منه..................
نوره: قلتلك بساعدك..
عمور: ما بتساعديني..
نوره: ليش انت اخوي الوحيد لازم اساعدك قول لي بس منو مسوي فيك كل ها قول لي ..
عمور: ما بتصدقين..
اتجدمت منه: خبرني كل شي وانا مستعده اسمعك لنهايه بس منو مسوي فيك جي اعرفه..؟؟
هز راسه بمعنى نعم..
همست و احس هالليله ما بتعدي ع الخير مع اني كنت مستانسه من شويه ...
حضنت ايدي بصدري و سالته: منوه ...؟؟
همس عمور: فارس ..​
 
عودة
أعلى